Lokwenta Simdzinge Nkulunkulu

Tati tekusebenta kwengcondvo titsi kuze bantfu bajabule mbamba, badzinga lokutsite lokungetulu kwetidzingo tabo tenyama. Loku siyakubona ngobe bantfu bavame kufuna kwenta tintfo letibenta bative banenjongo nobe bafune kutsi kube nalotsite nobe lokutsite labakutsatsa njengalokungetulu kunabo. Kuze benetise lesidzingo, labanye bacitsa sikhatsi sabo sekutijabulisa banake indalo, tintfo tebuciko, umculo kanye nalokunye lokunyenti. Kodvwa labanyenti abayitfoli injabulo sibili nobe lehlala njalo ngekwenta letintfo.

Liciniso lekutsi umuntfu utalwa anesidzingo sekwati Nkulunkulu alibamangalisi bantfu labafundza liBhayibheli. Tehluko tekucala tencwadzi yaGenesisi tiveta kutsi ngemuva kwekudala bantfu lababili bekucala, Nkulunkulu abekhuluma nabo njalo kute bakwati kuba nebuhlobo naye. (Genesisi 3:8-10) Akazange adale bantfu kutsi batiphilele ngaphandle kwakhe; bayakudzinga kukhulumisana naye njengeMenti wabo. LiBhayibheli likhuluma kanyenti ngalesidzingo bantfu labanaso.

Sibonelo saloko kutsi Jesu watsi: “Bayajabula labo labanakisisa tintfo letiphatselene naNkulunkulu.” (Matewu 5:3) Ngekusho kwalamavi, singase siphetse ngekutsi lenye yetintfo letibalulekile kuze sikwati kuphila imphilo lejabulisako naleyenetisako, kutsi senetise sifiso lesitalwa sinaso sekwati Nkulunkulu. Singakwenta njani loko? Jesu waveta imphendvulo ngesikhatsi atsi: “Umuntfu ngeke aphile ngesinkhwa sodvwa, kodvwa ngawo onkhe emavi laphuma emlonyeni waJehova.” (Matewu 4:4) Emavi aNkulunkulu, lokuyimicabango yakhe neticondziso takhe letiseBhayibhelini, angasisita njani kutsi siphile imphilo lejabulisako nalenenjongo? Ase sicabange ngetindlela letintsatfu letibalulekile tekwenta loko.

Lamuhla, kunebantfu labanyenti labanemakhono netati letinyenti letihlale tikulungele kusinika ticondziso mayelana nebudlelwane nalabanye, telutsandvo, kuphila kwemndeni, kulungisa kungevani, kujabula kanye nekutfola injongo ekuphileni. Kodvwa-ke, ukhona yini lokufanela kakhulu kusinika sicondziso lesiphilile nalesicatjangwe kahle mayelana naletintfo, ngaphandle kweMenti wetfu, Jehova Nkulunkulu?

Nasi sibonelo: Nawutsenga umshini lomusha, njengemshini wekutsebula titfombe nobe ngcondvomshini, usuke ulindzele kutsi ufike uhambisana nencwadzi yeticondziso nobe incwadzi lechaza indlela yekuwusebentisa kahle futsi wenetiseke ngawo. LiBhayibheli lingafaniswa nencwadzi lenjalo. Liyincwadzi yeticondziso lemayelana nekuphila kwebantfu, Nkulunkulu, longumenti wekuphila layentele kutsi bayisebentise. “Lencwadzi yeticondziso” ichaza kutsi kuphila kudalelwe yiphi injongo nekutsi kufanele kusetjentiswe njani kuze kube nemiphumela lemihle.

Njenganobe nguyiphi incwadzi yeticondziso lebhalwe kahle, liBhayibheli lecwayisa bafundzi balo mayelana nemikhuba lengalimata kuphila kwabo. Teluleko nobe imibono lejubelako lesingayiniketwa ngulabanye bantfu ingase ibonakale itsandzeka futsi isebentiseka melula, kodvwa akusiko yini kuhlakanipha kucabanga ngekutsi sitawutfola imiphumela lemihle kakhulu futsi sibalekele tinkinga nangabe silandzela ticondziso teMenti wetfu?

Nanobe Jehova Nkulunkulu asiniketa ticondziso nemiyalo, akasiphoceleli kutsi siyemukele. Esikhundleni saloko, njengobe asitsandza futsi afuna kusisita, usincenga ngemusa atsi: “NginguSimakadze Nkulunkulu wenu, longuyena anifundzisa kutsi ngukuphi lokuncono kunako konkhe kini, lonilayela indlela lekufanele nihambe ngayo. Kube mane naniyilalela imiyalo yami, kuthula nenhlalakahle yenu ngabe kunjengemifula, kulunga kwenu kube njengemagagasi elwandle.” (Isaya 48:17, 18) Ngalamafisha, nangabe silalela sicondziso saNkulunkulu, sitawuphila kahle. Singaphindze sikubeke ngalendlela: Kuze siphile kahle futsi sijabule, siyamdzinga Nkulunkulu.

Labanye bantfu babona shengatsi abamdzingi Nkulunkulu ngobe babona tintfo letinyenti letibakhatsatako ekuphileni letingahambisani nekukholelwa kutsi kunaNkulunkulu lonelutsandvo. Sibonelo saloko kutsi bangatibuta imibuto lenjengalena: ‘Kungani bantfu labalungile bahlupheka?’ ‘Yini lebangela kutsi labanye bantfwana batalwe bakhubatekile nanobe bete licala?’ ‘Yini leyenta kutsi ekuphileni kwenteke tintfo letingakalungi?’ Lemibuto ibaluleke kakhulu futsi kutfola timphendvulo tayo letenetisako kungakutsintsa kakhulu kuphila kwetfu. Kunekutsi sisheshe sisole Nkulunkulu ngetinkinga letinjalo, ase sihlole kutsi liVi laKhe liBhayibheli lisikhanyisela njani kulendzaba.

Esehlukweni sesitsatfu sencwadzi yaGenesisi, sitfola indzaba lemayelana naSathane lowasebentisa inyoka kute etame kwenta bo-Adamu na-Eva bephule umyalo waJehova Nkulunkulu wekutsi bangasidli sitselo sesihlahla sekwati lokulungile nalokungakalungi. Sathane watsi ku-Eva: “Ningeke nife. Kepha Nkulunkulu uyati kutsi mhlazana nisidla, emehlo enu ayawuvuleka, bese nifanana naNkulunkulu nikwati lokuhle nalokubi.”—Genesisi 2:16, 17; 3:4, 5.

Ngalamavi, Sathane bekangasho nje kuphela kutsi Nkulunkulu ungumcambimanga, kodvwa abephindze atsi Nkulunkulu ubusa ngendlela lengakalungi. Develi watsi nangabe bantfu bangalalela yena, tintfo betitabahambela kahle kakhulu. Lensayeya lebeyiphakanyiswa nguSathane beyingalungiswa njani? Jehova wakhetsa kutsi kwendlule sikhatsi lesitsite kuze tonkhe tidalwa takhe titibonele kutsi letinsolo letashiwo nguSathane betiliciniso yini nobe betingemanga. Ecinisweni ngekwenta njalo, Nkulunkulu abeniketa Sathane kanye nalabo labebamsekela litfuba lekukhombisa kutsi umuntfu angaphila yini ngaphandle kwaNkulunkulu.

Ucabanga kutsi tiliciniso yini letinsolo taSathane? Bangaphila yini kahle bantfu futsi batibuse ngemphumelelo ngaphandle kwaNkulunkulu? Kuhlupheka, kubabete kulunga, kugula, kufa, bugebengu, kuhhohloka kwekutiphatsa, timphi, kubulawa kwesive lesitsite kuze sicedvwe kanye naletinye tento telunya lebetisolo ticindzetela bantfu emakhulu eminyaka, akungabateki kutsi tibufakazi bekutsi imetamo yemuntfu yekutibusa ngaphandle kwaNkulunkulu yehluleke kakhulu. Kunekutsi lisole Nkulunkulu ngekutsi nguye lobangela tinhlekelele tebantfu, liBhayibheli lembula sizatfu lesiyinhloko sekuhlupheka kwabo, litsi: “Umuntfu ubuse umuntfu, kwaba kulimala kwakhe.”—Umshumayeli 8:9, NW.

Ngesizatfu saloko, akusicaceli yini kutsi kufanele siye kuNkulunkulu hhayi nje kuphela kuze sitfole timphendvulo temibuto lekhatsata bantfu, kodvwa kuze sitfole neticatululo tayo? Yini Nkulunkulu latayenta?

Bantfu bebasolo bafuna kukhululeka ekuguleni, ekugugeni kanye nasekufeni. Basebentise sikhatsi lesinyenti, emandla kanye netintfo labanato kuze batfole lenkhululeko, kodvwa batfole imphumelelo lencane nobe bangayitfoli sanhlobo. Labanye bebanelitsemba lekutfola inkhululeko lenjalo emitsini lokutsiwa nawuyinatsa awufi, echibini lokutsiwa nawubhukushe kulo ushintja ube musha, nasepharadisi leliyinganekwane (Shangri-la) kanye nakuletinye tintfo letifana naleti. Tonkhe letintfo letingemaphupho tibajabhisile bantfu.

Nkulunkulu ufuna kutsi bantfu baphile kahle futsi bajabule. Lena bekuyinjongo yakhe yasekucaleni ngesikhatsi adala bantfu, futsi akakayikhohlwa. (Genesisi 1:27, 28; Isaya 45:18) Jehova Nkulunkulu usicinisekisa ngekutsi konkhe lafuna kukwenta utawukwenta nakanjani. (Isaya 55:10, 11) LiBhayibheli lisitjela ngesetsembiso saNkulunkulu sekubuyisela liPharadisi lelalahlwa bantfu bekucala. Encwadzini yekugcina yeliBhayibheli, sitfola emavi latsi: “[Jehova Nkulunkulu] utawesula tonkhe tinyembeti emehlweni abo, kufa ngeke kusaba khona, nekulila, nekukhala kanye nebuhlungu, ngeke kusaba khona. Tintfo letindzala setendlulile.” (Sembulo 21:4) Nkulunkulu utatiletsa njani letintfo letimangalisako, futsi singazuza njani kulesetsembiso?

Jesu Khristu, iNdvodzana yaNkulunkulu wafundzisa balandzeli bakhe kutsi bathantazele kutsi intsandvo yaNkulunkulu yentiwe. Bantfu labanyenti bayawati lomthantazo lokuvame kutsiwa nguMthantazo weNkhosi, futsi labanye bahlale bawuthantaza. Lomthantazo utsi: “Babe wetfu losezulwini, alingcweliswe libito lakho. UMbuso wakho awute. Intsandvo yakho ayentiwe emhlabeni njengasezulwini.” (Matewu 6:9, 10) Jehova Nkulunkulu utawusebentisa uMbuso wakhe kuze acedze tonkhe tinhlekelele letibangelwa kubusa kwemuntfu, bese uletsa umhlaba lomusha lonekulunga lawetsembisile.a (Danyela 2:44; 2 Phetro 3:13) Yini lokufanele siyente kute sizuze esetsembisweni saNkulunkulu?

Jesu Khristu washo naku lokumelula lokufanele sikwente: “Kukwati wena lokuphela kwaNkulunkulu weliciniso naloyo lowamtfuma, lokunguJesu Khristu, kuholela ekuphileni lokuphakadze.” (Johane 17:3) Ngelusito lwaNkulunkulu, singakutfola kuphila lokungapheli lokutawuba khona emhlabeni lomusha lowetsenjisiwe. Lesetsembiso singakucinisekisa nangalesinye sizatfu lesingakwenta uwuphendvule ngayebo umbuto lotsi: Siyamdzinga yini Nkulunkulu?

Eminyakeni letinkhulungwane letimbili leyendlulile, ngesikhatsi ase-Ariyophagusi nobe eMars Hill, e-Athene, umphostoli Pawula wakhuluma ngaNkulunkulu kubantfu base-Athene lebebanembono lovulekile, watsi: “Yena unika bonkhe bantfu kuphila, umoya, nato tonkhe tintfo. Ngaye siyaphila, siyanyakata, futsi sikhona, njengobe nje letinye timbongi tenu tisho titsi: ‘Ngobe siyintalo yakhe.’”—Imisebenti 17:25, 28.

Loko Pawula lakutjela bantfu base-Athene kuseliciniso nalamuhla. UMdali wetfu usinika umoya lesiwuphefumulako, kudla lesikudlako kanye nemanti lesiwanatsako. Ecinisweni, angeke siphile ngaphandle kwetintfo letinhle Jehova lasinike tona. Kungani Nkulunkulu achubeka anika bonkhe bantfu tintfo letinjalo, ngisho nobe bamnaka nobe bangamnaki? Pawula washo sizatfu saloko nakatsi: “Kute bafune Nkulunkulu ngekutimisela futsi bamtfole, nanobe ecinisweni angekho khashane kuloyo naloyo kitsi.”—Imisebenti 17:27.

Uyafuna yini kumati kahle Nkulunkulu, lokusho kufundza kabanti ngetinjongo takhe kanye neteluleko takhe tekuphila kahle, nyalo naphakadze? Nangabe kunjalo, sicela kutsi ukhulume nemuntfu lokunike lomagazini nobe utsintsane nebashicileli bawo. Batakujabulela kakhulu kukusita.