LiBhayibheli Lelibhalwe Ngelulwimi Lolukhulunywa Lamuhla

“NANGABE ukholelwa kutsi liBhayibheli lilivi laNkulunkulu lelentelwe bantfu, kusho kutsi Nkulunkulu ukhuluma natsi. . . . Nangabe inkholo yakho itsintsa konkhe kuphila kwakho, kusho kutsi [leliBhayibheli] libhalwe ngelulwimi lolukhulunywa lamuhla.” Lamavi abhalwa sati lesingu-Alan Duthie, encwadzini yaso letsi “Bible Translations: And How to Choose Between Them.”

Bantfu labatsandza liVi laNkulunkulu bayavumelana nalamavi langenhla. Bakholelwa ngalokucinile kutsi “yonkhe imiBhalo iphefumulelwe nguNkulunkulu, ilusito ekufundziseni, ekukhalimeni, ekulungiseni, nasekuyaleni ngekulunga.” (2 Thimothi 3:16) LiBhayibheli alisiyo nje incwadzi lendzala yenkholo lenetintfo letingakabaluleki. “Liyaphila, linemandla,” futsi lineticatululo letisebentako tekulungisa tinkinga tamalanga onkhe. (Hebheru 4:12) Nanobe kunjalo, kuze lencwadzi lengcwele icondzakale futsi isetjentiswe ngulabo labayifundzako, kufanele ibhalwe ngelulwimi lolukhulunywa lamuhla. Angitsi nemibhalo leyatiwa ngekutsi liThestamente Lelisha, ayizange ibhalwe ngesiGriki sakadzeni lebesisetjentiswa tati tefilosofi letinjengaPlato, kodvwa beyibhalwe ngesiGriki lesetayelekile lebesikhulunywa malanga onkhe, lesibitwa ngekutsi yi-Koine. Kuyacaca kutsi liBhayibheli labhalelwa kutsi bantfu labavamile bakwati kulifundza futsi balicondze.

Kute kube ngulamuhla, bekusolo kwentiwa emahumusho lamanyenti lahunyushelwe etilwimini letehlukahlukene. Imiphumela yaloko ibe mihle kakhulu. Kwentiwe kwaba melula kutsi liBhayibheli litfolwe ngibo bonkhe bantfu. Nanobe kunjalo, lamanyenti kulamahumusho lamasha ayehluleka kakhulu nakutiwa endzabeni yekuhumusha ngendlela lengiyo nalengagucugucuki. Sibonelo saloko kutsi lamanye ayatifihla timfundziso teliBhayibheli leticacile letinjengesimo salabafile, kutsi uyini umphefumulo kanye nekutsi lingubani libito laNkulunkulu weliciniso.

Ngako, nine bantfu labatsandza liVi laNkulunkulu niyakujabulela kukhululwa kwe-Lihumusho Lemhlaba Lomusha LemiBhalo YemaKhristu YesiGriki ngelulwimi lwesiSwati. BoFakazi BaJehova bamemetele kukhululwa kwalelihumusho lelibhalwe ngelulwimi lwalamuhla nga-September 6, 2013. Lelihumusho lite tinkholelo letingemanga futsi libeka tintfo ngendlela lengiyo, lokwenta kutsi likwati kuveta timfundziso teliBhayibheli lebekumatima kutsi labo labangalwati lulwimi lwasendvulo baticondze. Kodvwa-ke, ungase utibute kutsi, bobani labente lelihumusho lelihle kangaka?

Nanobe Lihumusho Lemhlaba Lomusha LemiBhalo YemaKhristu YesiGriki lilisha kubantfu labakhuluma siSwati, belisolo likhona kusukela nga-1950. Ngaleso sikhatsi, lakhululwa ngelulwimi lwesiNgisi, likhululwa yi-Watch Tower Bible and Tract Society—lokuyiNhlangano YeliBhayibheli yemhlaba wonkhe leseyinemlandvo lomudze wekushicilela emaBhayibheli. Sihloko salelihumusho lelisha sehluke kakhulu endleleni leyetayelekile yekwehlukanisa liBhayibheli ngekutsi lithestamente “lelidzala,” “nalelisha”—futsi lena ngulenye yetindlela leliveta ngayo kutsi lehlukile. Sicongosekulindza sa-September 15, 1950, [lesitfolakala ngesiNgisi], satsi: “Labantfu labakha ikomidi yekuhumusha bavete sifiso sabo . . . sekutsi bahlale bangatiwa, futsi abafuni kutsi emabito abo afakwe eBhayibhelini nabasaphila ngisho nalapho sebafile. Injongo yalelihumusho kuphakamisa libito laNkulunkulu lophilako neweliciniso.”

Lihumusho Lemhlaba Lomusha LemiBhalo Lengcwele, lelingumculu lowodvwa weliBhayibheli leliphelele, lakhululwa [ngesiNgisi] nga-1961. Nanobe emabito alabo labalihumusha angakembulwa ngisho nalamuhla, ngeke singabate kutsi bebanetisusa letinhle futsi bebatinikele kakhulu kulomsebenti. Setfulo seluhlelo lwa-1984 satsi: “Kuhumusha imiBhalo Lengcwele kusho kwendlulisela imicabango yaJehova Nkulunkulu kanye nemavi akhe kulolunye lulwimi . . . Bahumushi baleliBhayibheli, labamesabako Nkulunkulu longuMbhali wemiBhalo Lengcwele futsi labamtsandzako, bativa banemtfwalo wekuyendlulisela njengobe injalo imicabango nemavi akhe.”

Nanobe emalunga alelikomidi lekuhumusha abenetinhloso letinhle, abenalo yini likhono lekwenta lomsebenti? Letinye tifundziswa letingenetiseki melula titsi kuhunyushwa kweliBhayibheli kusuke kungumsebenti lowentiwe bantfu labete likhono nangabe angakavetwa emabito alabo labalihumushile kanye nekutsi bafundze kangakanani. Kodvwa akusito tonkhe tifundziswa letisho lamavi langenangcondvo. Alan S. Duthie, utsi: “Kube besati kutsi bobani labahumushe lihumusho lelitsite leliBhayibheli futsi balishicilela, loko bekungasisita yini sibone kutsi lelo humusho lihumusheke kahle? Cha, bekungeke. Kute lokubaluleke kwendlula kuhlolisisa loko lokutfolakala kulelo nalelo humusho.”a

Tinkhulungwane tebafundzi tikwentile loko. Kute kube ngulamuhla, kushicilelwe emakhophi eLihumusho Lemhlaba Lomusha langetulu kwetigidzi letingu-175, liphelele nobe liyincenye, ngetilwimi letingu-115, letikhulunywa emhlabeni wonkhe. Yini letfolwe bafundzi balo labanyenti?

KuMatewu 6:9, Jesu wafundzisa bafundzi bakhe kutsi bathantaze batsi: “Babe wetfu losezulwini, alingcweliswe libito lakho.” Nanobe kunjalo, emahumushweni lamanyenti Nkulunkulu uvetwa njengemuntfu lote libito, lobitwa kuphela ngekutsi “nguNkulunkulu” nobe “yiNkhosi.” Kodvwa bekungasinjalo ekucaleni. Libito laNkulunkulu lelitsi “Jehova,” belivela ngalokucacile tikhatsi leticishe tibe ngu-7 000 emiBhalweni yesiHebheru yekucala. (Eksodusi 3:15, NW; Tihlabelelo 83:18, NW.) Ngekuhamba kwesikhatsi, emaJuda ayekela kulisebentisa lelibito laNkulunkulu ngesizatfu setinkholelo tawo letisekelwe eteni. Ngemuva kwekufa kwebaphostoli baJesu, letinkholelo tangena nasebandleni lebuKhristu. (Catsanisa neMisebenti 20:29, 30; 1 Thimothi 4:1.) Bantfu lebebakopisha tincenye temiBhalo yesiGriki balisusa libito laNkulunkulu lelitsi Jehova, esikhundleni salo bafaka emagama esiGriki latsi Kyʹri·os na-The·osʹ, lasho kutsi “Nkhosi,” nekutsi “Nkulunkulu.”

Lokujabulisako kutsi eHumushweni Lemhlaba Lomusha kutsatfwe tinyatselo letibalulekile kute libito lelitsi Jehova libuyiselwe EmiBhalweni YemaKhristu YesiGriki (“liThestamente Lelisha”), tikhatsi letingu-237. Lokubuyiselwa kwalelibito akukasekelwa emibonweni yebahumushi, kodvwa kusekelwe elucwaningweni lolubanti lolwentiwe. Nasi sibonelo: KuLukha 4:18 kucashunwe emavi latfolakala ku-Isaya 61:1. Emibhalweni yesiHebheru yekucala, lelibito lelitsi Jehova belivela kulelivesi leliku-Isaya.b Ngesizatfu saloko, Lukha 4:18, loseHumushweni Lemhlaba Lomusha, utsi: “Umoya waJehova ukimi, ngobe ungigcobile kute ngimemetele tindzaba letimnandzi kulabaphuyile.”

Lendlela yekuhumusha iphindze isite bafundzi bakwati kubona umehluko lokhona emkhatsini waJehova Nkulunkulu neNdvodzana yakhe lekuphela kwayo, Jesu Khristu. Nasi sibonelo: Emahumusho lamanyenti ahumusha Matewu 22:44, ngekutsi: “INkhosi yatsi eNkhosini yami.” Kodvwa akuvakali kutsi ngubani lokhuluma nalomunye. Ecinisweni, lelivesi licashunwe emBhalweni weTihlabelelo 110:1, lobewunelibito laNkulunkulu emibhalweni yesiHebheru yekucala. Ngako-ke, Lihumusho Lemhlaba Lomusha libeka lelivesi ngekutsi: “Jehova watsi eNkhosini yami: ‘Hlala ngesekudla sami ngidzimate ngibeke titsa takho ngephansi kwetinyawo takho.’” Kucondza umehluko lowentiwa yimiBhalo emkhatsini waJehova Nkulunkulu neNdvodzana yakhe kuyintfo lebalulekile. (Makho 13:32; Johane 8:17, 18; 14:28) Loko kubaluleke kakhulu kute umuntfu asindziswe. Imisebenti 2:21 itsi: “Wonkhe umuntfu lobita libito laJehova utawusindziswa.”

Kuphindze kube naletinye tintfo letihamba embili letitfolakala eHumushweni Lemhlaba Lomusha. Imibhalo yesiGriki lehlolisiswe kahle ya-Westcott na-Hort yakhetfwa njengesisekelo lesiyinhloko salelihumusho. Kwanakisiswa kute lihumusho lekucala lesiGriki lendluliselwe njengobe belinjalo, lingaguculwa, futsi libekwe ngendlela lemelula nangelulwimi lolukhulunywa lamuhla. Kwenta njalo akuzange kugcine kuphela ngekulondvolota bunandzi kanye nekukhanga lebekukhona emiBhalweni yekucala, kodvwa kwaphindze kwenta bantfu balicondza liBhayibheli.

Sibonelo saloko kutsi kuRoma 13:1, umphostoli Pawula wancenga emaKhristu kutsi ‘atfobele tiphatsimandla,’ nobe babusi. Emahumusho lamanyenti achubeka atsi letiphatsimandla “tivunyelwe nguNkulunkulu,” nobe “tibekwe nguNkulunkulu.” (i-“King James Version,” ne-“Jerusalem Bible”) Labanye babusi basebentise lamahumusho kute babeke taba tekubusa kwabo ngelunya. Kodvwa ngenca yekutsi Lihumusho Lemhlaba Lomusha lihunyushwe ngendlela lefanele futsi tintfo tibekwe njengobe tinjalo, libeka lelivesi ngalendlela: “Tiphatsimandla letikhona nyalo tisetikhundleni tato letikaliwe letitinikwe nguNkulunkulu.”c Nyalo sesiyacondza kutsi nanobe Nkulunkulu kungasuye lokhetsa babusi bemhlaba, uyabavumela kutsi babe setikhundleni letikaliwe letibenta babe neligunya kulomunye nalomunye, kodvwa hhayi kuye.

Kuphindze kwentiwa imetamo yekutsi Lihumusho Lemhlaba Lomusha livete nemehluko lomncane wetento tesiGriki. Etilwimini letinyenti talamuhla, tento tiyasetjentiswa kute kuvele sikhatsi intfo leyenteke ngaso, kungaba sikhatsi lesengcile, sikhatsi sanyalo nobe kutsi itawenteka esikhatsini lesitako. Naselulwimini lwesiGriki tento tiveta kutsi intfo letsite yentiwe sikhashana yini, seyiphelile nobe isachubeka. Cabanga ngemavi aJesu lakuMatewu 6:33. Sento sesiGriki lesisho ‘kufuna’ sendlulisela umcondvo wentfo leyentiwa ngalokuchubekako. Ngako, inchazelo legcwele yalamavi aJesu ivetwa ngalendlela: “Chubekani nifuna kucala uMbuso waNkulunkulu nekulunga kwakhe, tonkhe leletinye tintfo nitawengetelwa tona.” Ngendlela lefanako, kuMatewu 7:7 kutsiwa: “Chubekani nicela, nitawuphiwa; chubekani nifuna, nitawutfola; chubekani ninconcotsa, nitawuvulelwa.”—Fundza naRoma 1:32; 6:2; Galathiya 5:15.

Lihumusho Lemhlaba Lomusha lenta konkhe lokusemandleni kute lingagucugucuki futsi lingashintji endleleni lelibeka ngayo emagama layinhloko. Nasi sibonelo: Ligama lesiGriki lelitsi psy·kheʹ, lihunyushwa ngekutsi “umphefumulo” ngato tonkhe tikhatsi nalivela. Loko kusita bafundzi basheshe bacondze kutsi umphefumulo awusiyo intfo lengafi, futsi loku kwehlukile kuloko lokufundziswa emasontfweni. Umphefumulo uyafa.—Matewu 2:20, umbhalo longentasi; Makho 3:4, Lukha 6:9; 17:33.

Kukhululwa kwemiBhalo YemaKhristu YesiGriki ngelulwimi lwesiSwati kumane kusicalo nje. Sekwentiwe tinhlelo tekutsi kuhunyushwe lonkhe liBhayibheli ngekuhamba kwesikhatsi. Kodvwa bafundzi bangaciniseka yini kutsi njengelihumusho lesiNgisi, lihumusho lesiSwati libeka tintfo njengobe tinjalo futsi aligucugucuki?

Yebo bangaciniseka. Sizatfu saloko kutsi umsebenti wekuhumusha bewusolo unakekelwa kahle Sigungu Lesibusako SaboFakazi BaJehova. Ngekuhlakanipha, kwentiwe sincumo sekutsi emaBhayibheli aletinye tilwimi ahunyushwe ngelicembu. Kwacaliswa emacembu lamanyenti ebahumushi beliBhayibheli etindzaweni letehlukahlukene letisemhlabeni wonkhe. Endlunkhulu yaboFakazi BaJehova leseBrooklyn, eNew York, kwakhiwa LiHhovisi Lelibuke Tindzaba Tekuhumusha kuze kunakekelwe tidzingo talawo macembu, kuphendvulwe imibuto yawo, futsi kucinisekiswe kutsi kuba nekuvumelana emaHumushweni Emhlaba Lomusha etilwimi letehlukahlukene. Kute kusitwe bahumushi beliBhayibheli, kucaliswe nelithulusi lelibalulekile lweluhlelo lwangcondvomshini. Kodvwa ciniseka kutsi nangetulu kwaloluhlelo lwangcondvomshini, kusadzingeka kutsi bahumushi basebente kamatima. Nanobe kunjalo, kusetjentiswa kwabongcondvomshini kuwente wangasabi matima kakhulu lomsebenti lobalulekile wekuhumusha Lihumusho Lemhlaba Lomusha ngendlela lengiyo nalengagucugucuki njengobe linjalo nelihumusho lesiNgisi. Lenye intfo levetwa nguloluhlelo lwekuhumusha yindlela emagama esiHebheru newesiGriki labekwe ngayo ehumushweni lesiNgisi, futsi loko kusita bahumushi kutsi bakhetse emagama lafanele elulwimini lwabo.

Tinzuzo taletinhlelo tibonakala ngalokucacile nasibuka imiphumela lebe khona. Siyakukhutsata kutsi ulihlolisise Lihumusho Lemhlaba Lomusha LemiBhalo YemaKhristu YesiGriki. Ungalitfola kubashicileli balomagazini. Utawujabulela tintfo letinyenti letinhle kulelihumusho: Licacile, liyafundzeka; linetihlokwana letingenhla kwelikhasi letikusita kutsi usheshe uwatfole emavesi lowetayele; linemabalave lanekwatiswa lokubanti kanye nesandzisanchazo lesichaza tintfo letikhangako. Lokubaluleke kakhulu kutsi ungafundza leliBhayibheli uciniseka kutsi liwendlulisela njengobe anjalo emavi aNkulunkulu ngelulwimi lolukhulunywa lamuhla.