Kutfola Emandla Ebutsakatsakeni Bami

Nangihlehla ngiya emuva ebuntfwaneni, ngikhumbula tikhatsi letijabulisako lebesinato endlini lencane lebesihlala kuyo nebatali bami eningizimu yeFulansi. Babe wangakhela umjikeni, futsi bengikutsandza kugijigijima ejalidini. Nga-1966, savakashelwa BoFakazi BaJehova ekhaya, bafike bacoca nababe sikhatsi lesidze. Ngemuva nje kwetinyanga letisikhombisa, babe wancuma kuba ngulomunye waBoFakazi BaJehova. Ngekushesha, namake walandzela etinyatselweni takhe, ngenca yaloko bangikhulisela ekhaya lelinelutsandvo.

Tinkinga tami tacala masinyane nje nasibuyela eSpain, lokulive batali bami labatalelwa kulo. Ngacala kuva buhlungu lobuhlabako etandleni kanye nasemacakaleni. Ngemuva kweminyaka lemibili, sengihambe bodokotela labanyenti, satfola dokotela lodvumile wesifo sematsambo, adzabukile, watsi: “Sekwephute kakhulu.” Make wavele wadzindza sililo. Lapho nje besengilibala kuva kukhulunywa ngemagama lengingawati, lafaka ekhatsi bo-“autoimmune chronic illness” nabo “juvenile polyarthritis.”a. Nanome bengisemncane ngineminyaka nje lelishumi, ngavele ngabona kutsi leto bekutindzaba letimbi.

Dokotela watsi kuncono ngimikiswe esibhedlela lesihlala siphindze silaphe bantfwana labasagule kakhulu. Nangifika, ngamangaliswa ngulesakhiwo lebesakhiwe ngendlela lesidzala. Bekunemtsetfo locinile kulendzawo: Bosisitela bangihhula tinwele babese bangigcokisa tembatfo takadzeni. Ngibibitseka, ngatibuta kutsi, ‘Ngingaphila kanjani kulendzawo lenje?’

Ngenca yekutsi batali bami bangifundzisa kutsi ngikhonte Jehova, ngala kuhlanganyela emasikweni emaKatolika labechutjwa kuleyo ndzawo. Labosisitela abakhonanga kukucondza kahle kutsi kungani ngingahlanganyeli. Ngancenga Jehova kutsi angangishiyi, ngekushesha ngemuva kwaloko ngeva shengatsi sandla saNkulunkulu lesivikelako siyangigaca, kuhle kwababe lonelutsandvo agona umntfwana wakhe.

Batali bami bebavumelekile kungivakashela sikhashana ngaboMgcibelo. Bangiletsela tincwadzi letisekelwe eBhayibhelini kutsi ngitifundze kute ngicinise kukholwa kwami. Ngalokuvamile, kwakungakavumeleki kutsi bantfwana babe netincwadzi tabo, kodvwa bosisitela bangivumela kutsi ngitigcine kanye neliBhayibheli lami, lebengilifundza onkhe emalanga. Ngangiphindze ngicoce nalamanye emantfombatane mayelana nelitsemba lami lekuphila phakadze emhlabeni loliPharadisi, lapho kungeke kube khona logulako. (Sembulo 21:3, 4) Nanome ngaletinye tikhatsi ngangitiva ngibuhlungu futsi nginesitunge, ngajabula kutsi kukholwa nekwetsembela kwami kuJehova kwakukhula nakakhulu.

Ngemuva kwetinyanga letisitfupha, bodokotela bangibuyisela ekhaya. Kugula kwami kwakungakabi ncono, kodvwa ngakujabulela kuphindze ngibe nebatali bami. Emalunga ami achubeka nekuchwala, loko lokwabangela kutsi ngive buhlungu kakhulu. Ngangena eminyakeni yekutfomba ngibutsakatsaka kakhulu. Nome kunjalo, nangineminyaka lengu-14 budzala ngabhajatiswa, futsi ngangitimisele kukhonta Babe wami wasezulwini ngelizinga lebengingakhona ngalo. Kodvwa ngaletinye tikhatsi ngangitiva ngidvumatekile ngaye. Ngangithantaza ngitsi: “Kungani nginje? Ngicela ungelaphe. Awuboni yini kutsi ngisetinhlungwini?”

Leyo minyaka yekutfomba yayimatima kakhulu kimi. Kwadzingeka ngikwemukele kutsi angeke ngibe ncono. Ngangihlale ngiticatsanisa nebangani bami labebajabulela kuphila, bayimicemane. Ngangitiva ngingasilutfo, futsi senginemahloni. Kodvwa umndeni wakitsi nebangani bami bebangisekela. Ngimkhumbula kahle a-Alicia, lobekamdzala kimi ngeminyaka lengu-20, lowaba ngumngani sibili. Wangisita kutsi ngijabulele kuba nalabanye bantfu kunekutsi ngilibale kucabanga ngetinkinga tami.

Nangineminyaka lengu-18 budzala, kugula kwami kwaphindze kwabuya ngemandla, kangangekutsi ngisho nekuya emihlanganweni yelibandla kwakungikhatsalisa. Nome kunjalo, ngasisebentisa kahle sikhatsi lebengiba naso ekhaya kute ngitadishe kahle liBhayibheli. Incwadzi yaJobe neyeTihlabelelo tangisita ngicondze kutsi kwanyalo Nkulunkulu Jehova angase angasivikeli etintfweni letibuhlungu lesibhekana nato, kepha uyachubeka asikhutsata kute sihlale sinebudlelwane lobuhle naye. Kuthantaza kwami njalo kwanginiketa “emandla lamakhulu kakhulu” kanye ‘nekuthula kwaNkulunkulu lokwendlula konkhe kucondza.’​—2 Khorinte 4:7; Filiphi 4:6, 7.

Nangineminyaka lengu-22 budzala, kwadzingeka sale ngisebentisa incola yalabakhubatekile. Ngangesaba kutsi bantfu ngeke basaba nendzaba nami kunaloko sebatawumane babuke nje nasi sigulane lesihleli encoleni. Kepha ngalokwehlukile kuloko, lencola yangenta ngativa senginenkhululeko, lelishwa lebengilicabanga lagucuka laba sibusiso. Isabel lobekangumngani wami watsi kungabanjani ngitibekele umgomo wekucitsa ema-awa langu-60 emsebentini wekushumayela, inyanga yinye nje sikanye naye.

Ekucaleni bengicabanga kutsi loko yintfo lengeke seyenteke. Kodvwa ngacela lusito kuJehova, futsi ngekusitwa ngumndeni wakitsi nebangani, ngakhona kukwenta. Leyo nyanga leyayimatasa yendlula ngekushesha, futsi ngatibona kutsi bese ngikuncobile kwesaba kanye neluhlazo. Ngawujabulela kakhulu lomsebenti,kangangekutsi nga-1996 ngancuma kuba lihlahlandlela lelivamile​—lokwakusho kucitsa ema-awa langu-90 ngenyanga emsebentini wekushumayela. Kwakungulesinye setincumo letikahle kulengatenta, kwangisondzeta edvute naNkulunkulu kwaphindze kwangenta ngativa ngincono. Kuhamba ngiyoshumayela kwanginiketa litfuba lekucoca nebantfu labanyenti ngaloko lengikukholelwako ngiphindze ngisite labanye babo kutsi babe bangani baNkulunkulu.

Ngelihlobo langa-2001, ngalimala engotini yemoto, ngaphuka yomibili imilente. Njengoba ngangilele embhedzeni wasesibhedlela ngisetinhlungwini letimatima, ngathantaza ngenhlitiyo, ngatsi: “Ngicela ungangishiyi Jehova!” Ngemuva kwaloko, lomunye wesifazane lobekalaliswe embhedzeni lodvutane newami wangibuta watsi: “Ungulomunye waBoFakazi BaJehova yini?” Ngangingenawo emandla ekuphendvula, ngako ngavele ngavuma ngenhloko. Wachubeka watsi: “Ngiyanati nine, futsi ngivamise kutifundza netincwadzi tenu.” Lawo mavi angidvudvuta kakhulu. Nanome ngangisesimeni lesidzabukisako, ngakhona kufakaza ngaJehova. Loko lokuyintfo leyangijabulisa kakhulu.

Ngatsi nangiba nconywana, ngancuma kuchubeka nekushumayela. Make abengifuca ngencola yalabachwalile siye lapho kunaletinye tigulane khona, kwatise kutsi totimbili tinyawo tami tatifakwe semende. Lilanga nelilanga besivakashela tigulane letimbalwa, sasitibuta kutsi tivuka njani ngalelolanga siphindze sitishiyele tincwadzi letisekelwe eBhayibhelini. Kuhambela leto tigulane bekungikhatsalisa, kepha Jehova wanginiketa emandla lebengiwadzinga.

Kuleminyaka leyendlulile tinhlungu tami tiye takhula kantsi nekushonelwa ngubabe kungente ngacindzeteleka kakhulu. Nome kunjalo, ngiyezama kuchubeka nginembono lofanele. Kanjani? Nakuvela litfuba, ngizama kutihlanganisa nebangani netihlobo letingisita kutsi ngingahlali ngicabanga ngetinkinga tami. Nanangingedvwa ngiyafundza, ngitadishe liBhayibheli, nome ngishumayele kulabanye ngelucingo.

Ngiphindze ngizame nekujabulela tintfo letincane njengekushaywa ngumoya ebusweni noma kuhogela liphunga lelimnandzi letimbali. Loku kungenta ngibe netizatfu tekumbonga Nkulunkulu. Kuyasita nekuhlale ungumuntfu lotihlekelako. Ngalelinye lilanga satsi sishumayela, umngani wami lobekangifusha ngencola watsi uma kancane ubhala lokutsite, incola yavele yagicika nami yate yayoshayisa imoto lebeyipakile. Sobabili setfuka kakhulu, kodvwa satsi nasibona kutsi kute lokubi kangako lokwentekile, savele saluphosa luhleko.

Tinengi tintfo lengingakhoni kutenta ekuphileni. Ngitibita ngekutsi tifiso tami letisetawugcwaliseka. Ngivame kuvala emehlo ami, bese ngeliso lengcondvo ngitibona sengisemhlabeni lomusha lowetsenjiswe nguNkulunkulu. (2 Phetro 3:13) Ngitibona ngiphilile, ngihambahamba, futsi ngikujabulela mbamba kuphila. Ayangidvudvuta emavi eNkhosi Davide latsi: “Tsemba kuSimakadze, cina ungadzangali, ube nesibindzi.” (Tihlabelelo 27:14) Nanome umtimba wami sewubutsakatsaka kakhulu, Jehova uye wangicinisa. Ngiyachubeka ngitfola emandla ebutsakatsakeni bami.