“Abemjabulisile Nkulunkulu”

ENOKI waphila sikhatsi lesidze kakhulu. Kungaba matima kitsi kutsi sikukholelwe loko, kodvwa lendvodza yaphila iminyaka lengu-365 lokuyiminyaka letfolakala ngekuphindza iminyaka lesiyiphilako kangu-4! Ngesikhatsi sa-Enoki, lesi bekungasiso sikhatsi lesidze kakhulu. Eminyakeni lengetulu kwetinkhulungwane letisihlanu leyendlulile, bantfu bebaphila sikhatsi lesidze kakhulu kwendlula iminyaka lesiyiphilako lamuhla. Umuntfu wekucala Adamu abesaphile iminyaka lengetulu kwa-600 nakutalwa Enoki, futsi ngemuva kwaloko waphindze waphila leminye iminyaka lengemakhulu lamatsatfu. Labanye esitukulwaneni sa-Adamu baphila sikhatsi lesidze kunaleso. Ngako nakaneminyaka lengu-365 Enoki abesolo angumcemane ayindvodza lebeyisengaphila iminyaka leminyenti. Nome kunjalo akazange.

Enoki abesengotini yekufa. Asewumbone ngemehlo engcondvo abaleka, ingesuki engcondvweni yakhe lentfo leyentiwe bantfu nakabatjela umlayeto lovela kuNkulunkulu. Bebatfukutsele bagane lunwabu. Labantfu bebamtondza mbamba. Bebangafuni kuva umlayeto wakhe futsi bebamenyanya Nkulunkulu wakhe labemtfumile. Bebangeke bakhone kuhlasela Jehova Nkulunkulu wa-Enoki kodvwa bebangakhona kumhlasela Enoki! Kungenteka Enoki abetibuta kutsi uyophindze awubone yini umndeni wakhe. Kungenteka abecabanga ngemkakhe nome ngemadvodzakati akhe, indvodzana yakhe Methusela nobe ngemtukulu wakhe Lameki. (Genesisi 5:21, 23, 25) Bekutawugcina kwentekeni vele?

Enoki akukhulunywa ngaye kakhulu eBhayibhelini, mitsatfu nje kuphela imibhalo lekhuluma ngaye. (Genesisi 5:21-24; Hebheru 11:5; Juda 14, 15) Nobe kunjalo, lamavesi asiniketa imininingwane leyenele lesenta siyati kahle lendvodza lenekukholwa lokucinile. Wena ungumuntfu lonakekela umndeni yini? Uke wakutfola kumatima yini kumelela intfo lowati kahle kutsi ilungile? Nangabe kunjalo, kunyenti longakufundza ngekukholwa kwa-Enoki.

Ngesikhatsi sa-Enoki, bantfu bebatiphatsa kabi. Besebasitukulwane sesikhombisa kusukela ku-Adamu. Ecinisweni, bantfu bebasasondzele kakhulu emphilweni lephelele leyake yaphilwa bo-Adamu na-Eva. Nguloko lobekwenta bantfu baphile sikhatsi lesidze. Nobe kunjalo, bebatiphatsa kabi futsi bete buhlobo lobuhle naNkulunkulu. Budlova besekuyintfo levamile. Lomkhuba lomubi wacala esitukulwaneni sesibili ngesikhatsi Khayini abulala Abela umnakabo. Lomunye lobekayintalelwane yaKhayini abetigcabha ngekutsi usidlova futsi utiphindziselela kakhulu kwendlula Khayini! Nasekuphila situkulwane sesitsatfu kwavela lolunye luhlobo lwebubi. Bantfu bebalisebentisa kabi ligama laJehova. Bebalisebentisela kumhlambalata nekumedzelela, hhayi ngendlela leyemukelekile yekumkhonta.​—Genesisi 4:8, 23-26.

Kungenteka loluhlobo lwekukhonta lolukhohlakele beseluvamile ngesikhatsi sa-Enoki. Njengobe Enoki akhula besekudzingeka kutsi ente sincumo. Abetawenta loko lokwentiwa bantfu labanyenti bangesikhatsi sakhe yini? Noma bekatawufuna Jehova Nkulunkulu weliciniso lowadala emazulu nemhlaba? Kungenteka watsintseka kakhulu nakafundza nga-Abela lowafela kukholwa kwakhe ngenca yekutsi abekhonta Jehova ngendlela leyamjabulisa. Enoki wakhetsa kumlingisa. Genesisi 5:22, utsi: “Enoki wachubeka ahamba naNkulunkulu weliciniso.” (catsanisa ne-NW) Lamavi aveta kutsi Enoki bekamtsandza Nkulunkulu ngisho nome abephila eveni lelingamtsandzi Nkulunkulu. Enoki ungumuntfu wekucala liBhayibheli lelimchaza ngalendlela.

Lona lelivesi liphindze litsi Enoki wachubeka ahamba naJehova ngisho nangemuva kwekutala indvodzana yakhe Methusela. Ngako Enoki abesavele anemndeni nakaneminyaka lengu-65 budzala. Abenemfati kodvwa ligama lakhe alishiwo eBhayibhelini, futsi ‘anemadvodzana nemadvodzakati,’ nawo lokungakhulunywa ngawo kutsi abemangakhi. Nangabe indvodza ifuna kuhamba naNkulunkulu ibe inakekela umndeni wayo, kufanele yetame kuwunakekela ngendlela yaNkulunkulu. Enoki bekati kutsi Jehova abelindzele kutsi etsembeke kumkakhe. (Genesisi 2:24) Asingabati kutsi wenta konkhe lokusemandleni akhe kute afundzise bantfwana bakhe ngaNkulunkulu Jehova. Loko kwaba namuphi umphumela?

LiBhayibheli alisitjeli lokunyenti kuloku. Alisho lutfo mayelana nekukholwa kwendvodzana yakhe Methusela, lokunguyona leyaphila sikhatsi lesidze kakhulu emlandvweni weliBhayibheli yaze yafa ngemnyaka waZamcolo. Methusela watala indvodzana wayetsa watsi nguLameki. Lameki waphila namkhulu wakhe Enoki sikhatsi lesingaba yiminyaka lengetulu kwelikhulu. Lameki wakhula anekukholwa lokucinile. Jehova wamphefumulela kutsi aphrofethe ngaNowa indvodzana yakhe, futsi leso siphrofetho safezeka ngemuva kwaZamcolo. Njengakhokho wakhe Enoki, Nowa kutsiwa naye wahamba naNkulunkulu. Nowa abengamati Enoki. Kodvwa Enoki wamshiyela sibonelo lesihle. Kungenteka Nowa wafundza ngalesibonelo sa-Enoki kuyise Lameki noma kumkhulu wakhe Methusela noma mhlawumbe kuJaredi labengubabe wa-Enoki lowafa ngesikhatsi Nowa asaneminyaka lengu-366 budzala.​—Genesisi 5:25-29; 9:1.

Cabanga ngemehluko lobewukhona emkhatsini wa-Enoki na-Adamu. Ngisho nobe Adamu abephelele wona kuJehova, ngako washiyela situkulwane sakhe sibonelo lesibi sekuvukela futsi wasiletsela kuhlupheka. Ngakulolunye luhlangotsi, Enoki abengakapheleli kodvwa wahamba naNkulunkulu washiyela situkulwane sakhe sibonelo lesihle sekukholwa. Adamu wafa ngesikhatsi Enoki asaneminyaka lengu-308 budzala. Umndeni wa-Adamu wamlilela yini nakafa njengobe abekhombise kuba ngukhokho loligovu? Asati. Kepha lesikwatiko kutsi “Enoki wachubeka ahamba naNkulunkulu weliciniso.”​—Genesisi 5:24, NW.

Nangabe ungumuntfu lonakekela umndeni, cabanga ngetifundvo longatitfola esibonelweni sa-Enoki sekukholwa. Kona kubalulekile kondla umndeni wakho ngetintfo lotidzingako ekuphileni, kodvwa kute lokubaluleke kwendlula kuwusita kutsi ube nebuhlobo lobuhle naNkulunkulu. (1 Thimothi 5:8) Loko ungakwenta ngemavi nangetento. Nawe ungakhona kubekela umndeni wakho sibonelo lesihle nangabe uhamba naNkulunkulu futsi uphila ngetimiso takhe letiphefumulelwe.

Kungenteka Enoki wativa ayedvwa njengobe abengumuntfu lonekukholwa eveni lelite kukholwa. Nkulunkulu wakhe Jehova wakubona yini loko kuye? Yebo wakubona. Ngalelinye lilanga, Jehova wakhuluma nalenceku yakhe leyetsembekile. Nkulunkulu waniketa Enoki umlayeto lobekufanele awutjele bantfu labephila nabo. Nkulunkulu wabese wenta Enoki waba ngumphrofethi. Kwaba nguye umphrofethi wekucala umlayeto wakhe lowembulwa eBhayibhelini. Loko sikwati ngobe ngemuva kwemakhulu eminyaka Juda umnakabo Jesu, waphefumulelwa kutsi abhale siphrofetho sa-Enoki.a

Besitsini siphrofetho sa-Enoki? Besitsi: “Bukani, Jehova weta nemashumi etinkhulungwane etingilosi takhe letingcwele, kuze abehlulele bonkhe, alahle bonkhe labangamhloniphi ngenca yetento tabo letimbi labatentile, nangetintfo letetfusako toni letingamhloniphi letitikhulume ngalokumelene naye.” (Juda 14, 15) Intfo yekucala lokungenteka uyinakile, kutsi Enoki wakhuluma shengatsi Nkulunkulu sewuvele utentile letintfo letishiwo ngulesiphrofetho. Nalabanye baphrofethi labalandzela nabo bamlingisa. Lokubalulekile kutsi: Lomphrofethi ukhuluma ngetintfo letitawenteka mbamba, kube shengatsi tintfo lesetivele tentekile!​—Isaya 46:10.

Bekunjani ku-Enoki kumemetela lomlayeto ngekuwushumayela kubantfu labebawulalela? Naka kutsi lomlayeto bewunemandla kanganani​—kusetjentiswe emagama lanjengekutsi ‘labangamhloniphi Nkulunkulu’ kanye nalelitsi ‘toni’ kute kulahlwe labantfu labebenta tintfo letimbi, kanye nendlela labebatenta ngayo. Lesiphrofetho besicwayisa bantfu kutsi lelive labebahlala kulo belikhohlakele kusukela bacoshwa ensimini yase-Edeni. Lelive belitawubhekana nenhlekelele ngesikhatsi Jehova eta nelibutfo lelikhulu ‘letingilosi takhe letingcwele’ litobabhubhisa. Enoki wabatjela ngesibindzi lesicwayiso lesivela kuNkulunkulu futsi loko wakwenta ayedvwa vo! Kungenteka Lameki wamangala nakabona sibindzi samkhulu wakhe. Nangabe kunjalo, singacondza kutsi wamangaliswa yini.

Kukholwa kwa-Enoki kusenta sitibute kutsi sinembono waNkulunkulu yini ngalelive lesiphila kulo. Lesehlulelo Enoki lasimemetela ngesibindzi sisasebenta nalamuhla, njengobe nje besisebenta nangesikhatsi sakhe. Ngekuvumelana nesecwayiso sa-Enoki, Jehova waletsa Zamcolo lomkhulu kulelive lebelikhohlakele langesikhatsi saNowa. Kuyoba njalo nangembhubhiso lenkhulu letako. (Matewu 24:38, 39; 2 Phetro 2:4-6) Nalamuhla, Nkulunkulu netingilosi takhe letingcwele bakulungele kuletsa sehlulelo sekulunga kulelive lelingamhloniphi Nkulunkulu. Ngamunye wetfu kufanele ahlale asikhumbula lesicwayiso futsi asitjele nalabanye. Emalunga emndeni nebangani betfu bangase basiphikise futsi ngaletinye tikhatsi singahle sitive sisodvwa. Jehova angeke aze atilahle tinceku takhe letetsembekile, njengobe nje angazange amlahle Enoki.

Enoki waphetselaphi? Ngandlela tsite kufa kwakhe bekuyintfo lengakavami nalesimangaliso kwendlula kuphila kwakhe. Lendzaba lekuGenesisi imane nje itsi: “Enoki wachubeka ahamba naNkulunkulu weliciniso. Wase uyanyamalala ngobe Nkulunkulu abesamtsatsile.” (Genesisi 5:24, NW) Nkulunkulu wamtsatsa ngamuphi umcondvo? Kamuva umphostoli Pawula wachaza watsi: “Ngekukholwa, Enoki watsatfwa kuze angakuboni kufa, futsi akatfolakalanga ndzawo ngobe Nkulunkulu wamtsatsa; kodvwa ngesikhatsi asengakatsatfwa, kwafakazwa ngaye kutsi abemjabulisile Nkulunkulu.” (Hebheru 11:5) Umphostoli Pawula abesho kutsini ngalamavi latsi “watsatfwa kuze angakuboni kufa”? Lamanye emahumusho eliBhayibheli atsi Nkulunkulu watsatsa Enoki wamyisa ezulwini. Kodvwa intfo lenjalo ayizange yenteke. LiBhayibheli likhombisa kutsi kwaba nguJesu Khristu umuntfu wekucala lowavuselwa ezulwini.​—Johane 3:13.

Pho-ke Enoki “watsatfwa kuze angakuboni kufa” ngamuphi umcondvo? Jehova wakutsatsa kuphila kwa-Enoki amvikela ebuhlungwini labetabuva nakabulawa. Kodvwa kwekucala, Enoki abetfole ‘bufakazi bekutsi abemjabulisile Nkulunkulu.’ Kwenteka njani loko? Ngaphambi nje kwekutsi afe, kungenteka Enoki abebone umbono lovela kuNkulunkulu lobewumkhombisa umhlaba sewulipharadisi. Ngemuva kwekubona loluphawu lolukhombisa kutsi Nkulunkulu uyamemukela, Enoki wabese uyafa. Abhala nga-Enoki nangalamanye emadvodza nebesifazane labetsembekile, umphostoli Pawula watsi: “Bonkhe laba bafa banekukholwa.” (Hebheru 11:13) Kungenteka titsa ta-Enoki tasifuna sidvumbu sakhe kodvwa atizange tisitfole ngobe kungenteka Jehova abesifihlile ngobe angafuni kutsi basone noma basisebentisele kutfutfukisa kukhonta kwemanga.b

Sicabanga ngalombhalo, asesitame kuyibona ngeliso lengcondvo indlela lokungenteka Enoki wafa ngayo. Asewucabange ngaloko lokungenteka kwenteka, ukhumbule kutsi nguloko kuphela lobekungenteka. Enoki abebaleka futsi kungenteka kutsi abesakhatsele. Titsa takhe beti la emvakwakhe futsi titfukutsele tigane lunwabu ngenca yemlayeto wakhe wekwahlulelwa. Enoki watfola indzawana yekubhaca kute atsi kuphumula kancane, kodvwa bekati kutsi angeke abaleke lokuyaphi. Abebona kutsi kufa besekusondzele. Asatiphumulele, wathantaza kuNkulunkulu wakhe. Kwatsi kusenjalo, wehlelwa kuthula lokusimangaliso. Wabona umbono wendzawo lenhle, wase utibona asalapho.

Asewucabange nje ngalombono lawubona lobewumbonisa live lelehluke kakhulu kulelo yena labelati. Kuye belilihle kakhulu lifanana nensimu yase-Edeni, kepha umehluko nje kutsi bekute emakherubi labeyigadzile kute bantfu bangangeni kuyo. Beyigcwele emadvodza kanye nebesifazane labebanemphilo lenhle futsi bayimicemane. Bonkhe bebanekuthula lokukhulu. Bekute nje lokukhombisa kutsi kunenzondo noma kuhlukunyetwa ngenca yenkholo, lokuyintfo Enoki labeyati kahle. Kantsi yena Enoki bekativela nje kutsi Jehova uyamtsandza futsi uyamemukela. Abeciniseka nekutsi lendzawo layibonako ngiyo vele indzawo lokufanele abekuyo futsi wativa asekhaya. Njengobe kancane kancane ativa akhululekile, Enoki walala butfongo lobukhulu nalobumnandzi lobute emaphupho.

Enoki watilalela lapho kuze kube ngulamuhla, wafa, kepha Jehova Nkulunkulu uyamkhumbula. Njengobe Jesu etsembisa, kutawufika lilanga lokuyawutsi ngalo bonkhe labo Nkulunkulu labakhumbulako beve livi laKhristu futsi baphume emathuneni. Batawutsi nabavula emehlo babone buhle belive lelisha lelinekuthula.​—Johane 5:28, 29.

Wena ungatsandza yini kuba khona endzaweni lenjalo? Cabanga nje ngenjabulo letawuba khona nasibonana na-Enoki. Cabanga ngetintfo letijabulisako lesitawutifundza kuye! Angasichazela nekutsi loko tsine lebesikucabanga mayelana nendlela kuphila kwakhe lokwaphela ngayo kuliciniso yini noma cha. Kodvwa kukhona lesidzinga kukufundza kuye ngisho nanyalo. Ngemuva kwekutsi asakhulume nga-Enoki, Pawula wachubeka watsi: “Ngaphandle kwekukholwa ngeke kwenteke kutsi umuntfu amjabulise Nkulunkulu.” (Hebheru 11:6) Lesi sizatfu lesinemandla sekulingisa Enoki, indvodza lenekukholwa nesibindzi!