Kuba Ngumngani Nakwenteka Bungani Busengotini Yekuphela

BANGANI labakahle baligugu futsi bungani lobuhlala sikhatsi lesidze abumane nje butentakalele. Nangabe bungani busengotini yekuphela, yini lesingayenta kuze sibugcine bukhona? Kunyenti lesingakufundza kubantfu lokukhulunywa ngabo eBhayibhelini lebebabangani sibili kodvwa lobo bungani lobacishe baphela.

Davide lobekangumelusi futsi ayinkhosi, naye bekanabo bangani labakahle. Jonathani bekangulomunye wabo. (1 Sam. 18:1) Kodvwa Davide bekanabo nalabanye bangani, njengemphrofethi Nathani. LiBhayibheli alisho kutsi bacala nini lobungani babo. Kodvwa ngalelinye lilanga, Davide wake watjela Nathani imfihlo yakhe njengoba nawe ungenta kumngani wakho. Davide bekafuna kwakhela Jehova indlu. Kungenteka kutsi Davide bekayitsandza imibono yaNathani umngani wakhe, ngetulu kwaloko abeyindvodza lebeyinemoya longcwele waNkulunkulu.​—2 Sam. 7:2, 3.

Nanobe kunjalo, kukhona intfo leyenteka leyacishe yacedza bungani babo. Inkhosi Davide yaphinga naBhatisheba futsi yahlela kutsi indvodza yakhe lengu-Uriya ibulawe. (2 Sam. 11:2-21) Kwaphela iminyaka leminyenti Davide etsembekile kuJehova futsi enta lokulungile. Kodvwa wase sewenta lesono lesibi! Besekwentekeni kulenkhosi lenhle? Bekangaboni yini kutsi wente liphutsa lelikhulu? Bekacabanga kutsi angamfihlela yini Nkulunkulu?

Bekatakwenta njani Nathani? Bekatawugadza kutsi kube ngulomunye umuntfu yini lovetela inkhosi leliphutsa layo? Labanye bantfu bebati kutsi nguye Davide lohlele kutsi Uriya abulawe. Ngako, kungani Nathani bekufanele ayikhulume lendzaba futsi afake bungani babo engotini? Loku futsi bekungafaka kuphila kwakhe engotini nakangakhuluma. Ngetulu kwaloko, Davide besavele ambulele Uriya longenacala.

Kodvwa Nathani bekangumkhulumeli waNkulunkulu. Lomphrofethi bekati kutsi nakangathula bungani bakhe naDavide bebungalimala futsi nembeza wakhe bowungeke umnike kuthula. Umngani wakhe Davide bekente intfo lengatsandvwa nguJehova. Inkhosi beyidzinga lusito kute ilungise buhlobo bayo naNkulunkulu. Davide abedzinga umngani sibili. Nathani abenguloyo mngani. Wakhetsa kukhuluma ngalendzaba ngekutsi asebentise umfanekiso lotamtsintsa njengobe Davide bekangumelusi. Nathani wakhuluma loko lebekushiwo nguNkulunkulu ngendlela yekutsi abone kutsi kubi kanganani loko lakwentile futsi imente alungise liphutsa lakhe.​—2 Sam. 12:1-14.

Bewungenta njani nangabe umngani wakho ente liphutsa lelikhulu nome sono lesibi? Mhlawumbe ungacabanga kutsi nawungamvetela liphutsa lakhe bungani benu butawuphela. Kungenteka ucabange nekutsi kutjela labadzala sono lasentile, kungasho kutsi awusuye umngani sibili. Ungenta njani?

Gianni, lesikhulume ngaye ekucaleni utsi: “Ngabona kutsi tintfo besetingasafani nasekucaleni. Maurizio bekangasakhululeki kucoca nami njengasekucaleni. Ngako nganconota kukhuluma naye nanobe bekumatima kwenta njalo. Ngatibuta: ‘Yini nje lengingamtjela yona langayati? Kungenteka atfukutsele!’ Kodvwa kukhumbula konkhe loko lebesikufundze naye kwangenta ngaba nesibindzi sekukhuluma naye. Nguloko kanye naye lakwenta nangidzinga lusito. Bengingafuni kutsi bungani betfu buphele kodvwa ngenca yekutsi bengimkhatsalela bengifuna kumsita.”

Maurizio uphindze atsi: “Gianni bekakhuluma loko lokungekhatsi kuye futsi bekacinisile. Bengati kutsi imiphumela yetento tami letimbi beyingakabangelwa nguye nobe Jehova. Ngako ngasemukela leseluleko futsi ngekuhamba kwesikhatsi ngaba nebuhlobo lobuhle naNkulunkulu.”

Davide bekanalabanye lebekasondzelene nabo lebebahlala baseluhlangotsini lwakhe nakabhekene netinkinga. Lomunye walaba bekunguHushayi, loyo liBhayibheli lelimbita ngekutsi “ngumngani lomkhulu waDavide.” (2 Sam. 16:16; 1 Khr. 27:33) Kungenteka bekayindvuna lebeyisondzelene kakhulu nenkhosi futsi angumngani wayo, loyo inkhosi beyimtfuma kutsi ayokwenta imisebenti leyimfihlo.

Kwatsi lapho indvodzana yaDavide lengu-Absalomu itsatsa bukhosi ngenkhani, ema-Israyeli lamanyenti aba seluhlangotsini lwa-Absalomu, ngaphandle kwaHushayi. Ngesikhatsi Davide abaleka, Hushayi wahamba naye. Davide weva buhlungu lobukhulu kakhulu ngobe bekajikelwe yindvodzana yakhe kanye nalabanye lebekabetsemba. Nanobe kunjalo, Hushayi wahlala etsembekile futsi atimisele kubeka kuphila kwakhe engotini kuze avimbele lelicebo lelibi kutsi liphumelele. Hushayi akakwentanga loko ngenca nje yekutsi uyindvuna. Wakhombisa kutsi ungumngani sibili.​—2 Sam. 15:13-17, 32-37; 16:15–17:16.

Kuyajabulisa kubona bazalwane nabodzadze lamuhla banebunye, hhayi nje ngenca yemisebenti labayentako ebandleni. Ngetento tabo basuke batsi: “Ngingumngani wakho, hhayi ngoba kufanele ngibe ngumngani wakho kodvwa ngenca yekutsi ubalulekile kimi.”

Nguloko kanye lokwenteka kumzalwane Federico. Asitwa ngumngani wakhe lamtsandzako longu-Antonio, wakhona kubhekana nesimo lesimatima ekuphileni kwakhe. Federico utsi: “Ngesikhatsi Antonio atfutsela ebandleni letfu, saba bangani labakhulu. Sobabili besitinceku letisebentako ebandleni futsi besikujabulela kusebenta ndzawonye. Ngemuva kwesikhashana, waba ngulomdzala welibandla. Ngetulu nje kwekuba ngumngani wami, bekasibonelo lesihle kimi.” Kodvwa Federico wenta sono. Ngekushesha wacela lusito kodvwa wase uyayekeliswa kuba lihlahlandlela nobe inceku lesebentako. Wenta njani Antonio?

Federico utsi: “Bengibona kutsi Antonio uva buhlungu. Wetama kungidvudvuta. Bekakhatsateka kakhulu ngebuhlobo bami naNkulunkulu lobebulimele futsi akazange sekangishiye. Wangikhutsata kutsi ngilwelwe kucinisa buhlobo bami naNkulunkulu futsi ngingapheli emandla.” Antonio utsi: “Ngacitsa sikhatsi lesinyenti naFederico. Bengifuna akhululeke kukhuluma nobe ngabe yini nami, ngisho nangebuhlungu lebekabuva.” Lokujabulisako kutsi Federico waphindze waba nebuhlobo lobuhle naNkulunkulu futsi ngekuhamba kwesikhatsi waphindze waba lihlahlandlela nenceku lesebentako. Antonio uphetsa ngekutsi atsi: “Nanobe sesisemabandleni lehlukene, kodvwa solo sibangani labakhulu.”

Ungativa njani nakungenteka umngani wakho akulahle ngesikhatsi umdzinga kakhulu? Bantfu labanyenti bangeva buhlungu lobukhulu. Ungakhona yini kumtsetselela? Ningachubeka yini nibe bangani labakhulu?

Ase ucabange ngaloko lokwenteka kuJesu emalangeni akhe ekugcina nakalamhlabeni. Sikhatsi sakhe lesinyenti bekasicitsa anebaphostoli bakhe labetsembekile futsi besebasondzelene kakhulu. Kungako Jesu ababita ngekutsi bangani bakhe. (Joh. 15:15) Kodvwa yini leyenteka ngesikhatsi aboshwa? Baphostoli babaleka. Phetro bekatsite angeke amshiye Jesu, kodvwa ngalelo langa wamphika.​—Mat. 26:31-33, 56, 69-75.

Jesu bekati kutsi bekatawubhekana nekuvivinywa kwakhe kwekugcina ayedvwana. Nanobe kunjalo, bekanaso sizatfu sekudvumala nesekuva buhlungu. Kodvwa loko lakusho kubafundzi bakhe ngemuva kwekuvuswa kwakhe akukhombisi kutsi bekadvumele, akwatile nobe abasola. Jesu akasibonanga sizatfu sekubabalela emaphutsa abo, lahlanganisa loko labakwenta ngebusuku bekuboshwa kwakhe.

Kunaloko, Jesu wamcinisa Phetro kanye nalalabanye baphostoli. Wakhombisa kutsi uyabetsemba ngekutsi abanikete ticondziso lebetimayelana nemsebenti lobalulekile wekufundzisa lobewutawentiwa emhlabeni wonkhe. Baphostoli bebasolo babangani bakhe. Indlela lebekabatsandza ngayo yabatsintsa kakhulu labaphostoli. Bebatimisele kungaphindze bayivise buhlungu iNkhosi yabo. Kungako baphumelela kulomsebenti lebekabanikete wona.​—Imis. 1:8; Khol. 1:23.

Lomunye dzadze libito lakhe lokungu-Elvira nakakhumbula loko lokwenteka ngesikhatsi bahishana nemngani wakhe, utsi: “Nakangitjela kutsi uve buhlungu ngaloko lengikwentile, ngativa ngitenyanya. Bekufanele atfukutsele. Kodvwa lokwangijabulisa kutsi bekakhatsateke ngami kakhulu kanye nangemiphumela yetento tami. Ngiyohlale ngikhumbula kutsi akanakanga kakhulu letento tami letimbi lengatenta kuye kunaloko wanaka indlela mine lebengitilimata ngayo. Ngambonga Jehova ngekutsi benginemngani lebekangikhatsalela kakhulu kunendlela yena lebekativa ngayo.”

Ngendlela lefanako, yini umngani sibili latawuyenta nangabe bungani busengotini yekuphela? Utawutimisela kukhuluma ngemusa kodvwa ngendlela lekhululekile nangabe kunesidzingo. Loyo mngani utawufanana naNathani kanye naHushayi, labahlala batsembekile ngisho nasetikhatsini letimatima futsi afanane naJesu lebekakulungele kutsetselela. Ungulolohlobo yini wena lwemngani?