Bunye Lobujabulisako Lobubakhona NgeSikhumbuto

1, 2. Ngumuphi umkhosi losenta sibe nebunye lotawuba khona nga-2018, futsi kungani? (Buka sitfombe lesisekucaleni kwalesihloko.)

NGA-MARCH 31, 2018, BoFakazi BaJehova kanye netigidzi tebantfu batawuhlangana nakushona lilanga kute bagubhe umkhosi weSikhumbuto sekufa kwaJesu. Lomkhosi logujwa minyaka yonkhe usisita sikhumbule loko Jesu lasentela kona. Njalo ngemnyaka, lomkhosi lojabulisako usenta sibe nebunye njengebantfu baJehova emhlabeni wonkhe.

² Cabanga ngendlela Jehova kanye naJesu labajabula ngayo nababuka tigidzi tebantfu tiba khona kulomkhosi lobaluleke kakhulu. LiBhayibheli labiketela kutsi “sicumbi lesikhulu lokute muntfu [longakhona] kusibala, siphuma kuto tonkhe tive, tinhlanga, bantfu, kanye netilwimi” futsi sitawumemeta ngelivi lelikhulu sitsi: “Insindziso ivela kuNkulunkulu wetfu lohleti esihlalweni sebukhosi, nakulo liWundlu.” (Semb. 7:9, 10) Kuyajabulisa kutsi nangabe siba khona kulomkhosi waminyaka yonkhe sisuke sikhombisa kutsi siyamhlonipha Jehova naJesu.

 3. Ngumiphi imibuto letawuphendvulwa kulesihloko?

³ Kulesihloko, sitawucoca ngetimphendvulo taleminye imibuto lesingatibuta yona. (1) Ungakulungiselela njani kuya eSikhumbutweni futsi uzuze kuso? (2) Sikhumbuto sekufa kwaJesu sibutfutfukisa njani bunye kubantfu baNkulunkulu? (3) Yini longayenta kute utfutfukise bunye? (4) Kuyoke kwenteke yini kutsi singasasigubhi Sikhumbuto? Nangabe kunjalo, kutawenteka nini?

 4. Kungani kubalulekile kutsi sibe khona eSikhumbutweni?

⁴ Cabanga ngekutsi kubaluleke ngani kutsi ube khona eSikhumbutweni. Khumbula kutsi kuya emihlanganweni yelibandla kuyincenye yekukhonta kwetfu Jehova. Asingabati kutsi Jehova naJesu bayanaka kutsi bobani labenta imetamo yekuba khona kulomkhosi lobaluleke kakhulu. Ecinisweni, sifuna babone kutsi sitawuhlale sikhona eSikhumbutweni ngaphandle nangabe sigula noma sibhekene netimo letingetulu kwemandla. Nangabe sikhombisa ngetento kutsi kuya emihlanganweni yebuKhristu kubalulekile kitsi, sinika Jehova sizatfu lesicinile sekutsi asigcine “encwadzini yekuphila” lenemagama ebantfu labatawutfola kuphila lokuphakadze.​—Mal. 3:16; Semb. 20:15.

 5. Nasekusondzele lilanga leSikhumbuto, ‘singatihlola njani kutsi sisekukholweni yini’?

⁵ Nasekusondzela Sikhumbuto, singabekela eceleni sikhatsi sekuthantaza kuJehova siphindze sihlolisise buhlobo betfu naye. (Fundza 2 Khorinte 13:5.) Singakwenta njani loko? Kufanele ‘sitihlole kutsi sisekukholweni yini.’ Kute sente kanjalo, kufanele sitibute kutsi: ‘Ngiyaciniseka yini kutsi ngiyincenye yenhlangano lokukuphela kwayo Jehova layisebentisako kute afeze intsandvo yakhe? Ngenta konkhe lokusemandleni ami yini kutsi ngishumayele ngiphindze ngifundzise tindzaba letimnandzi teMbuso waNkulunkulu? Tento tami tiyakhombisa yini kutsi ngiciniseka mbamba kutsi lawa ngemalanga ekugcina nekutsi kubusa kwaSathane sekutawuphela? Ngisametsemba yini Jehova kanye naJesu ngendlela bengibetsemba ngayo ngesikhatsi nginikela kuphila kwami kuNkulunkulu Jehova?’ (Mat. 24:14; 2 Thim. 3:1; Heb. 3:14) Kucabangisisa ngetimphendvulo talemibuto kutasisita kutsi sichubeke sihlola loko lesingiko.

 6. (a) Nguyiphi indlela lokukuphela kwayo lengasiholela ekuphileni lokuphakadze? (b) Yini leyentiwa ngulomdzala welibandla kute alungiselele Sikhumbuto minyaka yonkhe, futsi ungamlingisa njani?

⁶ Fundza tihloko letisekelwe eBhayibhelini letikhuluma ngekubaluleka kweSikhumbuto uphindze uzindle ngato. (Fundza Johane 3:16; 17:3.) “Kwati” Jehova kanye ‘nekukholwa’ kuJesu loyiNdvodzana yakhe letelwe yodvwa kukuphela kwendlela lengasiholela ekuphileni lokuphakadze. Kute ulungiselele Sikhumbuto, ungakhetsa kudadisha tihloko letitakusita kutsi usondzelane naJehova naJesu. Cabanga ngaloko bekusolo kwentiwa ngumzalwane losanesikhatsi lesidze angulomdzala welibandla. Eminyakeni leyengcile, bekabeka bomagazini be-Sicongosekulindza labakhuluma ngeSikhumbuto kanye nangelutsandvo Jehova naJesu labasibonise lona. Nasekusele emaviki lambalwa kufike Sikhumbuto, uphindze afundze letihloko futsi azindle ngekubaluleka kwalomkhosi. Ngaletinye tikhatsi, uhle engeta labanye bomagazini. Lomzalwane longulomdzala utfole kutsi ngekuphindze afundze letihloko futsi azindle ngekufundvwa kweliBhayibheli kwemalanga eSikhumbuto, ufundza tintfo letinsha minyaka yonkhe. Lokubaluleke kakhulu kutsi njalo ngemnyaka, lutsandvo lwakhe ngaJehova nangaJesu luyakhula. Lokudadisha kungakusita kutsi ukhulise lutsandvo kanye nekubonga ngaJehova naJesu futsi uzuze lokunyenti eSikhumbutweni.

 7. (a) Ngesikhatsi acalisa umkhosi weSidlo SeNkhosi Sakusihlwa, yini Jesu layithantazela? (b) Yini lekhombisa kutsi Jehova wawuphendvula umthantazo waJesu?

⁷ Ngebusuku Jesu lacalisa ngabo umkhosi weSidlo SeNkhosi Sakusihlwa, wathantaza wacela kutsi balandzeli bakhe babe munye njengobe yena naBabe wakhe bamunye. (Fundza Johane 17:20, 21.) Jehova wawuphendvula lomthantazo weNdvodzana yakhe layitsandzako, futsi nyalo tigidzi tebantfu tiyakholwa kutsi Jesu bekatfunywe nguJehova. Ngalokungafani naleminye imihlangano bantfu baNkulunkulu lababa nayo, Sikhumbuto sikhombisa ngalokucacile kutsi BoFakazi BaJehova banebunye. Bantfu labasemaveni lamanyenti emhlabeni wonkhe futsi labanebuve lobehlukene batawuhlangana kuze bakhumbule kufa kwaJesu. Kuletinye tindzawo, akuketayeleki kutsi bantfu bebuve lobehlukene bahlangane ndzawonye. Kodvwa bunye lobunjalo buhle kakhulu emehlweni aJehova naJesu!

 8. Ngumuphi umlayeto lomayelana nebunye Jehova lawuniketa Hezekeli?

⁸ Njengebantfu baJehova, abusimangalisi bunye lesinabo. Ecinisweni Jehova wabiketela kutsi bantfu bakhe bebatawuba nebunye. Cabanga ngemlayeto lawuniketa umphrofethi Hezekeli lomayelana nekuhlanganiswa kwemizaca lemibili, umzaca ‘wakaJuda newakaJosefa.’ (Fundza Hezekeli 37:15-17.) Sihloko lesitsi “Imibuto Levela Kubafundzi” lesiku-Sicongosekulindza saJuly 2016, sachaza kutsi: “Jehova waniketa Hezekeli umlayeto lotsembisa kuhlanganiswa kwetive taka-Israyeli ngemuva kwekubuyiselwa eVeni Lesetsembiso. Lomlayeto uphindze ubiketele kuhlanganiswa kwebantfu baNkulunkulu lokucale kwenteka kulamalanga ekugcina.”

 9. Ngubuphi bufakazi bekutsi siphrofetho saHezekeli siyagcwaliseka nasiseSikhumbutweni lesibakhona njalo ngemnyaka?

⁹ Kusukela nga-1919 kuchubeke, kancane kancane Jehova wacala kuhlela emaKhristu lagcotjiwe futsi wawahlanganisa njengobe amelelwa ‘ngumzaca wakaJuda.’ Ngekuhamba kwesikhatsi, labo labanelitsemba lekuphila emhlabeni labamelelwa ‘ngumzaca wakaJosefa’ batihlanganisa nalabagcotjiwe futsi lamacembu lamabili aba “ngumhlambi munye.” (Joh. 10:16; Zak. 8:23) Jehova wetsembisa kuhlanganisa lemizaca lemibili futsi ibe ngephasi kwesandla sakhe. (Hez. 37:19) Nyalo, lamacembu lamabili akhonta Jehova ngebunye ngephasi kweNkhosi lekhatimulako Jesu Khristu futsi siphrofetho saHezekeli simbita ngekutsi ‘nguDavide inceku’ yaNkulunkulu. (Hez. 37:24, 25) Lobunye lobuligugu lobuchazwa encwadzini yaHezekeli bubonakala ngalokucacile njengobe labagcotjiwe bahlangana “naletinye timvu” kute bakhumbule kufa kwaJesu. Noma kunjalo yini lesingayenta kute sitfutfukise bunye lesinabo futsi sibulondvolote?

10. Singabutfutfukisa njani bunye lobukhona kubantfu baNkulunkulu?

¹⁰ Lenye indlela lesingatfutfukisa ngayo bunye kubantfu baNkulunkulu kutsi sitfobeke. Ngesikhatsi Jesu asemhlabeni, wayala balandzeli bakhe kutsi batfobeke. (Mat. 23:12) Nangabe sitfobekile, angeke sincotjwe ngumoya walelive wekutikhukhumeta. Esikhundleni saloko kutfobeka kutasisita kutsi sibalalele labo labasiholako futsi loko kubalulekile kute libandla libe nebunye. Ngetulu kwako konkhe, kutfobeka kuyamjabulisa Jehova ngoba “umelene nalabatigcabhako kodvwa ubanika umusa wakhe labo labatfobekile.”​—1 Phet. 5:5.

11. Kucabangisisa ngaloko lokumelelwa tifanekiselo teSikhumbuto kusisita njani kutsi sitfutfukise bunye?

¹¹ Indlela yesibili lesingatfutfukisa ngayo bunye kutsi sicabangisise ngaloko lokumelelwa tifanekiselo letisetjentiswa eSikhumbutweni. Ngaphambi kwelilanga leSikhumbuto kanye nangelilanga leSikhumbuto, kufanele sicabangisise ngekubaluleka kwesinkhwa lesite imvubelo kanye neliwayini lelibovu. (1 Khor. 11:23-25) Sinkhwa simelela umtimba waJesu lote sono lowaba ngumhlatjelo futsi liwayini limelela ingati yakhe leyacitseka. Kodvwa kufanele sati lokungetulu kwaloko lokumelelwa tifanekiselo. Khumbula kutsi inhlawulo yaKhristu ikhombisa lutsandvo lwaJehova ngekutsi anikele ngeNdvodzana yakhe ngenca yetfu, iphindze ikhombise nelutsandvo Jesu lalukhombisa ngekutsi anikele ngekuphila kwakhe ngekutitsandzela ngenca yetfu. Kucabanga ngelutsandvo Jehova naJesu labanalo kutasenta kutsi natsi sibatsandze. Lutsandvo lesinalo ngaJehova lufana nentsambo lesihlanganisa ndzawonye futsi lucinisa bunye lesinabo nebazalwane.

12. Emfanekisweni wakhe lomayelana nenkhosi leyesula sikweleti, Jesu wakuveta njani kutsi Jehova ulindzele kutsi sibacolele labanye?

¹² Indlela yesitsatfu yekutfutfukisa bunye kutsi sibacolele ngekukhululeka labasonile. Nangabe sibacolela sisuke sikhombisa kutsi siyabonga ngenhlawulo yaKhristu lesenta sitsetselelwe tono tetfu. Cabanga ngemfanekiso waJesu lobhalwe kuMatewu 18:23-34. Tibute kutsi: ‘Ngiyakusebentisa yini loko Jesu lasifundzisa kona? Ngiyababeketelela yini bazalwane lengikanye nabo futsi ngikhombise kutsi ngiyabacabangela? Ngikulungele yini kubatsetselela labo labangonako?’ Kuliciniso kutsi letinye tono kumatima kutitsetselela ngobe sibantfu labanesono. Noma kunjalo, lomfanekiso usitjela ngaloko Jehova lalindzele kutsi sikwente. (Fundza Matewu 18:35.) Jesu wakwenta kwacaca kutsi Jehova angeke asicolele nangabe singabacoleli bazalwane betfu nakunesizatfu lesivakalako sekwenta njalo. Kufanele sicabangisise ngalendzaba. Nasicolela labanye njengobe Jesu asifundzisa sisuke sivikela bunye betfu lobuligugu futsi sibulondvolota.

13. Kwakha kuthula kubutfutfukisa njani bunye betfu?

¹³ Nasicolela labanye sikhombisa kutsi sakha kuthula. Khumbula seluleko semphostoli Pawula sekutsi kufanele ‘sikhutsalele kugcina bunye bemoya ngesibopho sekuthula.” (Ef. 4:3) Nasekusondzele Sikhumbuto kanye nangelilanga leSikhumbuto, cabangisisa ngendlela lobaphatsa ngayo labanye bantfu. Tibute kutsi: ‘Bukhona yini bufakazi lobucacile bekutsi angibabambeli labanye emagcubu? Labanye bayabona yini kutsi ngenta konkhe lokusemandleni ami kute ngakhe kuthula futsi ngitfutfukise bunye?’ Lena yimibuto lokufanele sicabangisise ngayo kulamalanga eSikhumbuto.

14. Singakhombisa njani kutsi ‘sibeketelelana ngelutsandvo’?

¹⁴ Indlela yesine yekutfutfukisa bunye kutsi silingise Jehova ngekutsi sikhombise lutsandvo njengobe anguNkulunkulu lolutsandvo. (1 Joh. 4:8) Ngako angeke sente ngatsi siyabatsandza bazalwane betfu sibe singabatsandzi ngalokusuka enhlitiyweni. Kutentisa kuphambene neseluleko semphostoli Pawula lesitsi kufanele ‘sibeketelelane ngelutsandvo.’ (Ef. 4:2) Naka kutsi Pawula akazange atsi kufanele ‘sibeketelelane,’ kodvwa watsi loku kufanele sikwente “ngelutsandvo.” Emabandleni lesikuwo kunato tonkhe tinhlobo tebantfu Jehova latidvonsele kuye. (Joh. 6:44) Njengobe Jehova abadvonsele kuye ubatsandza kakhulu. Ngako akukafanele sehlulele lesikholwa nabo sicabange kutsi abakufaneli kutsandvwa. Akukafaneli silugodle lutsandvo Jehova latsi kufanele silukhombise lesikholwa nabo!​—1 Joh. 4:20, 21.

15. Sati njani kutsi kutawuba neSikhumbuto sekugcina?

¹⁵ Ngalelinye lilanga sitawugubha kwekugcina umkhosi weSikhumbuto. Sikwati njani loku? Encwadzini yekucala layibhalela emaKhristu lagcotjiwe aseKhorinte, Pawula watsi ngekukhumbula kufa kwaJesu ‘achubeka amemetela kufa kweNkhosi idzimate ifike.’ (1 Khor. 11:26) Leligama lelitsi “ifike” lisho sentakalo lesifanako naleso sekuta kwaJesu lesichazwa esiphrofethweni lesikhuluma ngekuphela kwalelive. Mayelana nekuhlupheka lokukhulu lokusondzelako, Jesu watsi: “Lapho-ke kuyawubonakala sibonakaliso seNdvodzana yemuntfu ezulwini, futsi tonkhe tive temhlaba tiyawukhala tilile natiyibona ita isemafini inemandla nenkhatimulo. Iyawutfumela tingilosi tayo, tiphume nakushaywa emacilongo tiye emagumbini omane emhlaba, futsi tigcogcele ndzawonye labakhetsiwe labakuwo wonkhe umhlaba.” (Mat. 24:29-31) ‘Kugcogcelwa ndzawonye kwalabakhetsiwe’ kusho sikhatsi lapho onkhe emaKhristu lagcotjiwe latawube asemhlabeni atawutfola umvuzo wawo wasezulwini. Loku kutawenteka nasekwendlule incenye yekucala yekuhlupheka lokukhulu kodvwa ngaphambi kwemphi ye-Amagedoni. Ngemuva kwaloko bonkhe labangu-144 000 batawuhlanganyela naJesu ekuncobeni emakhosi emhlaba. (Semb. 17:12-14) Sikhumbuto lesitawuba khona ngaphambi kwekutsi labagcotjiwe baye ezulwini sitawube sisekugcina ngobe Jesu utawube ‘sekafikile.’

16. Kungani utimisele kubakhona eSikhumbutweni salomnyaka?

¹⁶ Shengatsi singatimisela kubakhona esikhumbutweni lesitawuba ngaMarch 31, 2018 futsi sizuze kuso. Kufanele sicele Jehova asisite sichubeke sifaka sandla ekwenteni bantfu bakhe babe nebunye. (Fundza Tihlabelelo 133:1.) Khumbula kutsi ngalelinye lilanga sitasigubha kwekugcina Sikhumbuto. Kwanyalo shengatsi singenta konkhe lokusemandleni etfu kute sibekhona eSikhumbutweni futsi sibutsatse njengalobuligugu bunye lesibanabo eSikhumbutweni.