Batali, Ningabasita Njani Bantfwana Benu Kutsi Babhajatiswe?

 1. Yini batali labangemaKhristu labafuna kuciniseka ngayo ngaphambi kwekutsi bantfwana babo babhajatiswe?

NAKACHAZA lokwenteka ngesikhatsi enta sincumo sekubhajatiswa, Blossom Brandt utsi: “Kwaphela tinyanga letinyenti solo ngitjela batali bami kutsi sengifuna kubhajatiswa futsi bebavame kucoca nami ngaloko. Bebafuna ngiciniseke ngalesincumo lebengifuna kusenta. December 31, 1934, waba lilanga lelijabulisa kakhulu ekuphileni kwami.” Lamuhla, batali labangemaKhristu basakujabulela kusita bantfwana babo kutsi bente tincumo letihlakaniphile. Kuhlehlisa kubhajatiswa ngalokungenasidzingo kungabulimata buhlobo babo naNkulunkulu. (Jak. 4:17) Noma kunjalo, batali bafuna kuciniseka kutsi ngaphambi kwekutsi bantfwana babo babhajatiswe, sebakulungele kutfwala umtfwalo wekuba ngumfundzi waKhristu.

 2. (a) Yini lekhatsata babonisi besigodzi? (b) Sitawucoca ngani kulesihloko?

² Babonisi besigodzi bakhombise kukhatsateka ngekutsi kunalabasebasha labaseminyakeni yekutfomba labakhulele emindenini yemaKhristu kepha labasengakabhajatiswa. Labanyenti babo bayahlanganyela emsebentini wekushumayela futsi bayaya nasemihlanganweni yelibandla. Batibona bangulabanye baBoFakazi BaJehova. Kepha kukhona lokubenta besabe kunikela kuphila kwabo kuJehova futsi babhajatiswe. Yini lebenta besabe kubhajatiswa? Ngaletinye tikhatsi, batali ngibo lababakhutsata kutsi bakuhlehlise kubhajatiswa. Kulesihloko, sitawucoca ngetintfo letine letivimba batali labangemaKhristu kutsi basite bantfwana babo batfutfuke baze babhajatiswe.

 3. Yini lebeyikhatsata batali baBlossom?

³ Batali baBlossom lesicoce ngaye esigabeni sekucala bebakhatsatekile kutsi umntfwana wabo sewukhule ngalokwenele yini kutsi acondze kubaluleka kwekubhajatiswa. Batali bangabona njani kutsi umntfwana wabo sewukulungele kutsatsa sincumo sekutinikela?

 4. Umyalo waJesu lokuMatewu 28:19, 20 ungabasita njani batali njengobe bafundzisa bantfwana babo?

⁴ Fundza Matewu 28:19, 20. Njengobe sibonile esihlokweni lesendlulile, liBhayibheli alisho kutsi umuntfu kufanele abhajatiswe nasekaneminyaka lemingakhi. Noma kunjalo, batali bangasitakala ngekucabangisisa ngekutsi kusho kutsini kwenta bafundzi. Leligama lesiGriki lelitsi “nente bafundzi” lelikuMatewu 28:19 linemcondvo wekufundzisa lotsite ngenjongo yekumenta umfundzi. Umlandzeli waKhristu ngumuntfu lofundza timfundziso taJesu, aticondze futsi atimisele kuphila ngekuvumelana nato. Ngako umgomo wabo bonkhe batali labangemaKhristu kufanele ube kufundzisa bantfwana babo kusukela basebancane kuze babe bafundzi baKhristu lababhajatisiwe. Kuliciniso kutsi luswane alukufanelekeli kubhajatiswa. Noma kunjalo, liBhayibheli liyakhombisa kutsi bantfwana labancane bangaweva emaciniso laseBhayibhelini futsi bawatsandze.

5, 6. (a) Indlela liBhayibheli lelichaza ngayo Thimothi isitjelani mayelana nekubhajatiswa kwakhe? (b) Batali labahlakaniphile bangabasita njani bantfwana babo ngalokuphumelelako?

⁵ Thimothi bekangumfundzi lowakhetsa kukhonta Jehova kusukela asemncane. Umphostoli Pawula watsi Thimothi wafundza emaciniso laseBhayibhelini kusukela asemncane. Ngisho noma Thimothi akhululela emndenini lonetinkholo letehlukene, make nagogo wakhe labebangemaJuda bamfundzisa kutsi atsandze imiBhalo. Kungako bekanekukholwa lokucinile. (2 Thim. 1:5; 3:14, 15) Nasekaseminyakeni yabo-20, Thimothi besekangumfundzi waJesu lobekakufanelekela kuniketwa emalungelo lakhetsekile ebandleni.​—Imis. 16:1-3.

⁶ Kuliciniso kutsi bantfwana abafani futsi abakhombisi kuvutfwa ngesikhatsi nangelizinga lelifanako. Labanye bakhombisa kuvutfwa babancane kanye nesifiso sekubhajatiswa. Labanye balungela kubhajatiswa nasebabadzala. Ngako batali labahlakaniphile ababacindzeteli bantfwana babo kutsi babhajatiswe. Kunaloko, basita umntfwana ngamunye kutsi akhulise buhlobo bakhe naNkulunkulu futsi atfutfuke ngelizinga lakhona ngalo. Batali bayajabula nangabe umntfwana wabo alalela umBhalo weTaga 27:11. (Fundza.) Noma kunjalo, akukafaneli balahlekelwe ngumgomo wabo wekusita bantfwana babo kutsi babe ngemaKhristu. Nabacabanga ngaloko, batali kufanele batibute kutsi: ‘Umntfwana wami unelwati lolwenele yini lolungamenta atinikele kuNkulunkulu futsi abhajatiswe?’

 7. Kuze abhajatiswe, umuntfu kufanele abe nelwati lolunyenti yini ngeliBhayibheli? Chaza.

⁷ Njengebafundzisi, batali bafuna bantfwana babo babe nesisekelo lesicinile selwati kuze babhajatiswe. Noma kunjalo, akudzingeki kutsi bantfwana bati tintfo letinyenti kuze batinikele kuNkulunkulu futsi babhajatiswe. Ngemuva kwekubhajatiswa, bonkhe bafundzi kufanele bachubeke bafundze kuze batfole lwati lweliciniso. (Fundza Kholose 1:9, 10.) Umuntfu kufanele abe nelwati lolunganani kuze abhajatiswe?

8, 9. Yini lesingayifundza kuPawula kanye nakugadzi welijele?

⁸ Lokwenteka kulomunye umndeni wangelikhulu lekucala kungabasita batali lamuhla. (Imis. 16:25-33) Ngesikhatsi ahambela emabandla kwesibili nga-50 C.E., Pawula waya eFiliphi. Ngesikhatsi balapho, Pawula kanye nemngani wakhe Silasi bamangalelwa ngemanga futsi bavalelwa ejele. Ngalobo busuku, kwatamatama umhlaba futsi iminyango yelijele yavuleka. Logadzi bekesaba kutsi letiboshwa tibalekile, futsi besekafuna kutibulala kodvwa Pawula wabese uyambita. Pawula naSilasi bakhona kushumayela logadzi kanye nemndeni wakhe. Kutsandza kwabo emaciniso labawafundza ngaJesu kwabenta batsatsa siphi sinyatselo? Babhajatiswa ngekushesha. Yini lesingayifundza kulendzaba?

⁹ Kungenteka logadzi bekalisotja lebelitsetse umhlalaphasi. Bekangayati imiBhalo. Kuze atfole sisekelo lesicinile semiBhalo bekufanele afundze emaciniso eliBhayibheli lasisekelo, acondze kutsi kusho kutsini kuba yinceku yaNkulunkulu aphindze atimisele kulalela timfundziso taJesu. Ngesikhashana lesincane, lwati lolusisekelo labesanalo ngemaciniso laseBhayibhelini kanye nelutsandvo labesanalo ngawo lwamenta wabhajatiswa. Asingabati kutsi wachubeka engeta lwati lebekanalo ngisho nobe besekabhajatisiwe. Ucabanga ngalesibonelo, yini longayenta nangabe umntfwanakho akhombisa kuwatsandza ngalokusuka enhlitiyweni emaciniso lasisekelo laseBhayibhelini lafaka ekhatsi inchazelo nekubaluleka kwekutinikela kanye nekubhajatiswa? Batali labangemaKhristu bangephetsa ngekutsi angakhuluma nalabadzala belibandla kute bahlole kutsi uyakufanelekela yini kubhajatiswa.a Njengalabanye bafundzi lababhajatisiwe, utawuchubeka engeta lwati lanalo ngenjongo yaJehova kuphila kwakhe konkhe, kuze kube phakadze.​—Rom. 11:33, 34.

10, 11. (a) Yini labanye batali labayicabangako? (b) Yini batali lokufanele bayinake kakhulu?

¹⁰ Labanye batali bacabanga kutsi kungaba kahle kutsi bantfwana babo bahlehlise kubhajatiswa kuze batfole imfundvo lephakeme kucala kanye nemsebenti loholela kahle. Noma loko bangakusho ngetinhloso letikahle, kungamsita yini umntfwana kutsi atfole imphumelelo sibili? Lokubaluleke kakhulu kutsi kuyavumelana yini nemiBhalo? Yini liBhayibheli lelisikhutsata kutsi siyente?​—Fundza Umshumayeli 12:1.

¹¹ Kubalulekile kukhumbula kutsi lelive kanye netintfo letikulo tiphambene nendlela Jehova lacabanga ngayo kanye nentsandvo yakhe. (Jak. 4:7, 8; 1 Joh. 2:15-17; 5:19) Kuba nebuhlobo lobuhle naJehova kungamvikela umntfwana wakho kuSathane, live lakhe kanye nasendleleni lekabi yekucabanga. Nangabe umtali atsandza kakhulu tintfo talelive, angenta umntfwana adideke futsi netintfo latitsatsa njengaletibalulekile tingaphatamiseka. Batali labangemaKhristu labanelutsandvo bangalivumela yini lelive lonakalise umbono wemntfwana wabo mayelana nekuphumelela? Liciniso likutsi injabulo mbamba kanye nekuphumelela sitakutfola kuphela nangabe sibeka Jehova kucala ekuphileni kwetfu.​—Fundza Tihlabelelo 1:2, 3.

12. Kungani labanye batali bafuna bantfwana babo bakuhlehlise kubhajatiswa?

¹² Nakachaza tizatfu letamenta walela indvodzakati yakhe kutsi ibhajatiswe, lomunye make longumKhristu watsi: “Ngitiva nginemahloni kusho kutsi sizatfu lesiyinhloko kutsi bengesaba kutsi umntfwana wami angahle ayekeliswe kuba nguFakazi.” Njengalodzadze, labanye batali bacabanga kutsi kuncono kutsi umntfwana wabo akuhlehlise kubhajatiswa aze akhule ngalokwanele futsi ayekele kwenta imikhuba yebuntfwana. (Gen. 8:21; Taga 22:15) Bangahle bacabange kutsi, ‘Nangabe umntfwana wami angakabhajatiswa, angeke ayekeliswe kuba nguFakazi.’ Yini lekabi ngekucabanga lokunjalo?​—Jak. 1:22.

13. Kuhlehlisa kubhajatiswa kutakwenta ungalandzisi yini kuJehova? Chaza.

¹³ Kuliciniso kutsi batali labangemaKhristu angeke bavume kutsi umntfwana wabo abhajatiswe abe angakakhuli ngalokwenele kutsi angatinikela. Noma kunjalo, kuliphutsa kucabanga kutsi umntfwana ngeke alandzise kuJehova ngoba angakabhajatiswa. Kungani? Kulandzisa kuJehova akuyi ngekutsi ubhajatisiwe yini noma cha. Esikhundleni saloko, umntfwana utawulandzisa kuNkulunkulu nangabe akwati lokulungile nalokungakalungi. (Fundza Jakobe 4:17.) Ngako esikhundleni sekuvimbela bantfwana babo kutsi babhajatiswe, batali labahlakaniphile balwela kuba sibonelo lesihle kubantfwana babo. Bafuna kubafundzisa kusukela basebancane kutsi batitsandze ngalokusuka enhlitiyweni timiso taJehova letiphakeme tekutiphatsa. (Luk. 6:40) Loko kutabavikela kakhulu bantfwana bakho, futsi kutabakhutsata kutsi baphile ngekuvumelana netindlela taJehova letilungile.​—Isa. 35:8.

14. Labadzala bangabalekelela njani batali ekusiteni bantfwana babo kutsi batfutfuke baze babhajatiswe?

¹⁴ Njengebelusi, labadzala belibandla bangasifaka sandla ekusiteni batali ngekutsi bakhulume kahle ngemigomo yekukhonta Nkulunkulu. Lomunye dzadze lowakhonta njengelihlahlandlela iminyaka lengetulu kwa-70 ukhumbula indlela lokwamsita ngayo kucoca neMzalwane Charles T. Russell ngesikhatsi aneminyaka lengu-6 budzala. Watsi: “Kwaphela imizuzu lengu-15 sicoca ngemigomo yami yekukhonta Nkulunkulu.” Emavi lakahle nalakhutsatako angaba nemiphumela lemihle nalehlala njalo. (Taga 25:11) Labadzala bangaphindze bacele batali kanye nebantfwana babo kutsi bahlanganyele emisebentini leyentiwa emaHholweni eMbuso, futsi babele labasebasha imisebenti letsite kuye ngemakhono kanye neminyaka yabo.

15. Ngutiphi tindlela emalunga elibandla langakhutsata ngato bantfu labasebasha?

¹⁵ Emalunga elibandla angasita ngekutsi akhombise kubanaka bantfu labasebasha. Loku kufaka ekhatsi nekutinaka tintfo letikhombisa kutsi bayatfutfuka. Losemusha uke washo imphendvulo lesuka enhlitiyweni nalecatjangelwe kahle yini noma uke wabeka inkhulumo emhlanganweni losekhatsi neliviki? Ukhonile yini kubhekana neluvivinyo lwekwetsembeka kwakhe ngalokuphumelelako noma walisebentisa kahle litfuba lekufakaza esikolweni? Kufanele sisheshe sibancome ngalokusuka enhlitiyweni bantfu labasebasha. Singakwenta umgomo wetfu kutsi sitinike sikhatsi sekubanaka bantfu labasebasha, sicoce nabo ngaphambi nangemuva kwemhlangano. Nasenta njalo, labasha batawubona kutsi bayincenye ‘yelibandla lelikhulu.’​—Hla. 35:18.

16, 17. (a) Kubaluleke ngani kutsi bantfwana babhajatiswe? (b) Nguyiphi injabulo batali labangemaKhristu labalwela kuyitfola? (Buka sitfombe lesisekucaleni kwalesihloko.)

¹⁶ Kukhulisa umntfwana ‘ngekumyala nangesicondziso saJehova’ kulilungelo lelikhulu umtali longumKhristu langaba nalo. (Ef. 6:4; Hla. 127:3) Ngalokungafani nebantfwana besive sema-Israyeli, bantfwana bemaKhristu lamuhla abatalwa bayincenye yebantfu labatinikele kuJehova. Ngetulu kwaloko, lutsandvo ngaNkulunkulu nangeliciniso akuzuzwa njengelifa. Kusukela ngelilanga umntfwana latalwa ngalo, batali kufanele batibekele umgomo wekumenta umfundzi, futsi bamsite kutsi atinikele kuJehova aphindze abhajatiswe. Kute lokubaluleke kakhulu kwendlula loku. Kutinikela, kubhajatiswa kanye nekukhonta Nkulunkulu ngiko lokutasisita sisindze ekuhluphekeni lokukhulu lokutako.​—Mat. 24:13.

¹⁷ Ngesikhatsi Blossom Brandt ancuma kutsi ufuna kubhajatiswa, batali bakhe labesaba Nkulunkulu bebafuna kuciniseka kutsi abekulungele kutsatsa lesinyatselo lesibaluleke kakhulu ekuphileni kwakhe. Nasebaciniseka kutsi ukulungele, basisekela sincumo sakhe. Ngebusuku bangaphambi kwekubhajatiswa kwakhe, babe wakhe wenta intfo lenhle kakhulu. Blossom watsi: “Babe watsi asiguce, wase uyathantaza. Watjela Jehova kutsi ujabule kakhulu ngesincumo sendvodzakati yakhe sekutinikela kuye.” Ngemuva kweminyaka lengetulu kwalengu-60, Blossom watsi: “Ungaciniseka kutsi noma kungendlula sikhatsi lesingakanani, angisoze ngabukhohlwa lobo busuku.” Shengatsi nani batali ningatfola injabulo nekwenetiseka lokuletfwa kubona bantfwana benu batinikela kuJehova futsi baba tinceku takhe letibhajatisiwe.