Abebatsandza Bantfu

1, 2. Jesu ulukhombise njani lutsandvo lolujulile ngebantfu?

LITUBULO laNkulunkulu lisibonelo lesihamba embili sekuhlakanipha kwaJehova futsi ‘beliyingcweti yekwakha’ emsebenti weYise. Cabanga ngendlela Jesu labekajabule ngayo futsi enetiseke ngayo ngesikhatsi uYise “amisa emazulu” futsi “abeka tisekelo temhlaba.” Kodvwa kuto tonkhe tintfo letadalwa nguYise, Jesu ‘abejabulela bonkhe bantfu.’ (Taga 8:22-31) Abebatsandza bantfu kusukela ekucaleni.

² Ngekuhamba kwesikhatsi, Jesu wakhombisa kwetsembeka nelutsandvo kuYise nakubo bonkhe bantfu, ngesikhatsi ashiya lizulu ngekutitsandzela futsi eta emhlabeni angumuntfu. Jesu wakwenta ngelutsandvo loko kute anikele ngekuphila kwakhe kube “yinhlawulo yalabanyenti.” (Matewu 20:28; Filiphi 2:5-8) Ngesikhatsi asemhlabeni, Nkulunkulu wamnika emandla ekwenta timangaliso. Letimangaliso tiveta indlela Jesu labebatsandza ngayo bantfu tiphindze tikhombise netintfo letinhle latabentela tona ngekushesha.

 3. Sitawufundza ngani kulesihloko?

³ Ngesikhatsi esemhlabeni, Jesu washumayela ‘tindzaba letimnandzi teMbuso waNkulunkulu.’ (Lukha 4:43) Bekati kutsi loMbuso utawungcwelisa libito leYise uphindze ucatulule tinkinga tebantfu phakadze. Njengobe abeshumayela, abenta timangaliso letinyenti. Letimangaliso takhombisa kutsi ubakhatsalela bonkhe bantfu. Kungani loko kubalulekile kitsi? Kungobe loko lakwenta kusiniketa litsemba kuphindze kusicinisekise ngelikusasa. Ase sicoce ngetimangaliso letine letentiwa nguJesu.

 4. Yini leyenteka ngesikhatsi Jesu ahlangana nendvodza leyayinebulephelo?

⁴ Ngesikhatsi asemsebentini wekushumayela, Jesu waya endzaweni lebitwa ngekutsi yiGalile. Kulelinye lemadolobha alapho, wahlangana nendvodza lebeyinesifo lesibi sebulephelo. (Makho 1:39, 40) Lendvodza yayibangwa netibi kangangekutsi Lukha lobekangudokotela wayichaza ngekutsi ‘beyigcwele bulephelo.’ (Lukha 5:12) LiBhayibheli litsi ngesikhatsi lendvodza lebeyigula ibona Jesu, “yaguca embikwakhe yamncenga yatsi: ‘Nkhosi, nawutsandza ungangenta ngihlanteke.’” Lendvodza beyati kutsi Jesu unemandla ekuyelapha, kodvwa beyifuna kwati kutsi uyafuna yini. Kungani? Kungobe lendvodza yayetayele baFarisi labebambukela phansi umuntfu lonebulephelo. Abecabangani Jesu? Abetayiphatsa njani lendvodza lokungenteka beseyichwalile? Yini wena lobewungayenta?

 5. Kungani Jesu abefuna kwelapha lendvodza lebeyinebulephelo?

⁵ Kungenteka lendvodza lebeyigula ayizange imemete itsi: “Ngingcolile, ngingcolile!” njengobe bekusho uMtsetfo waMosi. (Levithikhusi 13:43-46) Kodvwa Jesu akazange atfukutsele. Esikhundleni saloko, abeyivela futsi afuna kuyisita. Asati ngalokucondzile kutsi yini Jesu labeyicabanga, kodvwa siyayati indlela lativa ngayo. Wayivela buhlungu lendvodza waze wenta simangaliso. Wayitsintsa, lokwakuyintfo labanye bantfu lebebangeke bayente. Ngekuciniseka nangemusa, Jesu watsi: “Ngiyatsandza, hlanteka.” Ngemuva kwaloko “lobulephelo baphela.” (Lukha 5:13) Kuyacaca-ke kutsi Jehova wanika Jesu emandla ekwenta lesimangaliso newekukhombisa indlela labebatsandza ngayo bantfu.​—Lukha 5:17.

 6. Yini lejabulisako ngetimangaliso taJesu, futsi tisikhombisani?

⁶ Ngemandla aNkulunkulu, Jesu wenta timangaliso letinyenti letinhle. Akelaphanga nje bantfu lebebanebulephelo kuphela, kodvwa waphindze welapha bantfu lebebanetifo letinyenti letehlukahlukene. LiBhayibheli lisitjela kutsi bantfu bamangala nababona “timungulu tikhuluma, tinchute tihamba kahle, netimphumphutse tibona.” (Matewu 15:31) Nakelapha lotsite, Jesu abengadzingi umuntfu lophile kahle kuze anikele ngetitfo takhe temtimba. Abenemandla ekwelapha titfo temtimba letigulako. Abebalapha ngekucwabita kweliso bantfu, ngalesinye sikhatsi elapha ngisho nalabo lebebakhashane naye. (Johane 4:46-54) Letibonelo letinhle tisikhombisani? Tisikhombisa kutsi iNkhosi yetfu Jesu Khristu inemandla kanye nesifiso sekususa konkhe kugula phakadze. Nasifundza ngendlela Jesu labaphatsa ngayo bantfu, sitfola sicinisekiso sekutsi eveni lelisha ‘utawubanesihe kulababutsakatsaka nalabeswele.’ (Tihlabelelo 72:13) Jesu utawelapha bonkhe labagulako ngobe utawube afuna kubelapha.

7, 8. Chaza loko lokwenteka ngaphambi kwekutsi Jesu ahlangane nendvodza lebeyigula eBhethesda.

⁷ Etinyangeni letimbalwa ngemuva kwekwelapha lendvodza leyayinebulephelo, Jesu wesuka eGalile waya eJudiya lapho efika wachubeka khona nemsebenti wekushumayela tindzaba letimnandzi teMbuso waNkulunkulu. Kungenteka kutsi babatinkhulungwane bantfu labeva umlayeto wakhe futsi batsintfwa lutsandvo lababonisa lona. Jesu abefuna mbamba kudvudvuta labahluphekako nalabacindzetelekile futsi abanike litsemba.​—Isaya 61:1, 2; Lukha 4:18-21.

⁸ Ngenyanga yaNisan, Jesu wahamba waya eJerusalema kute ayogubha liPhasika. Lelidolobha laliphitsitela njengobe bantfu bebete kulomkhosi lobalulekile. Enyakatfo nelithempheli bekunelichibi lebelibitwa ngekutsi yiBhethesda, lapho Jesu ahlangana khona nendvodza lebeyingakwati kuhamba.

9, 10. (a) Kungani bantfu bebaya echibini lebelibitwa ngekutsi yiBhethesda? (b) Yini Jesu layenta nakefika kulelichibi, futsi loko kusifundzisani? (Buka sitfombe lesisekucaleni kwalesihloko.)

⁹ Ticumbi tebantfu labagulako betivame kuya eBhethesda. Kungani? Kungobe beticabanga kutsi umuntfu logulako angelapheka ngalokusimangaliso nakangena kulelichibi nangabe lamanti ahlubhutela. Cabanga ngesiphitsiphitsi lesasilapho njengobe bantfu labanyenti bebakhatsatekile futsi bacindzetelekile ngobe bafuna kwelashwa. Jesu abete sono futsi abengakudzingi kwelashwa, kodvwa kungani bekete kulendzawo? Kungobe bekabatsandza bantfu. Kulapho ahlangana khona nendvodza lebeseyigule sikhatsi lesidze kunaleso labekasiphilile emhlabeni.​—Fundza Johane 5:5-9.

¹⁰ Jesu wabuta lendvodza kutsi iyafuna yini kuphindze ihambe. Cabanga ngelusizi lwalendvodza njengobe itjela Jesu kutsi iyafuna kwelashwa kodvwa ayiboni kutsi ingelashwa njani ngobe kute longayifaka kulelichibi. Jesu watjela lendvodza kutsi yente intfo lengacabangeki. Wayitjela kutsi ayitsatse luhlaka lwayo ihambe. Ngako-ke lendvodza yatsatsa luhlaka lwayo yase iyahamba. Lesimangaliso sisicinisekiso lesihle saloko Jesu latakwenta eveni lelisha. Sikhombisa lutsandvo lolujulile Jesu lanalo ngebantfu. Abebafuna labo labadzinga lusito. Sibonelo saJesu kufanele sisikhutsate kutsi sichubeke sifuna bantfu labasensimini yetfu labacindzetelekile nalabakhatsatwa tintfo letimbi letenteka kulelive.

11. Makho 5:25-34 ukhombisa njani kutsi Jesu abebatsandza bantfu labagulako?

¹¹ Fundza Makho 5:25-34. Kwaphela iminyaka lengu-12 umfati lotsite aphetfwe sifo lebesimenta ative anemahloni. Lokugula bekutsintsa kuphila kwakhe konkhe, lokufaka ekhatsi nendlela yakhe yekukhonta. Waya kubodokotela labanyenti futsi wacitsa imali lenyenti etama kutelaphisa, kodvwa bekubanhlanga temuka nemoya. Ngalelinye lilanga, lomfati waba nelicebo lelisha lebelitamsita kutsi elapheke, ngako wangena esicumbini sebantfu futsi watsintsa ingubo yaJesu. (Levithikhusi 15:19, 25) Ngesikhatsi Jesu eva kutsi emandla aphumile kuye, wabuta kutsi ngubani lomtsintsile. Lomfati “wetfuka futsi wesaba” “waguca embikwakhe, wase umtjela lonkhe liciniso.” Jesu bekati kutsi Jehova abesavele amelaphile lomfati, ngako-ke ngemusa watsi kuye: “Ndvodzakati, kukholwa kwakho kukuphilisile. Hamba kahle, ngobe sewuphilile ekuguleni kwakho.”

12. (a) Usebentisa loko lesesikufundzile, ungamchaza njani Jesu? (b) Jesu wasibekela siphi sibonelo?

¹² Kusidvudvuta kakhulu kubona indlela Jesu labebatsandza ngayo bantfu, ikakhulukati labo lebebagula. Sathane ufuna sicabange kutsi asikabaluleki nekutsi kute umuntfu lositsandzako. Nanobe kunjalo, timangaliso taJesu tisikhombisa kutsi unendzaba natsi kanye netinkinga tetfu. Sijabula kakhulu ngekuba neNkhosi nemPhristi Lophakeme lositsandzako. (Hebheru 4:15) Kungase kube matima kucondza imiva yalotsite losagule sikhatsi lesidze, ikakhulukati nangabe singaguli. Kodvwa cabanga ngaJesu. Abeneluvelo ngebantfu labagulako nanobe yena angazange agule. Shengatsi singenta konkhe lokusemandleni etfu kute silingise sibonelo sakhe selutsandvo.​—1 Phetro 3:8.

13. Kuvuswa kwaLazaru kusikhombisani ngaJesu?

¹³ Jesu abetsintseka kakhulu nakabona buhlungu balabanye. Nasi sibonelo: Ngesikhatsi umngani wakhe Lazaru sekafile, Jesu “walila” futsi “wadzabuka” njengobe abebona tihlobo nebangani baLazaru beva buhlungu. (Fundza Johane 11:33-36.) Wakhala, nanobe bekati kutsi utawumvusa Lazaru. Bekangesabi kutsi labanye babone indlela labetiva ngayo. Abemtsandza Lazaru kanye nemndeni wakubo kangangekutsi waze wasebentisa emandla aNkulunkulu kute amvuse.​—Johane 11:43, 44.

14, 15. (a) Yini lekhombisa kutsi Jehova ufuna kukususa kuhlupheka kwebantfu? (b) Yini lesiyifundza egameni lelitsi “labasemathuneni”?

¹⁴ LiBhayibheli lichaza kutsi Jesu ufana ncamashi neYise, lokunguJehova. (Hebheru 1:3) Ngako-ke timangaliso taJesu tikhombisa kutsi Jehova naye ufuna kususa kugula, buhlungu kanye nekufa. Madvute, Jehova naJesu batawuvusa bantfu labanyenti labafile. Jesu watsi “sikhatsi siyeta lapho bonkhe labasemathuneni” batawuvuswa.​—Johane 5:28, 29.

¹⁵ Jesu wasebentisa ligama lelitsi “labasemathuneni,” lokukhombisa kutsi inkhumbulo yaJehova inencenye. Nkulunkulu Somandla, longuMdali wendalo yonkhe, angakhumbula yonkhe imininingwane yetihlobo tetfu lesitintsandzako, lokufaka ekhatsi nebuntfu bato. (Isaya 40:26) Jehova ngeke agcine ngekukhona kutikhumbula nje kuphela kodvwa uyafuna kutikhumbula. Tindzaba letiseBhayibhelini letimayelana neluvuko titibonelo letinhle taloko lokutawenteka eveni lelisha.

16. Nguliphi litfuba tinceku taNkulunkulu letitaba nalo?

¹⁶ Nangabe sitawuchubeka setsembekile, kungenteka sibe nelitfuba lekubona lesinye setimangaliso letinhle, lokukusindza ekuhluphekeni lokukhulu! Ngekushesha nje ngemuva kwe-Amagedoni, sitawubona letinye timangaliso letinyenti. Ngaleso sikhatsi, bonkhe bantfu batawuba nemphilo lenhle. (Isaya 33:24; 35:5, 6; Sembulo 21:4) Ticabange ubona bantfu balahla tibuko tabo temehlo, ludvondvolo, timboko, tihlalo talabakhubatekile kanye netintfo letisita labangeva etindlebeni kutsi beve. Jehova uyati kutsi bonkhe labatawusindza e-Amagedoni kufanele baphile saka ngobe batawube banemsebenti lomnyenti lokufanele bawente. Ngibo labatawugucula likhaya letfu lelihle lelingumhlaba kutsi libe yipharadisi.​—Tihlabelelo 115:16.

17, 18. (a) Kungani Jesu enta timangaliso? (b) Kungani kufanele wente konkhe lokudzingekile kute ube seveni lelisha laNkulunkulu?

¹⁷ “Sicumbi lesikhulu” lamuhla siyakhutsateka nasifundza ngendlela Jesu labebalapha ngayo labagulako. (Sembulo 7:9) Letimangaliso ticinisa litsemba letfu lelihle lelimayelana nekulashwa ngalokuphelele esikhatsini lesitako. Tiphindze tikhombise indlela iNdvodzana yaNkulunkulu lelitubulo lebatsandza ngayo bantfu. (Johane 10:11; 15:12, 13) Umusa lomkhulu waJesu ukhombisa lutsandvo lolujulile Jehova lanalo ngenceku yakhe ngayinye.​—Johane 5:19.

¹⁸ Live lamuhla ligcwele buhlungu, kuhlupheka kanye nekufa. (Roma 8:22) Kungaleso sizatfu sidzinga live lelisha laNkulunkulu. Kulelo live, bonkhe bantfu batawuba nemphilo lenhle Nkulunkulu labetsembise yona. Malakhi 4:2 usicinisekisa ngekutsi ‘sitawutjakadvula njengemankhonyane,’ futsi sijabule ngobe sitawube sesilashiwe saphindze sakhululeka ekubeni nesono. Shengatsi kubonga kwetfu ngaJehova kanye nekukholwa kwetfu etetsembisweni takhe, kungasikhutsata kutsi sente konkhe lokusemandleni etfu kute singene eveni lelisha. Kusikhutsata kakhulu kwati kutsi timangaliso Jesu latenta titibonelo tenkhululeko yaphakadze bantfu labatayijabulela madvute nasekabusa.