SIFUNDVO 59
Ungahlala Wetsembekile Ngisho Nobe Bantfu Bakuphatsa Kabi
Bantfu batawetama kusiyekelisa kukhonta Jehova, baze basiphatse kabi. Kufanele kusetfuse yini loko?
1. Yini leyenta silindzele kuphatfwa kabi?
LiBhayibheli litsi: “Bonkhe labafuna kuphila ngekutinikela kuNkulunkulu ebunyeni naKhristu Jesu, nabo batawuphatfwa kabi.” (2 KuThimothi 3:12) Jesu waphatfwa kabi ngobe bekangesiyo incenye yelive laSathane. Natsi asisiyo incenye yalelive, ngako asimangali nasiphatfwa kabi bohulumende netinhlangano tenkholo.—Johane 15:18, 19.
2. Yini lesingayenta kuze silungele kuphatfwa kabi?
Kufanele simetsembe kakhulu Jehova nyalo. Tinike sikhatsi sekuthantaza nekufundza liVi lakhe onkhe malanga. Bani khona njalo emihlanganweni yelibandla. Konkhe loku kutakusita ube nesibindzi sekubhekana nekuphatfwa kabi, ngisho nobe uphatfwa kabi ngemalunga emndeni. Umphostoli Pawula lowaphatfwa kabi tikhatsi letinyenti wabhala watsi: “Jehova ungumsiti wami; angeke ngesabe.”—KumaHebheru 13:6.
Kushumayela njalo kungasisita kutsi sibe nesibindzi. Kushumayela kusifundzisa kutsi simetsembe Jehova futsi sincobe kwesaba bantfu. (Taga 29:25) Kuba nesibindzi sekushumayela nyalo, kutakusita uchubeke ushumayela ngisho nobe hulumende angavimba umsebenti wetfu.—1 KubaseThesalonika 2:2.
3. Kusizuzisa ngani kuchubeka setsembekile kuJehova nasiphatfwa kabi?
Kuliciniso kutsi asikujabuleli kuphatfwa kabi, kodvwa nangabe sicinisela nasiphatfwa kabi, kukholwa kwetfu kuyacina. Sisondzela kakhulu kuJehova nasibona indlela lasisita ngayo nasiphelelwa ngemandla. (Fundza Jakobe 1:2-4.) Jehova uva buhlungu nakasibona sihlupheka, kodvwa uyajabula nakasibona sicinisela. LiBhayibheli litsi: “Nangabe ubeketelela kuhlushwa ngobe wenta lokulungile, loku kuhle kuNkulunkulu.” (1 Phetro 2:20) Nasihlala setsembekile, Jehova utasinika kuphila lokuphakadze emhlabeni lomusha. Ngaleso sikhatsi, bonkhe labatawube baphila batawukhonta Jehova futsi kute lotobaphikisa.—Matewu 24:13.
CHUBEKA UFUNISISA
Fundza kutsi sisho ngani kutsi singahlala setsembekile kuJehova ngisho nobe bantfu basiphatsa kabi, nekutsi Jehova utasibusisa njani.
4. Ungacinisela nawuphatfwa kabi ngemalunga emndeni wakho
Jesu bekati kahle kutsi lamanye emalunga emindeni yetfu angahle angajabuli nasikhonta Jehova. Fundza Matewu 10:34-36, bese nicoca ngalombuto:
Yini emalunga emndeni langayisho nobe ayente nangabe lotsite akhetsa kukhonta Jehova?
Kuze ubone sibonelo saloko, dlala le-VIDEO, bese nicoca ngalombuto lolandzelako.
Yini longayenta nangabe sihlobo sakho nobe umngani etama kukuyekelisa kukhonta Jehova?
Fundza Tihlabelelo 27:10 naMakho 10:29, 30. Ngemuva kwekufundza umbhalo ngamunye, cocani ngalombuto:
Lesetsembiso singakusita njani nangabe uphikiswa ngemalunga emndeni nobe bangani?
5. Chubeka ukhonta Jehova ngisho nobe uphatfwa kabi
Kudzingeka sibe nesibindzi kuze sikhonte Jehova nangabe labanye betama kusiyekelisa. Dlala le-VIDEO, bese nicoca ngalombuto lolandzelako.
Tikucinisa njani tibonelo letikule-video?
Fundza Imisebenti 5:27-29 naKumaHebheru 10:24, 25. Ngemuva kwekufundza umbhalo ngamunye, cocani ngalombuto:
Kungani kubaluleke kakhulu kuchubeka sikhonta Jehova ngisho kushumayela nobe imihlangano ivinjelwe?
6. Jehova utakusita kutsi ucinisele
BoFakazi BaJehova labasemhlabeni wonkhe futsi bebudzala lobehlukene bachubekile bakhonta Jehova ngekwetsembeka ngisho nobe baphatfwa kabi. Kuze ubone kutsi yini lebasitile, dlala le-VIDEO, bese nicoca ngalombuto lolandzelako.
Kule-video, yini lesite laboFakazi kutsi bacinisele?
Fundza KubaseRoma 8:35, 37-39 naKubaseFiliphi 4:13. Ngemuva kwekufundza umbhalo ngamunye cocani ngalombuto:
Lombhalo ukucinisekisa njani kutsi ungakhona kubeketelela nobe nguluphi luvivinyo?
Fundza Matewu 5:10-12, bese nicoca ngalombuto:
Kungani ungajabula ngisho nobe uphatfwa kabi?
Tigidzi taBoFakazi BaJehova tikhonile kuchubeka timkhonta ngekwetsembeka ngisho nobe tiphikiswa. Nawe ungakhona!
LABANYE BANTFU BATSI: “Angeke ngikhone kubeketelela kuphatfwa kabi.”
Ngumiphi imibhalo lengabaniketa sibindzi labasidzingako?
LOKO LESICOCE NGAKO
Jehova uyajabula ngemetamo lesiyentako yekumkhonta nanobe siphatfwa kabi. Ngekusitwa nguye, singakhona kucinisela!
Yini Loyifundzile?
Kungani emaKhristu kufanele akulindzele kuphatfwa kabi?
Yini longayenta nyalo kuze ukulungele kuphatfwa kabi?
Yini lengakusita uciniseke kutsi ungakhona kukhonta Jehova ngisho nobe uvivinywa?
LOKUNYE LONGAKUHLOLA
Bukela lomunye umzalwane losemusha achaza indlela Jehova lamsite ngayo kutsi acinisele ngesikhatsi aboshelwe kungalutsatsi luhlangotsi.
Buka loko lokwasita labanye labashadene kutsi bakhonte Jehova ngekwetsembeka iminyaka leminyenti nanobe bebaphikiswa.
Fundza kutsi yini lengakusita ube nesibindzi nawuphatfwa kabi.
“Tilungiselele Nyalo Kubeketelela Lushushiso” (Sicongosekulindza, saJuly 2019)
Kufanele sikutsatse njani kuphikiswa ngemalunga emndeni wetfu, futsi singabhekana njani nako?
“Liciniso Aliletsi ‘Kuthula Kodvwa Liletsa Inkemba’” (Sicongosekulindza, sa-October 2017)