Tilungiselele Nyalo Kubeketelela Lushushiso

 1. Kungani kufanele sikulungele kushushiswa?

NGEBUSUKU bangaphambi kwekufa kwakhe, Jesu watsi bonkhe bantfu labakhetsa kuba balandzeli bakhe batawuzondwa. (Joh. 17:14) Kuze kube ngunyalo, BoFakazi BaJehova labetsembekile bahlushwa bantfu labamelene nekukhonta kweliciniso. (2 Thim. 3:12) Silindzele kutsi titsa tetfu tisihluphe kakhulu njengobe kuphela kwalelive kusondzela.—Mat. 24:9.

2-3. (a) Yini lokufanele siyati mayelana nekwesaba? (b) Sitawucoca ngani kulesihloko?

² Yini lesingayenta kute silungele kubeketelela lushushiso? Akudzingeki size setame kucabanga ngato tonkhe tintfo letingenteka kitsi. Nasingenta njalo singafikelwa kwesaba futsi sikhatsateke. Loko kungasenta siyekele kukhonta Jehova ngisho lushushiso lusengakefiki. (Taga 12:25; 17:22) Kwesaba kusikhali lesinemandla “sitsa setfu Sathane” lesisisebentisako kute sisihlasele. (1 Phet. 5:8, 9) Yini lesingayenta nyalo kute sitilungiselele lushushiso?

³ Kulesihloko sitawucoca ngekutsi singabucinisa njani buhlobo betfu naJehova kanye nekutsi kubaluleke ngani kutsi loko sikwente nyalo. Sitawuphindze sicoce ngekutsi yini lesingayenta kute sibe nesibindzi. Ekugcineni sitawuhlola kutsi yini lokufanele siyente nangabe bantfu labasiphikisako basenyanya.

 4. Ngekusho kwemBhalo waHebheru 13:5, 6, yini lokufanele siciniseke ngayo?

⁴ Ciniseka kutsi Jehova uyakutsandza futsi angeke akushiye. (Fundza Hebheru 13:5, 6.) Eminyakeni leminyenti leyendlulile lesinye Sicongosekulindza satsi: “Umuntfu lomati kahle Nkulunkulu utawumetsemba kakhulu nakufika lushushiso.” Lamavi aliciniso. Kuze sikhone kubeketelela lushushiso, kufanele simtsandze Jehova futsi simetsembe kakhulu, singangabati kutsi uyasitsandza.—Mat. 22:36-38; Jak. 5:11.

 5. Yini letakusita ubone kutsi Jehova uyakutsandza?

⁵ Fundza liBhayibheli onkhe malanga futsi utibekele umgomo wekusondzela kuJehova. (Jak. 4:8) Nawufundza liBhayibheli naka buntfu baJehova lobuhle netento takhe bese wetama kucondza kutsi ukutsandza kangakanani. (Eks. 34:6) Labanye bakutfola kumatima kukholelwa kutsi Jehova uyabatsandza ngobe abati kutsi kunjani kutsandvwa. Nangabe utiva ngaleyondlela, njalo ngelilanga yetama kubala tindlela Jehova lakubonise ngato umusa kanye neluvelo. (Hla. 78:38, 39; Rom. 8:32) Nawucabanga ngalokwenteke ekuphileni kwakho futsi uzindla ngalokufundza eBhayibhelini, utawukhona kubala tintfo letinyenti Jehova lakwentele tona. Buhlobo bakho naJehova butawucina kakhulu nangabe umbonga ngetintfo lakwentela tona.—Hla. 116:1, 2.

 6. Ngekusho kwemBhalo weTihlabelelo 94:17-19, kungakusita njani kuthantaza ngalokusuka enhlitiyweni?

⁶ Thantaza njalo. Cabanga ngemfana lomncane logonwe ngubabe wakhe. Lomfana utiva avikelekile futsi akesabi kutjela babe wakhe tintfo letinhle naletimbi letenteke ngalelo langa. Nawe ungativa ngendlela lefanako nangabe uthantaza onkhe malanga kuJehova. (Fundza Tihlabelelo 94:17-19) Nawuthantaza kuJehova, “tfulula inhlitiyo yakho njengemanti,” umtjele tonkhe tintfo letikwenta wesabe futsi ukhatsateke. (Sil. 2:19) Utawuba yini umphumela? LiBhayibheli litsi utawuba ‘nekuthula kwaNkulunkulu lokwendlula konkhe kucondza.’ (Fil. 4:6, 7) Nawuthantaza ngalendlela utawusondzela kakhulu kuye.—Rom. 8:38, 39.

 7. Kungani kufanele siciniseke kutsi tetsembiso teMbuso waNkulunkulu titawufezeka mbamba?

⁷ Ciniseka kutsi tibusiso letitawuletfwa nguMbuso waNkulunkulu titawuba khona mbamba. (Num. 23:19) Nangabe ungatikholwa letetsembiso kutawuba melula ngaSathane nebantfu bakhe kutsi bakwesabise. (Taga 24:10; Heb. 2:15) Yini longayenta nyalo kute utetsembe kakhulu tintfo letitawentiwa nguMbuso waNkulunkulu? Tinikete sikhatsi sekucwaninga ngaloko Nkulunkulu letsembisa kukwenta ngeMbuso wakhe, ucwaninge nangetizatfu letikwenta umetsembe. Kutakusita ngani loko? Cabanga ngaStanley Jones lowaboshwa iminyaka lengu-7 ngenca yekukholwa kwakhe.b Yini leyamsita kutsi ahlale etsembekile? Utsi: “Kukholwa kwami bekucinile ngobe bengiwati uMbuso waNkulunkulu ngikwati loko lotawukwenta futsi bengiciniseka kutsi tetsembiso tawo titawugcwaliseka mbamba. Kute umuntfu labengakhona kungiyekelisa kukhonta Jehova.” Nangabe unekukholwa lokucinile etetsembisweni taNkulunkulu, utawusondzela kakhulu kuye futsi ngeke uyekele kumkhonta ngenca yekwesaba.—Taga 3:25, 26.

 8. Kuba khona kwetfu emihlanganweni kuvetani ngatsi? Chaza.

⁸ Bani khona njalo emihlanganweni yebuKhristu. Imihlangano isisita sisondzele kakhulu kuJehova. Kuba khona kwetfu emihlanganweni ngiko lokutawuncuma kutsi sitawukhona yini kuphumelela nasibhekana nekushushiswa esikhatsini lesitako. (Heb. 10:24, 25) Kungani sisho njalo? Nangabe nyalo sivumela tintfo letincane tisivimbe singabi khona emihlanganweni, esikhatsini lesitako sitawukhona yini kutifaka engotini kute sihlangane nebazalwane? Nangabe sitimisela kuba khona emihlanganweni, angeke siyekele kuya kuyo nangabe bantfu labasiphikisako betama kusivimba kutsi sihlangane. Nyalo sikhatsi sekutsi siyitsandze kakhulu imihlangano yetfu ngobe nangabe siyitsandza angeke sivumele kuphikiswa kanye nekuvinjelwa nguhulumende kusente silalele bantfu kunekulalela Nkulunkulu.—Imis. 5:29.

 9. Kungani kwati imiBhalo ngenhloko kuyindlela lekahle yekulungiselela lushushiso?

⁹ Yati ngenhloko imibhalo loyitsandzako. (Mat. 13:52) Kuliciniso kutsi site inkhumbulo lephelele kodvwa Jehova angasebentisa umoya wakhe lonemandla kute asikhumbute imiBhalo lesiyitsandzako. (Joh. 14:26) Lomunye umzalwane lowaboshwa e-East Germany futsi wavalelwa yedvwa watsi: “Kwaba sibusiso lesikhulu kakhulu kutsi ngaphambi kwekutsi ngiboshwe bengati imiBhalo leminyenti ngenhloko. Njengobe bengingedvwa bengihlale ngicabangisisa ngetindzaba letehlukahlukene letiseBhayibhelini.” LemiBhalo yasita umzalwane wetfu kutsi ahlale anebuhlobo lobuhle naJehova futsi etsembekile kuye.

10. Kungani kufanele sitibambe ngenhloko tingoma teMbuso?

¹⁰ Khumbula tingoma tekudvumisa Jehova futsi utihlabele. Ngesikhatsi boPawula naBanabasi baboshiwe eFiliphi bahlabela tingoma tekudvumisa Jehova lebebatikhumbula. (Imis. 16:25) Kwenteka lokufanako ngesikhatsi bazalwane baseSoviet Union batfunjelwa eSiberia. Yini leyabasita kutsi bahlale bacinile? Dzadze Mariya Fedun watsi: “Sahlabela tonkhe tingoma teMbuso lebesitikhumbula.” Waphindze watsi letingoma tabakhutsata bonkhe futsi tabasita kutsi bahlale basondzelene naJehova. Uyakhutsateka yini nawuhlabela tingoma tekudvumisa Jehova lotitsandzako? Nangabe kunjalo yetama kutibamba ngenhloko nyalo.—Buka libhokisi lelitsi “Ngiphe Sibindzi”.

11-12. (a) Ngekusho kwemBhalo wa-1 Samuweli 17:37, 45-47, yini leyenta Davide waba nesibindzi? (b)  Ngusiphi sifundvo lesibalulekile lesisifundza kuDavide?

¹¹ Kudzingeka ube nesibindzi kute ukhone kubeketelela lushushiso. Yini longayenta nangabe ubona ngatsi ute sibindzi? Khumbula kutsi kuba nesibindzi akuyi ngebukhulu bemtimba wakho, emandla lonawo nome emakhono akho. Cabanga ngaDavide nakabhekene naGoliyathi. Nakacatsaniswa nalesidlakela Davide bekamncane, angenamandla futsi bekangakahlomi ngalokuphelele. Davide bekangakaphatsi ngisho nenkemba. Nobe kunjalo bekanesibindzi. Ngesibindzi Davide wagijima wayolwa nalesidlakela.

¹² Yini leyenta Davide waba nesibindzi? Bekaciniseka ngalokuphelele kutsi Jehova utamsita. (Fundza 1 Samuweli 17:37, 45-47.) Davide akazange anake kutsi Goliyathi bekamkhulu kangakanani kunaye. Kodvwa wanaka kutsi Goliyathi bekamncane kakhulu nakacatsaniswa naJehova. Yini lesiyifundzako kulendzaba? Sitawuba nesibindzi nangabe sati kutsi Jehova utasisita futsi siciniseka kutsi titsa tetfu tincane kakhulu naticatsaniswa naNkulunkulu longuSomandla. (2 Khr. 20:15; Hla. 16:8) Yini lesingayenta nyalo kuze sibe nesibindzi nakufika lushushiso?

13. Yini lesingayenta kute sibe nesibindzi? Chaza.

¹³ Singaba nesibindzi nangabe sicocela labanye tindzaba letimnandzi teMbuso waNkulunkulu. Kungani sisho njalo? Kungobe kushumayela kusifundzisa kutsi setsembele kuJehova futsi sincobe kwesaba bantfu. (Taga 29:25) Njengobe sicinisa imisipha nangabe sijima, ngendlela lefanako siba nesibindzi lesikhulu nangabe sishumayela emtini ngemuti, etindzaweni tawonkhewonkhe, etindzaweni temabhizinisi, futsi sifakaza singakahleli. Nangabe sishumayela ngesibindzi nyalo, sitawukhona kuchubeka sishumayela ngisho nome umsebenti wetfu sewuvinjelwe.—1 Thes. 2:1, 2.

14-15. Yini lesiyifundza kuNancy Yuen nakuValentina Garnovskaya?

¹⁴ Kunyenti lesingakufundza kubodzadze lababili labetsembekile labakhombisa kutsi banesibindzi lesikhulu. Nancy Yuen bekangemamitha langu-1.5 budze, kodvwa bekanesibindzi.c Akazange ayekele kushumayela tindzaba letimnandzi teMbuso waNkulunkulu. Ngako waboshwa iminyaka lengu-20 eChina. Tiphatsimandla lebetimphenya tatsi “bekanenkhani kwendlula bonkhe bantfu” labebaseveni lakubo!

¹⁵ Valentina Garnovskaya waboshwa eRussia emahlandla lamatsatfu, futsi wahlala ejele iminyaka lengu-21.d Leni? Bekatimisele kuchubeka ashumayela kangangekutsi tiphatsimandla taze tambita ngekutsi “usigebengu lesiyingoti.” Yini leyenta labesifazane lababili kutsi babe nesibindzi? Bebaciniseka kutsi Jehova bekabasita.

16. Yini lebaluleke kakhulu kute sibe nesibindzi?

¹⁶ Njengobe sesibonile, kute sibe nesibindzi akukafaneli setsembele emandleni etfu kanye nasemakhonweni lesinawo. Kunaloko, kufanele setsembe kutsi Jehova uyasisita futsi uyasilwela. (Dut. 1:29, 30; Zak. 4:6) Loko kubaluleke kakhulu kute sibe nesibindzi.

17-18. Ngekusho kwemBhalo waJohane 15:18-21, ngusiphi secwayiso Jesu lasiniketa sona? Chaza.

¹⁷ Siyajabula nangabe bantfu basihlonipha, kodvwa akukafaneli sicabange kutsi asisilutfo nangabe bantfu bangasitsandzi. Jesu watsi: “Niyajabula nobe nini lapho bantfu banitondza, banikhipha inyumbazana, banihlambalata, futsi ngenca yeNdvodzana yemuntfu banikhuluma kabi batsi nibantfu lababi.” (Luk. 6:22) Bekasho kutsini Jesu?

¹⁸ Jesu bekangasho kutsi emaKhristu atawujabula nakazondwa ngulabanye. Kunaloko bekawecwayisa ngaloko bekutawenteka. Asisiyo incenye yalelive. Siphila ngekuvumelana netimfundziso taJesu futsi sishumayela umlayeto labekawushumayela. Kungako bantfu balelive basizonda. (Fundza Johane 15:18-21.) Sifuna kujabulisa Jehova, ngako ngeke sive buhlungu nangabe bantfu basizonda ngenca yekutsi sitsandza Babe wetfu.

19. Singabalingisa njani baphostoli?

¹⁹ Singavumeli nobe yini leshiwo bantfu noma labayentako isente sibe nemahloni ekuba BoFakazi BaJehova. (Mik. 4:5) Singafundza kumelana nekwesaba bantfu ngekutsi sicabange ngaloko lokwentiwa baphostoli eJerusalema ngekushesha nje ngemva kwekufa kwaJesu. Bebati kutsi baholi benkholo yemaJuda bebabazonda kangakanani. (Imis. 5:17, 18, 27, 28) Nanobe kunjalo, onkhe malanga bebachubeka baya ethempelini futsi bativeta kulabanye bantfu kutsi babafundzi baJesu. (Imis. 5:42) Abazange bancotjwe kwesaba. Natsi ngalokufanako singakhona kuncoba kwesaba bantfu ngekutsi singatifihli kutsi siBoFakazi BaJehova emsebentini, esikolweni nasendzaweni lesihlala kuyo.—Imis. 4:29; Rom. 1:16.

20. Yini lebeyenta baphostoli bajabule nanobe bebazondwa?

²⁰ Yini lebeyenta baphostoli bajabule? Bebasati sizatfu lebesibenta bazondwe futsi bebakutsatsa njengelilungelo lelikhulu kuhlushwa ngenca yekwenta intsandvo yaJehova. (Luk. 6:23; Imis. 5:41) Kamuva umphostoli Phetro watsi: “Ngisho nobe kungenteka nihlushwe ngenca yekulunga, niyajabula.” (1 Phet. 2:19-21; 3:14) Nangabe sati kutsi basizonda ngenca yekutsi senta lokuhle, ngeke sivume kuyekela kukhonta Jehova.

21-22. (a) Yini loncume kuyenta kute ulungiselele lushushiso? (b) Yini lesitawucoca ngayo esihlokweni lesilandzelako?

²¹ Asati kutsi lushushiso luyofika nini nome kutsi babusi bayosiyekelisa nini kwenta umsebenti waJehova. Kodvwa siyati kutsi singatilungiselela lushushiso nyalo ngekutsi sicinise buhlobo betfu naJehova, sibe nesibindzi futsi sifundze kubeketelela kuzondwa bantfu. Loko kutasisita kutsi sibe nesibindzi sekuchubeka sikhonta Jehova esikhatsini lesitako.

²² Kodvwa siyokwenta njani nangabe siyekeliswa kwenta umsebenti waJehova? Esihlokweni lesilandzelako sitawucoca ngetimiso teliBhayibheli letitasisita sichubeke sikhonta Jehova ngisho nobe umsebenti wetfu uvinjelwe.