Nkulunkulu Uyabuva Buhlungu​—Indlela Lesingamjabulisa Ngayo

Uke weviswa yini buhlungu waze wakhala?—a Kitsi sonkhe kuke kwenteka loko. Kodvwa ngaletinye tikhatsi buhlungu singase singabuva emtimbeni. Labanye bangakhuluma tintfo letimbi ngatsi letingasilo liciniso. Angitsi loko kungasivisa buhlungu?— NaNkulunkulu uyabuva buhlungu nakukhulunywa emanga ngaye. Asesikhulume ngaloku, sibone kutsi singamjabulisa njani Nkulunkulu kunekutsi simvise buhlungu.

LiBhayibheli litsi labanye bantfu lebebatsi bayamtsandza Nkulunkulu “bamdzabukisa,” futsi ‘bamvisa buhlungu.’ Kuliciniso kutsi kute umuntfu longalimata umtimba waJehova Nkulunkulu, ngobe unguSomandla. Asesibone kutsi yini lementa eve buhlungu nasingakwenti loko lasitjela kona.

Bantfu bekucala lababili Jehova labadala bamvisa buhlungu lobukhulu. Labantfu wababeka ePharadisi lasemhlabeni, lebelibitwa ngekutsi ‘yinsimu yase-Edeni.’ Bebabobani labantfu lababili?— Ucinisile, kwacale kwaba na-Adamu, kwatsi ngekuhamba kwesikhatsi kwaba na-Eva. Asesifundze kutsi bamvisa njani Jehova buhlungu.

Ngemuva kwekutsi Jehova ababeke kulensimu, watsi abayinakekele. Wabatjela nekutsi bangaba nebantfwana, bahlale nabo kulensimu futsi bangafi. Kodvwa batsi basengakabi nebantfwana, kwenteka intfo lembi kubo-Adamu na-Eva. Uyati kutsi kwentekani?— Ingilosi yabangela bo-Adamu na-Eva kutsi bone kuJehova. Asesibone kutsi loku kwenteka njani.

Lengilosi yenta inyoka yabonakala shengatsi iyakhuluma. Kwamjabulisa Eva loko labekuva ngobe lenyoka yatsi ‘utawufanana naNkulunkulu.’ Ngako wakwenta loko inyoka lebeyimtjela kona. Uyati kutsi bekuyini leyo?—

Eva wadla kulesihlahla Jehova latjela Adamu kutsi bangadli kuso. Ngaphambi kwekutsi Nkulunkulu adale Eva, watsi ku-Adamu: “Ungadla ngekutsandza kwakho tonkhe titselo letilapha ensimini; kodvwa ungasidli sitselo sesihlahla sekwati lokulungile nalokungakalungi, ngobe mhlazana usidla uyakufa nekufa.”

Eva abewati lomyalo. Kodvwa wachubeka abuka lesihlahla, futsi wabona kutsi “sasifanelwe kudliwa, nekutsi sasibukeka sisihle, . . . wakha kulesihlahla wadla.” Ngemuva kwesikhatsi wanika Adamu, ‘naye wadla.’ Ucabanga kutsi kungani Adamu enta njalo?— Kungobe abesatsandza Eva kakhulu kunaJehova. Wakhetsa kujabulisa Eva kunekujabulisa Nkulunkulu. Kodvwa kulalela Jehova kubaluleke kakhulu kunekulalela lomunye umuntfu!

Uyayikhumbula yini lenyoka leyakhuluma na-Eva? Njengobe umuntfu angenta popayi abonakale shengatsi uyakhuluma, umuntfu lotsite wenta lenyoka yabonakala ikhuluma. Ngubani labekhuluma asebentisa lenyoka?— ‘Bekuyinyoka yekucala, lebitwa ngekutsi nguDeveli nangekutsi nguSathane.’

Uyati yini kutsi ungamjabulisa njani Jehova?— Loko ungakwenta ngekuhlale wetama kwenta tintfo letimjabulisako. Sathane utsi angabangela bonkhe bantfu bente lokufunwa nguye. Ngako Jehova uyasikhutsata atsi: “Ndvodzana [nobe ndvodzakati] yami, hlakanipha, khona ngitewujabula, ngitekwati kuphendvula nome ngabe ngubani longedzelelako.” Sathane uchubeka adzelela Jehova nobe ameya. Utsi angenta bonkhe bantfu bangamkhonti Nkulunkulu. Ngako-ke jabulisa Jehova ngekutsi umlalele uphindze umkhonte! Utawutimisela yini kukwenta loko?—