Tfola Lokunyenti Nawufundza LiBhayibheli

 1. Yini lekhombisa kutsi imiBhalo beyibalulekile kuJesu?

CABANGA nje kutsi bekunjani kulalela Jesu nakafundzisa. Bekavame kucaphuna imiBhalo Lengcwele lebeyisengcondvweni yakhe! Ecinisweni, wawacaphuna emiBhalweni emavi ekucala labhalwe eBhayibhelini lawasho ngemuva kwekubhajatiswa nemavi ekugcina lawasho ngaphambi kwekutsi afe.b (Dut. 8:3; Hla. 31:5; Luk. 4:4; 23:46) Kuleminyaka lemitsatfu nehhafu, Jesu bekavame kufundza imiBhalo embikwebantfu, ayicaphune futsi ayichaze.—Mat. 5:17, 18, 21, 22, 27, 28; Luk. 4:16-20.

 2. Yini leyasita Jesu kutsi ayati kahle imiBhalo njengobe akhula? (Buka sitfombe lesisekhasini lekucala.)

² Kusasele iminyaka ngaphambi kwekutsi Jesu acale kushumayela, bekavame kufundza liVi laNkulunkulu futsi bekavame kuva nalifundvwa. Siyaciniseka kutsi ekhaya bekeva Mariya naJosefa bacaphuna imiBhalo nakucocwa.c (Dut. 6:6, 7) Singaciniseka kutsi Jesu bekaya esinagogeni njalo ngeliSabatha anemndeni wakubo. (Luk. 4:16) Nakalapho, bekalalelisisa nakufundvwa imiBhalo. Ngekuhamba kwesikhatsi, Jesu wafundza kutifundzela yena imiBhalo Lengcwele. Umphumela waloko waba kutsi akagcinanga nje ngekuyati kahle imiBhalo, kepha waphindze wayitsandza futsi wayivumela kutsi itsintse tento takhe. Sibonelo nje, khumbula loko lokwenteka ngesikhatsi Jesu asethempelini futsi aneminyaka lengu-12 budzala. Bafundzisi lebebawati kahle uMtsetfo waMosi “bebamangaliswa timphendvulo [taJesu] kanye nendlela lebekacondza ngayo tintfo.”—Luk. 2:46, 47, 52.

 3. Sitawucoca ngani kulesihloko?

³ Natsi singalati liVi laNkulunkulu futsi silitsandze nangabe silifundza njalo. Kodvwa yini lesingayenta kuze sisitakale kakhulu nasilifundza? Singafundza kuloko Jesu lakusho kulabo lebebati uMtsetfo, lokufaka ekhatsi tati temtsetfo, baFarisi kanye nebaSadusi. Labaholi benkholo bebavame kuyifundza imiBhalo, kepha bekungabasiti loko bebakufundza. Jesu waveta tintfo letintsatfu lebekufanele ngabe lamadvodza ayatenta kuze asitakale nawafundza imiBhalo. Loko lakusho kutasisita kutsi sitfutfukise indlela (1) lesikucondza ngayo loko lesikufundzako, (2) sitfole umcebo loseVini laNkulunkulu, futsi (3) sivumele liVi laNkulunkulu kutsi lisibumbe.

 4. Umbhalo waLukha 10:25-29 usifundzisani mayelana nekufundza liVi laNkulunkulu?

⁴ Sifuna kukucondza loko lesikufundza eVini laNkulunkulu, ngale kwaloko ngeke sisitakale ngalokugcwele. Sibonelo nje, cabanga ngaloko Jesu lakukhuluma nalenye “indvodza letsite lebeyati uMtsetfo.” (Fundza Lukha 10:25-29.) Ngesikhatsi lendvodza imbuta kutsi kufanele yenteni kuze itfole kuphila lokuphakadze, Jesu wayisita kuze itfole imphendvulo eVini laNkulunkulu, wayibuta watsi: “Kantsi uMtsetfo utsini? Uwufundza njani?” Lendvodza yawuphendvula kahle lombuto ngekutsi icaphune imibhalo lekhuluma ngekutsandza Nkulunkulu nekutsandza makhelwane. (Lev. 19:18; Dut. 6:5) Kodvwa naka loko leyabese iyakusho, yatsi: “Ngubani vele longumakhelwane wami?” Loko kwakhombisa kutsi beyingakucondzi kahle loko leyakufundza. Ngenca yaloko, beyingati kutsi ingakusebentisa njani kahle loko lekufundzako ekuphileni kwayo.

 5. Umthantazo nekufundza ungajaki kungakusita njani kutsi ukucondze kancono loko lokufundzako?

⁵ Singalicondza kancono liVi laNkulunkulu nangabe sitifundzisa kulifundza kahle. Naku lokunye lokungakusita: Thantaza ngaphambi kwekutsi ufundze. Sidzinga kusitwa nguJehova kuze sicondze imiBhalo, ngako singamcela asiphe umoya wakhe longcwele kuze sikhone kunakisisa nasifundza. Ungajaki nawufundza. Loko kutakusita kutsi kungene loku lokufundzako. Kungakusita kufundza uphumisele nobe uhambisane nekufundvwa kweliBhayibheli lokurekhodiwe. Nangabe uva lokurekhodiwe futsi ukubona, loko kutakusita kutsi ucondze, ukhumbule futsi ufundze lokunyenti eVini laNkulunkulu. (Josh. 1:8) Nasewucedzile kufundza, phindze uthantaze, ubonge Jehova ngalesipho lesiliVi lakhe futsi umcele akusite kutsi ukusebentise loku losandza kukufundza.

 6. Kutibuta imibuto nekubhala emaphuzu kungakusita njani nawusafundza? (Buka sitfombe.)

⁶ Naku lokunye lokubili lokungakusita kutsi ukucondze kancono loko lokufundza eBhayibhelini. Tibute imibuto ngaloku lokufundzako. Njengobe ufundza indzaba letsite, tibute: ‘Bobani bosogcamile kulendzaba? Ngubani lokhulumako? Ukhuluma nabani futsi yini leyenta akhulume naye? Lendzaba yenteka kuphi futsi nini?’ Lemibuto itakusita kutsi ucabange ngemaphuzu lamcoka kulendzaba futsi ulandzelele. Ngetulu kwaloko, bhala phansi emaphuzu njengobe ufundza. Nawubhala emaphuzu, uyacabanga ngawo futsi loko kuyakusita kutsi ucondze kancono. Kubhala kuphindze kukusite kutsi ukukhumbule loko bewukufundza. Ungabhala imibuto, tintfo lotitfolile nawusacwaninga, ufishanise emaphuzu lamcoka, ungabhala nekutsi ungakusebentisa njani loku losandza kukufundza nobe kutsi utiva njani ngaloku lokufundzako. Ungatfola kutsi kubhala letintfo kungakusita utsatse liVi laNkulunkulu njengemlayeto locondzene nawe.

 7. Ngubuphi buntfu lesibudzingako, futsi yini leyenta sibudzinge? (Matewu 24:15)

⁷ Jesu waveta buntfu lobubalulekile lokufanele sibe nabo nasifundza liVi laNkulunkulu—lokukucondza. (Fundza Matewu 24:15.) Kuyini kucondza? Likhono lekubona kutsi umcondvo lotsite uhlangana njani nalomunye, nekutsi wehluka njani kulomunye kanye nekubona intfo lengakashiwo. Ngetulu kwaloko, njengobe Jesu aveta, siyakudzinga kucondza kuze sibone tintfo letentekako letigcwalisa tiphrofetho letiseBhayibhelini. Siphindze sibudzinge lobuntfu kuze sizuze ngalokugcwele kuloko lesikufundza eBhayibhelini.

 8. Kungasisita njani kuba nekucondza nasifundza?

⁸ Jehova uyabanika bantfu bakhe kucondza. Ngako thantaza kuye, umcele akusite ube nalobuntfu. (Taga 2:6) Yini longayenta kuze wente ngekuvumelana nemithantazo yakho? Hlatiya loko lokufundzako futsi unake kutsi kuhlangana njani naletinye tintfo lotatiko. Lokunye lokungakusita kusebentisa tincwadzi tetfu, lokufaka ekhatsi Lithulusi Lekucwaninga LaBoFakazi BaJehova. Letincwadzi titakusita kutsi ukucondze loko lokufundzako eBhayibhelini nekutsi ubone kutsi ungakusebentisa njani ekuphileni kwakho. (Heb. 5:14) Nawunekucondza, utakuva kancono loko lokushiwo yimiBhalo.

 9. Nguliphi liciniso lelibalulekile lelisemiBhalweni baSadusi labangazange balinake?

⁹ BaSadusi bebatati kahle tincwadzi tekucala letisihlanu letisemiBhalweni yesiHebheru, kodvwa bebangawanaki emaciniso labalulekile lakuletincwadzi letiphefumulelwe. Sibonelo nje, cabanga ngaloko Jesu lakusho ngesikhatsi baSadusi bambuta ngekuvuswa kwalabafile. Wababuta watsi: “Anifundzanga yini encwadzini yaMosi, endzabeni yesihlahla lesivutsako, kutsi Nkulunkulu watsi kuye: ‘Mine nginguNkulunkulu wa-Abrahama, wa-Isaka newaJakobe’?” (Mak. 12:18, 26) Nanobe baSadusi bebayifundze tikhatsi letinyenti lendzaba, umbuto waJesu wakhombisa kutsi bebangalinaki leliciniso lelibalulekile lelisemiBhalweni lelimayelana nemfundziso yekuvuswa kwebantfu labafile.—Mak. 12:27; Luk. 20:38.d

10. Yini lokufanele siyinake nasifundza?

¹⁰ Yini lesiyifundzako? Nasifundza, sifuna kunaka kutsi yini lesiyifundzako evesini nobe endzabeni leseBhayibhelini. Asifuni nje kugcina ngekucondza timfundziso letisisekelo, kodvwa sifuna nekucondza emaciniso netimiso letijulile.

11. Ungawusebentisa njani umbhalo wa-2 KuThimothi 3:16, 17 kuze utfole umcebo nawufundza liBhayibheli?

¹¹ Ungawutfola njani umcebo nawufundza liBhayibheli? Cabanga ngaloko lokushiwo ngu-2 KuThimothi 3:16, 17. (Fundza.) Naka kutsi “yonkhe imiBhalo . . . ilusito” (1) ekufundziseni, (2) ekwekhuteni, (3) ekulungiseni tintfo (4) nasekuyaleni ngekulunga. Ungasitakala ngaletindlela letine ngisho ufundza tincwadzi teliBhayibheli longakavami kutisebentisa. Hlatiya lendzaba loyifundzako kuze ubone kutsi ikufundzisani ngaJehova, ngenjongo yakhe, nobe ngetimiso teliBhayibheli. Cabanga ngekutsi ikwekhuta njani. Loko ungakwenta ngekubuka kutsi ikusita njani kuze ubone imikhuba lemibi nobe imicabango lemibi futsi uyigweme nekutsi ikusita njani kuze uhlale wetsembekile kuJehova. Naka kutsi lendzaba ikusita njani kuze ulungise tintfo, nobe ulungise umbono longasiwo lokungenteka uvetwe ngulotsite nawushumayela. Ngetulu kwaloko, buka siyalo kulamavesi lesingakusita kutsi ubuke tintfo ngendlela Jehova latibuka ngayo. Nawuhlale ukhumbula letintfo letine, utawutfola umcebo eVini laNkulunkulu lotakusita kutsi usitakale kakhulu nawulifundza.

12. Yini leyenta Jesu wabuta baFarisi umbuto lotsi: “Anizange nifundze yini?”

¹² Jesu waphindze wabuta lombuto lotsi “Anizange nifundze yini?” kuze avete kutsi baFarisi bebanembono lokabi ngemiBhalo. (Mat. 12:1-7)e Ngalelolanga, baFarisi batsi bafundzi baJesu abakaligcini liSabatha. Jesu wabaphendvula ngekutsi acaphune imiBhalo lemibili kanye nelivesi lelikuHoseya kuze avete kutsi baFarisi bebangasicondzi sizatfu lesenta kwaba nemtsetfo weliSabatha nekutsi bebehlulekile kukhombisa umusa. Yini leyenta lamadvodza kutsi angabumbeki nakafundza liVi laNkulunkulu? Kungenca yekutsi bewafuna emaphutsa nawafundza futsi bekatigcabha. Loko kwenta kutsi angakucondzi loko bekakufundza.—Mat. 23:23; Joh. 5:39, 40.

13. Ngumuphi umbono lokufanele sibe nawo nasifundza liBhayibheli, futsi leni?

¹³ Siyafundza kuloko lokwashiwo nguJesu kutsi kufanele sibe nembono lokahle nasifundza liBhayibheli. Kufanele sitfobeke futsi sivume kufundziswa, singafani nalabaFarisi. Kufanele ‘silemukele ngemoya lophansi livi lelihlanyelwe kitsi.’ (Jak. 1:21) Nangabe sinemoya lophansi, sitawuvumela liVi laNkulunkulu kutsi lisishintje. Tindzaba letiseBhayibhelini letimayelana nemusa, luvelo nelutsandvo titasishintja nangabe singatigcabhi futsi singafuni emaphutsa nasifundza liBhayibheli.

14. Singabona njani kutsi siyalivumela yini liBhayibheli lisibumbe? (Buka titfombe.)

¹⁴ Indlela lesibaphatsa ngayo labanye iyakhombisa kutsi siyalivumela yini liVi laNkulunkulu kutsi lisibumbe. BaFarisi behluleka kuvumela liVi laNkulunkulu kutsi litsintse tinhlitiyo tabo, ngenca yaloko ‘babalahla ngelicala labo labamsulwa.’ (Mat. 12:7) Ngendlela lefanako, tintfo lesiticabangako ngalabanye nendlela lesibaphatsa ngayo iyakhombisa kutsi siyalivumela yini liVi laNkulunkulu kutsi lisibumbe. Nasi sibonelo, sivamile yini kukhuluma ngetintfo letinhle lesitibona kulabanye, nobe sisheshe sikhulume ngemaphutsa abo? Sinemusa yini futsi sisheshe sibacolele yini, nobe sihlale sibona emaphutsa futsi sibabambele emagcubu? Timphendvulo talemibuto titasisita sibone kutsi siyakuvumela yini loko lesikufundzako kutsi kushintje indlela lesicabanga ngayo, lesitiva ngayo nalesikwentako.—1 Thim. 4:12, 15; Heb. 4:12.

15. Jesu bekativa njani ngemiBhalo Lengcwele?

¹⁵ Jesu bekayitsandza imiBhalo Lengcwele, futsi indlela bekativa ngayo yavetwa kahle kulamavi lasiphrofetho lakuTihlabelelo 40:8 latsi: “Awu Nkulunkulu wami, kuyangijabulisa kwenta intsandvo yakho, umtsetfo wakho usenhlitiyweni yami.” Ngenca yaloko, bekajabula futsi waphumelela ekukhonteni Jehova. Natsi singajabula futsi siphumelele nangabe sivumela liVi laNkulunkulu kutsi libe setinhlitiyweni tetfu.—Hla. 1:1-3.

16. Yini longayenta kuze usitakale kakhulu nawufundza liVi laNkulunkulu? (Buka libhokisi lelitsi “Emavi AJesu Angakusita Ukucondze Loko Lokufundzako.”)

¹⁶ Shengatsi singatfutfukisa likhono letfu lekufundza liBhayibheli ngekuvumelana nemavi aJesu nesibonelo lasibekela sona. Singayitfutfukisa indlela lesilicondza ngayo liBhayibheli ngekutsi sithantaze, singajaki nasilifundza, sitibute imibuto futsi sibhale emaphuzu. Singasebentisa kucondza ngekutsi sihlatiye kahle loko lesikufundzako eBhayibhelini ngekusitwa tincwadzi letisekelwe kulo. Singafundza kulisebentisa kancono liBhayibheli, ngisho netindzaba lesingakavami kutifundza ngekutsi sifune umcebo lokungasimelula kuwutfola. Ngetulu kwaloko, singalivumela liVi laNkulunkulu kutsi lisibumbe ngekutsi sibe nembono lokahle nasilifundza. Nasikwenta loku, sitawusitakala nasifundza liBhayibheli futsi sitawusondzelana kakhulu naJehova.—Hla. 119:17, 18; Jak. 4:8.