Singahlala Simsulwa

 1. Yini bantfu labanyenti labacabanga kutsi yetayelekile?

SIPHILA eveni leligcwele kutiphatsa lokubi. Nasi sibonelo: Bantfu labanyenti bacabanga kutsi kuyintfo letayelekile kuba sitabane nobe kulala nemuntfu longakashadi naye. Ema-movie, tincwadzi, tingoma kanye netikhangiso, tigcwele kutiphatsa lokubi ngekwelicansi. (Tihlabelelo 12:8) Kodvwa Jehova angasisita kutsi siphile ngendlela lemjabulisako. Singaba msulwa nobe sihlanteke kulelive leligcwele kutiphatsa lokubi.​—Fundza 1 Thesalonika 4:3-5.

2, 3. (a) Kungani kufanele sitibalekele tifiso letimbi? (b) Yini lesitawucoca ngayo kulesihloko?

² Kuze sijabulise Jehova, kufanele sitibalekele tonkhe tintfo latenyanyako. Kodvwa ngesizatfu sekutsi sinesono, singahle sikhangwe kutiphatsa lokubi njengenhlanti lekhangwa kudla lokusedobeni. Nasicala kuba nemicabango lemibi, kufanele siyibalekele ngekushesha. Nangabe singakwenti loko, sifiso lesibi sitawuba nemandla kangangekutsi nasitfola litfuba lekusenetisa, singase silisebentise. Kunjengobe nje liBhayibheli lisho: “Sifiso nasesakhekile siveta sono.”​—Fundza Jakobe 1:14, 15.

³ Sifiso lesibi singakhula etinhlitiyweni tetfu. Kungako kufanele sikunakisise loko lesesicala kukufisa. Nangabe siyibalekela imicabango lemibi, ngeke sitiphatse kabi ngekwelicansi futsi ngeke siyitfole nemiphumela yako lebuhlungu. (Galathiya 5:16) Kulesihloko, sitawucoca nganati tintfo letintsatfu letitasisita kutsi silwisane netifiso letimbi: buhlobo betfu naJehova, seluleko lesiseVini lakhe kanye nelusito lwemaKhristu lavutsiwe.

 4. Kungani kubalulekile kutsi sisondzelane naJehova?

⁴ LiBhayibheli litjela labo labafuna ‘kusondzelana naNkulunkulu,’ litsi: “Gezani tandla tenu” futsi “nihlambulule tinhlitiyo tenu.” (Jakobe 4:8) Nangabe Jehova anguMngani wetfu lomkhulu, asigcini nje ngekufuna kutsi tento tetfu timjabulise, kodvwa siphindze sifune nekutsi imicabango yetfu imjabulise. Nangabe imicabango yetfu imsulwa futsi ihlantekile, netinhlitiyo tetfu titawuba msulwa. (Tihlabelelo 24:3, 4; 51:6; Filiphi 4:8) Jehova uyacondza kutsi sinesono nekutsi singahle sicale kucabanga tintfo letimbi. Kodvwa ngesizatfu sekutsi asifuni kumvisa buhlungu, senta konkhe lesingakwenta kuze sibalekele imicabango lemibi. (Genesisi 6:5, 6) Senta konkhe lokusemandleni etfu kuze imicabango yetfu ihlale ihlantekile.

5, 6. Umthantazo ungasisita njani kutsi silwisane netifiso letimbi?

⁵ Jehova utasisita kutsi silwisane nemicabango lemibi nangabe sichubeka sithantazela lusito lwakhe. Usinika umoya longcwele kute sibe nemandla ekuhlala simsulwa. Emithantazweni yetfu, singatjela Jehova kutsi sifuna imicabango yetfu imjabulise. (Tihlabelelo 19:14) Ngekutitfoba, simcela abuke kutsi tikhona yini tifiso letimbi enhlitiyweni yetfu letingasenta sone. (Tihlabelelo 139:23, 24) Chubeka ucela Jehova kutsi akusite kute ubalekele kutiphatsa lokubi futsi wente lokulungile ngisho nalapho kumatima.​—Matewu 6:13.

⁶ Ngaphambi kwekufundza ngaJehova, kungenteka besitsandza kwenta tintfo langatemukeli futsi kungenteka sisalwa naletifiso letimbi. Kodvwa Jehova angasisita kutsi sishintje futsi sente tintfo letimjabulisako. Nasi sibonelo: Ngemuva kwekutsi iNkhosi Davide ilele naBatisheba, yaphendvuka futsi yancenga Jehova kutsi ayinike “inhlitiyo lehlantekile” futsi ayisite ilalele. (Tihlabelelo 51:10, 12) Ngako nangabe besinetifiso letimbi letinemandla esikhatsini lesendlulile futsi lesisalwa nato, Jehova angasisita kutsi sibe nesifiso lesikhulu sekumlalela nesekwenta lokulungile. Angasisita kutsi silawule imicabango yetfu lemibi.​—Tihlabelelo 119:133.

 7. LiVi laNkulunkulu lingasisita njani kutsi sibalekele imicabango lemibi?

⁷ Jehova angaphendvula imithantazo yetfu yekucela lusito asebentisa liVi lakhe liBhayibheli. Kulo, sitfola kuhlakanipha kwaNkulunkulu lokuhlantekile. (Jakobe 3:17) Nasifundza liBhayibheli malanga onkhe, sigcwalisa tingcondvo tetfu ngemicabango lehlantekile. (Tihlabelelo 19:7, 11; 119:9, 11) EBhayibhelini kuphindze kube netibonelo netecwayiso letisisita kutsi sibalekele imicabango lemibi netifiso letimbi.

8, 9. (a) Kungani lelinye lijaha lalala nengwadla? (b) Sibonelo lesikuTaga sehluko 7 singasisita kutsi sibalekele tiphi timo?

⁸ KuTaga 5:8, liVi laNkulunkulu lisecwayisa ngekutsi sikubalekele kutiphatsa lokubi. KuTaga sehluko 7, sifundza ngendzaba yelijaha lelahamba ebusuku eceleni kwendlu yemfati loyingwadla. Lomfati abesekoneni lalomgwaco, “embatsise kwengwadla.” Waya kulelijaha walibamba, walicabuza futsi washo tintfo letakha tifiso letimbi kulo. Alizange litibalekele letifiso, umphumela waloko waba kutsi lagcine lilele nayo lengwadla. Nanobe belingakakuhleli kwenta sono, kodvwa lasenta. Ngemuva kwaloko kwadzingeka liphile nemiphumela yesono. Kube layicondza ingoti lebelitifaka kuyo, belitayibalekela lengwadla.​—Taga 7:6-27.

⁹ Njengalelijaha, natsi singatsatsa tincumo letingakahlakaniphi ngobe singayicondzi ingoti. Nasi sibonelo: Letinye titeshi te-TV ebusuku tikhombisa tinhlelo letinekutiphatsa lokubi, ngako kungaba yingoti kushintjashintja titeshi kuze nje ubone kutsi kunani kuto. Kungaphindze kube yingoti kungena emakhelini e-Internet ube ungati kutsi atakufaka kuphi, kanye nekusebentisa tindzawo tekucoca nebantfu usebentisa i-internet nobe ema-Web site lafaka ekhatsi tikhangiso letinekutiphatsa lokubi nemakheli ekwatiswa lokunekungcola. Kuletimo, loko lesikubukako kungasenta kutsi sibe netifiso letimbi futsi loko kungasiholela ekungamlalelini Jehova.

10. Kungani kuyingoti kudlala ngelutsandvo? (Buka sitfombe lesisekucaleni kwalesihloko.)

¹⁰ LiBhayibheli liphindze lisitjele indlela bantfu bebulili lobehlukene lokufanele baphatsane ngayo. (Fundza 1 Thimothi 5:2.) EmaKhristu akhombisa lutsandvo lwetitsandzani kulashade nabo kuphela nobe kumuntfu lafuna kushada naye. Awadlali ngelutsandvo. Labanye bangacabanga kutsi kwenta ngendlela yekukhombisa lutsandvo lwetitsandzani kulotsite, lokufaka ekhatsi indlela yekuhambisa umtimba, indlela yekwenta tintfo nobe indlela yekubukana, akusiyo ingoti yingci nje naningabambani. Kodvwa nangabe bantfu lababili badlala ngelutsandvo, bangacala babe nemicabango lemibi futsi loko kungaholela ekutiphatseni lokubi. Kwentekile esikhatsini lesendlulile futsi kungenteka nanyalo.

11. Sifundzani kuJosefa?

¹¹ Josefa wasibekela sibonelo lesihle. UmkaPhotifari wetama kumlinga kutsi alale naye. Nanobe ala kulala naye, kodvwa wachubeka amlinga. Onkhe malanga abecela Josefa kutsi “ahlale naye.” (Genesisi 39:7, 8, 10) Lesinye sati seliBhayibheli sachaza kutsi umkaPhotifari abenelitsemba lekutsi nabangasala bodvwa, Josefa angalala naye. Josefa abetimisele kungamnaki lomfati, futsi akazange adlale ngelutsandvo naye. Ngaleyo ndlela, akazange avumele tifiso letimbi kutsi tikhule enhlitiyweni yakhe. Ngesikhatsi abamba ingubo yaJosefa futsi etama kulala naye ngenkhani, ngekushesha Josefa “wanyomula lengubo wabaleka wamshiya nayo, waphuma kulendlu.”​—Genesisi 39:12.

12. Sati njani kutsi loko lesikubukako kungayitsintsa inhlitiyo yetfu?

¹² Jesu wasecwayisa kutsi loko lesikubukako kungayitsintsa inhlitiyo yetfu futsi kwakhe tifiso tekutiphatsa kabi ngekwelicansi. Watsi: “Wonkhe umuntfu lochubeka abuka lomsikati ate amkhanuke sewuvele uphingile naye enhlitiyweni.” (Matewu 5:28) Nguloko lokwenteka eNkhosini Davide. ‘Yatsi isetulu endlini yayo yabona umfati ageza,’ kodvwa ayiyekelanga kumbuka nekucabanga ngaye. (2 Samuweli 11:2) Nanobe abengumfati walenye indvodza, Davide waba nesifiso sekulala naye futsi walala naye.

13. Kungani kufanele sente “sivumelwane” nemehlo etfu, futsi singakwenta njani loko?

¹³ Nangabe sifuna kubalekela imicabango lemibi, kufanele silandzele sibonelo saJobe. Watsi: “Ngenta sivumelwane nemehlo ami.” (Jobe 31:1, 7, 9) NjengaJobe, singenta sincumo sekutsi singabi nemicabango lemibi ngemuntfu lesimbukako. Sitawubuka eceleni ngekushesha nangabe sibona sitfombe lesikhombisa kungcola ku-computer, ebhodini lekukhangisa, kumagazini nobe kuyiphi indzawo.

14. Yini lokufanele siyente kuze sihlale simsulwa?

¹⁴ Nawucabanga ngoloku lesesicoce ngako, ungase ubone kutsi kusafanele wente lokunyenti kuze ulwisane netifiso letimbi. Nangabe kufanele wente tingucuko, tente ngekushesha! Nawulalela loko Jehova lakushoko, ungakubalekela kutiphatsa lokubi futsi uhlale umsulwa.​—Fundza Jakobe 1:21-25.

15. Kungani kubalulekile kucela lusito nangabe sikutfola kumatima kulwisana netifiso letimbi?

¹⁵ Nangabe ukutfola kumatima kulwisana netifiso letimbi, khuluma nalotsite ebandleni lesekuphele sikhatsi lesidze akhonta Jehova futsi longakunika seluleko lesihle lesivela eVini laNkulunkulu. Kungase kube matima kutsi ukhulume ngetinkinga takho kulabanye, kodvwa kubalulekile kutsi ucele lusito. (Taga 18:1; Hebheru 3:12, 13) EmaKhristu lavutsiwe angakusita kutsi ubone lapho kufanele ulungise khona. Ngemuva kwaloko kufanele ulungise kute uchubeke unguMngani waJehova.

16, 17. (a) Labadzala belibandla bangabasita njani labo labakutfola kumatima kulwisana netifiso letimbi? Shano sibonelo. (b) Kungani kubalulekile ngalabo lababuka titfombe letikhombisa kungcola kutsi bacele lusito ngekushesha?

¹⁶ Labadzala labasemabandleni etfu bakulungele kusisita. (Fundza Jakobe 5:13-15.) Besekuphele iminyaka leminyenti lelinye lijaha laseBrazil likutfola kumatima kulwisana netifiso letimbi. Litsi: “Bengati kutsi tintfo lengiticabangako atimjabulisi Jehova, kodvwa benginemahloni kakhulu kutjela labanye indlela lebengitiva ngayo.” Lomunye lomdzala wabona kutsi lelijaha lidzinga lusito futsi walikhutsata kutsi licele lusito kulabadzala belibandla. Lelijaha litsi: “Ngamangala kakhulu ngendlela labazalwane labebanemusa ngayo kimi, bebanesineke futsi bangicondza kunendlela lebengicabanga ngayo. Batilalelisisa tinkinga tami. Basebentisa liBhayibheli kuze bagcizelele lutsandvo Jehova lanalo ngami futsi bathantaza nami. Loko kwenta kutsi kube melula kwemukela seluleko seliBhayibheli labanginika sona.” Ngemuva kwekucinisa buhlobo balo naJehova, lelijaha litsi: “Nyalo sengiyakubona kubaluleka kwekufuna lusito kunekutsi sitetfwalele tsine tinkinga tetfu.”

¹⁷ Nangabe unemkhuba wekubuka titfombe letikhombisa kungcola, kufanele ucele lusito ngekushesha. Nawutsatsa sikhatsi lesidze ungaluceli lusito, utawuba sengotini lenkhulu yekutiphatsa kabi ngekwelicansi. Utawuvisa labanye buhlungu futsi loko kungase kwente bantfu bakhulume kabi ngaJehova. Labanyenti bacele lusito kulabadzala belibandla futsi basemukele seluleko sabo kuze kujabulisa Jehova, futsi bahlale basebandleni lebuKhristu.​—Tihlabelelo 141:5; Hebheru 12:5, 6; Jakobe 1:15.

18. Yini lotimisele kuyenta?

¹⁸ Live laSathane lichubeka litiphatsa kabi kakhulu. Kodvwa tinceku taJehova tenta konkhe lokusemandleni ato kuze tingcine imicabango yato ihlantekile futsi imsulwa. Jehova utigcabha kakhulu ngato. Shengatsi singasondzela kuJehova futsi silandzele seluleko lesisitfola eVini lakhe nasebandleni lebuKhristu. Nangabe senta loko, sitawujabula futsi sibe nanembeza lohlantekile. (Tihlabelelo 119:5, 6) Esikhatsini lesitako, nasekabhujisiwe Sathane, sitawuphila phakadze emhlabeni lomusha waNkulunkulu lohlantekile.