LiBhayibheli liyavuma kutsi kuphila kwebantfu, ‘kufishane futsi kugcwele tinkinga.’ (Jobe 14:1) Ngulena yini imphilo Nkulunkulu lafuna siyiphile? Iyini injongo yakhe ngatsi? Iyoke ifezeke yini? Tfola timphendvulo letidvudvutako letiseBhayibhelini.

1. Jehova ufuna siphile imphilo lenjani?

Jehova ufuna siphile imphilo lencono kakhulu. Ngesikhatsi Nkulunkulu adala bantfu bekucala, bo-Adamu na-Eva, wababeka endzaweni lenhle lelipharadisi, lokuyingadze yase-Edeni. Ngako “Nkulunkulu wabese uyababusisa, watsi kubo: ‘Talanani nandze nigcwale emhlabeni futsi niwuncobe.’” (Genesisi 1:28) Jehova bekafuna kutsi babe nebantfwana, bente umhlaba wonkhe ube lipharadisi, futsi banakekele netilwane. Injongo yakhe ngebantfu beyikutsi bajabulele imphilo lemnandzi futsi baphile phakadze.

Ngisho nobe tintfo tingazange tenteke ngaleyo ndlela,a injongo yakhe ayikashintji. (Isaya 46:10, 11) Solo usafuna kutsi bantfu labamlalelako baphile phakadze bangahlushwa lutfo.—Fundza Sembulo 21:3, 4.

2. Singayijabulela njani imphilo lenenjongo nyalo?

Jehova wasidala saba nesifiso sekunaka “tintfo letiphatselene naNkulunkulu,” lokusifiso sekumati nekumkhonta. (Fundza Matewu 5:3-6.) Ufuna sibe nebuhlobo lobuhle naye, ‘sihambe ngato tonkhe tindlela takhe, simtsandze futsi simkhonte ngayo yonkhe inhlitiyo yetfu.’ (Dutheronomi 10:12; Tihlabelelo 25:14) Nasenta njalo, singajabula mbamba ngisho sinetinkinga. Kukhonta Jehova kwenta kutsi kuphila kwetfu kube nenjongo.

3. Jehova ufuna bantfu baphile imphilo lejabulisako

Dlala le-VIDEO, bese nicoca ngalombuto lolandzelako.

I-VIDEO: Kungani Nkulunkulu Adala Umhlaba?—Incenye (1:41)

• Kungani Nkulunkulu adala umhlaba waba muhle?

Fundza Umshumayeli 3:11, bese nicoca ngalombuto:

• Loku kukufundzisani ngaJehova?

4. Injongo yaJehova ayikashintji

Fundza Tihlabelelo 37:11, 29 na-Isaya 55:11, bese nicoca ngalombuto:

• Sati njani kutsi injongo yaJehova ngatsi ayikashintji?

5. Kukhonta Jehova kwenta kuphila kwetfu kube nenjongo

I-VIDEO: Ngatfola Kutsi Iyini Injongo Yekuphila (5:03)

• Kwamsita njani Terumi kufundza ngenjongo yekuphila?

Fundza Umshumayeli 12:13, bese nicoca ngalombuto:

• Njengobe Jehova asentele tintfo letinyenti kangaka, yini tsine lokufanele simentele yona?

LOKO LESICOCE NGAKO

Jehova ufuna sikujabulele kuphila kuze kube phakadze emhlabeni lote kuhlupheka. Nasimkhonta ngenhlitiyo yetfu yonkhe, kuphila kwetfu kuba nenjongo ngisho kwanyalo.

Yini Loyifundzile?

• Beyiyini injongo yaJehova yasekucaleni ngabo-Adamu na-Eva?

• Sati njani kutsi injongo yaNkulunkulu ngebantfu ayikashintji?

• Ungayitfola njani injongo yekuphila?

LOKUNYE LONGAKUHLOLA

Fundza kuze utfole bufakazi bekutsi ingadze yase-Edeni beyikhona mbamba.

“Insimi Yase-Edeni—Iyinganekwane Yini Nobe Iliciniso?” (Sicongosekulindza saJanuary 1, 2011)

Tfola kutsi kungani siciniseka kutsi umhlaba utawuhlala kuze kube phakadze.

“Utawubhujiswa Yini Umhlaba?” (Sihloko lesiku-internet)

Hlola loko lokushiwo liBhayibheli ngekutfola kuphila lokunenjongo.

“Iyini Injongo Yekuphila?” (Sihloko lesiku-internet)

Buka kutsi indvodza lebeyicabanga kutsi inako konkhe, yakutfola njani loko bekushoda ekuphileni kwayo.

Nyalo Kuphila Kwami Sekunenjongo (3:55)

2. Bobani lababusa naJesu?

Jesu akabusi yedvwana. Bantfu ‘bato tonkhe tinhlanga, tilwimi, bantfu netive . . . batawuba ngemakhosi etikwemhlaba.’ (Sembulo 5:9, 10) Bangakhi labatawubusa naKhristu? Kusukela Jesu eta emhlabeni, emaKhristu lamanyenti aba balandzeli bakhe. Nobe kunjalo, bangu-144 000 kuphela labatawubusa naJesu ezulwini. (Fundza Sembulo 14:1-4.) Onkhe lamanye emaKhristu lasemhlabeni atawuba takhamuti taloMbuso.—Tihlabelelo 37:29.

UMbuso waNkulunkulu sewuvele uyabusa. Madvutane utawukwenta lushintjo lolukhulu emhlabeni. Ase sibone letinye tintfo letinhle longatilangatelela ngephansi kwaloMbuso.

1. UMbuso waNkulunkulu utakuletsa njani kuthula nekulunga emhlabeni?

Jesu, loyiNkhosi yeMbuso waNkulunkulu, utawubhubhisa bantfu lababi nabohulumende emphini ye-Amagedoni. (Sembulo 16:14, 16) Ngaleso sikhatsi, lesetsembiso lesilandzelako lesiseBhayibhelini sitawufezeka ngalokuphelele: “Ngemuva nje kwesikhashana, bantfu lababi ngeke basaba khona.” (Tihlabelelo 37:10) Asebentisa loMbuso, Jesu utawuciniseka kutsi kugcwala kuthula nekulunga emhlabeni.—Fundza Isaya 11:4.

2. Kuphila kutawuba njani nase kwenteka intsandvo yaNkulunkulu emhlabeni?

Nasekubusa uMbuso waNkulunkulu, “labalungile batawudla lifa lemhlaba, futsi bahlale kuwo kuze kube phakadze.” (Tihlabelelo 37:29) Ticabange sewuphila emhlabeni lapho khona wonkhe umuntfu sekalungile futsi atsandza Jehova nalabanye bantfu! Kute lotawugula, futsi wonkhe umuntfu utawuphila phakadze.

3. Yini letawufezwa nguMbuso waNkulunkulu nasekubhujiswe bantfu lababi?

Nasebabhujisiwe bantfu lababi, Jesu utawubusa njengeNkhosi iminyaka lengu-1 000. Ngaleso sikhatsi, yena kanye nalabangu-144 000 latawubusa nabo, batawusita bantfu labasemhlabeni kutsi babe bete sono. Naseyiphelile iminyaka lengu-1 000, umhlaba wonkhe utawuba lipharadisi lelihle futsi bonkhe bantfu batawujabula ngobe batawube balalela imitsetfo yaJehova. Jesu utawubese ubuyisela uMbuso kuBabe wakhe, Jehova. ‘Libito [laJehova] litawungcweliswa’ ngendlela lebelingakaze lingcweliswe ngayo. (Matewu 6:9, 10) Kutawube sekubonakele kutsi Jehova unguMbusi lokahle nalonendzaba nebantfu bakhe. Jehova utawubese ubhubhisa Sathane, nemadimoni, kanye nalabo labakhetsa kuvukela bukhosi baKhe. (Sembulo 20:7-10) Timo letikahle letitawuletfwa nguMbuso waNkulunkulu titawubakhona kuze kube phakadze.

CHUBEKA UFUNISISA

4. UMbuso waNkulunkulu utawususa bohulumende bebantfu

“Umuntfu ubuse lomunye umuntfu wase uyamlimata.” (Umshumayeli 8:9) Jehova utawusebentisa uMbuso wakhe kuze alungise umonakalo lobangelwe ngulokungalungi.

Fundza Danyela 2:44 na-2 KubaseThesalonika 1:6-8, bese nicoca ngalemibuto:

• Yini Jehova neNdvodzana yakhe, Jesu labatayenta kubohulumende bebantfu kanye nalabo lababasekelako?

• Loko lokufundzile ngaJehova nangaJesu kukucinisekisa njani kutsi loko labatakwenta kutawuba nekulunga?

5. Jesu uyiNkhosi lekahle kakhulu

Njengobe ayiNkhosi yeMbuso waNkulunkulu, Jesu utawukwenta tintfo letinyenti kakhulu kuze asite bantfu bakhe labasemhlabeni. Dlala le-VIDEO kuze ubone indlela Jesu lakhombise ngayo kutsi ufuna kusita bantfu nekutsi Nkulunkulu umnikete emandla ekwenta njalo.

I-VIDEO: Jesu Wakhombisa Kutsi Yini Letawufezwa NguloMbuso (1:13)

Tintfo letentiwa nguJesu ngesikhatsi alapha emhlabeni, takhombisa loko bekutawukwentiwa nguloMbuso. Kuletibusiso letibalwe lapha, ngutiphi wena lotilangatelela ngalokukhetsekile? Fundza imibhalo lesisita sati lokunyenti ngaletibusiso.

6. UMbuso waNkulunkulu utawuletsa likusasa lelihle

I-VIDEO: Emantjontjo Elikusasa Lelihle (4:38)

Fundza Tihlabelelo 145:16, bese nicoca ngalombuto:

• Kukwenta utive njani kwati kutsi Jehova ‘utawuniketa tintfo letiphilako loko letikufisako’?

LOKO LESICOCE NGAKO

UMbuso waNkulunkulu utawufeza loko Nkulunkulu lafuna ukufeze. Utawushintja lomhlaba ube lipharadisi leligcwele bantfu labalungile labatawukhonta Jehova kuze kube phakadze.

Yini Loyifundzile?

• UMbuso waNkulunkulu utalingcwelisa njani libito laJehova?

• Yini lesenta sikholelwe kutsi uMbuso waNkulunkulu utatifeza tetsembiso letiseBhayibhelini?

• Ngutiphi tintfo lotilangatelela ngalokukhetsekile letitawufezwa nguloMbuso?

LOKUNYE LONGAKUHLOLA

Tfola kutsi iyini i-Amagedoni.

“Iyini Imphi Ye-Amagedoni?” (Sihloko lesiku-internet)

Fundza ngaloko lokutakwenteka ngesikhatsi sekubusa kwaJesu kweminyaka lengu-1 000 kanye nangemuva kwaso.

“Yini Eyokwenzeka Ngosuku Lokwahlulela?” (Sicongosekulindza,  saSeptember 1, 2012 lesitfolakala ngesiZulu)

Buka kutsi imindeni ingaticabanga njani indzawonye epharadisi.

Tibone UsePharadisi (1:50)

Esihlokweni lesitsi “Ngangihlushwa Yimibuzo Eminingi,” tfola kutsi livukela mbuso lasitfola njani sisombululo belisifuna.

“IBhayibheli Lishintsha Ukuphila” (Sicongosekulindza, saJanuary 1, 2012, letfolakala ngesiZulu)