LiBhayibheli Nelikusasa Lakho

ASEWUTICABANGE uhamba wedvwa ebusuku futsi kumnyama. Nanobe kusebusuku, uyayibona idlela ngenca yelithoshi lelikukhanyiselako. Liyakhona kukukhanyisela indlela lohamba kuyo. Liyakhona futsi nekukukhanyisela embili ubone tindzawo letikhashane.

Ngendlela lefanako, liBhayibheli liyafana nelithoshi. Njengoba sibonile etihlokweni lesicoce ngato, liVi laNkulunkulu lingasisita sikhone kusingatsa tinkinga lesihlangabetana nato onkhe malanga kulelive lesiphila kulo. Kodvwa liBhayibheli liphindze lente lokungetulu kwaloko. Lisiniketa umbono locacile ngelikusasa, lisente sibone indlela leholela enjabulweni yaphakadze siphindze sihambe ngayo futsi sibe nekuthula lokwenetisako. (Tihlabelelo 119:105) Likwenta njani loku?

Asesicoce ngetindlela litimbili liBhayibheli lelisiniketa ngato litsemba ngelikusasa: 1 Lisenta sibe nenjongo ekuphileni, futsi 2 lisifundzisa indlela lesingakha ngayo bungani lobungapheli neMdali wetfu.

LiBhayibheli lisiniketa seluleko lesingasetsemba kute sicatulule tinkinga tetfu, lingetulu nje kwanobe ngabe nguyiphi incwadzi lengaba lusito. Kunekutsi lisikhutsate kutsi sinake kakhulu tinkinga tetfu, liBhayibheli lisifundzisa kutsi kufanele sitibone sesiphila kuphila lokuncono. Nasenta kanjalo singaba nenjongo ngekuphila.

Nasi sibonelo, cabanga nganasi simiso seliBhayibheli lesitsi: “Kunenjabulo lenyenti ekupheni kunasekwemukeleni.” (Imisebenti 20:35) Usakhumbula yini usita lomunye lebekadzinga lokutsite? Nobe usakhumbula yini ulalelisisa umngani wakho akutfululela sifuba sakhe? Awuzange yini ujabula ngekutsi wente lilanga lalomunye labalihle?

Sitfola injabulo lenkhulu nangabe sipha labanye futsi singagadzi lutfo kubo. Lomunye umbhali watsi: “Akukavami kupha lotsite ungagadzi lutfo kuye​—ngaphandle nangabe uvele wapha nje ungakacabangi lutfo longakutfola.” Nobe kunjalo, nangabe sipha labo labangenalutfo labangasibuyisela ngako, sitawutfola umvuzo. Siba nencenye lenkhulu eluhlelweni lwaNkulunkulu. Ecinisweni, sisuke sisebenta nemdali wetfu loyo lobuka tento letinjalo temusa njengesikweleti kuye. (Taga 19:17) Uyakujabulela loko lesikwentela bantfu labaphansi futsi usitsembisa kusibuyisela kona ngekuphila lokuphakadze emhlabeni loliphadisi​—lokulitsemba lelijabulisako lelikusasa!​—Tihlabelelo 37:29; Lukha 14:12-14.a

Ngetulu kwako konkhe, liBhayibheli lisifundzisa kutsi singaba nekuphila lokunenjongo ngekukhonta Nkulunkulu weliciniso, longuJehova. LiVi lakhe lisikhutsata kutsi simdvumise siphindze simlalele. (Umshumayeli 12:13; Sembulo 4:11) Nasenta njalo, sitawutfola injabulo lenkhulu lebesingeke siyicabange. Ecinisweni, usicela kutsi: ‘Sihlakaniphe, khona atewujabula.’ (Taga 27:11) Cabanga nganaku​—nangabe senta tincumo letisekelwe etimisweni letiseBhayibhelini ngekuhlakanipha, sisuke sijabulisa inhlitiyo yaBabe wetfu losezulwini. Kungani? Ngobe uyasikhatsalela futsi ufuna sizuze ngekulandzela ticondziso takhe. (Isaya 48:17, 18) Nguyiphi nje injongo lesingaba nayo ngetulu kwekukhonta uMbusi wendzawo yonkhe futsi siphile ngendlela lemjabulisako?

LiBhayibheli liphindze lisifundzise kwakha bungani neMdali wetfu. LiBhayibheli litsi: “Sondzelani kuNkulunkulu, naye utawusondzela kini.” (Jakobe 4:8) Ngaletinye tikhatsi singahle singabate kutsi singaba bangani neMdali lomkhulu. Kodvwa liBhayibheli liyasicinisekisa kutsi nangabe ‘simfuna sitomtfola’ ngoba akekho “khashane kuloyo naloyo kitsi.” (Imisebenti 17:27) Leseluleko seliBhayibheli sekutsi sibe bangani naNkulunkulu sibalulekile kute sibe nelikusasa lelihle. Ngayiphi indlela?

Cabanga nganaku: Nobe singetama kangakanani kubaleka, kute namunye longakhona kubalekela sitsa lesikhulu​—kufa. (1 Khorinte 15:26) Nobe kunjalo, Nkulunkulu uphila phakadze. Angeke aze afe futsi ufuna nebangani bakhe baphile phakadze nabo. Ngemavi lamelula nalamnandzi, liBhayibheli lichaza loko Jehova lakufunela labo labamfunako, litsi: “Shangatsi ningaphila phakadze naphakadze!”​—Tihlabelelo 22:26.

Ungabakha kanjani lobungani lobuhlala phakadze naNkulunkulu? Chubeka ufundza ngaye eVini lakhe liBhayibheli. (Johane 17:3; 2 Thimothi 3:16) Funa lusito lwakhe kute ucondze imiBhalo. LiBhayibheli lisicinisekisa ngekutsi nangabe ‘sichubeka sicela kuhlakanipha’ kuNkulunkulu utosiniketa kona.b (Jakobe 1:5) Kwekugcina, timisele kusebentisa loko lokufundzile, futsi uvumele liVi laNkulunkulu kutsi libe “sibane etinyaweni [takho], futsi libe kukhanya endleleni [yakho]”​—nyalo nasesikhatsini lesitako.​—Tihlabelelo 119:105.