SIFUNDVO 36
Yetsembeka Kuto Tonkhe Tintfo
Wonkhe umuntfu ufuna bangani labetsembekile. NaJehova ulindzele kutsi bangani bakhe betsembeke. Nobe kunjalo, loku akusimelula kulelive leligcwele bantfu labangaketsembeki. Kusisita njani kwetsembeka kuto tonkhe tintfo?
1. Ngusiphi sizatfu lesibaluleke kakhulu sekwetsembeka?
Nasetsembekile kulabanye sisuke sikhombisa kutsi siyamtsandza Jehova futsi siyamhlonipha. Cabanga nganaku: Jehova uyakwati konkhe lesikucabangako nalesikwentako. (KumaHebheru 4:13) Uyasibona nasikhetsa kwetsembeka, futsi loko kumenta ajabule. LiVi lakhe litsi: “Jehova uyamenyanya umuntfu lolicili, kodvwa ungumngani lomkhulu webantfu labalungile.”—Taga 3:32.
2. Ngutiphi letinye tindlela lesingakhombisa ngato kutsi setsembekile ekuphileni kwetfu kwamalanga onkhe?
Jehova ufuna ‘sikhulume liciniso kulomunye nalomunye.’ (Zakhariya 8:16, 17) Kusho kutsini loko? Ngisho nobe sikhuluma nemalunga emndeni wetfu, bantfu lesisebenta nabo, bazalwane nabodzadze labangemaKhristu, nobe tiphatsimandla, asiwakhulumi emanga nobe sibatjele tintfo letingesilo liciniso. Bantfu labetsembekile abebi. (Fundza Taga 24:28 naKubase-Efesu 4:28.) Bayibhadala yonkhe imitselo labayikweletako. (KubaseRoma 13:5-7) Kuletindlela nakuletinye, ‘sitiphatsa ngekwetsembeka kuto tonkhe tintfo.’—KumaHebheru 13:18.
3. Kusisita kuphi kwetsembeka?
Nasatiwa ngekutsi setsembekile, labanye bantfu bayasetsemba. Sisita labanye bative baphephile ebandleni, njengobe kwenteka emndenini lonelutsandvo. Siba nanembeza lohlantekile. Kwetsembeka kwetfu ‘kuyayihlobisa imfundziso yaNkulunkulu, longuMsindzisi wetfu’ kungaphindze kwente labanye bafune kukhonta Jehova.—KuThithusi 2:10.
CHUBEKA UFUNISISA
Hlola kutsi kwetsembeka kukutsintsa njani wena naJehova, ufundze nekutsi ungetsembeka njani etimeni letehlukahlukene ekuphileni.
4. Kwetsembeka kuyamjabulisa Jehova
Fundza Tihlabelelo 44:21 naMalakhi 3:16, bese nicoca ngalemibuto:
Ucabanga kutsi kungani kungesiko kuhlakanipha kufihla liciniso?
Ucabanga kutsi Jehova utiva njani nasikhetsa kukhuluma liciniso ngisho nobe kumatima kwenta njalo?
Batali bayajabula nangabe bantfwana bakhuluma liciniso. Nasikhuluma liciniso, senta Jehova ajabule
5. Yetsembeka ngaso sonkhe sikhatsi
Bantfu labanyenti bakholelwa kutsi ngeke uhlale wetsembekile ngaso sonkhe sikhatsi. Nobe kunjalo, cabanga ngekutsi kungani kufanele sihlale setsembekile. Dlala le-VIDEO.
Fundza KumaHebheru 13:18, bese nicoca ngekutsi singetsembeka njani . . .
emindenini yetfu.
emsebentini nobe esikolweni.
kuletinye timo.
6. Kwetsembeka kuyasisita
Ekucaleni, kungahle kubonakale shengatsi kwetsembeka kusiletsela tinkinga, kodvwa ngekuhamba kwesikhatsi kungaba yintfo lenhle kakhulu longayenta. Fundza Tihlabelelo 34:12-16, bese nicoca ngalombuto:
Kwetsembeka kukwenta njani kuphila kwakho kube ncono?
Emadvodza nebafati labetsembekile bacinisa imishado yabo
Tisebenti letetsembekile tetsenjwa bacashi bato
Bantfu labetsembekile batakhela ligama lelihle netiphatsimandla
LABANYE BANTFU BATSI: “Lamanye emanga mancane kakhulu kutsi ungatikhatsata ngawo.”
Yini lekwenta ukholelwe kutsi Jehova uwatondza onkhe emanga?
LOKO LESICOCE NGAKO
Jehova ufuna kutsi bangani bakhe betsembeke kuko konkhe labakushoko nalabakwentako.
Yini Loyifundzile?
Ngutiphi letinye tindlela longakhombisa ngato kutsi wetsembekile?
Kungani kungasiko kuhlakanipha kucabanga kutsi singafihla liciniso?
Yini lekwenta ufune kwetsembeka ngaso sonkhe sikhatsi?
LOKUNYE LONGAKUHLOLA
Batali bangabafundzisa njani bantfwana babo kutsi betsembeke?
Kukahle ngani kwenta loko lesetsembise kutsi sitawukwenta?
Tfola kutsi kufanele yini sikhokhe umtselo ngisho nobe ungasetjentiswa kahle.
“Ingabe Kumelwe Ukhokhe Izintela?” (Sicongosekulindza, saSeptember 1, 2011 lesitfolakala ngesiZulu)
Fundza kutsi yini leyakhutsata lenye indvodza lebeyingaketsembeki kutsi ishintje kuphila kwayo, futsi yente umsebenti lokahle?
“Ngafundza Kutsi Jehova Unemusa Futsi Uyatsetselela” (Sicongosekulindza, saJuly 1, 2015)