Ungumuntfu Lonjani Jehova?

Yini lefika engcondvweni yakho nawucabanga ngaJehova Nkulunkulu? Umbona angumuntfu lobalulekile lokhashane kakhulu yini nawe kutsi ungaba ngumngani wakhe? Noma umbona angumuntfu lonemandla lamakhulu kakhulu kodvwa lote luvelo? Mbambambamba ungumuntfu lonjani Jehova? Asebentisa liVi lakhe liBhayibheli, Jehova uveta lobunye buntfu bakhe, nekutsi unendzaba nawe.

1. Kungani singamboni Nkulunkulu?

“Nkulunkulu unguMoya.” (Johane 4:24) Jehova ute umtimba wenyama. UnguMuntfu longuMoya futsi uhlala ezulwini, indzawo lesingeke siyibone ngemehlo enyama.

2. Ngubuphi lobunye buntfu baJehova?

Ngisho nobe singamboni Jehova, singakhona kumati njengeMuntfu sibili ngobe unebuntfu lobuhle. LiBhayibheli litsi: “Jehova uyakutsandza kulunga, futsi angeke abalahle labetsembekile kuye.” (Tihlabelelo 37:28) Uphindze abe ‘nelutsandvo lolukhulu nemusa,’ ikakhulukati kulabo labasetinkingeni. (Jakobe 5:11) “Jehova usedvute nalabo labephuke tinhlitiyo; uyabasindzisa labadvumatekile.” (Tihlabelelo 34:18; umbhalo longentasi) Bewati yini kutsi tintfo lesitentako tingamjabulisa Jehova nobe timvise buhlungu? Uyadvumateka futsi eve buhlungu nangabe umuntfu akhetsa kwenta tintfo letimbi. (Tihlabelelo 78:40, 41) Kodvwa uyajabula nangabe umuntfu enta lokulungile.—Fundza Taga 27:11.

3. Jehova usikhombisa njani kutsi uyasitsandza?

Buntfu baJehova lobuhamba embili lutsandvo. Ecinisweni, “Nkulunkulu ulutsandvo.” (1 Johane 4:8) Lutsandvo lwaJehova asiluboni nje kuphela kuloko lesikufundza eBhayibhelini, kodvwa siphindze silubone nakuloko lakudalile. (Fundza Imisebenti 14:17) Nasi sibonelo, cabanga ngendlela Nkulunkulu lasidala ngayo. Wasidala ngendlela yekutsi sibone imibala lemihle, sive umculo lomnandzi, futsi sinambitse nekudla lokumnandzi. Ufuna sikujabulele kuphila.

CHUBEKA UFUNISISA

4. Umoya longcwele ungemandla aNkulunkulu lasebentako

Njengobe natsi sisebentisa tandla tetfu nasisebenta, naJehova usebentisa umoya wakhe longcwele. LiBhayibheli liveta kutsi umoya longcwele awusiwo umuntfu, kepha, ungemandla Nkulunkulu lawasebentisako kuze ente tintfo. Fundza Lukha 11:13 kanye neMisebenti 2:17, bese nicoca ngalemibuto:

• Nkulunkulu ‘utawutfululela’ umoya wakhe longcwele kulabo labawucelako. Ngako ucabanga kutsi umoya longcwele ungumuntfu nobe ungemandla aNkulunkulu lasebentako? Yini lekwenta usho kanjalo?

Jehova usebentisa umoya wakhe longcwele kuze ente tintfo letimangalisako. Fundza Tihlabelelo 33:6; na-2 Phetro 1:20, 21, bese nicoca ngalombuto:

• Ngutiphi letinye tindlela Jehova lasebentise ngato umoya wakhe longcwele?

5. Jehova unebuntfu lobutsandzekako

Mosi bekasikhonti saNkulunkulu lesetsembekile, kodvwa bekafuna kumati kahle njengobe anguMdali wakhe. Ngako Mosi wacela Nkulunkulu watsi: “Ngicela ungifundzise tindlela takho kuze ngikwati.” (Eksodusi 33:13) Jehova wamphendvula ngekutsi amtjele kutsi ungumuntfu lonjani. Fundza Eksodusi 34:4-6, bese nicoca ngalemibuto:

• Ngubuphi buntfu Jehova labuveta kuMosi?

• Ngubuphi buntfu baJehova lobutsandza kakhulu?

6. Jehova unendzaba nebantfu

Bantfu baNkulunkulu, lokungemaHebheru, bebatigcili eGibhithe. Jehova wativa njani ngesikhatsi labantfu bakhe bahlushwa? Dlala LOKULALELWAKO, futsi ulandzelele njengobe kufundvwa Eksodusi 3:1-10, bese nicoca ngalemibuto lelandzelako.

LOKULALELWAKO: Jehova Bekakubona Kuhlupheka Kwabo (2:45)

• Lendzaba ikutjelani ngendlela Jehova lativa ngayo ngekuhlupheka kwebantfu?—Buka emavesi 7 na-8.

• Ucabanga kutsi Jehova ufuna kubasita mbamba yini bantfu nekutsi unawo yini emandla ekubasita? Kungani utsi yebo, nobe utsi cha?

7. Singafundza kutsi Jehova ungumuntfu lonjani nasibuka tintfo latidalile

Jehova uveta buntfu bakhe asebentisa tintfo latidalile. Dlala le-VIDEO, ngemuva kwaloko nifundze KubaseRoma 1:20, bese nicoca ngalombuto lolandzelako.

I-VIDEO: Indalo Isikhombisa Lutsandvo LwaJehova—Imitimba Yetfu (1:57)

• Ngubuphi buntfu baJehova lobubona etintfweni latidalile?

LOKO LESICOCE NGAKO

Jehova ungumuntfu longabonakali, kodvwa unebuntfu lobuhle. Buntfu bakhe lobuhamba embili lutsandvo.

Yini Loyifundzile?

• Kungani singakhoni kumbona Jehova?

• Uyini umoya longcwele?

• Ngubuphi lobunye buntfu baJehova?

LOKUNYE LONGAKUHLOLA

Fundza lokunyenti ngebuntfu baJehova lobune lobuhamba embili.

“Ungumuntfu Lonjani Nkulunkulu?” (Sicongosekulindza No. 1 2019)

Hlola bufakazi bekutsi Jehova akatfolakali kuyo yonkhe indzawo.

“Nkulunkulu Ukuyo Yonkhe Indzawo Yini?” (Sihloko lesiku-internet)

Tfola kutsi kungani liBhayibheli litsi umoya longcwele usandla saNkulunkulu.

“Uyini Umoya Longcwele?” (Sihloko lesiku-internet)

Bekulukhuni ngalendvodza lengaboni emehlweni kukholelwa kutsi Nkulunkulu unendzaba nayo. Tfola kutsi yini leyayenta yashintja indlela beyicabanga ngayo.

“Manje Sengiyakwazi Ukusiza Abanye” (Sicongosekulindza sa-October 1, 2015, lesitfolakala ngesiZulu)