Lutsandvo Sipho Semoya Lesiligugu

UMPHOSTOLI Pawula waphefumulelwa kutsi abhale ngetipho temoya longcwele letiyimfica. (Gal. 5:22, 23) Wachaza letipho letinhle ngekutsi “titselo temoya.”a Letitselo tingumphumela ‘webuntfu lobusha.’ (Khol. 3:10) Njengobe nesihlahla singatsela titselo letinhle nangabe sinakekelwa kahle, nemuntfu utsela titselo temoya letinhle nangabe umoya longcwele ugeleta kahle ekuphileni kwakhe.​—Hla. 1:1-3.

Sitselo sekucala semoya longcwele Pawula lakhuluma ngaso sipho lesiligugu selutsandvo. Siligugu kanganani? Pawula watsi ngaphandle kwelutsandvo ‘bekangasilutfo.’ (1 Khor. 13:2) Kodvwa luyini lutsandvo, singaluhlakulela njani siphindze sibe nalo onkhe malanga?

Nanobe kute emagama langachaza kahle lutsandvo, liBhayibheli lichaza indlela lolungabonakala ngayo. Ngokwesibonelo, eBhayibhelini sifundza ngekutsi lutsandvo “luyabeketela futsi lunemusa.” Lokunye, “lujatjuliswa liciniso” futsi “lucinisela kuto tonkhe tintfo, lukholwa ngito tonkhe tintfo, lwetsemba tonkhe tintfo, lubeketelela tonkhe tintfo.” Lutsandvo luphindze lufake ekhatsi indlela lejulile lotiva ngayo ngalabanye, lukwente ubakhatsalele mbamba futsi lukwente usondzelane nabo. Ngakulolunye luhlangotsi, umuntfu lote lutsandvo ubonakala ngemona, kutigcabha, kutiphatsa lokubi, kuticabangela, intfukutselo nemoya wekungacoceli. Ngekungafani nemuntfu lonenhlitiyo lembi kanye nalotigabatisako, lutsandvo lesifuna kuba nalo “alutifuneli kwalo.”—1 Khor. 13:4-8.

“Nkulunkulu ulutsandvo.” Ngako-ke, Jehova usisekelo lesibalulekile selutsandvo. (1 Joh. 4:8) Yonkhe imisebenti yakhe netento takhe ifakazela lutsandvo lwakhe. Ngekutfumela Jesu emhlabeni kutsi atohlupheka aphindze asifele, bekakhombisa sintfu kutsi usitsandza kakhulu. Umphostoli Johane wabhala watsi: “Lutsandvo lwaNkulunkulu lwavetwa ngaloku kitsi, ngobe Nkulunkulu wayitfumela eveni iNdvodzana yakhe lekuphela kwayo kuze sitfole kuphila ngayo. Ngulolo-ke lutsandvo, hhayi kutsi ngitsi lesitsandze Nkulunkulu, kodvwa nguye lowasitsandza, watfumela iNdvodzana yakhe kutsi ibe ngumhlatjelo wekuhlawulela tono tetfu.” (1 Joh. 4:9, 10) Ngenca yelutsandvo lwaNkulunkulu, singatsetselelwa tono tetfu, sibe nelitsemba futsi sitfole nekuphila.

Jesu wakhombisa kutsi uyasitsandza sintfu ngekutsi ente intsandvo yaNkulunkulu. Naku lokwabhalwa nguPawula: “[Jesu] watsi: ‘Naku ngitile kuze ngente intsandvo yakho.’ . . . ‘Ngalentsandvo’ lokukhulunywe ngayo, singcwelisiwe ngekunikelwa kwemtimba waJesu Khristu lokwenteke kanye kuphela.” (Heb. 10:9, 10) Kute umuntfu lonelutsandvo lolungetulu kwalolu. Jesu watsi: “Kute umuntfu lonelutsandvo lolukhulu kunalolu, kutsi anganikela ngemphefumulo wakhe ngenca yebangani bakhe.” (Joh. 15:13) Nanobe sinesono, singakhona yini kuba nelutsandvo lolufanana nelwaJehova naJesu? Yebo! Asesicoce ngekutsi singakhona njani.

Pawula usikhutsata atsi: “Lingisani Nkulunkulu njengebantfwana labatsandzekako, futsi chubekani nihamba ngelutsandvo, njengobe nje naKhristu anitsandza waphindze watinikela ngenca yenu.” (Ef. 5:1, 2) Sichubeka ‘sihamba ngelutsandvo’ nangabe sihlakulela lobuntfu kuphila kwetfu konkhe. Sikhombisa kutsi siyabatsandza labanye ngetento hhayi ngemavi kuphela. Johane wabhala watsi: “Bantfwana, akukafaneli sitsandze ngelivi nobe ngemlomo kuphela, kodvwa kufanele sitsandze ngetento nangeliciniso.” (1 Joh. 3:18) Sibonelo saloku kutsi nangabe simtsandza Nkulunkulu kanye nabomakhelwane sitawubatjela “tindzaba letimnandzi teMbuso.” (Mat. 24:14; Luk. 10:27) Siphindze sihambe ngelutsandvo nangabe sikhombisa kutsi siyabeketela, sinemusa futsi siyatsetselela. LiBhayibheli liseluleka litsi: “Njengobe Jehova anitsetselele ngekukhululeka, nani yentani kanjalo.”​—Khol. 3:13.

Lutsandvo lolunje akukafanele lufananiswe nelutsandvo lwekutentisa. Cabanga nganaku, umtali lonetsandvo lekutentisa angase etame kuthulisa umntfwana lokhalako ngekutsi amnikete konkhe lakufunako. Kodvwa umtali lomtsandza mbamba umntfwana wakhe ngalesinye sikhatsi angacinisa sandla nakudzingeka. Ngendlela lefanako, Nkulunkulu ulutsandvo, kodvwa liBhayibheli litsi: “Jehova uyamyala loyo lamtsandzako.” (Heb. 12:6) Natsi nangabe sihamba ngelutsandvo sitawubayala labanye nakudzingeka. (Taga 3:11, 12) Kodvwa nasiyala labanye kufanele sikhumbule kutsi sinesono futsi singahle singakhombisi tento telutsandvo. Ngako, sonkhe kunetintfo lokufanele sitfutfuke kuto kute sikhombise labanye kutsi siyabatsandza. Singakwenta kanjani loku? Ake sesicoce ngetindlela letintsatfu lesingakwenta ngato.

Kwekucala, cela Nkulunkulu kutsi akuphe umoya wakhe, lotawukwenta ube nelutsandvo. Jesu watsi Jehova “ubapha umoya longcwele labo labamcelako.” (Luk. 11:13) Nangabe sithantazela umoya longcwele futsi ‘sichubeka sihamba ngemoya,’ tento tetfu titawukhombisa kutsi siyabatsandza. (Gal. 5:16) Cabanga nganaku, nangabe ungulomdzala ebandleni lebuKhristu, ungase ucele umoya longcwele kutsi ukusite ukhone kuyala labanye ngeseluleko lesiseBhayibhelini ngendlela lenelutsandvo. Nangabe ungumtali, ungawucela umoya waNkunkulu kutsi ukusite ukhone kuyala bantfwana bakho ngelutsandvo hhayi ngekutfukutsela.

Kwesibili, cabanga ngendlela Jesu lakhombisa ngayo lutsandvo ngisho nalapho aphatfwa kabuhlungu. (1 Phet. 2:21, 23) Kufanele sicabange ngesibonelo saKhristu ikakhulukati nangabe kukhona losikhubako nobe nasiphatfwa kabuhlungu. Nasibhekana netimo letinjalo kungaba kuhle kutibuta kutsi, ‘Kube bekunguJesu bekatawukwenta njani?’ Dzadze Leigh kwamsita kakhulu kucabanga ngalombuto ngaphambi kwekutsi ente lokutsite nakaphatfwa kabi. Utsi: “Ngalelinye lilanga, lomunye umutfu lebesisebenta naye watfumelela labanye lebesisebenta nabo umlayeto nge-e-mail abatjela tintfo letimbi ngami kanye nangemsebenti lebengiwenta. Loku kwangivisa buhlungu kakhulu. Kodvwa kamuva ngatibuta kutsi, ‘Ngingamlingisa njani Jesu kulenkinga lena?’ Ngemuva kwekucabanga ngaloko Jesu labengakwenta ngancuma kuyiyekela lendzaba futsi ngingasho lutfo ngayo. Kamuva ngatfola kutsi lesisebenti besigula matima futsi besicindzeteleke kakhulu. Ngaphetsa ngekutsi besingakacondzi kusho loko lebesikubhalile ngami. Kucabanga ngesibonelo saJesu ngesikhatsi akhombisa kutsi uyabatsandza labanye ngisho nobe bebamphatsa kabi, kwangisita ngakhona kumtsandza loyo lebengisebenta naye.” Ngako natsi nasilingisa Jesu, sitawuhlale sibatsandza labanye.

Kwesitsatfu, hlakulela umoya welutsandvo lwekutidzela lokuluphawu lwebuKhristu beliciniso. (Joh. 13:34, 35) Mayelana naloku, imiBhalo iseluleka kutsi sibe ‘nemcondvo’ lofanako nalowo Jesu bekanawo. Ngekushiya lizulu, “watidzela” ngenca yetfu “kwadzimate kwaba ngulapho afa.” (Fil. 2:5-8) Nangabe sichubeka silingisa lutsandvo lwakhe lwekutidzela, imicabango yetfu kanye nendlela lesitiva ngayo itawufanana neyakhe futsi sitawubeka tidzingo talabanye kucala kunetetfu. Nguyiphi leminye imiphumela lebakhona nangabe sihlakulela lutsandvo?

Nangabe sibatsandza labanye kuba nemiphumela lemihle kakhulu. Cabanga nganati tibonelo letimbili:

• LUTSANDVO LWEBUZALWANE BEMHLABA WONKHE: Ngenca yekutsi siyabatsandza labanye, siyati kutsi nobe ngabe ngukuliphi libandla lesiya kulo emhlabeni wonkhe, bazalwane nabodzadze lesibakhandza lapho batawusemukela ngenjabulo. Kusibusiso lesikhulu kutsandvwa ngibo ‘bonkhe bazalwane betfu labasemhlabeni wonkhe’! (1 Phet. 5:9) Ngukuphi nje encenye lapho singatfola khona lutsandvo lolunje ngaphandle kwekulutfola kubantfu baNkulunkulu?

• KUTHULA: “Kubeketelelana ngelutsandvo,” kusenta sijabulele “sibopho sekuthula.” (Ef. 4:2, 3) Sijabulela kuthula nasiya emihlangweni yelibandla yamaviki onkhe, emihlanganweni yesigodzi kanye nasemihlanganweni yesifundza. Awuvumi yini kutsi umoya wekuthula lonjengalo awufani naloyo lokhona kulelive lelehlukene ekhatsi? (Hla. 119:165; Isa. 54:13) Nangabe sakha kuthula nalabanye, sisuke sikhombisa lutsandvo lesinalo ngabo futsi loko kuyamjabulisa Babe wetfu wasezulwini.​—Hla. 133:1-3; Mat. 5:9.

Pawula wabhala watsi: “Lutsandvo luyakha.” (1 Khor. 8:1) Lwakha njani lutsandvo? Encwandzini yaPawula yekucala yaKhorinte sehluko-13, lebitwa ngekutsi “Tihlabelelo telutsandvo”​—lomphostoli uchaza tindlela lutsandvo lolwakha ngato. Lenye indlela lolwakha ngayo, kutsi lufunela labanye lokubasitako. (1 Khor. 10:24; 13:5) Ngetulu kwaloko, ngesizatfu sekutsi lutsandvo luyacabangela, luyabeketela futsi lunemusa, lwenta imindeni itsandzane luphindze lwakhe bunye emabandleni.​—Khol. 3:14.

Indlela lesimtsandza ngayo Nkulunkulu ibaluleke kakhulu futsi iyasakha. Lutsandvo lolunjengalolu luhlanganisa tonkhe tinhlobo tebantfu, tebuve kanye natotonkhe tinhlobo tetilwimi futsi tijabulela kuhlangana ndzawonye kute tikhonte Jehova tilinganise “lihlombe ngelihlombe.” (Zef. 3:9) Asitimisele kukhombisa lesipho lesiligugu sesitselo semoya longcwele waNkulunkulu onkhe malanga.