SIFUNDVO 05
LiBhayibheli Linemlayeto Lesiwubhalelwe NguNkulunkulu
Jehova usiphe liBhayibheli. Lesi sipho lesimangalisako lesakhiwa tincwadzi letincane letingu-66. Kodvwa kungenteka uyatibuta: ‘Lavelaphi liBhayibheli? Labhalwa ngubani?’ Kuze siphendvule lemibuto asesicale sicoce ngekutsi umlayeto waNkulunkulu loseBhayibhelini wefika njani kitsi.
1. Nangabe liBhayibheli labhalwa bantfu, kungani sitsi umBhali walo nguNkulunkulu?
LiBhayibheli labhalwa ngemadvodza langu-40, kusukela nga-1513 B.C.E. kuya ku-98 C.E., futsi kwatsatsa iminyaka lengu-1 600 kutsi licedvwe kubhalwa. Babhali balo bebavela etindzaweni letingafani. Nobe kunjalo, liBhayibheli lonkhe liyavumelana. Kwentiwa yini loku? Ngobe nguNkulunkulu umBhali walo. (Fundza 1 KubaseThesalonika 2:13.) Lababhali beliBhayibheli bebangabhali imicabango yabo. Kunaloko “bebakhuluma lokuvela kuNkulunkulu njengobe bebacondziswa ngumoya longcwele.”a (2 Phetro 1:21) Nkulunkulu wasebentisa umoya wakhe longcwele kuze atjele nobe akhutsate lamadvodza kutsi abhale imicabango yakhe.—2 KuThimothi 3:16.
2. Bonkhe bantfu bangazuza yini eBhayibhelini?
“Tonkhe tive, tinhlanga, tilwimi kanye nebantfu” bangazuza etindzabeni letimnandzi letiseBhayibhelini. (Fundza Sembulo 14:6.) Nkulunkulu wente sicinisekiso sekutsi liBhayibheli liyatfolakala ngetilwimi letinyenti kwendlula nobe ngabe nguyiphi lenye incwadzi emlandvweni. Cishe bonkhe bantfu banalo liBhayibheli. Loko kuliciniso ngobe ngisho nobe bantfu bahlala kuphi nobe bakhuluma luphi lulwimi banalo liBhayibheli.
3. LiBhayibheli laba kuyiphi ingoti futsi Jehova walivikela njani?
LiBhayibheli labhalwa etintfweni letingahlali sikhatsi lesidze, letinjengesikhumba kanye nemaphepha lakhiwe ngesihlahla se-papyrus. Ngako emadvodza lebekatsandza liBhayibheli akopisha ngekucophelela loko lobekubhalwe kuletintfo futsi akubhala kahle. Labanye babusi nebaholi benkholo betama kulicedza kutsi lingaphindzi libe khona liBhayibheli. Nobe kunjalo, labanye bantfu bebatimisele kufaka kuphila kwabo engotini kuze balivikele. Jehova akazange avumele muntfu nobe lenye intfo imvimbele kutsi akhulume natsi. LiBhayibheli litsi: “Livi laNkulunkulu wetfu lihlala kuze kube phakadze.”—Isaya 40:8.
CHUBEKA UFUNISISA
Fundza lokunyenti mayelana nendlela Nkulunkulu labatjela ngayo bantfu kutsi babhale liBhayibheli, indlela lalivikela ngayo, kanye naloko lakwenta kute bantfu balitfole.
4. LiBhayibheli lisitjela ngemBhali walo
Dlala le-VIDEO, nifundze 2 KuThimothi 3:16, bese nicoca ngalemibuto lelandzelako.
Nangabe liBhayibheli labhalwa bantfu, kungani kutsiwa liliVi laNkulunkulu?
Ucabanga kutsi kunengcondvo yini kutsi Nkulunkulu bekangandlulisela imicabango yakhe kubantfu kuze bayibhale?
Mabhalane angabhala incwadzi, kodvwa umlayeto lokuyo walona lomtjela kutsi akabhale kutsini. Ngendlela lefanako, bantfu lababhala liBhayibheli, babhala umlayeto lovela kuNkulunkulu
5. LiBhayibheli lasindza ekuhlaselweni
Nangabe liBhayibheli liyincwadzi levela kuNkulunkulu, besingalindzela kutsi alivikele. Kusukela endvulo bantfu labasetikhundleni bebasolo betama kulicedza kutsi lingaphindzi libe khona. Baholi benkholo betama kulifihla. Ngisho nobe bebaphikiswa futsi besatjiswa ngekufa, bantfu labanyenti babeka kuphila kwabo engotini kute nje bavikele liBhayibheli. Kuze ufundze ngalomunye walabo lababeka kuphila kwabo engotini, dlala le-VIDEO, bese nicoca ngalemibuto lelandzelako.
Njengobe sewati kutsi bantfu labanyenti bafaka kuphila kwabo engotini kuze bavikele liBhayibheli, loko akukwenti yini ufune kulifundza? Kungani?
Fundza Tihlabelelo 119:97, bese nicoca ngalombuto:
Yini leyente bantfu labanyenti bafaka kuphila kwabo engotini kuze bahumushe liBhayibheli futsi balisakate?
6. Incwadzi lebhalelwe bonkhe bantfu
LiBhayibheli lihunyushwe ngetilwimi letinyenti laphindze lasakatwa kwendlula nobe ngabe nguyiphi lenye incwadzi emlandvweni. Fundza Imisebenti 10:34, 35, bese nicoca ngalemibuto:
Kungani Nkulunkulu afuna kutsi liVi lakhe lihunyushwe ngetilwimiletinyenti futsi litfolwe bantfu labanyenti?
Yini loyitsandza kakhulu ngeliBhayibheli?
Bacishe babe ngu-
100%
bantfu emhlabeni wonkhe
labaneliBhayibheli ngelulwimi labaluvako
Litfolakala
ngetilwimi letingetulu kwa-
3 000
kungaba nguleliphelele nobe incenye yalo
5 000 000 000
Kulinganiselwa kutsi sekukhicitwe emaBhayibheli langetulu kwa-
futsi kute incwadzi lekhicitwe kakhulu kwendlula lona
LABANYE BANTFU BATSI: “LiBhayibheli limane nje liyincwadzi yakadzeni leyabhalwa bantfu.”
Wena ucabangani?
Yini lefakazela kutsi liBhayibheli liliVi laNkulunkulu?
LOKO LESICOCE NGAKO
LiBhayibheli liliVi laNkulunkulu futsi wente kutsi litfolwe ngibo bonkhe bantfu.
Yini Loyifundzile?
Sisuke sisho kutsini nasitsi Nkulunkulu watjela emadvodza kutsi abhale liBhayibheli?
Yini lekumangalisa kakhulu mayelana nekusindza kweliBhayibheli, kuhunyushwa kanye nekusakatwa kwalo?
Kwati imetamo Nkulunkulu layentile kute akhulume nawe kukwenta utive njani?
LOKUNYE LONGAKUHLOLA
Fundza ngemlandvo weliBhayibheli—kusuka emiBhalweni yekucala kuya etilwimini letikhulunywa lamuhla.
“Indlela Esalithola Ngayo IBhayibheli” (Phaphama! yaNovember 2007, letfolakala ngesiZulu)
Fundza indlela liBhayibheli lelisindze ngayo etingotini letintsatfu.
“Lasindza Njani LiBhayibheli?” (Sicongosekulindza No. 4 2016)
Buka letinye tingoti bahumushi lababakuto ngesikhatsi basahumusha liBhayibheli.
LiBhayibheli likopishwe laphindze lahunyushwa tikhatsi letinyenti. Yini lengakwenta uciniseke kutsi umlayeto walo awuzange ushintjwe?
a Njengobe kutawuchazwa kuSifundvo 07, umoya longcwele ungemandla aNkulunkulu lasebentako.