Umehluko Emkhatsini Webantfu Labakhonta Jehova Nalabangamkhonti

1, 2. Ngutiphi tinkinga bantfu baJehova labahlangabetana nato lamuhla? (Buka sitfombe lesisekucaleni kwalesihloko.)

BANTFU labanyenti labaceceshelwe kwelapha basebenta nebantfu labanetifo letitsatselwanako. Banakekela bantfu labagulako ngoba bafuna kubasita. Nanobe bafuna kubasita, kufanele bativikele kute bangatotfola letifo labetama kutelapha. Ngalokufanako, labanyenti betfu basebenta nebantfu labanendlela yekucabanga nebuntfu lobungahambisani nebuntfu baNkulunkulu. Loku kungaba yinkinga kitsi.

² Kulamalanga ekugcina kugcwele kutiphatsa lokubi. Incwadzi yesibili umphostoli Pawula layibhalela Thimothi ichaza tintfo letimbi letentiwa bantfu labahlukanisiwe naNkulunkulu futsi tiyachubeka tandza njengobe kuphela kwalelive kusondzela. (Fundza 2 Thimothi 3:1-5, 13.) Ngisho noma kwandza kwalobuntfu kungasimangalisa, umkhuba wabo, indlela labaphila ngayo kanye nalabenta ngayo tintfo ingasitsintsa. (Taga 13:20) Kulesihloko, sitawucoca ngemehluko lokhona emkhatsini webuntfu lobukhonjiswa bantfu balelive kulamalanga ekugcina kanye nalobukhonjiswa bantfu baNkulunkulu. Sitawuphindze sifundze ngekutsi singativikela njani emikhubeni lemibi yalelive kepha sibe sibasita kutsi babe nebuhlobo lobuhle naNkulunkulu.

 3. Umbhalo wa-2 Thimothi 3:2-5 ukhuluma ngebantfu labanjani?

³ Umphostoli Pawula wabhala kutsi: “Emalangeni ekugcina kutawuba netikhatsi letibucayi lokumatima kubhekana nato.” Wabese ukhuluma ngemikhuba lengu-19 lebeyitawubonakala kubantfu labaphila emalangeni ekugcina. Lemikhuba iphindze itfolakale nakuRoma 1:29-31, kodvwa encwadzini yaThimothi umphostoli Pawula wasebentisa emagama langatfolakali kuletinye tincwadzi emiBhalweni YemaKhristu YesiGriki. Ngaphambi kwekutsi akhulume ngalemikhuba, umphostoli Pawula wacala ngemavi latsi, “ngobe bantfu . . . ” Noma kunjalo, akusibo bonkhe bantfu labanalemikhuba lemibi. EmaKhristu anebuntfu lobehluke kakhulu.​—Fundza Malakhi 3:18.

 4. Ungabachaza njani bantfu labagcwele umgcabho?

⁴ Nakacedza kutsi bantfu batawutitsandza bona, batsandze nemali, Pawula wabhala kutsi bantfu batatigabatisa, batigcabhe futsi bagcwale umgcabho, lokuyimikhuba lebangelwa kutikhukhumeta ngenca yetintfo lokhona kutenta, indlela lobukeka ngayo, kanye nekunjinga. Bantfu labanjalo bafuna kuhlonishwa nekutsandvwa. Mayelana nemuntfu lotigcabhako, lomunye umfundzi watsi: “Enhlitiyweni yakhe utikhandza kunguye umuntfu sibili.” Labanye batsi bantfu labanjalo bayenyanya nababona labanye bantfu labatigcabhako.

 5. Tinceku taNkulunkulu letetsembekile takhombisa njani kutigcabha?

⁵ Jehova uyabenyanya bantfu labatigcabhako. Uyawenyanya “nemehlo latichenyako.” (Taga 6:16, 17) Kutigcabha kwenta bantfu bangakhoni kusondzela kuNkulunkulu. (Hla. 10:4) Kubuntfu baDeveli. (1 Thim. 3:6) Lokubuhlungu kutsi naletinye tinceku taJehova letetsembekile take tatigcabha. Uziya inkhosi yakaJuda beyetsembekile iminyaka leminyenti. Noma kunjalo, liBhayibheli litsi: “Kwatsi kube Uziya abe nemandla, kutiphakamisa kwakhe kwamdvonsela ekuweni. Akazange etsembeke kuSimakadze Nkulunkulu wakhe; wangena ethempelini laSimakadze washisa imphepho elatini lemphepho.” Ngekuhamba kwesikhatsi, iNkhosi Hezekiya yatikhukhumeta, kodvwa kwaba kwesikhashana.​—2 Khr. 26:16; 32:25, 26.

 6. Yini lebeyingenta Davide atikhukhumete, kodvwa kungani angazange atikhukhumete?

⁶ Labanye bantfu bayatigcabha ngekutsi bahle, badvumile, bayakwati kuhlabela, banemakhono ekwenta lokutsite noma banesikhundla lesiphakeme. Davide bekanako konkhe loku kepha bekatfobekile imphilo yakhe yonkhe. Nasekabulele Goliyati, waniketwa indvodzakati yeNkhosi Sawula kutsi ibe ngumfati wakhe, kodvwa Davide watsi: “Bengingubani mine, yona indlu yaketfu iyini, lona lusendvo lwababe beluyini esiveni saka-Israyeli, kutsi mine bengingaba ngumkhwenyane wenkhosi?” (1 Sam. 18:18) Yini leyasita Davide kutsi ahlale atfobekile? Lobuntfu, emakhono, kanye nemalungelo Davide bekanawo wawatfola ngoba Jehova watehlisa noma watitfoba kute anake Davide. (Hla. 113:5-8) Davide bekati kutsi konkhe lokuhle lebekanako bekuvela kuJehova.​—Catsanisa 1 Khorinte 4:7.

 7. Yini lengasisita kutsi sikhombise kutfobeka?

⁷ NjengaDavide, bantfu baJehova lamuhla balwela kuba ngulabatfobekile. Kuyasijabulisa kwati kutsi ngisho noma Jehova anguNkulunkulu lophakeme kakhulu, uyabukhombisa lobuntfu lobuhle. (Hla. 18:35) Siyasilalela sicondziso lesiphefumulelwe lesitsi: “Gcokani luvelo, umusa, kutfobeka, umoya lophansi, nekubeketela.” (Khol. 3:12) Siyati nekutsi lutsandvo “alutigabatisi, alutikhukhumeti.” (1 Khor. 13:4) Nangabe sitfobekile, sisuke sisita labanye kutsi basondzele kuJehova. Njengobe kutiphatsa kwebafati kungenta emadvodza azuzeke ngaphandle kwelivi, nekutfobeka kwebantfu baNkulunkulu kungenta labanye basondzele kuye.​—1 Phet. 3:1.

 8. (a) Labanye bantfu banamuphi umbono mayelana nekungalaleli batali? (b) ImiBhalo iyala bantfwana kutsi benteni?

⁸ Pawula wachaza indlela bantfu lebebatawuphatsana ngayo kulamalanga ekugcina. Wabhala kutsi emalangeni ekugcina, bantfwana ngeke balalele batali. Ngisho noma labanye bawemukela lomkhuba futsi bawukhutsata etincwadzini, kuma-movie, kanye nasetinhlelweni te-TV, kungalaleli kwenta umndeni ungabi nebunye. Sekuphele sikhatsi lesidze bantfu balati leliciniso. Nasi sibonelo, eGreece yasendvulo, umuntfu bekalahlekelwa ngiwo onkhe emalungelo nangabe ashaya batali bakhe; kantsi ngekusho kwemtsetfo wemaRoma, kushaya babe wakho bekukubi kakhulu njengelicala lekubulala. ImiBhalo yesiHebheru kanye neyemaKhristu yesiGriki iyala bantfwana kutsi bahloniphe batali babo.​—Eks. 20:12; Ef. 6:1-3.

 9. Yini letawusita labasebasha kutsi balalele batali babo?

⁹ Bantfwana bangativikela kute bangangenwa ngumoya walelive wekungalaleli ngekutsi bacabangisise ngetintfo labatentelwe batali babo. Kwati kutsi Jehova longuBabe wetfu sonkhe ufuna silalele, kutawusita bantfwana balalele batali babo. Nangabe bantfwana bakhuluma kahle ngebatali babo kutawusita labanye bantfwana kutsi babe nembono lokahle ngebatali babo. Ngako nangabe batali bangabatsandzi bantfwana babo kungaba matima kutsi babalalele ngalokusuka enhlitiyweni. Ngakulolunye luhlangotsi, nangabe umuntfu losemusha abona kutsi batali bakhe bamtsandza ngalokusuka enhlitiyweni, utawukhutsateka kutsi ente tintfo letitawubajabulisa ngisho noma alingeka kutsi angalaleli. Austin utsi: “Ngisho noma bengivame kungalaleli, batali bami banginiketa ticondziso letikahle bangichazela kutsi kungani babeka imitsetfo letsite futsi besikhulumisana ngekukhululeka. Loku kwangisita kutsi ngilalele. Bengibona kutsi batali bami bayangikhatsalela, futsi loku kwangenta ngafuna kubajabulisa.”

10, 11. (a) Ngumiphi imikhuba lemibi lekhombisa kutsi bantfu bete lutsandvo? (b) EmaKhristu eliciniso abatsandza kanganani bazalwane bawo?

¹⁰ Pawula waphindze wakhuluma nangaleminye imikhuba lekhombisa kutsi bantfu bete lutsandvo. Nasekakhulume ‘ngekungalaleli batali’, Pawula wabese ukhuluma ngebantfu labangabongi, loku kunengcondvo ngoba bantfu labanjalo ababongi ngetintfo letinhle labanye lababentele tona. Bantfu bebangeke betsembeke. Bebangeke bafune kwenta tivumelwano, lokukhombisa kutsi abafuni kuvana nalabanye bantfu. Bekutawuba nebantfu labahlambalatako kanye nalabatsengisa ngalabanye bantfu, futsi bebatawukhuluma kabi ngalabanye bantfu ngisho nangaNkulunkulu. Ngetulu kwaloko bekutawuba nebanyundzeli, lokusho bantfu labakhuluma kabi ngalabanye bantfu kute bone ligama labo.a

¹¹ Ngalokwehlukile kubantfu labete lutsandvo lamuhla, bantfu labakhonta Jehova babatsandza ngalokusuka enhlitiyweni labo labakholwa nabo. Loku kubonakele kutsi kuliciniso. Lutsandvo lokutsiwa yi-a·ga’pe lufaka ekhatsi kutsandza makhelwane. Jesu watsi lona ngumyalo wesibili lobaluleke kakhulu eMtsetfweni waMosi, futsi ulandzela umyalo wekutsandza Nkulunkulu. (Mat. 22:38, 39) Jesu waphindze watsi emaKhristu eliciniso abetawubonakala ngekutsi atsandzane. (Fundza Johane 13:34, 35.) EmaKhristu abetawutsandza ngisho netitsa tawo.​—Mat. 5:43, 44.

12. Jesu wakhombisa njani kutsi uyabatsandza bantfu?

¹² Jesu wakhombisa kutsi ubatsandza kakhulu labanye bantfu. Wahamba emadolobha lamanyeti, atjela labanye tindzaba letimnandzi teMbuso waNkulunkulu. Welapha labangaboni, labachutako, labanebulephelo labangeva etindlebeni futsi wavusa ngisho nalabafile. (Luk. 7:22) Ngisho noma bantfu bebamenyanya, Jesu wanikela ngekuphila kwakhe ngenca yabo. Jesu walukhombisa ngalokuphelele lutsandvo Babe wakhe lanalo. Emhlabeni wonkhe BoFakazi BaJehova bakhombisa lutsandvo lwaNkulunkulu kulabanye.

13. Lutsandvo lesilubonisa labanye lungabasita njani kutsi basondzele kuJehova?

¹³ Lutsandvo lesilukhombisa labanye lubenta basondzele kuBabe wetfu losezulwini. Nasi sibonelo, emhlanganweni wesifundza lobewuseThailand, lenye indvodza yatsintseka nayibona indlela bazalwane labatsandzana ngayo. Nayibuyela ekhaya, yacela kuchutjelwa sifundvo seliBhayibheli kabili ngeliviki. Beyishumayela etihlotjeni tayo, futsi ngemuva kwetinyanga letisitfupha ibuya emhlanganweni yabeka inkhulumo yayo yekucala yekufundvwa kweliBhayibheli eHholeni LeMbuso. Kuze sitihlole kutsi silubonisa kanganani lutsandvo kulabanye, kufanele sitibute kutsi: ‘Ngiyatimisela yini kusita labanye emndenini wami, ebandleni kanye nesemsebentini wekushumayela? Ngiyetama yini kubuka labanye ngendlela Jehova lababuka ngayo?’

14, 15. Ngubuphi buntfu lobukhonjiswa bantfu labanyenti, kodvwa yini labanye labayentile kuze bakhone kushintja?

¹⁴ Indlela bantfu kulamalanga ekugcina labatiphatsa ngayo inika emaKhristu sizatfu lesicinile sekutsi angatihlanganisi nabo. Bantfu labangakholelwa kuNkulunkulu bebangeke bakutsandze lokuhle, futsi lamanye emahumusho atsi, “bebatawutondza lokuhle.” Bangatibambi futsi babe nelulaka. Labanye bebatawuba nenkhani, noma babe nemawala futsi banganaki.

¹⁵ Bantfu labanyenti labebanelulaka bakhonile kushintja buntfu babo. Lolushintjo lwabiketelwa esiphrofethweni seliBhayibheli. (Fundza Isaya 11:6, 7.) Kulesiphrofetho sifundza ngetilwane tesiganga letifana netimphisi nemabhubesi letitawuhlala ngekuthula netilwane letifuywako njengetimvu nematfole. Naka kutsi lokuthula kutawuba khona “ngobe umhlaba uyawugcwala kwati Simakadze.” (Isa. 11:9) Njengoba tilwane tingeke tifundze ngaJehova, lesiphrofetho siyagcwaliseka nakubantfu labashintja buntfu babo.

16. LiBhayibheli libasite njani bantfu kutsi bashintje buntfu babo?

¹⁶ Bantfu labanyenti bebanelulaka njengetimphisi, kodvwa nyalo bahlalisana ngekuthula nalabanye. Ungafundza ngetibonelo tabo etihlokweni letitsi, “LiBhayibheli Liyakugucula Kuphila” letitfolakala ku-jw.org. Bantfu labati Jehova futsi bamkhonte abafani nebantfu lababonakala shengatsi bayamhlonipha Nkulunkulu kodvwa babe bawaphika emandla ako, benta shengatsi bayamkhonta Nkulunkulu kepha indlela labatiphatsa ngayo ayivumelani nalabakushoko. Kunaloko, bantfu labebenta tintfo letimbi bakhonile kugcoka “buntfu lobusha lobentiwa ngekuvumelana nentsandvo yaNkulunkulu ngekulunga nangebucotfo lobungibo.” (Ef. 4:23, 24) Bantfu nabafundza ngaNkulunkulu bayasibona sidzingo sekuphila ngekuvumelana netimiso takhe futsi loko kubenta bashintje tintfo labatikholelwako, indlela labacabanga ngayo nalabatiphatsa ngayo. Kwenta lolushintjo akusimelula, kodvwa lungenteka ngoba umoya waNkulunkulu uyabasita labo labatimisele kwenta intsandvo yakhe.

17. Singakugwema njani kulingisa bantfu labangamkhonti Jehova?

¹⁷ Umehluko emkhatsini webantfu labakhonta Nkulunkulu nalabo labangamkhonti ubonakala ngalokucacile. Tsine lesikhonta Nkulunkulu kufanele sicaphele kute singalingisi indlela bantfu balelive labacabanga ngayo. Kukuhlakanipha kutsi silalele sicondziso lesiphefumulelwe lesitsi sibafulatsele bantfu labachazwe emBhalweni wa-2 Thimothi 3:2-5. Kuliciniso kutsi ngeke sikhone kubagwema ngalokuphelele bantfu labangamkhonti Jehova. Kungenteka sisebenta nabo, sifundza nabo noma sihlala nabo. Kodvwa singakhona kukubalelekela kucabanga nekwenta njengabo. Loko singakwenta ngekutsi sicinise buhlobo betfu naJehova ngekudadisha liBhayibheli kanye nangekutihlanganisa nebantfu labatimisele kukhonta Jehova.

18. Indlela lesikhuluma ngayo nalesitiphatsa ngayo ingabasita njani labanye kutsi basondzele kuNkulunkulu?

¹⁸ Kufanele setame kusita labanye kutsi babe nebuhlobo lobuhle naNkulunkulu. Funa ematfuba ekushumayela futsi ucele Jehova akusite ukhulume emavi lakahle ngesikhatsi lefanele. Kufanele sitjele labanye kutsi siBoFakazi BaJehova. Nasenta njalo, kutiphatsa kwetfu lokuhle kutawuletsa ludvumo kuJehova hhayi kitsi. Siceceshelwe kutsi “sikulahle kungamhloniphi Nkulunkulu netifiso talelive, kodvwa siphile ngengcondvo lebhadlile, ngekulunga, nangekwesaba Nkulunkulu kulelive.” (Thit. 2:11-14) Nangabe sitiphatsa ngendlela Nkulunkulu lafuna sitiphatse ngayo, labanye batasibona bese batsi: “Asihambisane nani, ngobe sivile kutsi Nkulunkulu unani.”​—Zak. 8:23.