Nguluphi Lutsandvo Lolusiniketa Injabulo Sibili?

 1. Kungani sikhatsi lesiphila kuso sehlukile?

SIPHILA esikhatsini lesehluke kakhulu kulesake saba khona emlandvweni webantfu. Njengobe liBhayibheli labiketela, Jehova ubutsela ndzawonye “sicumbi lesikhulu . . . lesiphuma kuto tonkhe tive, tinhlanga, bantfu, kanye netilwimi.” Labo labakha lesicumbi ‘basive lesinemandla’ lesingetulu kwetigidzi letisiphohlongo futsi ‘bentela [Nkulunkulu] umsebenti longcwele busuku nemini.’ (Semb. 7:9, 15; Isa. 60:22) Akukase kwenteke emlandvweni kutsi bantfu labanyenti kangaka batsandze Jehova kanye nalabanye bantfu.

 2. Nguluphi lutsandvo lolwehlukile bantfu labangamkhonti Nkulunkulu labanalo? (Buka sitfombe lesisekucaleni kwalesihloko.)

² Noma kunjalo, imiBhalo yaphindze yabiketela kutsi esikhatsini salamuhla bekutawuba nelutsandvo lwebugovu lebelitawukhonjiswa bantfu labangamkhonti Nkulunkulu. Umphostoli Pawula wabhala kutsi: “Emalangeni ekugcina . . . , bantfu batawutitsandza bona, batsandze imali, . . . batsandze injabulo kunekutsandza Nkulunkulu.” (2 Thim. 3:1-4) Lolutsandvo lolu lwehlukile kulolo emaKhristu lanalo. Kulwela kufinyelela igomo lekhombisa bugovu akubaletseli bantfu injabulo labayilindzele. Kuliciniso kutsi lutsandvo lwebugovu lwenta kube matima kuphila kulelive.

 3. Sitawucoca ngani kulesihloko, futsi kungani?

³ Pawula wabona kutsi lutsandvo lwebugovu luyandza futsi lungaba yingoti kumaKhristu. Kungako aniketa secwayiso sekutsi ‘sibobafulatsela’ bantfu labanelutsandvo lwebugovu. (2 Thim. 3:5) Noma kunjalo, angeke sikhone kubagwema ngalokuphelele. Ngako singakugwema njani kwenta imikhuba leyentiwa bantfu balelive futsi silwele kujabulisa Jehova longuNkulunkulu welutsandvo? Ase sihlole umehluko emkhatsini welutsandvo sibili kanye nelutsandvo loluchazwa embhalweni wa-2 Thimothi 3:2-4. Kwenta loku kutasisita sitihlole futsi sibone lutsandvo lokufanele silubonise, lutsandvo loluletsa injabulo sibili nekwenetiseka.

 4. Kungani kungasiko kubi kutitsandza ngelizinga lelifanele?

⁴ Umphostoli lophefumulelwe wabhala kutsi: “Bantfu batawutitsandza bona.” Kukabi yini kutsi sititsandze? Cha, kuyintfo levamile futsi kufanele sititsandze njengobe Jehova wasidala kutsi sititsandze. Jesu watsi: “Kufanele utsandze makhelwane wakho njengobe utitsandza wena.” (Mak. 12:31) Nangabe singatitsandzi angeke sibatsandze bomakhelwane betfu. EBhayibhelini siphindze sifundze kutsi: “Emadvodza kufanele atsandze bomkawo njengobe atsandza imitimba yawo. Loyo lotsandza umkakhe utitsandza yena, ngobe kute umuntfu lowake watondza umtimba wakhe, kodvwa uyawondla aphindze awunakekele.” (Ef. 5:28, 29) Ngako kutitsandza ngendlela lefanele kuyintfo lenhle.

 5. Ungabachaza njani bantfu labatitsandza ngalokwecile?

⁵ Lutsandvo lokukhulunywa ngalo ku-2 Thimothi 3:2 akusilo lutsandvo lokufanele sibe nalo ngobe lulutsandvo lwebugovu. Bantfu labatitsandza ngalokwecile baticabangela bona kuphela futsi loko bakwenta ngelizinga lelingakafaneli. (Fundza Roma 12:3.) Batitsatsa njengalababaluleke kakhulu kunalabanye. Nangabe kukhona lokubi lebakwentile basola labanye ngako kunekutsi bavume emaphutsa abo. Bantfu labatitsandza bona batifunela tintfo letincono futsi abanendzaba nalabanye. Bantfu labanjalo bete injabulo sibili.

 6. Nguyiphi imiphumela lesiyitfola ngekutsandza Nkulunkulu?

⁶ Bafundzi beliBhayibheli batsi lutsandvo lwebugovu luyintfo yekucala umphostoli Pawula layisho nakabala buntfu lobungafaneleki lobebutawuba khona ngemalanga ekugcina, ngobe leletinye tintfo tibangelwa ngilo. Bantfu labatsandza Jehova banebuntfu lobuhlukile. LiBhayibheli litsi lutsandvo Nkulunkulu lafuna sibe nalo luhambisana nenjabulo, kuthula, kubeketela, umusa, buhle, kukholwa, umoya lomuhle, nekutibamba. (Gal. 5:22, 23) Umhlabeleli watsi: “Siyajabula leso sive Nkulunkulu waso lekunguJehova!” (Hla. 144:15, NW) Jehova unguNkulunkulu lojabulako futsi nebantfu bakhe bayajabula. Ngetulu kwaloko, ngalokungafani nalabo labatitsandza bona futsi labafuna kuphiwa kuphela, tinceku taJehova titfola injabulo ngekutsi tiphe labanye tintfo letinato.​—Imis. 20:35.

 7. Ngimiphi imibuto letasisita sihlolisise indlela lesitsandza ngayo Jehova?

⁷ Singabona kanjani kutsi indlela lesititsandza ngayo seyendlula indlela lesitsandza ngayo Jehova? Cabanga ngeseluleko lesitfolakala kuFiliphi 2:3, 4 lesitsi: “Ningenti lutfo ngekubanga nome ngekutati, kodvwa ngekutfobeka nitsatse labanye njengalabakhulu kunani. Ningaticabangeli nine kuphela, kodvwa cabangelani nalabanye.” Singatibuta kutsi: ‘Ngiyasisebentisa yini leseluleko ekuphileni kwami? Ngifuna mbamba yini kwenta intsandvo yaNkulunkulu? Ngiyabasita yini labanye, ebandleni kanye nasemsebentini wekushumayela?’ Akusimelula kunikela ngesikhatsi setfu kanye nemandla etfu. Kudzinga kutidzela kanye nekutimisela. Kute lokunye lokungasenta sijabule kwendlula kwati kutsi semukelwa nguMbusi wendzawo yonkhe.

 8. Kutsandza Nkulunkulu kukhutsate labanye kutsi benteni?

⁸ Kutsandza Jehova lwenta bantfu bashiye imisebenti leholela kahle kute bakhonte Jehova sikhatsi sonkhe. Ericka longudokotela lohlala eMelika wayekela kufuna sikhundla lesisetulu sebudokotela, waba lihlahlandlela futsi sewukhonte iminyaka leminyenti akanye nendvodza yakhe. Nakacabanga ngesikhatsi lesendlulile utsi: “Timo letinyenti lesihlangabetene nato nasishumayela endzaweni lapho khona kukhulunywa lolunye lulwimi kanye nebangani lesibatfolile kusente satfola injabulo ekuphileni. Solo ngisengudokotela, kepha kucitsa sikhatsi sami lesinyenti kanye nemandla ami kute ngisite bantfu babe nebuhlobo lobuhle naNkulunkulu nekuphindze nginakekele tidzingo tebazalwane lengikanye nabo, kungijabulisa kakhulu futsi kungenta ngenetiseke.”

 9. Kungani kutsandza imali kungayiletsi injabulo?

⁹ Pawula watsi bantfu ‘bebatawutsandza imali.’ Eminyakeni leyendlulile lelinye lihlahlandlela lacoca nalenye indvodza ngaNkulunkulu. Lendvodza yakhipha sipatji sayo, yakhipha imali, yayiphakamisa ngekutigcabha yase itsi: “Lona ngunkulunkulu wami!” Labanye ngeke sebente njengalendvodza embikwebantfu, kepha lelive ligcwele bantfu labatsandza imali kanye netintfo talelive. Noma kunjalo, liBhayibheli liyasecwayisa litsi: “Umuntfu lotsandza imali akeneliseki ngayo; nemuntfu lotsandza bunjinga lobukhulu akeneliswa nguloko lakutfolile.” (Shu. 5:10) Bantfu labanjalo batawuhlala bafuna imali lenyenti futsi bangenta nome ngabe yini kute bayitfole, batiletsele “buhlungu lobunyenti.”​—1 Thim. 6:9, 10.

10. Litsini liBhayibheli ngemcebo nangebuphuya?

¹⁰ Kuliciniso kutsi sonkhe siyayidzinga imali ngoba ingasinika sivikelo. (Shu. 7:12) Umuntfu angaba nenjabulo sibili yini nangabe anemali lenela tidzingo takhe kuphela? Yebo angajabula! (Fundza Umshumayeli 5:12.) Aguri, umsa waJakhe wabhala watsi: “Buphuya nebunjinga ungangiphi, kodvwa umane ungiphe lengikudzingako.” Singasicondza sizatfu sakhe sekutsi angafuni kuphuya kakhulu. Wachubeka wachaza watsi ngobe akafuni kulingeka kutsi ebe ngobe kweba kuhlazisa Nkulunkulu. Kungani athantaza wacela kutsi anganjingi? Wabhala watsi: “Ngingahle ngicabange kutsi wena angisakudzingi, ngidzimate ngitsi: ‘Ngubani yena loSimakadze?’” (Taga 30:8, 9) Kungenteka kukhona bantfu lobatiko labetsembele emcebeni kunekutsi betsembele kuJehova.

11. Ngusiphi seluleko Jesu lasisho mayelana nemali?

¹¹ Bantfu labatsandza imali angeke bakhone kujabulisa Nkulunkulu. Jesu watsi: “Kute umuntfu longasebentela emakhosi lamabili, ngobe utawutondza lenye atsandze lelenye, nobe ahloniphe lenye edzelele lelenye. Ngeke nikhonte Nkulunkulu kanye nemcebo.” Ngaphambi kwekutsi asho loku watsi: “Ningatibekeli umcebo emhlabeni, lapho umvunya nekutfomba kungawudla khona, nalapho emasela angagcekeza khona awebe. Kodvwa tibekeleni umcebo ezulwini, lapho umvunya nekutfomba kungeke kuwudle khona, nalapho emasela angeke agcekeze khona awebe.”​—Mat. 6:19, 20, 24.

12. Kuphila imphilo lemelula kungakwenta njani kube melula kukhonta Jehova? Shano sibonelo.

¹² Bantfu labanyenti batfole kutsi kuphila imphilo lemelula akubenti bajabule kuphela kepha kuphindze kubente bacitse sikhatsi lesinyenti bakhonta Jehova. Jack, lohlala eMelika, watsengisa indlu yakhe lenkhulu kanye nelibhizinisi lakhe ngoba bekati kutsi kwenta kanjalo bekutomenta akhone kuba lihlahlandlela kanye nemkakhe. Utsi: “Bekulukhuni kutsengisa likhaya letfu lelihle kanye netintfo lebesinato. Kepha iminyaka leminyenti, bengihlala ngibuya ekhaya ngikhatsatekile ngetinkinga temsebenti. Umkami lolihlahlandlela bekahlale ajabulile. Bekatsi: ‘Mine nginemphatsi lokahle kakhulu!’ Nyalo njengobe nami sengilihlahlandlela, sesisebentela umphatsi munye, Jehova.”

13. Yini lengasisita sitihlole endzabeni yekutsandza imali?

¹³ Kuze sihlolisise umbono lesinawo ngemali, kufanele siphendvule lemibuto lelandzelako ngekwetsembeka: ‘Ngikukholelwa mbamba yini lokushiwo liBhayibheli ngemali futsi ngiphila ngekuvumelana nalo yini? Kwakha imali kuta kucala yini ekuphileni kwami? Ngitsandza kakhulu umcebo yini kwendlula buhlobo bami naJehova kanye nebantfu bakhe? Ngimetsemba mbamba yini Jehova kutsi utatinakekela tindzingo tami?’ Singaciniseka kutsi angeke aze abadvumate labo labetsembele kuye.​—Mat. 6:33.

14. Ngumuphi umbono lofanele ngekutijabulisa?

¹⁴ Njengobe kwabiketelwa, bantfu labanyenti lamuhla ‘batsandza injabulo.’ Kute lokubi ngekutitsandza ngelizinga lelifanele, ngekuba nembono lokahle ngemali kanye nangekutijabulisa. Jehova akafuni kutsi siyekele tintfo letisenta sijabule. Nalikhutsata bantfu labetsembekile, liBhayibheli litsi: “Hamba udle kudla kwakho ngenjabulo, unatse liwayini lakho ngenhlitiyo lejabulako.”​—Shu. 9:7.

15. Umbhalo wa-2 Thimothi 3:4 ukhuluma ngaluphi luhlobo lwekutijabulisa?

¹⁵ Umbhalo wa-2 Thimothi 3:4 ukhuluma ngebantfu labatsandza injabulo hhayi Nkulunkulu. Naka kutsi lelivesi alisho kutsi labantfu batsandza injabulo kwendlula kutsandza Nkulunkulu, lokungasho kutsi bayamtsandza Nkulunkulu. Kunaloko litsi “batsandza injabulo kunekutsandza Nkulunkulu.” Lomunye umfundzi wabhala kutsi: “Lelivesi alisho kutsi batsandza Nkulunkulu ngelizinga lelitsite, kunaloko lisho kutsi abamtsandzi sanhlobo Nkulunkulu.” Loku kusecwayiso kulabo labatsandza kakhulu injabulo! Emavi latsi ‘bantfu labatsandza injabulo’ achaza bantfu labanake kakhulu “umcebo kanye nenjabulo yalelive.”​—Luk. 8:14.

16, 17. Ngusiphi sibonelo Jesu lasibekela sona endzabeni yekutijabulisa?

¹⁶ Jesu wakhombisa kutsi abenembono lokahle ngekutijabulisa. Waya ‘edzilini lemshado’ waphindze waya ‘nasedzilini lelikhulu.’ (Joh. 2:1-10; Luk. 5:29) Ngesikhatsi sekuphele liwayini kulomshado, ngalokusimangaliso washintja emanti aba liwayini. Kulomunye umcimbi akazange avumelane nemibono yebantfu lebebatibona balungile labamsola ngekutsi usimiti nemnatsi weliwayini.​—Luk. 7:33-36.

¹⁷ Noma kunjalo, Jesu akazange anake kakhulu kutijabulisa. Wabeka Jehova kucala ekuphileni kwakhe waphindze watikhandla kute asite labanye. Wabeketelela kufa kabuhlungu elugodvweni kuze bantfu labanyenti batfole kuphila lokuphakadze. Nakakhuluma nebantfu labebatawulandzela tinyatselo takhe edvute, Jesu watsi: “Niyajabula nangabe bantfu banihlambalata, baniphatsa kabi, futsi banicalela emanga ngenca yami. Jabulani nitfokote, ngenca yekutsi umvuzo wenu mkhulu ezulwini, ngobe nebaphrofethi baphatfwa ngaleyo ndlela.”​—Mat. 5:11, 12.

18. Nguyiphi imibuto lengasisita sitihlole kutsi sikutsandza kanganani kutijabulisa?

¹⁸ Yini lengasisita sitihlole kutsi sikutsandza kangakanani kutijabulisa? Singatibuta kutsi: ‘Kutijabulisa kuta kucala yini kunekuya emihlanganweni nasensimini? Ngitimisele yini kudzela kwenta tintfo lengititsandzako kute ngikhonte Jehova? Nangikhetsa tekutijabulisa ngiyacabanga yini kutsi Jehova utawutiva kanjani?’ Nangabe simtsandza mbamba Jehova sitawugwema kwenta tintfo lesati kahle kutsi atimjabulisi kanye naleto lesicabanga kutsi atimjabulisi.​—Fundza Matewu 22:37, 38.

19. Bobani labangeke babe nenjabulo sibili?

¹⁹ Ngisho noma sekuphele iminyaka lengu-6 000 bantfu bahlupheka, lelive laSathane selitawuphela. Lelive ligcwele bantfu labatitsandza bona, labatsandza imali kanye nalabatsandza kutijabulisa. Labantfu balwa kamatima kuze batfole labakufunako futsi babeka tintfo labatitsandzako kucala ekuphileni kwabo. Bantfu labanjalo ngeke kwenteke kutsi babe nenjabulo sibili. Esikhundleni saloko kuba njengobe umhlabeleli abhala: “Uyajabula umuntfu lomsiti wakhe kunguNkulunkulu waJakobe, lolitsemba lakhe likuJehova, Nkulunkulu wakhe.”​—Hla. 146:5, NW.

20. Lutsandvo ngaNkulunkulu lukuletsele njani injabulo?

²⁰ Njengobe sibantfu baJehova sinelutsandvo lwaNkulunkulu futsi linani letfu liyakhula yonkhe minyaka. Lobu bufakazi bekutsi umbuso waNkulunkulu uyabusa futsi masinyane utasiletsela tibusiso letinyenti. Injabulo sibili nalehlala njalo singayitfola ngekutsi sente intsandvo yaNkulunkulu nekwati kutsi sijabulisa Losetikwako konkhe. Labo labatsandza Jehova batawujabula kuze kube phakadze. Esihlokweni lesilandzelako sitawucoca ngebuntfu lobubangelwa lutsandvo lwebugovu siphindze sibone kutsi behluke ngani kubuntfu betinceku taJehova.