Sikhutsato Lesiphumelelako

LABADZALA labangemaKhristu kufanele bakwati “kukhutsata ngemfundziso lephilile.” (Thit. 1:9) Ngaletinye tikhatsi kungase kudzingeke kutsi loku kwentiwe ngephansi kwetimo letimatima. Kubalulekile kuniketa seluleko ngendlela levumelana netimiso temiBhalo. Kungako labadzala kufanele balalele nasi seluleko: “Chubeka utimisela . . . ekukhutsateni.” (1 Thim. 4:13) Nanobe loko lokukhulunywa ngako kulesifundvo kucondziswe kakhulu kulabadzala nobe kulabo labafisa kuba ngulabadzala, tikhona letinye tikhatsi lapho batali kudzingeka khona kutsi bakhutsate bantfwana babo nobe labo labachuba tifundvo teliBhayibheli kudzingeke khona kutsi bakhutsate labo labafundza nabo liBhayibheli. Timiso letifanako tiyasebenta nakuleto timo.

Lapho Kudzingeka Ukhutsate Khona. Kuze ubone kutsi kunini lapho kudzingeka ukhutsate khona, kuyasita kuhlola timo lokukhulunywa ngato eBhayibhelini lapho kwaniketwa khona sikhutsato. Umphostoli Phetro wakhutsata labadzala kutsi bawunake umsebenti wabo wekuba belusi bemhlambi waNkulunkulu. (1 Phet. 5:1, 2) Pawula weluleka Thithusi kutsi akhutsate emajaha “kutsi abe nengcondvo lebhadlile.” (Thit. 2:6) Pawula wakhutsata emaKhristu labekanye nawo kutsi ‘akhulume ngekuvumelana,’ nekutsi angatihlanganisi nalabo lababangela kwehlukana emkhatsini webazalwane. (1 Khor. 1:10; Rom. 16:17; Fil. 4:2) Nanobe Pawula ancoma emalunga elibandla laseThesalonika ngetintfo letinhle labetenta, wawakhutsata kutsi achubeke asisebentisa seluleko lebekasitfolile. (1 Thes. 4:1, 10) Phetro wancenga emaKhristu labekanye nawo kutsi ‘achubeke abalekela tifiso tenyama.’ (1 Phet. 2:11) Juda wakhutsata bazalwane bakhe kutsi bakulwele “kamatima kukholwa” ngenca yebantfu labangamesabi Nkulunkulu lebebangene ekutiphatseni lokubi kwekweyisa. (Juda 3, 4) EmaKhristu ancengwa kutsi akhutsatane kuze kube bete ngisho namunye emkhatsini wawo loba lukhuni ngenca yekuyenga kwesono. (Heb. 3:13) Phetro wakhutsata emaJuda labesengakakholwa kuKhristu, watsi: “Sindziswani kulesitukulwane lesigwegwile.”​—Imis. 2:40.

Ngubuphi buntfu lobudzingekako kuze ukhone kukhutsata etimeni letinjengaleti? Umuntfu lokhutsatako angakwenta njani loko lakhutsata bantfu kutsi bakwente kuvakale kutsi kuyaphutfuma kodvwa angevakali shengatsi uyabatsetsisa nobe uyabaphocelela?

Kwente “Ngelutsandvo.” Nangabe sikhutsato setfu singasiniketi “ngelutsandvo,” singevakala sicinile. (Flm. 9) Kuliciniso kutsi nangabe kudzingeka kutsatfwe sinyatselo ngekushesha, kufanele kuvakale kutsi kuyaphutfuma endleleni sikhulumi lesikhuluma ngayo. Nangabe uphansi nawukhuluma ungevakala shengatsi uva buhlungu. Nanobe kunjalo, nawukhutsata kufanele ukhulume ngalokusuka enhlitiyweni futsi uvete imiva. Labo labakulalele batawukhutsateka nangabe ukhuluma ngendlela lenelutsandvo. Ngesikhatsi atikhulumela yena kanye nebazalwane labekanye nabo, Pawula watjela emaKhristu aseThesalonika, watsi: “Nati kahle kutsi besichubeka sinikhutsata, . . . njengobe nababe enta kubantfwana bakhe.” (1 Thes. 2:11) Labo babonisi labangemaKhristu bebabakhutsata ngelutsandvo bazalwane babo. Emavi akho kufanele uwasho uchutjwa kubakhatsalela bantfu lokhuluma nabo.

Sebentisa kuhlakanipha. Ungabenti batfukutsele bantfu lowetama kubakhutsata. Ngesikhatsi lesifanako, ungesabi kutjela labo lokhuluma nabo loko ‘lokuyintsandvo yaNkulunkulu.’ (Imis. 20:27) Labo labasitsandzako sikhutsato angeke batfukutsele nobe bangasakutsandzi ngenca yekutsi ubakhutsate kutsi bente intfo lefanele.​—Hla. 141:5.

Esikhatsini lesinyenti, kuyazuzisa kumncoma kucala umuntfu ngaphambi kwekutsi umnikete sikhutsato. Cabanga ngetintfo letinhle bazalwane bakho labatentako, lokutintfo letimjabulisako naJehova: kukholwa lokubonakala emsebentini labawentako, lutsandvo lolubakhutsata kutsi batikhandle, nekucinisela kwabo nababhekene netinkinga. (1 Thes. 1:2-8; 2 Thes. 1:3-5) Loku kutawukwenta bazalwane bakho bative babalulekile futsi babone kutsi uyabacondza, ngaleyondlela batawusilalela sikhutsato lotawubaniketa sona.

“Ngako Konkhe Kubeketela.” Sikhutsato kufanele siniketwe “ngako konkhe kubeketela.” (2 Thim. 4:2) Kuhlanganisani loku? Kuhlanganisa kubeketelela kuphatfwa kabi nobe kutfukutseliswa. Umuntfu lobeketelako uhlala anelitsemba lekutsi labo labamlalele batakusebentisa loko lakushoko. Kuba nalomoya nawuniketa sikhutsato kutawenta kutsi labo labakulalele bangacabangi kutsi ubatsatsa kabi. Kuciniseka kwakho kutsi bazalwane nabodzadze wenu bafuna kwenta konkhe lokusemandleni abo kuze bakhonte Jehova kubawubakhutsata kutsi babe nesifiso sekwenta lokuhle.​—Heb. 6:9.

“Ngemfundziso Lephilile.” Umzalwane longulomdzala ‘angakhutsata’ njani “ngemfundziso lephilile”? Ngekutsi “abambelele emavini letsembekile mayelana nelikhono lakhe lekufundzisa.” (Thit. 1:9) Kunekutsi uvete umbono wakho, sekela loko lokushoko eVini laNkulunkulu. Vumela liBhayibheli kutsi likusite ucondze kutsi yini lokudzingeka uyisho. Bhala tinzuzo tekusebentisa loko lokushiwo liBhayibheli ngaleyo ndzaba lotawube ukhuluma ngayo. Yati kahle imiphumela yekungakulandzeli loko lokushiwo liVi laNkulunkulu, kungaba yimiphumela yanyalo nobe yesikhatsi lesitako, futsi yisebentise kuze labo labakulalele basibone sidzingo sekutsatsa sinyatselo lesifanele.

Ciniseka kutsi ubachazela ngendlela lecacile labo labakulalele kutsi yini lokufanele bayente nekutsi kufanele bayente njani. Kwente kucace kutsi loko lokushoko kusekelwe ngalokucinile emiBhalweni. Nangabe imiBhalo iniketa inkhululeko letsite mayelana naloko lokufanele kwentiwe, chaza kutsi leyo nkhululeko ingakanani. Esiphetfweni sakho, shano emavi ekugcina latawubakhutsata labo lokhuluma nabo kutsi batsatse sinyatselo.

‘Ngenkhululeko Lenkhulu Yekukhuluma.’ Kuze ukhutsate ngemphumelelo, kudzingeka ube “nenkhululeko lenkhulu yekukhuluma.” (1 Thim. 3:13) Yini leyenta umuntfu akhulume ngekukhululeka? Kutsi “sibonelo semisebenti lemihle” lanayo sihambisane naloko lakhutsata bazalwane bakhe kutsi bakwente. (Thit. 2:6, 7; 1 Phet. 5:3) Loku kwenta kutsi labo labasuke bakhutsatwa babone kutsi loyo lobakhutsatako akakalindzeli kutsi bente intfo yena langayenti. Batawubona kutsi bangakulingisa kukholwa kwakhe, njengobe naye alingisa Khristu.​—1 Khor. 11:1; Fil. 3:17.

Sikhutsato lesisekelwe eVini laNkulunkulu nalesiniketwa ngelutsandvo singafeza lokunyenti kakhulu. Labo labaniketwe loyo msebenti wekuniketa sikhutsato kufanele batimisele kutsi loku bakwente kahle.​—Rom. 12:8.