Fundza EVini LaNkulunkulu
Kutakwentekani NgeLilanga Lekwehlulela?
Lesihloko simayelana nemibuto lokungenteka kutsi uke watibuta yona futsi sikukhombisa lapho ungatfola khona timphendvulo eBhayibhelini lakho. BoFakazi BaJehova bangakujabulela kucoca nawe ngaletimphendvulo.
1. Liyini Lilanga Lekwehlulela?
Njengobe kuvela esitfombeni lesingesekudla, bantfu labanyenti bacabanga kutsi ngelilanga lekwehlulela tigidzigidzi temiphefumulo titawuvela embikwesihlalo saNkulunkulu sebukhosi kuze yehlulelwe ngemisebenti yayo, leminye itfole umvuzo wekuphila ezulwimi leminye ihlushwe esihogweni. LiBhayibheli lona lichaza kutsi injongo yelilanga lekwehlulela kukhulula bantfu ekuphatfweni kabi. (Tihlabelelo 96:13) Nkulunkulu ubeke Jesu kutsi abe nguMehluleli lotawubangela kutsi bantfu baphatfwe kahle.—Fundza Isaya 11:1-5; Imisebenti 17:31.
2. Lilanga Lekwehlulela litakubuyisela njani kulunga?
Ngesikhatsi umuntfu wekucala Adamu avukela Nkulunkulu ngemabomu, wabangela kutsi yonkhe intalo yakhe ibe nesono, ihlupheke iphindze ife. (Roma 5:12) Kuze alungise lesimo, Jesu utawuvusa tigidzi talabafile. Incwadzi yeSembulo yembula kutsi loko kutawenteka ekubuseni kwaJesu Khristu kweminyaka leyinkhulungwane.—Fundza Sembulo 20:4, 11, 12.
Kwehlulelwa kwebantfu labavusiwe ngeke kusekelwe etintfweni labatenta basengakafi kodvwa kutawusekelwa etintfweni labatotenta nasebavusiwe ticatsaniswe nalokubhalwe ‘etincwadzini’ lokukhulunywa ngato kuSembulo sehluko 20. (Roma 6:7) Umphostoli Pawula watsi kulabo labatawuvuswa baphindze baniketwe litfuba lekufundza ngaNkulunkulu, kutawuba nebantfu “labalungile nalabangakalungi.”—Fundza Imisebenti 24:15.
3. Yini letawufezwa Lilanga Lekwehlulela?
Bantfu labafa bangakaze balitfole litfuba lekwati Nkulunkulu Jehova nekumkhonta batawutfola litfuba lekushintja bente lokulungile. Nangabe benta lokulungile “bayawuvukela ekuphileni.” Labanye labavusiwe ngeke bavume kufundza tindlela taJehova. Labo, “bayawuvukela ekulahlweni.”—Fundza Johane 5:28, 29; Isaya 26:10; 65:20.
Ekupheleni kwelilanga lekwehlulela lelitawutsatsa iminyaka leyinkhulungwane, Jehova utawube asabuyisele bantfu labamlalelako esimeni sekungabi nasono njengasekucaleni. (1 Khorinte 15:24-28) Lelo litsemba lelihle labo bonkhe labalalelako. Eluvivinyweni lekugcina, Nkulunkulu utawukhulula Sathane Develi ekuboshweni kwakhe lokutawube kutsatse iminyaka leyinkhulungwane. Sathane utawuphindze etame kuyekelisa bantfu kukhonta Jehova kodvwa labo labangeke bamlalele Sathane batawuphila phakadze emhlabeni bajabule.—Fundza Isaya 25:8; Sembulo 20:7-9.
4. Nguliphi lelinye lilanga lekwehlulela lelitawuzuzisa bantfu?
LiBhayibheli liphindze lisebentise ligama lelitsi “lilanga lekwehlulela” nalisho sikhatsi lokutawucedvwa ngaso lelive lelibi. Lelilanga lekwehlulela litawufika bantfu bangakalilindzeli njengaZamcolo wangesikhatsi saNowa lowacedza bonkhe bantfu lababi. Kubhujiswa lokusheshako kwebantfu “labangamesabi Nkulunkulu” kutawuholela emhlabeni lomusha lonebantfu labalungile ‘lapho kutobusela khona kulunga.’—Fundza 2 Phetro 3:6, 7, 13.
Kuze utfole kwatiswa lokubanti, fundza emakhasi 213-215 alencwadzi Lifundzisani Mbambambamba LiBhayibheli?, leshicilelwa boFakazi BaJehova.
[Sitfombe ekhasini 16]
“Kwehlulela Kwekugcina,” sitfombe sa-Gustave Doré, 1832-1883
[Emavi laveta Umtfombo walentfo]
Engravings by Doré