Hlobo Luni Lwemuntfu Lofuna Kuba Ngilo?

1, 2. “Luhlobo luni lwebantfu” lokufanele sibe ngilo kute semukeleke kuNkulunkulu?

KUNGEKWEMVELO kutsi sibe nendzaba nekutsi labanye bacabangani. Tsine njengemaKhristu akukafaneli yini sibe nendzaba kutsi Jehova ucabangani ngatsi? Ngetulu kwaloko, unguMuntfu lomkhulu emhlabeni wonkhe futsi ‘ungumtfombo wekuphila.’—Hla. 36:9.

² Agcizelela kutsi kufanele sibe “luhlobo luni lwebantfu” ngekwembono waJehova, umphostoli Phetro usikhutsata kutsi sente ‘tento tekutinikela kuNkulunkulu.’ (Fundza 2 Phetro 3:11.) Kute semukeleke kuNkulunkulu, ‘tento tetfu tekutiphatsa’ kufanele tibe nguletihlantekile—ngekutiphatsa, ngesimo setfu sengcondvo nangebuhlobo betfu naNkulunkulu. Ngetulu kwaloko, kufanele sente ‘tento tekutinikela kuNkulunkulu’ ngekumhlonipha ngalokujulile nekunamatsela ngekwetsembeka kuye. Kufuna kwemukelwa nguye, akufaki kutiphatsa kwetfu nje kuphela kodvwa naloko lesingiko ngekhatsi. Njengobe Jehova ‘avivinya inhlitiyo,’ uyati kutsi kutiphatsa kwetfu kungcwele nekutsi sitinikele kuye kuphela yini nobe cha.—1 Khr. 29:17.

 3. Ngalokuphatselene nebuhlobo betfu naNkulunkulu, ngumiphi imibuto lokufanele sitibute yona?

³ Sathane Develi, akafuni kutsi sifune kwemukelwa nguNkulunkulu. Ecinisweni, wenta konkhe langakwenta kute asilahlekisele buhlobo lesinabo naJehova. Sathane akangabati kusebentisa emanga nekukhohlisa kute asidedisele khashane naNkulunkulu wetfu lesimkhontako. (Joh. 8:44; 2 Khor. 11:13-15) Ngako-ke, senta ngekuhlakanipha kutibuta: ‘Sathane ubadukisa njani bantfu? Yini lengingayenta kute ngivikele buhlobo bami naJehova?’

 4. Emetameni yekubhidlita buhlobo betfu naNkulunkulu, yini Sathane layihlaselako futsi ngani?

⁴ Umfundzi Jakobe naku lakubhala: “Ngulowo nalowo ulingwa ahuhwe tinkhanuko takhe, adudeke. Nangabe inkhanuko seyitsatsile, itala sono; sono nase siphelele, sitala kufa.” (Jak. 1:14, 15) Emetameni yekubhidlita kunamatselana kwetfu naNkulunkulu, Sathane uhlasela umtfombo wetinkhanuko tetfu—inhlitiyo yetfu.

5, 6. (a) Ngutiphi tindlela Sathane latisebentisako kute asihlasele? (b) Ngutiphi tilingo Sathane latisebentisako emetameni yakhe yekonakalisa tifiso tenhlitiyo yetfu, futsi uphumelele njani ekutisebentiseni?

⁵ Ngutiphi tindlela Sathane latentako kute ahlasele tinhlitiyo tetfu? LiBhayibheli litsi: “Umhlaba wonkhe ungephansi kwemandla alomubi.” (1 Joh. 5:19) Kute Sathane asihlasele usebentisa ‘tintfo letiseveni.’ (Fundza 1 Johane 2:15, 16.) Eminyakeni letinkhulungwane leyendlulile, ngebucili Develi wente indlela yekuphila kulomhlaba yabonakala incono kakhulu. Njengobe siphila kulomhlaba, kufanele sitigadze kulamachinga lamanyenti lawasebentisako.—Joh. 17:15.

⁶ Sathane usebentisa tindlela letakhelwe kutsi tonakalise tifiso tenhlitiyo yetfu. Umphostoli Johane usivetela tilingo letintsatfu Sathane latisebentisako: (1) ‘inkhanuko yenyama,’ (2) ‘inkhanuko yemehlo’ kanye (3) “nekutigabatisa lokulite ngetintfo takulomhlaba.” Sathane watisebentisa letindlela kute alinge Jesu ehlane. Njengobe sekuphele iminyaka leminyenti asebentisa letingibe, lamuhla Sathane utisebentisa ngemphumelelo lenkhulu, njengobe ahlasela butsakatsaka bemuntfu ngamunye. Ngaphambi kwekutsi sibone kutsi singativikela njani kulesimo, asesibone indlela Develi ladukisa ngayo Eva kodvwa wangaphumeleli ekudukiseni iNdvodzana yaNkulunkulu.

 7. Sathane wayisebentisa njani ‘inkhanuko yenyama’ kute alinge Eva?

⁷ Kute bantfu bachubeke baphila badzinga kudla. Umdali wenta umhlaba kute ukhicite kudla lokunyenti. Njengesifiso semvelo sekufuna kudla, Sathane angase etame kusebentisa leso sifiso kute asilinge singamlaleli Nkulunkulu. Asewubone kutsi wamlinga njani Eva. (Fundza Genesisi 3:1-6.) Sathane watjela Eva kutsi angasidla ‘sihlahla sekwati lokuhle nalokubi’ futsi angeke afe kunaloko utawufanana naNkulunkulu. (Gen. 2:9) Ngebucili Develi watjela Eva kutsi akadzingi kulalela Nkulunkulu kute aphile. Kwakungemanga laluhlata lawo. Ngesikhatsi lomcondvo waSathane sewungenile engcondvweni ya-Eva, timbili tintfo labengatenta: Abengavele ale kudla kulesihlahla, nobe achubeke acabanga ngako, avumele sifiso sakhe ngekudla kulesihlahla sikhule. Nanobe tonkhe tihlahla abevunyelwe kutsi adle kuto, kodvwa wakhetsa kulalela Sathane mayelana nalesihlahla lebesisemkhatsini wensimi, “wakha kulesihlahla wadla.” Sathane wakha sifiso kutsi Eva angalaleli loko labeyalwe ngako nguMdali wakhe.

 8. Sathane wetama njani kulinga Jesu asebentisa ‘inkhanuko yenyama,’ futsi kungani lesilingo singazange siphumelele?

⁸ Sathane wasebentisa emachinga lafananako ngesikhatsi alinga Jesu ehlane. Ngemuva kwekutsi Jesu azile kudla emalanga langu-40 nebusuku lobungu-40, Sathane wetama kulinga Jesu ngekudla. Sathane watsi: “Nangabe uyiNdvodzana yaNkulunkulu, tjela nali litje ligucuke libe sinkhwa.” (Luk. 4:1-3) Jesu abenetintfo letimbili labengatenta: Bekangakhetsa kungawasebentisi lamandla akhe kute agucule lamatje abe sinkhwa, nobe awasebentise. Jesu bekati kutsi abengeke awasebentise lamandla akhe ngenca yetifiso takhe tebugovu. Nanobe abelambile, kodvwa akazange avumele indlala kutsi ite kucala kuye kunekugcina buhlobo bakhe naJehova. Jesu waphendvula watsi: “UmBhalo utsi: ‘Umuntfu angeke aphile ngesinkhwa sodvwa.’”—Luk. 4:4.

 9. Iyini ‘inkhanuko yemehlo,’ futsi Sathane wayisebentisa njani lenkhanuko ku-Eva?

⁹ Johane waphindze wakhuluma ‘ngenkhanuko yemehlo’ njengesilingo. Loku kuchaza kutsi umuntfu angabuka intfo letsite bese uyayikhanuka. Endzabeni ya-Eva, Sathane watsi: “Emehlo enu ayawuvuleka.” Njengobe Eva achubeka abuka lesihlahla lokwatsiwa angasidli, samkhanga. Eva wabona kutsi lesihlahla “sasibukeka sisihle.”

10. Sathane wayisebentisa njani ‘inkhanuko yemehlo’ kute alinge Jesu, futsi yini leyentiwa nguJesu?

¹⁰ Kwentekani endzabeni yaJesu? Sathane “wamkhombisa [Jesu] ngekushesha lokukhulu yonkhe imibuso yemhlaba, watsi: ‘Ngitakunika onkhe lamandla, nabo bonkhe lobunjinga.’” (Luk. 4:5, 6) Jesu abengeke ayibone yonkhe lemibuso ngesikhashana nje, kodvwa Sathane wacabanga kutsi nakaveta ludvumo lwalemibuso, ngembono, abengakhangeka Jesu. Ngesibindzi, Sathane watsi: “Konkhe loku kungaba kwakho nawungamane ungikhotsamele kanye nje.” (Luk. 4:7) Yayingekho indlela yekutsi Jesu abe luhlobo lwemuntfu Sathane labefuna abe ngilo. Waphendvula ngekushesha, watsi: “UmBhalo utsi: ‘Khotsama iNkhosi Nkulunkulu wakho, umkhonte yena yedvwa!’”—Luk. 4:8.

11. Eva walingwa njani nguSathane?

¹¹ Nakakhuluma ngetintfo talomhlaba, Johane wabala ‘kutigabatisa lokulite ngetintfo takulomhlaba.’ Ngesikhatsi bo-Adamu na-Eva kungibo kuphela bantfu emhlabeni, bebangeke bakhone ‘kutigabatisa ngetintfo talomhlaba’ kulabanye bantfu. Kodvwa kuliciniso kutsi bakhombisa kutigabatisa. Ngesikhatsi Sathane alinga Eva, ngebucili watsi Nkulunkulu umfihlele lokutsite lokuhle. Develi wamtjela kutsi ngalelolanga adla ‘esihlahleni sekwati lokulungile nalokungakalungi’ ‘utawufanana naNkulunkulu, ati lokuhle nalokubi.’ (Gen. 2:17; 3:5) Sathane wasikisela kutsi Eva angatfola inkhululeko kuJehova. Kutigcabha kwamenta wavumela kulalela lamanga. Wadla kulesihlahla labeyalwe kutsi angasidli acabanga kutsi angeke aze afe. Abetikhohlisa ngekucabanga njalo.

12. Nguyiphi lenye indlela Sathane lalinga ngayo Jesu, futsi Jesu wenta njani?

¹² Ngalokwehlukile na-Eva, Jesu wabeka sibonelo lesihle sekutfobeka. Sathane wetama kumlinga ngalenye indlela, kodvwa Jesu wala ngisho nekwenta sento lebesitawuvivinya Nkulunkulu. Bekungasho kutigcabha loko. Kunaloko, imphendvulo yaJesu beyicacile futsi icondzile, itsi: “UmBhalo futsi utsi: ‘Ungayilingi iNkhosi, Nkulunkulu wakho.’”—Fundza Lukha 4:9-12.

13, 14. Chaza kutsi Sathane utisebentisa njani tilingo lamuhla.

¹³ Lamuhla Sathane usebentisa tilingo letifanana naleto latisebentisa ku-Eva nakuJesu. Asebentisa ‘inkhanuko yenyama,’ Develi usebentisa live kute achubekisele phambili kutiphatsa lokubi nekwecisa ekudleni nasekunatseni. Asebentisa titfombe letikhombisa kungcola, ngalokukhetsekile ku-Internet, angakwati kubamba umbukeli angakanaki futsi kutsandzeke emehlweni akhe. Umcebo, emandla neludvumo kwenta bantfu labatigcabhako kutsi ‘batigabatise ngalokulite ngetintfo takulomhlaba.’

¹⁴ ‘Tintfo letiseveni’ tifanana nemsundvu losetjentiswa ngumdwebi. Lemisundvu iyakhanga kute ibambe tinhlanti. Sathane angasebentisa loko bantfu labakubona kutayelekile ekuphileni kute bente lokuphambene nemtsetfo waNkulunkulu. Tilingo letinyenti letifanana naleti, tentelwe kutsi tisikhange futsi tonakalise tinhlitiyo tetfu. Tisikhutsata kutsi kunakekela tidzingo tetfu nemphilo lentofontofo kuta kucala kunekwenta intsandvo yaNkulunkulu. Tilingo letinjalo tingasebenta yini kitsi?

15. Singamlingisa njani Jesu ekumelaneni netilingo taSathane?

¹⁵ Nanobe Eva awela esilingweni saSathane, kodvwa Jesu wamelana naso. Ngaso sonkhe sikhatsi bekaniketa imphendvulo levela emiBhalweni, atsi: “UmBhalo utsi.” Nangabe sibafundzi labakhutsele beliBhayibheli, sitawuyati kahle imiBhalo futsi sitawakhumbula emavesi langasisita simelane nekulingwa. (Hla. 1:1, 2) Kukhumbula tibonelo letisemBhalweni tetinceku taNkulunkulu letetsembekile kutasisita kutsi sitilingise. (Rom. 15:4) Kuhlonipha Jehova, kutsandza lakutsandzako nekwenyanya lakwenyanyako, kutasivikela.—Hla. 97:10.

16, 17. “Emandla ekucabanga” anamuphi umtselela eluhlotjeni lwemuntfu lesifuna kuba ngilo?

¹⁶ Umphostoli Pawula usikhutsata kutsi sisebentise “emandla ekucabanga” kute sibe luhlobo lwebantfu lolubunjwa ngimicabango yaNkulunkulu hhayi yalelive. (Rom. 12:1, 2) Agcizelela sidzingo sekutsi sinakisise loko lesikucabangako, Pawula watsi: ‘Sibhidlita konkhe lokuphakamele kuvimbela kwati Nkulunkulu. Sitfumba yonkhe imicabango, siyente itfobele kulalela Khristu.’ (2 Khor. 10:5) Imicabango yetfu inemtselela eluhlotjeni lwemuntfu lesingilo, ngako-ke sidzinga “kuchubeka sicabanga” ngetintfo letakhako.—Fil. 4:8.

¹⁷ Angeke silindzele kuba ngcwele nangabe sitondla ngemicabango nangetifiso letimbi. Kufanele sitsandze Jehova ‘ngenhlitiyo lemhlophe.’ (1 Thim. 1:5) Kodvwa inhlitiyo iyakhohlisa, futsi kungenteka singaboni kutsi “netintfo letiseveni” tisitsintsa kakhulu kangakanani. (Jer. 17:9) Ngako-ke, kufanele ‘sitihlole sibone kutsi sibambelele yini ekukholweni kwetfu’ sitibute ngekwetsembeka mayelana nekukhanya lesikufundza eBhayibhelini.—2 Khor. 13:5.

18, 19. Kungani kufanele sitimisele kuba luhlobo lwebantfu Jehova lafuna kutsi sibe ngilo?

¹⁸ Lokunye lokusisita kutsi simelane “netintfo letiseveni” kugcina engcondvweni emavi laphefumulelwe lashiwo nguJohane latsi: “Live liyendlula netinkhanuko talo, kodvwa lowo lowenta intsandvo yaNkulunkulu, uyawuphila kuze kube phakadze.” (1 Joh. 2:17) Lelive lelibuswa nguSathane libonakala litawuba khona njalo futsi liyintfo sibili. Nobe kunjalo ngalelinye lilanga litawubhujiswa. Kute lesiniketwa kona ngulelive laSathane lokutawuhlala njalo. Kukhumbula leliciniso kutasisita simelane netilingo taDeveli.

¹⁹ Umphostoli Phetro usikhutsata kutsi sibe luhlobo lwebantfu lolwemukelwa nguNkulunkulu njengobe ‘silindzele kufika kwelilanga laNkulunkulu. Lelo langa liyawuncibikilisa emazulu ngemlilo, netinkhanyeti tincibilikiswe kushisa.’ (2 Phet. 3:12) Ngekushesha nje, lelo langa litawube lifikile, futsi Jehova utawubhubhisa yonkhe incenye yelive laSathane. Kute kufike leso sikhatsi, Sathane utawuchubeka asebentisa ‘tintfo letiseveni’ kute asilinge njengobe enta ku-Eva naJesu. Asingafanani na-Eva sifune kwenelisa tinkhanuko tetfu. Nasenta njalo sitawube sitsi Sathane ngunkulunkulu wetfu. Kufanele sifanane naJesu simelane netilingo letifanana naleti, nanobe tentiwe ngendlela yekutsi tikhange. Shengatsi ngamunye wetfu angatimisela kuba luhlobo lwemuntfu Jehova lafuna sibe ngilo.