Khonta Jehova Kuphela!

 1. Kungani kufanele sikhonte Jehova kuphela?

KUFANELE sikhonte Jehova kuphela ngobe nguye lowasidala futsi wasiniketa kuphila. (Semb. 4:11) Nobe kunjalo, kunebumatima lesibhekana nabo. Ngisho nobe simtsandza Jehova futsi simhlonipha, kunetintfo letingasiphatamisa bese asisakhoni kukhonta yena yedvwa. Kufanele sati kutsi kungenteka njani loko. Asesicale sicoce ngekutsi kusho kutsini kukhonta Jehova kuphela.

 2. Ngekusho kwembhalo wa-Eksodusi 34:14, yini lesitayenta nangabe sikhonta Jehova kuphela?

² EBhayibhelini, kutsandza Jehova ngalokujulile kuhlobone nekukhonta yena kuphela. Angeke sivumele umuntfu nobe intfo letsite kutsi itsatse sikhala saJehova etinhlitiyweni tetfu.—Fundza Eksodusi 34:14.

 3. Kungani sinetizatfu letinhle tekutsandza Jehova?

³ Sinetizatfu letinhle tekutsandza Jehova. Letizatfu tisekelwe emacinisweni lesiwafundzile ngaye. Siyabutsandza nebuntfu bakhe lobuhle. Siyatati tintfo Jehova latitsandzako nalatenyanyako, futsi sivumelana naye kuto. Siyayati injongo yakhe ngebantfu futsi siyayisekela. Siyajabula ngekutsi uyasivumela kutsi sibe bangani bakhe. (Hla. 25:14) Konkhe lesikufundzako ngeMdali wetfu kusisondzeta kakhulu kuye.—Jak. 4:8.

 4. (a) Yini Develi layentako kuze asente simtsandze kancane Jehova? (b) Yini lesitawucoca ngayo kulesihloko?

⁴ Develi ulawula lelive, futsi usebentisa lona kuze ente kutsi tintfo lesitifunako tibaluleke ekuphileni kwetfu, futsi wenta kube matima kubalekela tifiso letimbi lesinato. (Ef. 2:1-3; 1 Joh. 5:19) Ufuna kutsi sitsandze letinye tintfo kunekutsi sitsandze Jehova kuphela. Asesicoce ngetindlela letimbili Develi langatisebentisa kuze ente loko. Kwekucala, wetama kusenta kutsi sitsandze imali, kwesibili, wetama kusenta kutsi sikhetse kabi kwekutijabulisa.

 5. Kungani kufanele sicaphele kuze singabi nesifiso sekutsandza imali?

⁵ Sonkhe siyafuna kuba nekudla lokwenele, kugcoka timphahla letinhle kanye nekuba nendzawo lekahle yekuhlala. Nobe kunjalo, kufanele sicaphele kuze singabi nesifiso sekutsandza imali. Bantfu labanyenti lamuhla ‘batsandza imali’ futsi batsandza netintfo labangatitsenga ngayo. (2 Thim. 3:2) Jesu bekati kutsi balandzeli bakhe kungenteka balingeke kutsi babe nesifiso sekuba nemali lenyenti. Watsi: “Kute umuntfu longasebentela emakhosi lamabili, ngobe utawutondza lenye atsandze lelenye, nobe ahloniphe lenye edzelele lelenye. Ngeke nikhonte Nkulunkulu kanye nemcebo.” (Mat. 6:24) Umuntfu lokhonta Jehova abe acitsa sikhatsi lesinyenti nemandla akhe kuze abe nemali lenyenti, kungafana nekutsi ukhonta emakhosi lamabili. Utawube akakhonti Jehova kuphela.

 6. Ngutiphi tifundvo lesingatifundza emavini aJesu lebekawabhekise ebandleni lebeliseLawodisiya?

⁶ Ngasekupheleni kwelikhulu lekucala, emalunga elibandla lebelisedolobheni laseLawodisiya bekatigabatisa atsi: “Nginjingile, nginemcebo, kute nalengikudzingako.” Kodvwa Jehova naJesu bebabona kutsi labantfu ‘bebalusizi, babekuhawukelwa, beswele, batimphumphutse, futsi bangcunu.’ Jesu wabeluleka, hhayi ngobe bebanjingile kodvwa ngenca yekutsi kutsandza kwabo imali bekulimata buhlobo babo naJehova. (Semb. 3:14-17) Nasibona kutsi sesicala kuba nesifiso sekufuna imali lenyenti, kufanele sikulungise ngekushesha kucabanga kwetfu. (1 Thim. 6:7, 8) Nasingenti njalo, sitawubese sicala kutsandza letinye tintfo kunekutsi sitsandze Jehova kuphela, futsi yena angeke akwemukele kumkhonta kwetfu. Jehova “unguNkulunkulu lonesikhwele.” (Dut. 4:24) Kungenteka njani kutsi imali ibaluleke kakhulu ekuphileni kwetfu?

7-9. Sifundzani kulokwenteka kuDavid longulomdzala welibandla?

⁷ Cabanga ngesibonelo saDavid waseMelika, loyindvodza lendzala ebandleni futsi losebenta ngekutimisela. Utsi bekasisebenti lesikhutsele. David wakhushulelwa nesikhundla enkampaneni lebekasebenta kuyo futsi bekatsatfwa njengesisebenti lebesiwenta kahle kakhulu umsebenti waso eveni lakubo. David utsi: “Ngaleso sikhatsi, bengicabanga kutsi kuphumelela kwami bekukhombisa kutsi Jehova uyangibusisa.” Kodvwa bekuliciniso yini loko?

⁸ David wase ucala kubona kutsi umsebenti wakhe bewubulimata buhlobo bakhe naJehova. Utsi: “Nangisemihlanganweni yelibandla kanye nasemsebentini wekushumayela, bengihlale ngicabanga ngetinkinga tasemsebentini. Bengakha imali lenyenti kodvwa kukhatsateka kwami bekuba kunyenti kakhulu, futsi nemshado wami wacala kuba netinkinga.”

⁹ David besekufanele akhetse kutsi yini lebeyibaluleke kakhulu kuye. Utsi: “Kwadzingeka kutsi ngente sincumo lesicinile kuze ngilungise simo sami.” David bekafuna kushintja luhlelo lwakhe lwekusebenta, ngako watjela umcashi wakhe ngaloko bekafuna kukwenta. Waba yini umphumela? David wacoshwa emsebentini! Yini labese uyayenta? Utsi: “Ngakusasa ngafaka sicelo sekuba lihlahlandlela lelisitako lelichubekako.” David nemfati wakhe bacala kwenta umsebenti wekuhlanta takhiwo kuze banakekele tidzingo tabo. Ngekuhamba kwesikhatsi, David wacala kuba lihlahlandlela lelivamile futsi nemfati wakhe webese uba lihlahlandlela lelivamile. Laba labashadene bakhetsa kwenta umsebenti wekutiphilisa lobukelwa phansi bantfu labanyenti, kodvwa loluhlobo lwemsebenti labalwentako alusiyo intfo lebeyibaluleke kakhulu kubo. Ngisho nobe imali labayitfolako iyincane kakhulu kunalebebayitfola nabasasebenta, kodvwa njalo ngenyanga iyenela kuze bente tintfo labatidzingako. Bafuna kwenta Jehova ete kucala ekuphileni kwabo, futsi bayabona kutsi Jehova uyabanakekela labo labafuna uMbuso kucala.—Mat. 6:31-33.

10. Singayigadza njani inhlitiyo yetfu?

¹⁰ Ngisho nobe sinemali lenyenti nobe sinalencane, kufanele sigadze tinhlitiyo tetfu. Kanjani? Ungavumi kungenwa sifiso sekutsandza imali. Ungavumi nekutsi umsebenti lowentako wekutiphilisa ute kucala kunekukhonta Jehova. Ungabona kanjani kutsi loko kuyenteka kuwe? Nayi leminye imibuto longatibuta yona: ‘Nangisemihlanganweni yelibandla nobe ngisemsebentini wekushumayela, ngivame kucabanga ngemsebenti wami wekutiphilisa yini? Ngivame kukhatsateka ngekutsi ngitawuba nemali leyenele yini esikhatsini lesitako? Imali kanye netintfo lenginato kubanga tinkinga yini emshadweni wami? Ngingakhona yini kwenta umsebenti wekutiphilisa lobukeleka phansi nangabe nje ungivumela kutsi ngikhonte Jehova sikhatsi lesinyenti?’ (1 Thim. 6:9-12) Nasicabanga ngalemibuto, kufanele sikhumbule kutsi Jehova uyasitsandza futsi setsembiso lesitsi “ngeke ngize ngikushiye, futsi ngeke ngize ngikulahle,” usenta kulabo labakhonta yena kuphela. Kungako umphostoli Pawula wabhala watsi: “Indlela leniphila ngayo ayingabi yekutsandza imali.”—Heb. 13:5, 6.

11. Yini lengenteka kumuntfu ngenca yekutijabulisa lakukhetsako?

¹¹ Jehova ufuna sikujabulele kuphila, futsi kwekutijabula kungasisita kutsi sente njalo. Ecinisweni, neliVi laNkulunkulu liyasho kutsi “kute lokuncono umuntfu langakwenta ngaphandle kwekutsi adle anatse eneliseke ngemsebenti wakhe.” (Shu. 2:24) Nobe kunjalo, kwekutijabulisa lokunyenti lokukulelive kungabulimata buhlobo betfu naJehova. Kwenta bantfu bangatihloniphi timiso tekutiphatsa kuphindze kubente kutsi babeketelele nobe batsandze tintfo liVi laNkulunkulu lelitsi atikalungi.

12. Ngekusho kwembhalo wa-1 Khorinte 10:21, 22, kungani kufanele sicaphelisise nasikhetsa kwekutijabulisa?

¹² Sifuna kukhonta Jehova kuphela, ngako angeke sidle “etafuleni laJehova” siphindze sidle “etafuleni lemadimoni.” (Fundza 1 Khorinte 10:21, 22.) Esikhatsini lesinyenti, kudla nemuntfu kuluphawu lwebungani. Nangabe sikhetsa kwekutijabulisa lokukhutsata budlova, kusetjentiswa kwemimoya, kutiphatsa lokubi nobe letinye tifiso tenyama nemikhuba yayo, sitawube sidla netitsa taNkulunkulu. Umphumela waloko kutsi sitawube singatilimati tsine kuphela kodvwa sitawube silimata nebuhlobo betfu naJehova.

13-14. Ngekusho kwembhalo waJakobe 1:14, 15, kungani kufanele sikucaphele kwekutijabulisa lesikukhetsako? Niketa sibonelo.

¹³ Kwekutijabulisa singakufananisa njani nekudla? Nasidla, siyakukhetsa loko lesikufaka emilonyeni yetfu. Kodvwa nasesikumitile lokudla, angeke sitincumele kutsi kutawusita njani umtimba wetfu. Kudla lokunemphilo kungasenta siphile; kudla lokute imphilo kungasigulisa. Angeke sisheshe siyibone imiphumela, kodvwa ngekuhamba kwesikhatsi ingabese iyavela.

¹⁴ Ngendlela lefanako, nasikhetsa kwekutijabulisa, singakukhetsa loko lesifuna kukufaka etingcondvweni tetfu. Ngemuva kwaloko, kwekutijabulisa lesitawube sikukhetsile kutayitsintsa indlela lesicabanga ngayo nalesitiva ngayo. Kwekutijabulisa lokukahle kungasijabulisa; kwekutijabulisa lokungcolile kungasilimata. (Fundza Jakobe 1:14, 15.) Imiphumela yekutijabulisa lokukabi ngeke isheshe ibonakale, kodvwa ngekuhamba kwesikhatsi itawubonakala. Kungako liBhayibheli lisecwayisa litsi: “Ningadukiswa: Nkulunkulu akasuye wekuphukutwa. Ngobe nobe yini umuntfu layihlanyelako, utawuvuna yona futsi; lohlanyela anembono wenyama utawuvuna konakala enyameni yakhe.” (Gal. 6:7, 8) Kubaluleke kakhulu kutsi sigweme konkhe kwekutijabulisa lokukhutsata tintfo Jehova latenyanyako!—Hla. 97:10.

15. Ngusiphi sipho Jehova lasinikete sona kuze sisijabulele?

¹⁵ Bantfu baJehova labanyenti bayakujabulela kubukela siteshi se-JW^® lesiku-Internet. Dzadze lokutsiwa nguMarilyn watsi: “Siteshi se-JW singisitile kutsi ngihlale ngijabulile, futsi ngibukela konkhe lokuvelako ngobe konkhe kukahle. Nangitiva nginesitunge nobe ngiphelelwa ngemandla, ngivame kubukela inkhulumo lekhutsatako nobe luhlelo LweKukhonta Kwasekuseni. Loko kungenta ngisondzele kakhulu kuJehova kanye nenhlangano yakhe. Siteshi se-JW sikushintje kakhulu kuphila kwami.” Wena uyazuza yini kulesipho saJehova? Njalo ngenyanga, lesiteshi siba netinhlelo letinsha, futsi kuba nalokulalelwako, ema-video, kanye netingoma letikhutsatanako longatibukela uphindze utilalele nobe kunini.

16-17. Kungani kufanele sisilawule ngekucophelela sikhatsi lesisicitsa sitijabulisa, futsi singakwenta njani loko?

¹⁶ Kufanele sikucaphele kwekutijabulisa lesikukhetsako, futsi kufanele sicaphele kutsi singanani sikhatsi lesisicitsa kuko. Nasingakacapheli, singatikhandza sicitsa sikhatsi lesinyenti sitijabulisa kunekutsi sikhonte Jehova. Labanyenti bakutfola kumatima kulawula sikhatsi labasicitsa batijabulisa. Dzadze lokutsiwa ngu-Abigail loneminyaka lengu-18 utsi: “Kubukela i-TV kuyayiphumuta ingcondvo yami ngemuva kwekwenta imisebenti yelilanga. Kodvwa nangangikacapheli, ngingatikhandza ngicitsa sikhatsi lesinyenti ngibukela i-TV.” Umzalwane losemusha lokutsiwa nguSamuel utsi: “Esikhatsini lesinyenti, ngibukela ema-video lamanyenti lamafishane ku-Internet. Ngicala ngekubukela i-video yinye futsi ngitsi nangibuka sikhatsi ngikhandze kutsi sekuphele ema-awa lamatsatfu nobe lamane solo ngibukela.”

¹⁷ Ungasilawula njani sikhatsi losicitsa utijabulisa? Indlela yekucala kutfola kutsi singanani sikhatsi losicitsa utijabulisa. Mhlawumbe ungasibhala phansi sikhatsi losicitsa utijabulisa evikini. Wabhale ku-calendar ema-awa lowacitsa ubukela i-TV, ubuka i-Internet nalowacitsa udlala imidlalo entfweni yakho yebuchwephesha. Nawubona shengatsi ucitsa sikhatsi lesinyenti kuloku, yetama kutentela luhlelo lwekusebentisa sikhatsi sakho. Hlela kwenta tintfo letibalulekile kucala bese utibekela nesikhatsi sekutijabulisa. Ngemuva kwaloko, cela Jehova kutsi akusite unamatsele kuloluhlelo lotentele lona. Nawenta njalo utawuba nesikhatsi kanye nemandla lowadzingako kuze utifundzele liBhayibheli, ube nesikhatsi sekukhonta kwemndeni, ube nesikhatsi sekuya emihlanganweni yelibandla kanye nesekukhonta Jehova ngekuya emsebentini wekushumayela. Utasijabulela kakhulu sikhatsi lotasicitsa utijabulisa ngobe utawube ubeke Jehova kucala ekuphileni kwakho.

18-19. Singakhombisa njani kutsi sitinikele kuJehova kuphela?

¹⁸ Ngemuva kwekubhala ngekuphela kwalelive laSathane, nangelive lelisha lelitako, umphostoli Phetro watsi: “Bazalwane labatsandzekako, njengobe nilindzele letintfo, yentani konkhe lokusemandleni enu kutsi ekugcineni anitfole ningenasici, ningasoleki futsi ninekuthula.” (2 Phet. 3:14) Nasisilalela leseluleko futsi sente konkhe lesingakwenta kuze sihlale sihlantekile ngekutiphatsa nasebuhlotjeni betfu naJehova, sitawube sikhombisa kutsi sikhonta Jehova kuphela.

¹⁹ Sathane nalelive lakhe utawuchubeka etama kusenta kutsi sibeke letinye tintfo kucala ekuphileni kwetfu kunaJehova. (Luk. 4:13) Noma singabhekana natiphi timo, angeke sivumele umuntfu nobe intfo letsite kutsi itsatse sikhala saJehova etinhlitiyweni tetfu. Sitimisele kuniketa Jehova loko lokufanele yena yedvwa—kukhonta yena kuphela!