Buka ya Pele ya Dikronike

14 Morena Hirame+ wa Tire a romela baromuwa ho Davida ha mmoho le difate tsa kedare, batho ba betlang majwe* le ba sebetsang ka mapolanka hore ba mo hahele ntlo.*+ 2 Davida o ne a tseba hore Jehova o tiisitse borena ba hae Iseraele+ hobane o entse hore mmuso wa hae o be matla molemong wa setjhaba sa hae sa Iseraele.+

3 Davida a ba le basadi+ ba bangata Jerusalema mme a ba le bara le baradi ba bangata.+ 4 Ana ke mabitso a bana ba hae ba hlahetseng Jerusalema:+ Shamua, Shobabe, Nathane,+ Solomone,+ 5 Ibare, Elishua, Elpelete, 6 Noga, Nefege, Jafia, 7 Elishama, Beliada le Elifelete.

8 Ha Bafilista ba utlwa hore Davida o tlotsitswe hore e be morena wa Iseraele yohle,+ Bafilista bohle ba tla ho tla lwantsha Davida.+ Ha Davida a utlwa taba ena, a tswa a yo ba hlasela. 9 Bafilista ba tla mme ba hlasela batho ba dulang Kgohlong* ya Refaime.+ 10 Davida a botsa Modimo a re: “Na nka ya ke yo lwantsha Bafilista? Na o tla nthusa hore ke ba hlole?” Yaba Jehova o re ho yena: “Tsamaya mme ke tla o thusa hore o ba hlole.”+ 11 Davida a ya Baale-perazime+ mme a ba bolaela moo. Yaba o re: “Modimo wa nnete o hlotse dira tsa ka jwalo ka lerako le dihilweng ke metsi.” Ke ka lebaka leo ba ileng ba bitsa sebaka seo Baale-perazime.* 12 Bafilista ba siya medimo ya bona ya ditshwantsho moo mme e ile ya tjheswa mollong+ ha Davida a fana ka taelo eo.

13 Ha morao Bafilista ba boela ba hlasela batho ba dulang kgohlong.*+ 14 Davida a boela a botsa Modimo empa Modimo wa nnete a re ho yena: “O se ke wa nyolohela ho bona ka ho toba. Empa o ba pote ka morao mme o ba hlasele o hlaha ka pela dihlahla tsa bakha.+ 15 Ha o utlwa lerata la masole a tsamayang hodima dihlahla tsa bakha, o a hlasele hanghang hobane Modimo wa nnete o tla be a o eteletse pele ho ya bolaya masole a Bafilista.”+ 16 Davida a etsa feela jwalo ka ha Modimo wa nnete a mo laetse+ yaba ba bolaya masole a Bafilista ho tloha Gibeone ho ya fihla Gezere.+ 17 Davida a tuma dinaheng tsohle mme Jehova a etsa hore ditjhaba tsohle di mo tshabe.+