Daniele

10 Ka selemo sa boraro Morena Saeruse+ wa Persia a busa, ho ile ha eba le taba eo Daniele ya neng a bitswa Beltsatsare+ a ileng a e senolelwa. Molaetsa oo e ne e le wa nnete mme o ne o bua ka ntwa e kgolo. O ile a utlwisisa molaetsa oo a ba a thuswa hore a utlwisise seo a se boneng.

2 Matsatsing ao, nna Daniele ke ne ke se ke qetile dibeke tse tharo kaofela ke lla.+ 3 Ka dibeke tseo tse tharo, ke ne ke sa je dijo tse monate, ke sa je nama, ke sa nwe veine ke bile ke sa itlotse ka oli. 4 Ka letsatsi la bo24 la kgwedi ya pele, ha ke ntse ke le lebopong la noka e kgolo e leng noka ya Tigris,*+ 5 ha ke sheba, ka bona monna ya apereng diaparo tsa line,+ thekeng a itlamme ka lebanta la kgauta ya Ufaze. 6 Mmele wa hae o ne o phatsima jwalo ka krisolite,+ sefahleho sa hae se kganya jwalo ka lehadima, mahlo a hae a ne a le jwalo ka malakabe a mollo,* matsoho le maoto a hae a ne a shebahala jwalo ka koporo e bentshitsweng+ mme modumo wa lentswe la hae o ne o le jwalo ka mantswe a batho ba bangata. 7 Ke nna feela ya ileng a bona pono eo. Banna bao ke neng ke ena le bona ha ba a ka ba e bona.+ Ba ile ba tshoha haholo, ba baleha ho ya ipata.

8 Ke ile ka sala ke le mong mme ha ke bona pono ena e hlollang, ka fellwa ke matla, sefahleho sa ka sa fetoha mme ka sala ke kgathetse haholo.+ 9 Ka mora moo, ka utlwa a bua le nna empa ha ke mo utlwa, ka kgaleha sefahleho sa ka se thetsitse fatshe.+ 10 Ka utlwa motho a ntshwara+ ka letsoho a ntshisinya hore ke tsohe. Yaba ke a tsoha ke kgumama ka mangole ke ntse ke itshwareleditse fatshe. 11 A re ho nna:

“Daniele, wena monna ya ratwang haholo,*+ mamela mantswe ana ao ke tlo o bolella ona. Ema hobane ke rometswe ho wena.”

Ha a tjho jwalo, ka ema ke ntse ke thothomela.

12 A re ho nna: “Daniele, o se ke wa tshoha.+ Thapelo ya hao e utlwilwe ho tloha ka letsatsi la pele ha o ne o batla ho utlwisisa dintho tsena le ha o ne o ikokobetsa ka pela Modimo wa hao. Modimo o utlwile thapelo ya hao mme ke ka lebaka leo ke tlileng ho wena.+ 13 Kgosana ya mmuso+ wa Persia e ne e nthibeletse ka matsatsi a 21. Empa Mikaele*+ e leng e mong wa dikgosana tse phahameng, o ile a tla ho tla nthusa. Ke ne ke le moo pela marena a Persia. 14 Ke tlo o thusa ho utlwisisa se tla etsahalla batho ba heno matsatsing a ho qetela+ hobane ke pono ya se tla etsahala nakong e tlang.”+

15 Ha a qeta ho mpolella ditaba tsena, ke ile ka sheba fatshe yaba ha ke sa tseba hore na ke reng. 16 Lengeloi leo le shebahalang jwalo ka motho la ntshwara molomo+ yaba ke qala ho bua, ka re ho ya emeng ka pela ka: “Morenaka, pono ena e a ntshosa ebile ha ke na matla.+ 17 Morenaka, ha ke kgone ho bua le wena+ hobane ha ke na matla ebile ha ke kgone le ho hema.”+

18 Lengeloi leo le shebahalang jwalo ka motho le ile la ntshwara hape yaba le a mmatlafatsa.+ 19 La re: “O se ke wa tshoha+ wena monna ya ratwang haholo.*+ Kgotso e be le wena+ mme o tiye o be matla.” Ha le ntse le bua le nna ke ile ka ba le matla ka re: “Bua morenaka hobane o mmatlafaditse.”

20 Ka mora moo a re: “Na o a tseba hore na ke hobaneng ha ke tlile ho wena? Ke tla kgutla ke yo lwantsha kgosana ya Persia.+ Ha ke tsamaya, kgosana ya Greece e tla tla. 21 Le ha ho le jwalo, ke tla o bolella dintho tse ngotsweng bukeng ya nnete. Ha ho na motho ya ntsheheditseng dinthong tsena haese Mikaele,+ kgosana ya lona.+