Daniele

8 Ka selemo sa boraro sa puso ya Morena Belshatsare,+ nna Daniele ke ile ka bona pono e nngwe ntle le eo ke e boneng pele.+ 2 Ka bona pono eo ke le Shushane*+ ntlong ya borena* e profinseng ya Elame.+ Ke ne ke le haufi le noka ya Ulai ha ke bona pono eo. 3 Ha ke sheba hodimo, ka bona ramo+ e nang le manaka a mabedi e eme ka pela noka.+ Manaka ao a mabedi a ne a le malelele empa le leng le ne le le lelelele ho feta le leng. Le lelelele haholo ke lona le ileng la hlaha ha morao.+ 4 Ka bona ramo e hlasela dira ka bophirimela, ka leboya le ka borwa mme ho ne ho se na sebata se hlaha se neng se ka ema ka pela yona. Ho ne ho se na ya ka pholosang ba bang ho yona ka lebaka la matla* a yona.+ E ne e iketsetsa seo e se ratang ebile e ikgohomosa.

5 Ha ke ntse ke shebile, ka bona phooko*+ e hlaha ka bophirimela mme e feta hodima lefatshe lohle empa e sa thetse fatshe. Hape phooko eo e ne e ena le lenaka le leholo pakeng tsa mahlo a yona.+ 6 E ne e tla ho ramo e nang le manaka a mabedi, eo ke ileng ka e bona e eme haufi le noka. Ya mathela ho yona e halefile haholo.

7 Ka bona e ntse e atamela ramo e halefile haholo. Ya hlasela ramo ya ba ya roba manaka a yona a mabedi mme ramo e ne e se na matla a ho itwanela. Ya lahlela ramo fatshe le ho e hatakela. Ho ne ho se na ya ka thusang ramo eo ha phooko e e thula.

8 Phooko ya ikgohomosa haholo. Empa eitse ha e eba matla, lenaka la yona le leholo la robeha. Ka mora moo, ha hlaha manaka a mane a maholo sebakeng sa lona, a shebile dikarolong tse nne tsa lefatshe.*+

9 Ho le leng la ona ha hlaha lenaka le leng le lenyenyane. Le ile la eba leholo haholo ho elella ka borwa, ka botjhabela le ka lehlakoreng la Mokgabiso.*+ 10 Le ile la eba leholo hoo le ileng la fihla lebothong la lehodimo yaba le dihela karolo e nngwe ya lebotho leo le ya dinaledi lefatsheng mme la di hatakela. 11 La ikgohomosetsa le Kgosana ya lebotho mme sehlabelo seo a neng a se etsetswa ka mehla sa kgaotsa ho ba teng. Sebaka se kgethilweng sa sehalalelo sa hae sa heletswa.+ 12 Lebotho la fuwa lenaka leo le sehlabelo se neng se etswa ka mehla sa kgaotsa ho ba teng ka lebaka la molato. La nna la lahlela nnete lefatsheng. Le ne le etsa seo le se batlang mme le atleha.

13 Ka utlwa mohalaledi a bua mme mohalaledi e mong a re ho yena: “Pono ya sehlabelo se etswang ka mehla le ya molato o bakang tshenyo e tla tswela pele ho fihlela neng?+ Sebaka se halalelang le lebotho di tla hatakelwa ho fihlela neng?” 14 A re ho nna: “Ho fihlela ho fetile matsatsi* a 2 300. Sebaka se halalelang se tla kgutlisetswa boemong ba sona bo nepahetseng.”

15 Ha ke ntse ke shebile pono eo mme ke leka ho e utlwisisa, hanghang ka bona motho ya kang monna a eme ka pela ka. 16 Ka utlwa lentswe la motho hara noka ya Ulai,+ a hweletsa a re: “Gabariele,+ thusa motho eo hore a utlwisise seo a se boneng.”+ 17 A atamela moo ke neng ke eme teng empa ha a tla ka tshoha hoo ke ileng ka kgumama ka ba ka thetsa fatshe ka hlooho. A re ho nna: “Mora motho, tseba hore dintho tsena di tla phethahala nakong ya bofelo.”+ 18 Ha a ntse a bua le nna, ka kgaleha ke ntse ke thetsitse fatshe ka hlooho. A ntshwara mme a nkemisa e le hore ke eme hape.+ 19 A re: “Ke o tsebisa se tla etsahala karolong e qetellang ya kahlolo hobane se tla etsahala ka nako e behilweng ya bofelo.+

20 Ramo e nang le manaka a mabedi eo o e boneng e emela marena a Media le Persia.+ 21 Phooko e boya bo bongata e emela morena wa Greece.+ Lenaka le leholo le neng le le pakeng tsa mahlo a yona, le emela morena wa pele.+ 22 Manaka a mane a ileng a hlaha sebakeng sa le le leng le ileng la robeha,+ a emela mebuso e mene e tswang setjhabeng sa morena eo e tla hlaha empa mebuso eo e ke ke ya eba matla jwalo ka yena.

23 Karolong e qetellang ya mmuso wa bona, ha ba kgopo ba etsa dintho tse mpe ka ho fetisisa, ho tla hlaha morena ya sehloho ya utlwisisang mantswe a sa hlakang.* 24 O tla ba matla haholo empa eseng ka matla a hae. O tla baka tshenyo ka tsela e sa tlwaelehang mme o tla atleha. O tla fedisa ba matla le bahalaledi.+ 25 Ka ha o bolotsana, o tla bua leshano hore a atlehe a be a ikgohomose. O tla bolaya batho ba bangata nakong eo ba ikutlwang ba sireletsehile.* O tla hlasela le Kgosana ya dikgosana, o tla fediswa empa a ke ke a fediswa ka letsoho la motho.

26 Se buuweng ponong mabapi le mahlabelo a mantsiboya le a hoseng ke nnete. O se ke wa bolella mang kapa mang ka pono eo hobane ho tla feta nako e telele pele e etsahala.”+

27 Ke ile ka ikutlwa ke kgathetse mme ka qeta matsatsi a mmalwa ke kula.+ Ka mora moo, ka ema ka etsa mosebetsi wa morena.+ Ke ne ke makaditswe ke pono eo mme ho ne ho se na motho ya ka kgonang ho e utlwisisa.+