Ho Baroma

9 Ka ha ke molatedi wa Kreste, ke bua nnete ha ke bue leshano. Le letswalo la ka le tataiswang ke moya o halalelang le a mpakela 2 hore ke dula ke utlwile bohloko pelong ya ka ebile ke saretswe haholo. 3 Ke lakatsa eka e ka be e le nna ya arotsweng le Kreste, e le nna ya tlo fediswa sebakeng sa bana beso, batho ba morabe wa heso 4 e leng Baiseraele. Modimo o ba kgethile hore e be bara ba hae,+ a ba phahamisa, a etsa dilekane le bona,+ a ba fa Molao,+ ditshepiso+ le tlotla ya hore ba mo sebeletse.+ 5 Ke ditloholo tsa baholoholo ba rona+ bao Kreste le yena e ileng ya eba setloholo sa bona ha e le motho.+ Modimo ya busang tsohle a ke a roriswe ka ho sa feleng. Amen.

6 Le ha ho le jwalo, tshepiso ya Modimo ha e a hloleha ho phethahala. Etswe ha se Baiseraele bohle bao ehlileng e leng “Baiseraele.”+ 7 Hape ha se hore ditloholo* tsohle tsa Abrahama ke bana ba hae.+ Modimo o ile a re ho Abrahama: “O tla ba le ditloholo* ka Isaka.”+ 8 E leng hore bana ba tswetsweng ke Abrahama ha se bana ba Modimo.+ Bana ba tswetsweng ka lebaka la tshepiso+ ya Modimo ke bona ba nkwang e le bana ba Abrahama. 9 Modimo o ile a fana ka tshepiso ena: “Ke tla kgutlela ho wena ka yona nako ena mme Sara o tla be a ena le mora.”+ 10 Modimo o ile a nna a etsa tshepiso ha Rebeka a tla ima mafahla ao ntate wa ona e neng e le Isaka moholoholo wa rona.+ 11 Le pele mafahla ao a hlaha mme a etsa letho le letle kapa le lebe, Modimo o ile a bontsha hore morero wa hae ha o a itshetleha ka mesebetsi empa o itshetlehile ka hore na o batla ho kgetha mang. 12 Ho ile ha thwe ho yena: “E moholo e tla ba lekgoba la e monyenyane”+ 13 jwalo ka ha Mangolo a re: “Ke ratile Jakobo empa ke hloile Esau.”+

14 Na re re Modimo ha a na toka? Ha ho jwalo.+ 15 O re ho Moshe: “Ke tla bontsha mohau ho eo ke tla mo bontsha mohau, ke tla ba mosa ho eo ke batlang ho ba mosa ho yena.”+ 16 Ka hoo, tsela eo Modimo a kgethang ka yona ha e a itshetleha ka hore na motho o batlang kapa o sebetsa ka thata hakae empa e itshetlehile ka mohau wa Modimo.+ 17 Lengolo le re ho Faro: “Ke o bolokile o phela ka lebaka lena: Hore ke bontshe matla a ka ka wena le hore lebitso la ka le bolelwe lefatsheng lohle.”+ 18 Ka hoo, Modimo o hauhela eo a batlang ho mo hauhela empa ya batlang ho ba manganga o a mo tlohela.+

19 Ba bang ba ka mpotsa ba re: “Ke hobaneng ha a re tshwaya diphoso? Ke mang ya ka hanyetsang thato ya Modimo?” 20 Wena motho, o mang hore o arabise Modimo?+ Na ntho e bopilweng e ka re ho ya e bopileng: “Ke hobaneng ha o mpopile tjee?”+ 21 Na sebopi ha se na matla a ho bopa sejana se kgethehileng* le se tlwaelehileng* se sebedisa letsopa+ le le leng? 22 Modimo o ne a batla ho tsebahatsa matla a hae le ho bontsha kgalefo ya hae ho batho ba sa lokang. Empa o ile a kgetha ho mamella batho bana ba neng ba tshwanela ho fuwa kotlo ebile ba tshwana le dijana tse lokelang ho senngwa. 23 O ile a etsa jwalo e le hore a bontshe boemo ba hae bo phahameng haholo ho batho bao a neng a tla ba hauhela+ le ba tla fumana moputso oo a ba lokiseditseng wona. 24 Ke rona bao a ba bitsitseng hara Bajuda esita le hara ditjhaba tse ding.+ 25 Ho jwalo ka ha a ile a bolela bukeng ya Hosea a re: “Batho bao e seng setjhaba+ sa ka ke tla ba bitsa setjhaba sa ka mme mosadi ya neng a sa ratwe ke tla mo bitsa ya ratwang.+ 26 Sebakeng seo ho sona ho ileng ha thwe ho bona, ‘Ha le setjhaba sa ka,’ ke hona moo ba tla bitswa bara ba Modimo ya phelang.”+

27 Hape Esaia o re ka Baiseraele: “Le hoja palo ya Baiseraele e ka lekana le lehlabathe la lewatle, ke batho ba seng bakae feela ba tla pholoswa+ 28 hobane Jehova* o tla ahlola lefatshe mme a fane ka kahlolo a sa senye nako.”+ 29 Ho jwalo ka ha Esaia a ile a bolela nakong e fetileng a re: “Hoja Jehova* wa mabotho a se ke a re siela bana, re ka be re bile feela jwalo ka Sodoma hape re ka be re tshwana le Gomora.”+

30 Re ka reng? Re ka re batho ba ditjhaba tse ding ba nkwa ba lokile ka lebaka la tumelo ya bona+ le hoja ba sa etse dintho tse lokileng.+ 31 Le hoja Baiseraele ba ne ba etsa dintho tse lokileng ho ya ka molao, ha ba a ka ba latela molao oo ka botlalo. 32 Hobaneng? Ba ne ba nahana hore ba tla nkwa ba lokile ka lebaka la mesebetsi ya bona eseng hobane ba ena le tumelo. Ba ile ba kgoptjwa ke “lejwe le kgopang.”+ 33 Ho jwalo ka ha ho ngodilwe ha thwe: “Bonang! Ke beha lejwe Sione,+ lejwe le kgopang le lefika le kgopisang empa ya dumelang ho lona a ke ke a phoqeha.”+