SEHLOOHO SE ITHUTWANG SA 17
Dumella Jehova Hore a o Thuse ho Lwantsha Bademona
“Re lwana le . . . makgotla a moya a kgopo a leng dibakeng tsa lehodimo.”—BAEF. 6:12.
PINA YA 55 Le se ke la ba Tshaba!
SEO RE TLO ITHUTA SONAa
1. Jwalo ka ha ho hlalositswe ho Baefese 6:10-13, ke tsela efe e ikgethang ka ho fetisisa e bontshang hore Jehova o a re rata? Hlalosa.
TSELA e ikgethang ka ho fetisisa eo Jehova a bontshang ka yona hore o a re rata, ke ka ho re thusa ho lwantsha dira tsa rona. Dira tsa rona tse ka sehloohong ke Satane le bademona ba hae. Jehova o re lemosa ka dira tsena, ebile o re fa seo re se hlokang e le hore re di lwantshe. (Bala Baefese 6:10-13.) Jwale haeba re dumella Jehova hore a re thuse, re bile re itshetleha ka yena ka ho felletseng, re ka kgona ho hanyetsa Diabolose. Re tla ikutlwa jwalo ka moapostola Pauluse, ha a ne a re: “Haeba Modimo a eme le rona, ke mang ya tla ba kgahlanong le rona?”—Bar. 8:31.
2. Re tlo ithutang sehloohong sena?
2 Jwalo ka bahlanka ba Jehova, ha re senye nako ya rona re shebane le Satane le bademona ba hae. Ho e na le hoo, re amehile ka ho ithuta ka Jehova le ho mo sebeletsa. (Pes. 25:5) Le ha ho le jwalo, re lokela ho tseba maqheka a Satane. Hobaneng? E le hore a se ke a re qhekella. (2 Bakor. 2:11) Sehloohong sena, re tlo tshohla tsela e ka sehloohong eo Satane le bademona ba hae ba lekang ho kgelosa batho ka yona. Re tla boela re ithute le ka moo re ka ba hlolang ka teng.
BADEMONA BA KGELOSA BATHO JWANG?
3-4. (a) Ho sebedisana le meya ho bolelang? (b) Hona ho atile hakae?
3 Tsela e ka sehloohong eo Satane le bademona ba hae ba e sebedisang ho leka ho kgelosa batho, ke tshebedisano le meya. Batho ba sebedisanang le meya, ba ithetsa ka hore ba kgona ho tseba dintho tseo batho ba ke keng ba kgona ho di tseba. Ka mohlala, ba re ba ka kgona ho tseba se tla etsahala ka moso ka ho sebedisa bonohe ba dinaledi. Ba bang bona ba etsa eka ba ka kgona ho bua le bafu. Athe ba bang bona ba sebedisa boloi mme ba betsa ba bang ka mantswe a boloi.b
4 Ho sebedisana le meya ho atile hakae? Patlisiso e ileng ya etswa dinaheng tse 18 tsa Latin America le Caribbean, ho fumanwe hore motho a le mong ho ba bararo o dumela boselamose, boloi kapa bonohe. Hape batho ba bangata ba dulang dinaheng tsena, ba dumela hore ho a kgoneha ho buisana le bafu. Ho ile ha boela ha etswa patlisiso e nngwe dinaheng tse 18 tsa Afrika. Batho ba bangata dinaheng tsena ba dumela boloi. Ka hona, ho sa tsotellehe hore na re dula naheng efe, re lokela ho itebela kgahlanong le tshebedisano le meya. Etswe Satane o batla ho kgelosa “lefatshe lohle leo ho ahilweng ho lona.”—Tšen. 12:9.
5. Jehova o ikutlwa jwang ka tshebedisano le meya?
5 Jehova ke “Modimo wa nnete.” (Pes. 31:5) Ebe jwale o ikutlwa jwang ka tshebedisano le meya? O e hloile. Ke ka hona a ileng a re ho Baiseraele: “Ho lona ha ho a lokela hore ho fumanwe le ha e le mang ya fetisang mora wa hae kapa moradi wa hae mollong, le ha e le mang ya sebedisang bonohe, ya sebedisang boselamose kapa le ha e le mang ya batlang dipontsho tsa se tlang kapa moloi, kapa ya betsang ba bang ka mantswe a boloi kapa le ha e le mang ya batlang keletso ho ya buisanang le meya kapa setsebi se bolelang diketsahalo esale pele kapa le ha e le mang ya botsang bafu. Etswe e mong le e mong ya etsang dintho tsena ke ntho e manyala ho Jehova.” (Deut. 18:10-12) Ke nnete hore Bakreste ha ba sa le tlasa Molao oo Jehova a neng a o file Baiseraele. Le ha ho le jwalo, tsela eo a tadimang tshebedisano le meya ka yona e ntse e eso fetohe.—Mal. 3:6.
6. (a) Satane o sebedisa tshebedisano le meya jwang ho ntsha batho kotsi? (b) Ho ya ka Moeklesia 9:5, keng seo e leng nnete ka bafu?
6 Jehova o re lemosa kgahlanong le tshebedisano le meya, hobane o a tseba hore Satane o sebedisa yona ho ntsha batho kotsi. Satane o sebedisa tshebedisano le meya ho jala mashano a hae, a kang la hore bafu ba phela sebakeng se seng se itseng. (Bala Moeklesia 9:5.) O boetse o sebedisa tshebedisano le meya ho tshosa batho, le ho etsa hore ba se ke ba hlola ba sebeletsa Jehova. O batla hore batho ba tshepe bademona eseng Jehova.
RE KA LWANTSHA BADEMONA JWANG?
7. Keng seo Jehova a re bolellang sona?
7 Jwalo ka ha ho hlalositswe qalong, Jehova o re bolella seo re lokelang ho se etsa e le hore re se ke ra qhekellwa ke Satane le bademona ba hae. A re ke re hlahlobeng dintho tseo re lokelang ho di etsa, tse tla re thusa ho lwana kgahlanong le Satane le bademona ba hae.
8. (a) Ke tsela efe e ka sehloohong e tla re thusa ho hlola bademona? (b) Pesaleme ya 146:4 e pepesa leshano lefe la Satane mabapi le bafu?
8 Bala Lentswe la Modimo mme o nahanisise ka lona. Ho etsa jwalo ho tla o thusa hore o se ke wa thetswa ke bademona. Bibele e tshwana le sabole e bohale mme e pepesa mashano ao Satane a a buang. (Baef. 6:17) Ka mohlala, Bibele e hanana le thuto ya hore bafu ba ka kgona ho buisana le batho ba phelang. (Bala Pesaleme ya 146:4.) E boetse e re hopotsa hore ke Jehova feela ya ka bonang se tla etsahala ka moso. (Esa. 45:21; 46:10) Ka hona, haeba re bala Lentswe la Modimo ka mehla re bile re nahanisisa ka lona, re tla hloya mashano ao bademona ba a buang mme re ke ke ra a kgolwa.
9. Ke mefuta efe ya tshebedisano le meya eo re lokelang ho e qoba?
9 Hana ho etsa ntho le ha e le efe e amanang le tshebedisano le meya. Ka ha re Bakreste ba nnete, ha re etse ntho le ha e le efe e amanang le ho sebedisana le meya. Ka mohlala, ha re ye dingakeng tsa setso kapa hona ho leka ho buisana le bafu ka tsela le ha e le efe. Jwalo ka ha ho hlalositswe sehloohong se fetileng, re qoba meetlo e etswang ha ho ena le lefu e dumellanang le thuto ya hore bafu, ba phela sebakeng se seng se itseng. Hape ha re sebedise bonohe ho leka ho sheba se tla etsahala ka moso. (Esa. 8:19) Re a tseba hore mekgwa ena e kotsi mme e ka re susumelletsa hore re sebedisane le Satane le bademona ba hae.
Etsisa Bakreste ba mehleng ya baapostola ka ho lahla ntho efe kapa efe e amanang le bademona le ka ho hana boithabiso bo nang le tshebedisano le meya (Sheba serapa sa 10-12)
10-11. (a) Batho ba bang ba mehleng ya baapostola ba ile ba etsang ha ba qala ho ithuta Bibele? (b) Ho ya ka 1 Bakorinthe 10:21, ke hobaneng ha re lokela ho ba etsisa, hona re ka ba etsisa jwang?
10 Lahla ntho efe kapa efe e tsamaisanang le bodemona. Batho ba bang ba mehleng ya baapostola ba neng ba dula Efese, ba ne ba sebedisana le meya. Empa ka mora ho ithuta Lentswe la Modimo, ba ile etsa diphetoho tse kgolo. Bibele e re: “Ba bangata ba neng ba sebedisa tsebo ya boselamose ba bokella dibuka tsa bona mme ba di tjhesa ka pela bohle.” (Lik. 19:19) Batho bana ba ile ba etsa sohle seo ba ka se kgonang ho lwana kgahlanong le bademona. O tla hopola hore dibuka tsa bona tsa boselamose di ne di le turu. Empa ho e na le hore ba fane ka tsona kapa ho di rekisetsa ba bang, ba ile ba etsa qeto ya ho di tjhesa. Ka sebele ba ne ba amehile ka ho thabisa Jehova, eseng ka tjhelete e ngata eo ba e sebedisitseng ho reka dibuka tseo.
11 Ebe re ka etsisa Bakreste bao ba mehleng ya baapostola jwang? E ka ba bohlale hore le rona re lahle ntho efe kapa efe e amanang le boselamose. Dintho tseo di akarelletsa difaha, kgweetsa kapa ntho le ha e le efe eo ho thweng e sebedisetswa ho sireletsa motho kgahlanong le bademona.—Bala 1 Bakorinthe 10:21.
12. Re lokela ho ipotsa dipotso dife ka boithabiso boo re bo kgethang?
12 Hlahlobisisa boithabiso boo o bo kgethang ka hloko. Ipotse: ‘Na ke bala dibuka, dimakasine kapa dihlooho Inthaneteng tse buang ka bodemona? Ho thweng ka mmino oo ke o mamelang, kapa dimuvi le mananeo a thelevishene ao ke a shebellang, kapa dipapadi tsa video? Na le tsona di amana le bodemona? Na boithabiso boo ke bo kgethang bo na le tshebedisano le meya? Na bo hlahisa dinwamadi, dithotsela kapa batho ba nang le matla a fetang a tlhaho? Na bo etsa e ka boselamose, boloi kapa ho bitsetsa batho ba bang bomadimabe ho bonahale e ka ha ho kotsi?’ Ke nnete hore ha se boithabiso bohle bo nang le bophelo ba ditoro bo amanang le tshebedisano le meya. Jwale ha o ntse o hlahlobisisa boithabiso boo o bo kgethang, ikemisetse ho kgetha bo se nang dintho tseo Jehova a di hloileng. Re batla ho etsa sohle seo re ka se kgonang ho dula re na le letswalo le hlwekileng ka pela Modimo.—Lik. 24:16.c
13. Re lokela ho qoba ho etsang?
13 Qoba ho qoqa ka dipale tse buang ka bademona. Boemong bona, re lokela ho etsisa Jesu. (1 Pet. 2:21) Jesu o phetse lehodimong pele a tla lefatsheng. Ka hoo, o ne a tseba ho hongata ka Satane le bademona ba hae. Empa o ne o ke ke wa utlwa a ntse a qoqela batho ka mangeloi ana a kgopo. O ne a batla ho ruta batho ka Jehova eseng ho nna a ba qoqela ka Satane. Le rona re ka etsisa Jesu ka hore re se ke ra nna ra qoqa ka dipale tse buang ka bademona. Ho e na le hoo, re bontsha ka seo re se buang hore dipelo tsa rona di a “tlolatlola ka lebaka la taba e kgahlisang,” e leng nnete eo Bibele e e rutang.—Pes. 45:1.
Ha ho hlokahale hore re tshabe bademona ka ha Jehova, Jesu le mangeloi ba matla ho ba feta (Sheba serapa sa 14-15)d
14-15. (a) Ke hobaneng ha re sa lokela ho tshoswa ke bademona? (b) Ke bopaki bofe bo bontshang hore Jehova o sireletsa bahlanka ba hae kajeno?
14 O se ke wa tshoswa ke bademona. Ka ha re phela lefatsheng le tletseng bokgopo, re ka hlahelwa ke dintho tse mpe. Dikotsi, ho kula kapa lefu di ka hlaha re sa lebella. Empa ha re a lokela ho nahana hore dintho tsena di etsahala ka lebaka la meya e mebe. Bibele e re kaofela ha rona re hlahelwa ke ‘nako le diketsahalo tse sa lebellwang.’ (Moek. 9:11) Jehova o re bontshitse hore o matla ho feta bademona. Ka mohlala, ha a a ka a dumella Satane ho bolaya Jobo. (Jobo 2:6) Athe mehleng ya Moshe teng, Jehova o ile a bontsha hore o matla ho feta baprista ba Egepeta ba neng ba etsa boselamose. (Ex. 8:18; 9:11) Ka thuso ya Jehova, Jesu o ile bontsha hore o matla ho feta Satane le bademona ba hae ha a ne a ba dihela tlase lefatsheng. Haufinyane ba tla lahlelwa ka mohohlong mme ba ke ke ba hlola ba ntsha batho kotsi.—Tšen. 12:9; 20:2, 3.
15 Re na le bopaki bo totobetseng ba hore Jehova o sireletsa bahlanka ba hae kajeno. Ka mohlala, re ruta batho Bibele dikarolong tsohle tsa lefatshe. (Mat. 28:19, 20) Sena se pepesa mesebetsi e kgopo ya Diabolose mme ha a ne a kgona, o ne a tla thibela mosebetsi wa boboledi oo re o etsang. Empa re a thaba ho tseba hore a ke ke a o besa wa tuka. Ka hona, ha re a lokela ho tshoswa ke bademona ka ha re a tseba hore “mahlo a [Jehova] a qamaka ho pholletsa le lefatshe lohle hore a bontshe matla a hae molemong wa bao dipelo tsa bona di feletseng ho yena.” (2 Likron. 16:9) Haeba re tshepahalla Jehova, bademona ba ke ke ba re ntsha kotsi.
RE TLA FUMANA DITLHOHONOLOFATSO DIFE HA RE AMOHELA THUSO YA JEHOVA?
16-17. Fana ka mohlala o bontshang hore ho hlokahala motho a be sebete e le hore a hanele bademona.
16 Ho hlokahala re be sebete e le hore re hanele bademona, haholoholo haeba metswalle kapa beng ka rona ba re hanyetsa, le hoja ba sa etse seo ka sepheo se sebe. Jehova o tla re hlohonolofatsa haeba re bontsha sebete boemong bo jwalo. Hlokomela se ileng sa etsahalla moradiwabo rona Erica, ya dulang Ghana. O ne a le dilemo di 21 ha a qala ho ithuta Bibele. Ka ha Ntate wa hae e ne e le moprista ya sebedisang boselamose, o ne a lebelletse hore Erica a etse meetlo e amanang le tshebedisano le meya. E ne e akarelletsa ho ja nama e neng e hlabetswe medimo ya Ntate wa hae. Jwale eitse ha Erica a hana ho etsa meetlo ena, beng ka yena ba ile ba re o tella medimo. Ba ne ba dumela hore medimo e ne e ka etsa hore ba lahlehelwe ke dikelello kapa ya ba kudisa.
17 Lelapa labo Erica le ile la leka ho mo susumelletsa hore a latele moetlo oo, empa o ile a hana, le hoja seo se ne se bolela hore jwale ba ne ba tla mo leleka lapeng. Dipaki tse ding di ile tsa re a tlo dula le tsona. Ka sebele Jehova o ile a fa Erica Bakrestemmoho, bao e ileng ya ba lelapa labo le letjha. (Mar. 10:29, 30) Le hoja ba habo Erica ba ile ba mo tebela ba ba ba tjhesa dintho tseo a neng a na le tsona, o ile a dula a tshepahalla Jehova, a kolobetswa mme hona jwale ke pulamadiboho ya ka mehla. Erica ha a tshoswe ke bademona. Ha a bua ka beng ka yena o re: “Ke rapela letsatsi le letsatsi hore e se e ka lelapa leso le ka latswa ditlhohonolofatso tse tliswang ke ho ithuta ka Jehova, le ho fumana bolokolohi ba ho sebeletsa Modimo ya lerato jwalo ka yena.”
18. Re tla fumana ditlhohonolofatso dife haeba re tshepa Jehova?
18 Ke nnete hore tumelo ya rona e ke ke ya lekwa ka ditsela tse tshwanang. Le ha ho le jwalo, kaofela ha rona re lokela ho tshepa Jehova mme re hane ho susumetswa ke bademona. Ha re etsa jwalo, re tla fumana ditlhohonolofatso tse ngata mme re ke ke ra kgeloswa ke mashano a Satane. Hape re ke ke ra dumella hore ho tshaba bademona ho re thibele ho sebeletsa Jehova. Ka hodima tsohle, kamano ya rona le Jehova e tla tiya. Ka hona, Bibele e re eletsa ka hore: “Ipeheng tlasa Modimo; le hanyetse Diabolose mme o tla le balehela. Atamelang ho Modimo mme o tla atamela ho lona.”—Jak. 4:7, 8.
PINA YA 150 Batlang Modimo Hore le Lopollwe
a Ka ha Jehova o a re rata, o re lemosa ka moo bademona ba leng kotsi ka teng. Bademona ba leka jwang ho kgelosa batho? Hona re ka etsang ho hanela hore ba re kgelose? Sehloohong sena, re tlo ithuta ka moo Jehova a re thusang ka teng hore re se ke ra kgeloswa ke bademona.
b TLHALOSO YA LENTSWE: Tshebedisano le meya e bolela ditumelo le meetlo e amanang le bademona. E akarelletsa le thuto ya hore ha motho a hlokahetse, moya wa hae o tswelapele o phela mme o ka kgona ho bua le batho ba phelang, ka thuso ya motho ya ipolelang hore o kgona ho bua le bafu. Tshebedisano le meya, e boetse e akarelletsa boloi le bonohe. Jwalo ka ha re tlo ithuta sehloohong sena, boselamose bona bo akarelletsa mekgwa e amanang le boloi le matla a phahametseng a tlhaho. Bo boetse bo akarelletsa ho bitsetsa ba bang bomadimabe kapa ho ba loya.
c Baholo ha ba na tokelo ya ho etsa melao mabapi le hore na boithabiso bo itseng bo nepahetse kapa tjhe. Ka hoo, Mokreste e mong le e mong o lokela ho sebedisa letswalo la hae le kwetlisitsweng ke Bibele ha a kgetha seo a se balang, a se shebellang kapa dipapadi tseo a di etsang. Dihlooho tsa malapa di etsa bonnete ba hore di sebedisa melaomotheo ya Bibele ha di kgetha boithabiso ba lelapa. Sheba sehlooho se reng “Na ho na le Dimuvi, Dibuka kapa Dipina Tseo Dipaki Tsa Jehova di di Thibelang?” se hlahang ho jw.org® tlasa MABAPI LE RONA > DIPOTSO TSE ATISWANG HO BOTSWA.
d DITSHWANTSHO DI A HLALOSWA: Re bona Jesu jwalo ka Morena wa rona ya matla, a etella pele lebotho la mangeloi mme terone ya Jehova e le ka hodima bona.