Re ka Phela ka ho sa Feleng

 1. Ho nahanisisa ka tshepiso ya Jehova ya hore re tla phela ka ho sa feleng ho etsa hore re ikutlwe jwang?

JEHOVA o tshepisa batho ba mo mamelang hore ba tla fumana “bophelo bo sa feleng.” (Bar. 6:​23) Ha re nahanisisa ka tshepiso ena re rata Jehova le ho feta. A ko nahane feela: Ntate wa rona ya lehodimong o re rata haholo hoo ho se nang letho le ka re arohanyang le yena.

 2. Tshepiso ya hore re tla phela ka ho sa feleng e re thusa jwang?

² Tshepiso eo Modimo a re etseditseng yona ya bophelo bo sa feleng e re thusa hore re mamelle mathata ao re nang le ona hona jwale. Re ke ke ra tlohela ho sebeletsa Jehova esita le haeba dira tsa rona di re tshosa ka hore di tla re bolaya. Hobaneng? Lebaka le leng ke hobane re a tseba hore haeba re shwa re ntse re tshepahalla Jehova, o tla re tsosa mme re tla ba le tshepo ya hore re tla phela ho se mohla re tla shwa. (Joh. 5:​28, 29; 1 Bakor. 15:​55-58; Baheb. 2:​15) Ke hobaneng ha re ka kgodiseha hore re ka phela ka ho sa feleng? Nahana ka mabaka a latelang.

 3. Ke hobaneng ha re ka kgodiseha hore Jehova a ka kgona ho etsa hore re phele ka ho sa feleng? (Pesaleme ya 102:​12, 24, 27)

³ Re a tseba hore Jehova a ka kgona ho etsa hore re phele ka ho sa feleng hobane ke Mohlodi wa bophelo mme o phela ka ho sa feleng. (Pes. 36:9) Ditemana tse latelang tsa Bibele di a tiisa hore haesale Jehova a le teng ebile o tla dula a le teng. Pesaleme ya 90:2 e re Jehova ‘ha a na qalo ebile ha a na qetello.’ Pesaleme ya 102 e bua taba e tshwanang. (Bala Pesaleme ya 102:​12, 24, 27.) Le moprofeta Habakuke o ile a re ka Ntate wa rona ya lehodimong: “Jehova, esale o le teng. Modimo wa ka, Mohalaledi wa ka, ha o shwe.”​—Hab. 1:12.

 4. Na re lokela ho tshwenyeha haeba re sa utlwisise taba ya hore haesale Jehova a le teng? Hlalosa.

⁴ Na o thatafallwa ho utlwisisa taba ya hore haesale Jehova a le teng? (Esa. 40:​28) Batho ba bangata ha ba e utlwisise. Elihu o ile a re ka Modimo: “Ha ho na motho ya ka kgonang ho bala dilemo tsa hae.” (Jobo 36:​26) Empa taba feela ya hore ha re utlwisise ntho e itseng ha e bolele hore ntho eo ha se nnete. Mohlala, taba ya hore ha re utlwisise hantle hore na motlakase o sebetsa jwang, ha e bolele hore motlakase ha se ntho e teng. Ka tsela e tshwanang, le rona re ka nna ra se ke ra utlwisisa ka ho felletseng hore na ho tla jwang hore ebe Jehova haesale a le teng le hore o tla dula a le teng. Empa taba ena ha e bolele hore Modimo ha a phele ka ho sa feleng. Hore Modimo o phela ka ho sa feleng ha ho a itshetleha ka hore na re a utlwisisa kapa ha re utlwisise. (Bar. 11:​33-36) O bile teng pele ho dintho tsohle ho akareletsa letsatsi le dinaledi. Jehova o re kgodisa hore “ke yena ya entseng lefatshe ka matla a hae.” Hape o bile teng pele a ‘otlolla mahodimo.’ (Jer. 51:​15; Dik. 17:​24) Lebaka le leng le re kgodisang hore re ka phela ka ho sa feleng ke lefe?

 5. Banyalani ba pele ba ne ba ena le tshepo efe?

⁵ Hara dintho tsohle tseo Jehova a di bopileng lefatsheng, ke batho feela ba neng ba bopetswe hore ba se ke ba shwa. O ile a ba fa tshepo e ikgethang ya hore ba ke ke ba shwa. Le ha ho le jwalo, Jehova o ile a re ho Adama: “Empa ha e le sefate sa tsebo ya botle le bobe, o se ke wa ja ditholwana tsa sona hobane letsatsing leo ka lona o di jang, ka nnete o tla shwa.” (Gen. 2:​17) Hoja ebe Adama le Eva ba ile ba mamela Jehova, ba ka be ba sa shwa. Ho a utlwahala ho nahana hore ho na le nako eo Jehova a neng a tla ba dumella hore ba je ditholwana tsa ‘sefate sa bophelo.’ Ka ho etsa jwalo o ne a tla be a ba kgodisa hore ka nnete ba tla “phela ka ho sa feleng.”b​—Gen. 3:22.

6, 7. (a) Ke eng hape e bontshang hore batho ba ne ba sa bopelwa ho shwa? (b) O batla ho etsa dintho dife ha o se o phela ka ho sa feleng? (Sheba ditshwantsho.)

⁶ Borasaense ba bang ba fumane hore boko ba rona bo ka boloka boitsebiso bo bongata ho feta boo re ithutang bona ha re ntse re phela. Ena ke taba e thahasellisang. Ka 2010, makasine ya Scientific American Mind e ile ya re ho hakanngwa hore boko ba motho bo ka boloka boitsebiso bo bongata haholo. Boitsebiso boo bo ka lekana le mananeo a thelevishene a rekotilweng ao motho a ka nkang dilemo tse 300 a a shebeletse a sa kgaotse. Ho ka etsahala hore boko ba rona bo kgona ho boloka boitsebiso bo bongata haholo ho feta boo. Sena se bontsha hore Jehova o entse boko ba rona ka tsela eo bo ka kgonang ho boloka boitsebiso bo bongata ho feta boo re ithutang bona ka dilemo tse 70 kapa tse 80.​—Pes. 90:10.

⁷ Jehova o boetse o re file tabatabelo e matla ya ho phela. Bibele e re Modimo “o kentse ka dipelong tsa [batho] takatso ya ho phela ka ho sa feleng.” (Moek. 3:​11) Leo ke lebaka le leng le etsang hore re nke lefu e le sera. (1 Bakor. 15:​26) Haeba re kula haholo, na re a tela ebe re se re emela ho shwa? Tjhe. Hangata re ya ngakeng kapa re nwa meriana e le hore re tle re fole. Re etsa sohle seo re ka se kgonang hore re se ke ra shwa. Hape ha motho eo re mo ratang a hlokahala, ho sa tsotellehe hore na o moholo kapa o monyenyane re utlwa bohloko haholo, le hona ka nako e telele. (Joh. 11:​32, 33) Ho hlakile hore Mmopi wa rona ya lerato o ne a ke ke a re fa takatso ya ho batla ho phela ka ho sa feleng le bokgoni ba ho tswela pele re ithuta haeba morero wa hae e ne e se hore batho ba phele ka ho sa feleng. Empa ho na le mabaka a mang a mangata a etsang hore re dumele hore re ka kgona ho phela ka ho sa feleng. Hona jwale re tlo buisana ka hore na Jehova o entse eng nakong e fetileng le hore na o etsa eng hona jwale ho bontsha hore morero wa hae wa qalong ha wa fetoha.

 8. Esaia 55:​11 e re ruta eng ka morero wa Jehova bakeng sa rona?

⁸ Le hoja Adama le Eva ba ile ba etsa sebe se ileng sa fella ka hore bana ba bona ba shwe, Jehova ha a ka a fetola morero wa hae. (Bala Esaia 55:​11.) O ntse a rerile hore batho ba tshepahalang ba phele ka ho sa feleng. Re tseba seo ka lebaka la dintho tseo Jehova a ileng a di bua le ho di etsa ho phethahatsa morero wa hae.

 9. Modimo o tshepisitse eng? (Daniele 12:​2, 13)

⁹ Jehova o tshepisitse ho tsosa bafu le ho ba fa monyetla wa ho phela ka ho sa feleng. (Dik. 24:​15; Tite 1:​1, 2) Jobo ya tshepahalang o ne a kgodisehile hore Jehova o labalabela ho tsosa bafu. (Jobo 14:​14, 15) Moprofeta Daniele o ne a tseba hore batho ba tla tsoswa le ho fuwa monyetla wa ho phela ka ho sa feleng. (Pes. 37:​29; bala Daniele 12:​2, 13.) Bajuda ba mehleng ya Jesu le bona ba ne ba tseba hore Jehova a ka fa bahlanka ba hae ba tshepahalang “bophelo bo sa feleng.” (Luka 10:​25; 18:​18) Jesu o ile a bua ka tshepiso ena ka makgetlo a mangata mme yena ka boyena o ile a tsoswa ke Ntate wa hae.​—Mat. 19:​29; 22:​31, 32; Luka 18:​30; Joh. 11:25.

10. Mehlala ya batho ba ileng ba tsoswa nakong e fetileng e bontsha eng? (Sheba setshwantsho.)

¹⁰ Jehova ke Mofani wa bophelo mme o na le matla a ho tsosa bafu. O ile a fa moprofeta Elia matla a ho tsosa mora wa mohlolohadi wa Sarepta. (1 Mar. 17:​21-23) Ha morao Modimo o ile a thusa moprofeta Elisha ho tsosa mora wa mosadi wa Moshuneme. (2 Mar. 4:​18-20, 34-37) Mehlala eo le e meng e bontsha hore Jehova o na le matla a ho tsosa bafu. Ha Jesu a ne a le lefatsheng, o ile a bontsha hore Ntate wa hae o mo file matla ao a ho tsosa bafu. (Joh. 11:​23-25, 43, 44) Hona jwale Jesu o lehodimong mme o “filwe matla hodima ntho e nngwe le e nngwe e lehodimong le lefatsheng.” Ka hoo, a ka kgona ho phethahatsa tshepiso ya hore “bohle ba mabitleng” ba tla tsoswa ba ena le monyetla wa ho phela ka ho sa feleng.​—Mat. 28:​18; Joh. 5:​25-29.

11. Ke jwang lefu la Jesu le re fang monyetla wa ho phela ka ho sa feleng?

¹¹ Ke hobaneng ha Jehova a ile a dumella hore Mora wa hae eo a mo ratang a shwe lefu le bohloko? Jesu o ile a araba potso eo ha a re: “Modimo o ratile lefatshe haholo hoo a ileng a fana ka Mora wa hae ya mong e le hore e mong le e mong ya bontshang hore o dumela ho yena a se ke a timetswa empa a fumane bophelo bo sa feleng.” (Joh. 3:​16) Modimo o ile a etsa hore re be le monyetla wa ho phela ka ho sa feleng ka hore a fane ka Mora wa hae ho re lopolla sebeng. (Mat. 20:​28) Moapostola Pauluse o ile a hlalosa karolo ena ya bohlokwa ya morero wa Modimo ka ho re: “Ka ha lefu le bile teng ka motho, tsoho ya bafu le yona e teng ka motho. Feela jwalo ka ha bohle ba shwa ka lebaka la Adama, bohle ba tla phediswa ka lebaka la Kreste.”​—1 Bakor. 15:​21, 22.

12. Jehova o tla sebedisa Mmuso wa hae jwang hore o phethahatse morero wa hae ka batho?

¹² Jesu o ile a ruta balatedi ba hae ho rapella hore Mmuso wa Modimo o tle le hore thato ya Modimo e etswe lefatsheng. (Mat. 6:​9, 10) Morero o mong wa Modimo ke hore batho ba phele ka ho sa feleng lefatsheng. E le ho finyella morero oo, Jehova o kgethile Mora wa hae hore e be Morena wa Mmuso wa Bomesia. Modimo o ntse a bokella batho ba 144 000 ba tla sebetsa le Jesu ho phetha thato ya hae.​—Tshen. 5:​9, 10.

13. Jehova o etsa eng hona jwale, hona rona re lokela ho etsa eng?

¹³ Hona jwale Jehova o ntse a bokella “bongata bo boholo” ba batho. O ba ruta ho phela tlasa Mmuso wa hae. (Tshen. 7:​9, 10; Jak. 2:8) Le hoja batho ba bangata lefatsheng kajeno ba arotswe ke dintwa le lehloyo, batho bao e leng karolo ya “bongata bo boholo” ba sebetsa ka thata hore ho se ke ha eba le lehloyo hara bona. Ka tsela ya tshwantshetso ba etsa disabole tsa bona mehoma. (Mik. 4:⁠3) Ho ena le ho kenella dintweng tse bolayang batho ba bangata, ba thusa batho ho fumana “bophelo ba sebele” ka ho ba ruta ka Modimo wa nnete le merero ya hae. (1 Tim. 6:​19) Le haeba ba ka ba le mathata a ditjhelete kapa ba hanyetswa ke ba lelapa hobane ba tshehetsa Mmuso wa Modimo, Jehova o tla etsa bonnete ba hore ba na le dintho tseo ba di hlokang. (Mat. 6:​25, 30-33; Luka 18:​29, 30) Dintlha tsena kaofela di a re tiisetsa hore Mmuso wa Modimo ke ntho ya sebele le hore o tla tswela pele o phethahatsa morero wa Jehova.

14, 15. Tshepiso ya Jehova ya ho fedisa lefu ka ho sa feleng e tla phethahala jwang?

¹⁴ Hona jwale Jesu ke Morena wa Mmuso wa Modimo mme o tla phethahatsa ditshepiso tsohle tsa Jehova. (2 Bakor. 1:​20) Ho tloha ka 1914, haesale Jesu a hlola dira tsa hae. (Pes. 110:​1, 2) Haufinyane, Jesu le babusimmoho le yena ba tla qetela tlholo eo mme ba fedise batho bohle ba kgopo.​—Tshen. 6:⁠2.

¹⁵ Nakong ya Puso ya Jesu ya Dilemo Tse Sekete, bafu ba tla tsoswa mme batho bohle ba mamelang Jehova ba tla etswa hore ba phethahale. Ka mora teko ya ho qetela, batho bao Jehova a tla nka ba lokile ba tla fuwa ‘lefatshe e le lefa la bona, ba tla phela ho lona ka ho sa feleng.’ (Pes. 37:​10, 11, 29) Ho thabisang ke hore “sera sa ho qetela e leng lefu se tla fediswa.”​—1 Bakor. 15:26.

16. Lebaka la rona le ka sehloohong la ho sebeletsa Jehova e lokela ho ba lefe?

¹⁶ Sehloohong sena re se re ithutile hore tshepo ya rona ya bophelo bo sa feleng e thehilwe Lentsweng la Modimo. Tshepo eo e ka re thusa hore re dule re tshepahala matsatsing ana a ho qetela a boima. Empa ha re thabise Jehova hobane feela re batla ho phela ka ho sa feleng. Lebaka le ka sehloohong le etsang hore re tshepahalle Jehova le Jesu ke hobane re ba rata haholo. (2 Bakor. 5:​14, 15) Lerato leo ke lona le etsang hore re ba etsise re be re bolelle batho ba bang ka tshepo eo re nang le yona. (Bar. 10:​13-15) Ha re ithuta ho ba batho ba fanang le ba sa itjhebeng bobona, Jehova o tla batla ho ba motswalle wa rona ka ho sa feleng.​—Baheb. 13:16.

17. Re na le boikarabelo bofe? (Matheu 7:​13, 14)

¹⁷ Na re tla ba hara batho ba tla fumana bophelo bo sa feleng? Jehova o re file monyetla oo. Ho ho rona hore re dule tseleng e isang bophelong. (Bala Matheu 7:​13, 14.) Bophelo bo tla ba jwang ha re se re phela ka ho sa feleng? Re tla araba potso eo sehloohong se latelang.