Ho Baheberu

10 Molao ke setshwantsho feela+ sa dintho tse molemo tse tlang ho tla+ empa ha se dintho tseo ka sebele. Molao* oo ha o etse hore batho ba atamelang Modimo ba hloke sebe hobane feela ba etsa mahlabelo selemo le selemo.+ 2 Ha ho ne ho le jwalo, mahlabelo a ka be a emisitswe hobane ba a tlisang* ba ka be ba hlwekisitswe e le hore ba se ke ba hlola ba ikutlwa ba le molato ka lebaka la dibe tsa bona. 3 Empa mahlabelo ao a hopotsa batho dibe tsa bona selemo le selemo.+ 4 Etswe ho ke ke ha kgoneha hore madi a dipoho le a dipodi a tlose dibe.

5 Ha Kreste a tla lefatsheng o ile a re ho Modimo: “‘O ne o sa batle nyehelo le sehlabelo empa o ile wa ntokisetsa mmele. 6 Ha o a ka wa amohela dinyehelo tsa setjheso le dinyehelo tsa sebe.’+ 7 Ke ile ka re: ‘Bona, ke tlile. (Ho ngotswe ka nna moqolong.*) Ke tletse ho etsa thato ya hao Modimo wa ka.’”+ 8 Ka mora hore a re: “Ha o a ka wa batla kapa wa amohela mahlabelo, dinyehelo, dinyehelo tsa setjheso le dinyehelo tsa sebe” e leng mahlabelo a nyehelwang ho ya ka Molao, 9 o ile a re: “Ke tletse ho etsa thato ya hao.”+ O fedisa tsa pele e le hore a ka tiisa sa bobedi. 10 Ka “thato” eo ya Modimo,+ re halaleditswe ka sehlabelo sa mmele wa Jesu Kreste se nyehetsweng hanngwe ebile e le la ho qetela.+

11 Moprista e mong le e mong o a ema e le hore a etse mosebetsi wa hae o halalelang letsatsi le letsatsi+ le hore a etse mahlabelo kgafetsa+ le hoja mahlabelo ao a sa kgone ho tlosa dibe ka ho feletseng.+ 12 Empa Kreste yena o ile a nyehela sehlabelo se le seng e le hore a ka re lopolla sebeng ka ho sa feleng yaba o dula ka letsohong le letona la Modimo.+ 13 Ho tloha ka nako eo, o ne a se a emetse hore dira tsa hae di behwe tlasa maoto a hae.+ 14 Ka sehlabelo se le seng feela, o entse hore bohle ba ntseng ba halaletswa ba phethahale+ ka ho sa feleng. 15 Moya o halalelang le wona o a re pakela hore taba eo ke nnete ka ha o re: 16 “‘Selekane seo ke tla se etsa le bona ka mora matsatsi ao ke sena: Ke tla kenya molao wa ka dipelong tsa bona ke be ke o ngole dikelellong tsa bona,’ ke Jehova ya tjhong.”*+ 17 Ka mora moo o re: “Ha ke sa tla hlola ke hopola dibe tsa bona le diketso tsa bona tse mpe.”+ 18 Ha Modimo a tshwarela dibe, ha ho sa hlokahala nyehelo bakeng sa sebe.

19 Bana beso, ka lebaka la madi a Jesu, re na le sebete sa ho kena sebakeng se halalelang+ 20 hobane Jesu o re buletse tsela e yang moo. Tsela eo ke tsela e ntjha e lebisang bophelong. O re buletse yona ka ho fetela ka nqane ho kgaretene+ e tshwantshetsang nama ya hae. 21 Hape re na le moprista e moholo ya okametseng ntlo ya Modimo.+ 22 Ka hoo, a re atameleng Modimo ka dipelo tsohle ebile re ena le tumelo e matla hobane dipelo tsa rona di hlwekisitswe, matswalo a rona ha a sa re tshwenya+ le mmele ya rona e hlatswitswe ka metsi a hlwekileng.+ 23 A re tsweleng pele ho bolella batho bohle ka tshepo eo re nang le yona re sa tsilatsile+ hobane ya re tshepisitseng o a tshepahala. 24 A re tsotellaneng* e le hore re ka susumeletsana ho ba lerato le ho etsa dintho tse ntle.+ 25 Re se ke ra tlohela ho bokana mmoho+ jwalo ka ha ba bang ba tlwaetse empa re kgothatsane.+ Re etse dintho tsena le ho feta hobane re a bona hore letsatsi le ntse le atamela.+

26 Haeba re tlwaela ho etsa sebe ka boomo ka mora hore re fumane tsebo ya nnete,+ ha ho sa na sehlabelo se seng se tla nyehelwa bakeng sa dibe tsa rona.+ 27 Ho tla be ho se ho setse feela hore re emele kahlolo e tshosang le bohale bo tukang ba Modimo bo tla bolaya batho ba mo hanyetsang.+ 28 Motho ya sa mameleng Molao wa Moshe o ne a bolawa a sa hauhelwe ka mora hore batho ba babedi kapa ba bararo ba fane ka bopaki.+ 29 Jwale motho ya furallang Mora wa Modimo ka ho tella,* ya kgellang fatshe madi a bohlokwa a selekane+ ao a ileng a halaletswa ka ona ebile a rohakile moya wa Modimo ya re bontshang mosa,* yena le nahana hore o tla fumana kotlo e boima hakae?+ 30 Re a tseba hore Modimo o ile a re: “Phetetso ke ya ka, ke tla fana ka kotlo.” Hape o ile a re: “Jehova* o tla ahlola batho ba hae.”+ 31 Ke ntho e tshosang hore motho a otlwe ke Modimo ya phelang.

32 Le se ke la lebala matsatsi a pele ao ka ona le ileng la mamella mathata a mangata ha le ntse le lwana ntwa e boima ka mora hore Modimo a le kgantshetse lesedi.+ 33 Ka dinako tse ding, le ne le tlotlollwa le ho hloriswa ka pela batho mme ka dinako tse ding le thusa* ba hlahelwang ke dintho tse jwalo. 34 Le ile la utlwela ba teronkong bohloko. Ha le a ka la fellwa ke thabo ha le nkelwa dintho tsa lona+ hobane le ne le tseba hore le na le letlotlo le molemo ho feta, le sa senyeheng.+

35 Le se ke la kgaotsa ho ba sebete hobane le tla putswa haholo.+ 36 Le hloka ho ba le mamello+ e le hore ha le se le entse thato ya Modimo le ka fumana seo Modimo a se tshepisitseng. 37 Ho setse “nako e sa fediseng pelo,”+ “ya tlang o tla fihla mme a ke ke a dieha.”+ 38 “Empa mohlanka wa ka ya lokileng o tla phela hobane a ena le tumelo”+ feela “ha a ka tjhetjha, nke ke ka thaba.”+ 39 Ha re batho ba tjhetjhelang morao ebe re a fediswa+ empa re batho ba nang le tumelo e le hore re pholose bophelo ba rona.