Ho Baheberu

11 Tumelo ke ho ba le tshepo le ho kgodiseha hore dintho tseo o di lebeletseng di tla etsahala.+ Hape ke ho ba le bopaki ba hore dintho tseo re sa di boneng ka nnete di teng. 2 Ka ha baholoholo ba rona ba ne ba ena le tumelo, Modimo o ile a ba fa bopaki ba hore o a ba amohela.

3 Tumelo e re thusa ho lemoha hore dintho tsohle* di ile tsa hlophiswa ka taelo ya Modimo. Ka hoo, dintho tseo re di bonang di hlahile dinthong tseo re sa di boneng.

4 Ka ha Abele o ne a ena le tumelo, o ile a etsetsa Modimo sehlabelo sa boleng bo phahameng ho feta sa Kaine.+ Ka lebaka la tumelo eo, o ile a fuwa bopaki ba hore o lokile hobane Modimo o ile a amohela dimpho tsa hae.+ Le hoja a shwele, tumelo ya hae e ntse e bua+ le rona.

5 Ka ha Enoke+ o ne a ena le tumelo, o ile a falliswa+ e le hore a se ke a utlwa bohloko ha a shwa. Ha a ka a hlola a fumanwa hobane Modimo o ne a mo fallisitse. Pele a falliswa o ile a fuwa bopaki ba hore o thabisitse Modimo. 6 Re ke ke ra kgona ho kgahlisa Modimo haeba re se na tumelo ka ha ya atamelang Modimo o lokela ho dumela hore o teng le hore o putsa ba mo batlang e le ka nnete.+

7 Ka ha Noe o ne a ena le tumelo,+ ka mora hore Modimo a mo bolelle dintho tse tlo etsahala tse neng di eso ka di bonwa,+ o ile a bontsha hore o hlompha Modimo ka hore a hahe areka+ e le hore a pholose yena le ba lelapa la hae. Ka tumelo ya hae o ile a bontsha hore lefatshe le ne le tshwanela ho fediswa+ mme ha thwe o lokile ka lebaka la tumelo.

8 Ka ha Abrahama o ne a ena le tumelo,+ ha a bitswa, o ile a mamela ka hore a ye sebakeng seo a neng a tlo se fuwa e le lefa. O ile a tsamaya le hoja a ne a sa tsebe hore na o ya hokae.+ 9 Ka ha o ne a ena le tumelo, o ile a dula e le moditjhaba naheng eo a neng a e tshepisitswe.+ O ne a dula ditenteng+ le Isaka le Jakobo, bao le bona Modimo a neng a ba tshepisitse naha eo.+ 10 O ne a emetse motse o nang le metheo ya nnete, oo Modimo a o radileng le ho o haha.+

11 Ka ha Sara le yena o ne a ena le tumelo, o ile a fuwa matla a ho ba le bana le hoja a ne a se a fetile dilemo tsa ho ba le bana+ hobane o ile a nka hore ya neng a tshepisitse o a tshepahala. 12 Ka lebaka leo, monna eo ho neng ho nkwa hore a ke ke a kgona ho ba le bana,*+ o ile a ba le bana ba bangata+ jwalo ka dinaledi tsa lehodimo le ba se nang palo jwalo ka lehlabathe la lewatle.+

13 Kaofela ha bona ba ile ba shwa ba ntse ba ena le tumelo. Le hoja ditshepiso di sa ka tsa phethahala ba ntse ba phela,+ ba ile ba di bonela hole,+ ba di thabela mme ba bolela phatlalatsa hore e ne e le baditjhaba le baahi ba nakwana naheng eo ba neng ba dula ho yona. 14 Ba buang jwalo ba bontsha hantle hore ka nnete ba batla sebaka seo e leng sa bona. 15 Hoja ba ile ba nna ba nahana ka naha eo ba e siileng,+ ba ka be ba fumane monyetla wa ho kgutla. 16 Empa jwale ba labalabela sebaka se molemo le ho feta e leng lehodimo. Ka hoo, Modimo ha a swabele ho bitswa Modimo wa bona+ etswe o ba lokiseditse motse.+

17 Ha Abrahama a ne a behwa tekong,+ o ile a bontsha hore o na le tumelo ka hore ebe o ile a batla a nyehela Isaka. Monna enwa ya ileng a amohela ditshepiso a thabile o ile a leka ho nyehela mora wa hae ya mong.+ 18 O ile a etsa jwalo le hoja ho ne ho itswe ho yena: “O tla ba le ditloholo* ka Isaka.”+ 19 O ne a dumela hore Modimo a ka tsosa mora wa hae bafung. Ka hoo, o ile a mo amohela jwalo ka ha eka o qeta ho tsoha bafung e leng ntho e neng e bontsha hore na ho tla etsahalang ka moso.+

20 Isaka o ile a bontsha hore o na le tumelo ka hore ebe o ile a hlohonolofatsa Jakobo+ le Esau,+ a ba bolella dintho tse tla etsahala nakong e tlang.

21 Ka ha Jakobo o ne a ena le tumelo, ha a le haufi le ho shwa,+ o ile a hlohonolofatsa bara ba Josefa+ mme a rapela a ikokotletse ka lere la hae.+

22 Josefa o ile a bontsha hore o na le tumelo ka hore ebe ha a le haufi le ho shwa, o ile a bua ka hore Baiseraele ba tla tswa Egepeta mme a fana ka taelo ya hore na ho etsweng ka masapo a hae.+

23 Ka mora hore Moshe a hlahe, batswadi ba hae ba ile ba bontsha hore ba na le tumelo ka hore ba mo pate ka dikgwedi tse tharo+ hobane ba ile ba bona hore o motle.+ Ha ba a ka ba tshaba ho tlola taelo ya morena.+ 24 Ha Moshe a se a hodile, o ile a bontsha hore o na le tumelo+ ka hore a hane ho bitswa mora wa moradi wa Faro.+ 25 O ile a kgetha ho tshwarwa hampe ha mmoho le setjhaba sa Modimo ho ena le hore a thabele ho etsa sebe ka nakwana. 26 O ile a etsa jwalo hobane a nka hore ho tlotlollwa ka lebaka la Kreste ho bohlokwa haholo ho feta maruo a Egepeta ka ha o ne a letetse moputso ka pelo yohle. 27 Ka ha o ne a ena le tumelo, o ile a tloha Egepeta+ eseng hobane a tshaba bohale ba morena.+ O ile a tswela pele a mameletse jwalo ka ha eka o bona Modimo eo ho seng motho ya ka mo bonang.+ 28 O ile a bontsha hore o na le tumelo ka hore a keteke Paseka le ho fafatsa dikosene tsa menyako ka madi e le hore lengeloi la Modimo le se ke la bolaya matsibolo a batho ba Modimo.+

29 Ka ha batho ba Modimo ba ne ba ena le tumelo, ba ile ba feta hara Lewatle le Lefubedu jwalo ka ha eka ba feta moo ho ommeng+ empa ha Baegepeta bona ba leka ho etsa jwalo, metsi a ile a ba kgama.+

30 Ka ha Baiseraele ba ne ba ena le tumelo, marako a Jeriko a ile a wela fatshe ka mora hore ba a potapote ka matsatsi a supileng.+ 31 Ka ha Rahaba wa letekatse o ne a ena le tumelo, ha a ka a bolawa le batho ba sa mameleng hobane o ile a amohela dihlwela ka kgotso.+

32 Na ho hlokahala hore ke nne ke tswele pele? Ke tla fellwa ke nako haeba nka bua ka Gideone,+ Barake,+ Samsone,+ Jafeta,+ Davida+ ha mmoho le Samuele+ le baprofeta ba bang. 33 Ka ha ba ne ba ena le tumelo, ba ile ba hlola marena,+ ba etsa hore ho be le toka, ba etsetswa ditshepiso,+ ba kwala melomo ya ditau,+ 34 ba tima mollo o bohale,+ ba phonyoha sabole,+ ba fuwa matla ha ba ne ba fokola,+ ba eba matla ha ba le ntweng+ hape ba qhalakanya mabotho a ba direng.+ 35 Basadi ba ile ba amohela ba malapa a bona ba neng ba tsositswe bafung.+ Banna ba bang ba tshepahalang bona ba ile ba hlokofatswa empa ha ba a ka ba kgaotsa ho tshepahalla Modimo hobane feela ba shebile ho lokollwa. Ba ile ba mamella e le hore ba tle ba tsoswe bafung ka tsela e molemo ho feta eo ba bang ba tsositsweng ka yona. 36 Ba bang ba ile ba lekwa ka ho songwa, ho shapuwa, ho faswa ka diketane+ le ho lahlelwa diteronkong.+ 37 Ba ile ba tlepetswa ka majwe,+ ba lekwa, ba sakgwa, ba bolawa ka sabole,+ ba tsamaya ba apere makoko a dinku le a dipodi+ ha ka nako e tshwanang ba ne ba hloka, ba le matshwenyehong,+ ba tshwarwa hampe+ 38 mme lefatshe le ne le sa ba tshwanele. Ba ne ba dula mahwatateng, dithabeng, mahaheng+ le maphaong.

39 Le hoja kaofela ha bona ba ile ba fuwa bopaki ba hore ba thabisitse Modimo ka lebaka la tumelo ya bona, ha ba a ka ba bona ha tshepiso e phethahala 40 hobane Modimo o ne a nahanne ho re fa ntho e molemo le ho feta+ e le hore ba se ke ba tloswa sebe pele ho rona.