Ho Baheberu

12 Ka ha re na le sehlopha se seholo hakaalo sa dipaki se re potapotileng, a re lahleng dintho tsohle tse ka re imelang le sebe se re tshwasang ha bonolo+ mme re mathe ka mamello peisong e ka pela rona.+ 2 Re shebe ka hloko Moetapele e Moholo wa tumelo ya rona e leng Jesu+ Kreste, ya re thusang ho ba le tumelo e phethahetseng. O ile a mamella ha a ne a bolaelwa palong* ebile ha a ka a swabela ho tlotlollwa hobane o ne a tseba hore o tla thaba ka moso. Hona jwale o dutse ka letsohong le letona la terone ya Modimo.+ 3 Le nahanisise ka ya mameletseng ha baetsadibe ba ne ba bua dintho tse hlabang+ empa di sa ba thuse ka letho. Le nne le etse jwalo e le hore le se ke la kgathala la ba la fellwa ke matla.+

4 Ha le ntse le lwantsha sebe, ha le eso lwane ho ya boholeng ba hore le shwe. 5 Hape le lebetse keletso eo Modimo a le fileng yona jwalo ka ha ntate a bua le bara ba hae, e reng: “Mora wa ka, o se ke wa kgella tayo ya Jehova* fatshe kapa wa fellwa ke matla ha o kgalemelwa ke yena. 6 Jehova* o kgalemela bao a ba ratang, o shapa e mong le e mong eo a mo nkang e le mora.”+

7 Le lokela ho mamella hobane ena ke tsela eo le kgalemelwang* ka yona. Modimo o le tshwara jwalo ka bara ba hae.+ Etswe ke mora ofe eo ntate wa hae a sa mo kgalemeleng?+ 8 Haeba Modimo ha a le kgalemela ka tsela eo a kgalemetseng ba bang ka yona, ha le bana ba hae empa le bana ba motho e mong. 9 Ho feta moo, bontate ba rona ba ne ba re kgalemela mme re ne re ba hlompha. Na jwale ha re a lokela ho ikokobeletsa Ntate wa rona le ho feta ka ha ke yena ya tataisang bophelo ba rona ka matla a hae e le hore re phele?+ 10 Bontate ba rona ba re kgalemetse ka nakwana ho ya ka seo ba neng ba bona se lokile empa kgalemelo e tswang ho Modimo yona e re tswela molemo e le hore re ka halalela jwalo ka yena.+ 11 Ke nnete hore kgalemelo ha e monate, e bohloko. Le ha ho le jwalo, haeba re e amohela, re tla phela ka tsela e lokileng mme re be le kgotso.

12 Ka hoo, le matlafatse matsoho a kgathetseng le mangole a kgwehlang.+ 13 Le nne le tsamaye tseleng e nepahetseng+ e le hore leoto le hlotsang le se ke la utlwa bohloko le ho feta empa le fole. 14 Lwanelang hore le be le kgotso le batho ba bang,+ le phele bophelo bo halalelang*+ hobane motho ya sa bo pheleng a ke ke a bona Morena. 15 Le hlokomele hore ho se ke ha eba le ya hlolehang ho fumana mosa* wa Modimo e le hore ho se ke ha eba le motso o tjhefo o ka hlahang hara lona yaba o baka dikgathatso le ho silafatsa ba bangata.+ 16 Hlokomelang hore ho se ke ha eba le mang kapa mang hara lona ya etsang boitshwaro bo bobe bo amanang le thobalano* kapa ya sa ananeleng dintho tsa Modimo jwalo ka Esau, ya ileng a fana ka ditokelo tseo a nang le tsona jwalo ka letsibolo hore feela a fumane sejo se le seng.+ 17 Le a tseba hore ha morao ha a ne a batla ho fuwa tlhohonolofatso, ha a ka a e fuwa. Le hoja a ile a leka ka matla ho fetola maikutlo a ntate wa hae a bile a lla,+ ho ne ho se ho se na thuso.

18 Ha le a tla thabeng eo le ka kgonang ho e tshwara,+ e tukang,+ eo ho yona ho nang le leru le letsho, sefefo se matla, lefifi le letsholetsho,+ 19 modumo o lerata wa terompeta+ le modumo wa mantswe,+ oo e itseng ha batho ba o utlwa ba ileng ba kopa ho se mamele ho ya pele.+ 20 Ba ne ba tshoswa ke taelo e reng: “Esita le phoofolo e ka thetsang thaba eo, e tlepetswe ka majwe.”+ 21 Pono eo e ne e tshosa hoo Moshe a ileng a re: “Ke tshohile ebile ke a thothomela.”+ 22 Empa le tlile Thabeng ya Sione+ le motseng wa Modimo ya phelang, Jerusalema ya lehodimo+ le ho mangeloi a dikete tse mashome 23 a bokaneng.+ Hape le tlile ka pela phutheho ya matsibolo a ngodisitsweng mahodimong le ho Modimo Moahlodi wa bohle+ le ho ba lokileng ba phelang+ tumellanong le matla a halalelang, ba entsweng hore ba phethahale.+ 24 Le tlile ho Jesu, mmuelli+ wa selekane se setjha+ le ka pela madi ao re fafaditsweng ka ona a molemo ho feta a Abele.+

25 Le se ke la hana ho mamela* ya buang a le lehodimong. Nakong e fetileng, batho ba ile ba hana ho mamela ya neng a fana ka ditaelo tse halalelang lefatsheng yaba ba a otlwa. Le rona re ke ke ra phonyoha kotlo haeba re hana ho mamela ya buang a le mahodimong.+ 26 Ka nako eo, lentswe la hae le ile la sisinya lefatshe+ empa hona jwale o tshepisitse a re: “Ke tla boela ke sisinye mahodimo le lefatshe.”+ 27 Polelwana e reng “ke tla boela” e bontsha hore dintho tse sisintsweng e leng tse sa etswang ke Modimo di tla tloswa e le hore dintho tse sa sisinngwang di ka sala. 28 Ka ha re tla amohela Mmuso o ke keng wa sisinngwa, a re duleng re tshepahala e le hore Modimo a tswele pele ho re bontsha mosa hobane ka lebaka la wona re tla kgona ho mo sebeletsa ka tlhompho e tebileng. 29 Etswe Modimo wa rona o tshwana le mollo o fedisang.+