Jesu ke Mang?

Jesu ke e mong wa batho ba tsebahalang ka ho fetisisa historing. Le hoja batho ba bangata ba tseba lebitso la hae, ha ba tsebe hakaalo ka yena ebile ba na le maikutlo a fapaneng ka hore na ha e le hantle ke mang. Bibele e reng ka Jesu?

1. Jesu ke mang?

Jesu ke lengeloi le matla mme o phela lehodimong. Jehova Modimo o mo bopile pele a ka bopa dintho tsohle. Ka lebaka leo, o bitswa “letsibolo la popo yohle.” (Bakolose 1:15) Bibele e re Jesu ke mora “ya tswetsweng a nnotshi” wa Modimo hobane ke yena feela eo Jehova a mo bopileng ka ho toba. (Johanne 3:16) Jesu o sebeditse haufi le Ntate wa hae Jehova, a mo thusa ho bopa dintho tsohle. (Bala Liproverbia 8:30.) Jesu o ntse a na le kamano e ikgethang le Jehova. O sebetsa ka botshepehi e le mmuelli wa Modimo, e le “Lentswe”, ho fetisa melaetsa le ditaelo tsa Hae.​—Johanne 1:14.

2. Ke hobaneng ha Jesu a ile a tla lefatsheng?

Dilemo tse ka hodimonyana ho 2 000 tse fetileng, Jehova o ile a etsa mohlolo a sebedisa moya o halalelang. O ile a tlosa bophelo ba Jesu lehodimong a bo kenya popelong ya morwetsana ya bitswang Maria. Ka hoo, Jesu o ile a tswalwa e le motho. (Bala Luka 1:34, 35.) Jehova o rometse Jesu lefatsheng hore e tlo ba Mesia ya tshepisitsweng kapa Kreste le hore a tlo pholosa batho.a Boprofeta bohle bo buang ka Mesia bo ile ba phethahala ka Jesu mme sena se ile sa thusa batho ho tseba hore ke “Kreste, Mora wa Modimo ya phelang.”​—Matheu 16:16.

3. Jesu o hokae hona jwale?

Ka mora hore Jesu a shwe e le motho wa nama, Modimo o ile a mo tsosa e se e le lengeloi mme a kgutlela lehodimong. Ha a fihla, “Modimo . . . o ile a mo phahamisetsa boemong bo phahameng.” (Bafilipi 2:9) Hona jwale, Jesu ke lengeloi le matla haholo mme ke Jehova feela ya matla ho mo feta.

4. Jesu ha se Modimo ya Matla Ohle

Bibele e ruta hore le hoja Jesu e le lengeloi le matla lehodimong, o mamela ntate wa hae Jehova Modimo. Ke hobaneng ha re tjho jwalo? Bapala VIDEO ho bona hore na Bibele e re Jesu o fapana jwang le Modimo ya Matla Ohle.

VIDEO: Na Jesu Kreste ke Modimo? (3:22)

Mangolo a latelang a re thusa ho utlwisisa hore na Jehova le Jesu ba amana jwang. Bala mangolo ana ebe le buisana ka dipotso tse latelang:

Bala Luka 1:30-32.

• Lengeloi le ile la re Jesu o amana jwang le Jehova Modimo “Ya Phahameng ka ho Fetisisa”?

Bala Matheu 3:16, 17.

• Ha Jesu a kolobetswa, lentswe le ileng la hlaha lehodimong le ile la reng?

• O nahana lentswe leo e ne e le la mang?

Bala Johanne 14:28.

• Ke mang e moholo ho e mong le ya nang le matla a fetang a e mong? Na ke mora kapa ke ntate?

• Jesu o ile a re Jehova ke Ntate wa hae. See se re rutang?

Bala Johanne 12:49.

• Na Jesu o nahana hore yena le Ntate wa hae ke motho a le mong? Wena o nahanang ka bona?

5. Bopaki bo bontshitseng hore Jesu ke Mesia

VIDEO: Jesu o Phethahatsa Boprofeta (3:03)

Bala boprofeta bona ba Bibele ebe le buisana ka dipotso tse latelang:

Bala Mikea 5:2 e le hore o bone hore na Mesia o ne a lokela ho hlahela hokae.b

• Na ha Jesu a tswalwa boprofeta boo bo ile ba phethahala? ​—Matheu 2:1.

Bala Pesaleme ya 34:20 le Zakaria 12:10 ho bona dintlha tse profetilweng ka lefu la Mesia.

• Na boprofeta boo bo ile ba phethahala?​—Johanne 19:33-37.

• Na o nahana hore Jesu o ne a ka kgona ho etsa hore boprofeta boo bo phethahale?

• See se o tiisetsa eng ka Jesu?

KAKARETSO

Jesu ke lengeloi le matla. Ke mora wa Modimo ebile ke Mesia.

Re Ithutileng?

• Ke hobaneng ha Jesu a bitswa “letsibolo la popo yohle”?

• Jesu o ne a etsang pele a tla lefatsheng?

• Re tseba jwang hore Jesu ke Mesia?

BATLA

Ithute haholwanyane ka hore na re tseba jwang hore Jesu ke Mesia.

“Na Boprofeta bo Buang ka Mesia bo Paka Hore Jesu e ne e le Mesia?” (Sehlooho se websaeteng)

Ithute hore na ehlile Bibele e re Modimo o bile le Jesu ka tsela eo batho ba tswalang bana ka yona.

“Ke Hobaneng ha Jesu a Bitswa Mora wa Modimo?” (Sehlooho se websaeteng)

Ithute hore na ke hobaneng ha thuto ya boraro bo teroneng e sa tswe ka Bibeleng.

“Na Jesu ke Modimo?” (Molula-Qhooa, April 1, 2009)

Bala hore na bophelo ba mme e mong bo ile ba fetoha jwang ka mora hore a ithute hore na Bibele e ruta eng ka Jesu.

“Mosadi wa Mojuda o Hlalosa Lebaka le Entseng Hore a Boele a Hlahlobe Tumelo ya Hae” (Tsoha!, May 2013)