Jesu fuwa tlotla ha a kena Jerusalema a palame esele

Na Boprofeta bo Buang ka Mesia bo Paka Hore Jesu e ne e le Mesia?

Karabo ya Bibele

E ho jwalo. Ha Jesu a ntse a le lefatsheng o ile a phethahatsa boprofeta bo bongata bo buang ka “Mesia Moetapele,” le eo e neng e tla ba “Mopholosi wa lefatshe.” (Daniele 9:25; 1 Johanne 4:14) Esita le ka mora lefu la hae, Jesu o ile a tswela pele ho phethahatsa boprofeta bo buang ka Mesia.—Pesaleme ya 110:1; Liketso 2:34-36.

Lentswe “Mesia” le bolelang?

Lentswe la Seheberu Ma·shiʹach (Mesia) le la Segerike Khri·stos (Kreste) ka bobedi a bolela “Motlotsuwa.” Ka hoo, “Jesu Kreste” e bolela “Jesu Motlotsuwa,” kapa “Jesu Mesia.”

Mehleng ya ha ho ne ho ngolwa Bibele, motho o ne a tlotswa hlooho ka oli ha a ne a kgethelwa mosebetsi o itseng wa bolaodi. (Levitike 8:12; 1 Samuele 16:13) Modimo o ile a kgetha Jesu hore e be Mesia. Sena se bolela hore o fuwe matla a maholo. (Liketso 2:36) Jesu ha a ka a tlotswa ka oli empa Modimo o ile a mo tlotsa ka moya o halalelang.—Matheu 3:16.

Na boprofeta bo buang ka Mesia bo ne bo ka phethahatswa ke batho ba bangata?

Tjhe. Jwalo ka ha kgatiso ya monwana wa motho e mong le e mong e ikgethile, le boprofeta ba Bibele bo buang ka Mesia kapa Kreste, bo phethahetse ho motho a le mong. Empa Bibele e ile ya lemosa hore ho tla hlaha “boKreste ba bohata le baprofeta ba bohata mme ba tla etsa dipontsho le dimakatso tse kgolo e le hore ba kgelose esita le bakgethwa, haeba ho kgoneha.”—Matheu 24:24.

Na re ka lebella hore Mesia o ntse a tla tla?

Tjhe. Bibele e ile ya bolela esale pele hore Mesia o ne a tla tswa lelokong la Morena Davida wa Iseraele. (Pesaleme ya 89:3, 4) Le ha ho le jwalo, ditlaleho tsa maloko tsa Bajuda, tse neng di ka paka hore motho ke setloholo sa Davida, di ile tsa lahleha. E ka nna yaba sena se etsahetse ha Baroma ba ne ba timetsa Jerusalema ka selemo sa 70.a Ho tloha ka nako eo, ho ne ke ke ha kgoneha hore motho a pake hore o tswa lelokong la borena la Davida. Empa ha Jesu a ntse a le lefatsheng, ditlaleho tseo di ne di ntse di le teng mme dira tsa hae di ne di sitwa ho hanyetsa hore o tsa lelokong la Davida.—Matheu 22:41-46.

Boprofeta bo buang ka Mesia bo hlaha ka makgetlo a makae ka Bibeleng?

Re ke ke ra bolela ka ho toba hore na ho profetilwe ka Mesia ka makgetlo a makae. Ka mohlala, batho ba ka bala boprofeta ka mekgwa e fapaneng, le ditemaneng tseo ho hlakileng hore di bua ka Mesia. Lengolong la Esaia 53:2-7, ho buuwe ka dintlha tse mmalwa tse buang ka boprofeta ba Mesia. Batho ba bang ba nka ditemana tsena e le boprofeta bo le bong, ha ba bang bona ba ka kgetha ho qolla ntlha ka nngwe e le boprofeta bo ikemetseng.

Bo bong ba boprofeta bo buang ka Mesia boo Jesu a bo phethahaditseng

Boprofeta	Bo hlaha ho	Bo phethahala ho
E ne e tla ba setloholo sa Abrahama	Genese 22:17, 18	Matheu 1:1
E ne e tla ba setloholo sa Isaka mora wa Abrahama	Genese 17:19	Matheu 1:2
O ne a tla hlaha lelokong la Juda la Iseraele	Genese 49:10	Matheu 1:1, 3
O ne a tla hlaha lelokong la borena la Morena Davida	Esaia 9:7	Matheu 1:1
O ne a tla tswalwa ke morwetsana	Esaia 7:14	Matheu 1:18, 22, 23
O ne a tla hlahela Bethlehema	Mikea 5:2	Matheu 2:1, 5, 6
O ne a tla bitswa Emanueleb	Esaia 7:14	Matheu 1:21-23
O ne a tla hlahela lelapeng le futsanehileng	Esaia 53:2	Luka 2:7
Masea a ne a tla bolawa ka mora hore Mesia a tswalwe	Jeremia 31:15	Matheu 2:16-18
O ne a tla bitswa a le Egepeta	Hosea 11:1	Matheu 2:13-15
O ne a tla bitswa Monazarethac	Esaia 11:1	Matheu 2:23
O ne a tla etellwa pele ke lenqosa	Malakia 3:1	Matheu 11:7-10
O ne a tla tlotswa hore e be Mesia ka selemo sa 29d	Daniele 9:25	Matheu 3:13-17
Modimo o ne a tla phatlalatsa hore ke Mora wa Hae	Pesaleme ya 2:7	Liketso 13:33, 34
O ne a tla tjhesehela ntlo ya Modimo	Pesaleme ya 69:9	Johanne 2:13-17
O ne a tla bolela ditaba tse monate	Esaia 61:1	Luka 4:16-21
Mosebetsi oo neng a tla o etsa Galilea o ne o tla kgantsha lesedi	Esaia 9:1, 2	Matheu 4:13-16
O ne a tla etsa mehlolo jwalo ka Moshe	Deuteronoma 18:15	Liketso 2:22
O ne a tla bua menahano ya Modimo jwalo ka Moshe	Deuteronoma 18:18, 19	Johanne 12:49
O ne a tla phekolo ba bangata	Esaia 53:4	Matheu 8:16, 17
O ne a ke ke a ipitsetsa mahlo a batho	Esaia 42:2	Matheu 12:17, 19
O ne a tla ba le kutlwelo bohloko ho batho ba nang le mathata	Esaia 42:3	Matheu 12:9-20; Mareka 6:34
O ne a tla bontsha hore Modimo o na le toka	Esaia 42:1, 4	Matheu 12:17-20
E ne e tla ba moeletsi ya tsotehang	Esaia 9:6, 7	Johanne 6:68
O ne a tla tsebisa batho lebitso la Jehova	Pesaleme ya 22:22	Johanne 17:6
O ne a tla ruta ka dipapiso	Pesaleme ya 78:2	Matheu 13:34, 35
E ne e tla ba moetapele	Daniele 9:25	Matheu 23:10
Ba bangata ba ne ba ke ke ba dumela ho yena	Esaia 53:1	Johanne 12:37, 38
E tla ba lejwe le kgopang	Esaia 8:14, 15	Matheu 21:42-44
Batho ba ne ba ke ke ba mo amohela	Pesaleme ya 118:22, 23	Liketso 4:10, 11
O ne a tla hlouwa ntle ho le lebaka	Pesaleme ya 69:4	Johanne 15:24, 25
O ne a tla roriswa ha a kena Jerusalema a palame esele	Zakaria 9:9	Matheu 21:4-9
O ne a tla roriswa ke bana	Pesaleme ya 8:2	Matheu 21:15, 16
O ne a tla tla ka lebitso la Jehova	Pesaleme ya 118:26	Johanne 12:12, 13
O ne a tla ekwa ke motswalle wa hae	Pesaleme ya 41:9	Johanne 13:18
Ya neng a tla mo eka o ne tla fuwa dikotwana tse 30 tsa sileverae	Zakaria 11:12, 13	Matheu 26:14-16; 27:3-10
Metswalle ya hae e ne e tla mo lahla kgerehlwa	Zakaria 13:7	Matheu 26:31, 56
Dipaki tsa bohata di ne di tla fana ka bopaki kgahlanong le yena	Pesaleme ya 35:11	Matheu 26:59-61
O ne a tla thola ha a qoswa	Esaia 53:7	Matheu 27:12-14
O ne a tla tshwelwa ka mathe	Esaia 50:6	Matheu 26:67; 27:27, 30
O ne a tla otlwa hloohong	Mikea 5:1	Mareka 15:19
Ba ne ba tla mo shapa	Esaia 50:6	Johanne 19:1
O ne a ke ke a itwanela ha a otlwa	Esaia 50:6	Johanne 18:22, 23
Baetapele ba mmuso ba ne ba tla mo rerela bolotsana	Pesaleme ya 2:2	Luka 23:10-12
O ne a tla kokotelwa maoto le matsoho palong	Pesaleme ya 22:16	Matheu 27:35; Johanne 20:25
Batho ba ne ba tla lahla lotho (betjha) bakeng sa diaparo tsa hae	Pesaleme ya 22:18	Johanne 19:23, 24
O ne a tla balellwa hara baetsadibe	Esaia 53:12	Matheu 27:38
O ne a tla songwa a be a rohakwe	Pesaleme ya 22:7, 8	Matheu 27:39-43
O ne a tla utlwa bohloko molemong wa baetsadibe	Esaia 53:5, 6	1 Petrose 2:23-25
Ho ne ho tla bonahala eka Modimo o mo lahlile	Pesaleme ya 22:1	Mareka 15:34
O ne a tla fuwa asene le nyooko hore a di nwe	Pesaleme ya 69:21	Matheu 27:34
O ne a tla nyorwa pele a shwa	Pesaleme ya 22:15	Johanne 19:28, 29
O ne a tla beha bophelo ba hae ho Modimo	Pesaleme ya 31:5	Luka 23:46
O ne a tla tela bophelo ba hae	Esaia 53:12	Mareka 15:37
O ne a tla fana ka sehlabelo e le hore sebe se ka fela	Esaia 53:12	Matheu 20:28
Masapo a hae a ne a ke ke a rojwa	Pesaleme ya 34:20	Johanne 19:31-33, 36
O ne a tla hlajwa	Zakaria 12:10	Johanne 19:33-35, 37
O ne a tla patwa le barui	Esaia 53:9	Matheu 27:57-60
O ne a tla tsoswa bafung	Pesaleme ya 16:10	Liketso 2:29-31
Moeki wa hae o ne a tla nkelwa sebaka ke motho e mong	Pesaleme ya 109:8	Liketso 1:15-20
O ne a tla dula ka letsohong le letona la Modimo	Pesaleme ya 110:1	Liketso 2:34-36

a Buka ya McClintock and Strong’s Cyclopedia e re: “Ha ho pelaelo hore ditlaleho tsa maloko a Bajuda di ile tsa senyeha ha Jerusalema e timetswa, eseng pele ho moo.”

b Lebitso lena la Seheberu Emanuele, le bolela “Modimo O Na Le Rona,” le hlalosa hantle mosebetsi oo Jesu a o etsang e le Mesia. Taba ya hore o ile a tla lefatsheng le mesebetsi ya hae di bontsha hantle hore Modimo o na le bahlanka ba hae.—Luka 2:27-32; 7:12-16.

c Ho bonahala lentswe “Monazaretha” le tswa le tswa lentsweng la Seheberu neʹtser, le bolelang “lehlomela.”

d E le ho bona bopaki ba Bibele ba hore Mesia o fihlile ka selemo sa 29, sheba sehlooho se reng, “Ka moo Boprofeta ba Daniele bo Bolelang ho Fihla ha Mesia Esale Pele ka Teng.”

e Boprofeta bona bo hlaha lengolong la Zakaria empa Matheu o re ho ile “ha phethahala se ileng sa buuwa ka moprofeta Jeremia” (Matheu 27:9) Ho bonahala eka ka dinako tse ding buka ya Jeremia e ne e hlaha qalong karolong ya Mangolo a bitswang dibuka tsa ‘Baprofeta.’ (Luka 24:44) Ho bonahala ha Matheu a ne a bua ka “Jeremia” o ne a bolela dibuka tsohle tsa baprofeta, ho akarelletsa le buka ya Zakaria.