Tumelo​—E re Thusa Hore re be Matla

KA MOHLALA le hoja Satane a leka ho senya kamano ya rona le Jehova, tumelo e re thusa “ho tima metsu yohle e tukang ya ya kgopo.” (Baef. 6:​16) E boetse e re thusa ho mamella mathata ao re neng re sa nahana hore re ka a mamella. Jesu o ile a re ho barutuwa ba hae: “Haeba le ena le tumelo e boholo ba thollo ya mosetareta, le tla re ho thaba ena, ‘Tloha mona o ye mane,’ mme e tla tloha.” (Mat. 17:​20) Ka ha re a tseba hore tumelo e etsa hore re be le kamano e matla le Jehova, re lokela ho ipotsa dipotso tsena: Tumelo keng? Ho nka nnete e le ya bohlokwa ho amana jwang le tumelo ya rona? Re ka matlafatsa tumelo ya rona jwang? Hona re lokela ho beha tumelo ya rona ho mang?​—⁠Bar. 4:⁠3.

Ho ba le tumelo ha ho bolele feela ho dumela seo Bibele e se buang, hobane le “bademona ba a dumela [hore Modimo o teng] mme ba a thothomela.” (Jak. 2:​19) Jwale ho ba le tumelo ho bolelang?

Bibele e re tumelo e akarelletsa dintlha tsena tse pedi. Ya pele, “tumelo ke tebello e tiisitsweng ya dintho tseo ho nang le tshepo bakeng sa tsona.”(Baheb. 11:1a) Motho ya nang le tumelo o kgodisehile hore ditshepiso tsa Jehova ke nnete le hore di tla phethahala. Ka mohlala, Jehova o ile a re ho Baiseraele: “Haeba le ka tlola selekane sa ka sa motshehare le selekane sa ka sa bosiu, esita le hore bosiu le motshehare di se ke tsa eba teng ka nako ya tsona, ka ho tshwanang le selekane sa ka le mohlanka wa ka Davida se ka tlolwa.” (Jer. 33:​20, 21) Na o a tshoha hore ka nako e nngwe letsatsi le ke ke la tjhaba mme le etse hore ho se ke ha eba le bosiu le motshehare? Haeba o sa belaelle melao ya tlhaho e etsang hore lefatshe le dule le potoloha letsatsi, na o ka belaela ha Mmopi, e leng moetsi wa melao ena a re o tla phethahatsa ditshepiso tsa hae? O ka se belaele.​—⁠Esa. 55:​10, 11; Mat. 5:⁠18.

Ya bobedi, tumelo ke “bopaki bo totobetseng ba dintho tsa sebele le hoja di sa bonwe.” Mona Bibele e re tumelo ke “bopaki bo totobetseng” ba dintho tseo re eso di bone le ha ho le jwalo e le tsa nnete. (Baheb. 11:1b) Empa na re ka dumela ntho eo re eso e bone? Ha re re ngwana o a o botsa, ‘o tseba jwang hore hona le moya?’ Le hoja o eso ka o bona moya, empa o ka bontsha ngwana dintho tse fanang ka bopaki ba hore moya o teng, tse jwalo ka ho hema, ho sisinyeha ha difate le tse ding. Ha ngwana a hlokomela hore dintho tsena ke nnete, o tla utlwisisa hore ho a kgoneha ho dumela dinthong tseo motho a sa di boneng. Ka tsela e tshwanang, motho ha a lokela ho dumela feela a se na bopaki.​—⁠Bar. 1:⁠20.

Ka ha motho ha a lokela ho dumela feela a se na bopaki, o tlameha ho ba le ‘tsebo e nepahetseng ya nnete.’ (1 Tim. 2:⁠4) Empa ho ba le tsebo feela ha ho a lekana. Moapostola Pauluse o ile a re: “Ka pelo motho o bontsha tumelo.” (Bar. 10:​10) Motho ha a lokela ho tseba nnete feela empa o lokela ho e nka e le ya bohlokwa. Sena se tla etsa ho re a bontshe hore o na le tumelo mme a phele ka tsela e thabisang Modimo. (Jak. 2:​20) Motho ya sa nkeng nnete e le ya bohlokwa, a ka ba manganga le ha a se a fuwa bopaki, hobane ha a batle ho fetola seo a se dumelang kapa o batla ho ikgethela seo a se batlang. (2 Pet. 3:​3, 4; Juda 18) Ke ka hoo le mehleng ya ha ho ne ho ngolwa Bibele, e se batho kaofela ba ileng ba ba le tumelo le hoja ba ile ba bona mehlolo. (Num. 14:​11; Joh. 12:​37) Moya o halalelang o etsa hore batho ba ratang nnete, e be bona feela ba bang le tumelo.​—⁠Bagal. 5:​22; 2 Bathes. 2:​10, 11.

Morena Davida ke e mong wa batho ba neng ba ena le tumelo e matla. (Baheb. 11:​32, 33) Le ha ho le jwalo, ha se bohle lelapeng labo Davida ba neng ba ena le tumelo e tshwanang le ya hae. Ka mohlala, nahana ka Eliabe e leng abuti wa Davida. Ha Goliathe a ne a rohaka Baiseraele, Davida o ile a utlwa bohloko mme Eliabe o ile a mo kgalemela, e leng se ileng sa bontsha hore o ne a sena tumelo ho Jehova. (1 Sam. 17:​26-28) Davida o ne a ena le tumelo hobane o ne a ena le kamano e ntle le Modimo, ka ha ha hona motho ya hlahang a ena le tumelo kapa hona ho e futsa ho batswadi ba hae.

Ho Pesaleme ya 27, Davida o bontsha hore na keng e etseng hore a be le tumelo e matla. (Temana ya 1) Davida o ile a nahanisisa ka dintho tse ileng tsa mo etsahalla nakong e fetileng le ka moo Jehova a ileng a mo thusa ka teng mathateng a hae. (Temana ya 2, 3) O ne a ananela tabernakele ya Jehova. (Temana ya 4) Hape o ne a rorisa Modimo tabernakeleng le badumedimmoho. (Temana ya 6) A rapela mme a batla Jehova e le ka nnete. (Temana ya 7, 8) Davida o ne a boetse a batla ho tataiswa ke Modimo. (Temana ya 11) Davida o ne a nka ho ba le tumelo e le ha bohlokwa, hoo a ileng a botsa a re: ‘Nkabe ke le kae haeba ke ne ke sa ka ka ba le tumelo?’​—⁠Temana ya 13

O ka ba le tumelo e tshwanang le ya Davida haeba o etsa dintho tseo a neng a di etsa tse tlalehilweng ho Pesaleme ya 27. Jwalo ka ha motho a lokela ho ba le tsebo e nepahetseng e le hore a be le tumelo, ha o ntse o tswelapele ho bala Bibele le dingolwa tse thehilweng Bibeleng, ho tlaba bonolo hore o be le tumelo e leng karolo ya tholwana ya moya wa Modimo. (Pes. 1:​2, 3) Ka hoo, ha o bala iphe nako ya ho nahanisisa. Sena se tla o thusa hore o ananele dintho tseo Jehova a o etsetsang tsona. Ha kananelo ya hao e ntse e hola, o tla bontsha tumelo ya hao ha o le dibokeng mme o bolelle batho ba bang ka yena. (Baheb. 10:​23-25) Hape re bontsha hore re na le tumelo haeba re tswelapele ho ‘rapela ka mehla mme re se ke ra tela.’ (Luka 18:​1-⁠8) Ka hoo, re lokela ho ‘rapela re sa phetse,’ re tshepile hore Jehova ‘o a re tsotella.’ (1 Bathes. 5:​17; 1 Pet. 5:⁠7) Tumelo e re thusa hore re etse dintho tse nepahetseng, e leng se etsang hore re be matla.​—⁠Jak. 2:⁠22.

Bosiu ba pele a bolawa, Jesu o ile a re ho barutuwa ba hae: “Bontshang tumelo ho Modimo, le bontshe tumelo le ho nna.” (Joh. 14:⁠1) Ka hoo, ha re a lokela ho bontsha tumelo ho Jehova feela empa le ho Jesu. Ke jwang re ka bontshang tumelo ho Jesu? A re ke re hlahlobe ditsela tse tharo.

Ya pele, nka sehlabelo sa Jesu e le mpho eo Jehova a o fileng yona ka ho toba. Moapostola Pauluse o ile a re: “Ke phela ka tumelo e mabapi le Mora wa Modimo, ya ileng a nthata mme a inehela bakeng sa ka.” (Bagal. 2:​20) Ha o bontsha tumelo ho Jesu, o tla kgodiseha hore sehlabelo sa hae se o thusa hore o tshwarelwe dibe, o be le tshepo ya bophelo bo sa feleng le hore ke bopaki ba hore Jehova o a o rata. (Bar. 8:​32, 38, 39; Baef. 1:⁠7) Sena se tla o thusa hore o se ke wa ikutlwa o sena thuso.​—⁠2 Bathes. 2:​16, 17.

Ya bobedi, Atamela ho Jehova ka thapelo, ka ha ke ka sehlabelo sa Jesu re kgonang ho mo rapela. Ka lebaka la sehlabelo sena, re kgona ho rapela Jehova “ka bolokolohi ba puo teroneng ya mosa o sa tshwanelang, e le hore re ka fumana mohau le ho fumana mosa o sa tshwanelang bakeng sa thuso ka nako e nepahetseng.” (Baheb. 4:​15, 16; 10:​19-22) Thapelo e re thusa hore re hanele boikutlo ba ho etsa sebe.​—⁠Luka 22:⁠40.

Ya boraro, mamela Jesu. Moapostola Johanne o ile a re: “Ya bontshang tumelo ho Mora o na le bophelo bo sa feleng; ya sa mameleng Mora a ke ke a bona bophelo, empa kgalefo ya Modimo e sala hodima hae.” (Joh. 3:​36) Hlokomela hore Johanne o bapisa tumelo le ho mamela. Ka hoo, re tla be re bontsha tumelo ho Jesu haeba re mo mamela. Sena re se etsa ka ho latela “molao wa Kreste,” e leng dintho tseo a di rutileng le tseo a di laetseng. (Bagal. 6:⁠2) Re boetse re mamela Jesu ka ho latela tataiso eo a fanang ka yona ka “lekgoba le tshepahalang le le masene.” (Mat. 24:​45) Haeba re mamela Jesu, re tla ba le matla a ho mamella mathata a mefuta ena kaofela.​—⁠Luka 6:​47, 48.

Ka letsatsi le leng monna e mong o ile a llela Jesu a re: “Ke na le tumelo! Nthuse moo ke hlokang tumelo!” (Mar. 9:​24) Monna enwa o ne a ena le tumelo empa ka boikokobetso o ile a hlokomela hore o hloka tumelo e eketsehileng. Ka tsela e tshwanang, le rona ka nako e nngwe re tlo iphumana re le maemong ao ho ona, re hlokang tumelo e eketsehileng. Ka hoo, kaofela ha rona re lokela ho matlafatsa tumelo ya rona hona jwale. Jwalo ka ha re hlokometse, re ka matlafatsa tumelo ya rona ka ho bala Lentswe la Modimo le ho nahanisisa ka lona, e leng se tla etsa hore re ananele dintho tseo Jehova a re etsetsang tsona. Hape tumelo ya rona e ka matlafatswa ke ha re rapela Jehova le Bakrestemmoho, re bolella ba bang ka tshepo ya rona ebile re phehella thapelong. Ho feta moo, ha re matlafatsa tumelo ya rona, re tla fumana moputso o moholo. Lentswe la Modimo le a re kgothatsa le re: “Baratuwa, ka ho ikaha tumelong ya lona e halalelang ka ho fetisisa, le ho rapela ka moya o halalelang, le ipoloke leratong la Modimo.”​—⁠Juda 20, 21.