-
Bibele e Reng ka Thobalano?O ka Thaba ka ho sa Feleng!—Lenaneo la ho Ithuta Bibele
-
-
KGAOLO YA 41
Bibele e Reng ka Thobalano?
Batho ba bangata ba thatafallwa ke ho bua ka thobalano. Empa ha Bibele e bua ka thobalano, e bua ka yona ka tsela e hlomphehang ebile ha e pate letho. Seo e se buang se re tswela molemo. Taba ena e a utlwahala hobane Bibele e tswa ho Mmopi wa rona Jehova. O tseba dintho tse ka re tswelang molemo. Jehova o a re bolella hore na re etseng e le hore re mo thabise le hore na ke eng e ka re thusang hore re thabele bophelo ka ho sa feleng.
1. Na Jehova o nka ho etsa thobalano ho fosahetse?
Thobalano ke mpho e tswang ho Jehova. O batla hore e etswe ke monna le mosadi ba nyalaneng. Mpho ena e etseditswe hore banyalani ba be le bana hape ba thabele ho bontshana lerato ho ya ka moo Modimo a ba bopileng ka teng. Ke ka hoo Lentswe la Modimo le reng: “O thabe le mosadi wa botjha ba hao.” (Liproverbia 5:18, 19) Jehova o lebelletse hore banyalani ba Bakreste ba tshepahallane hobane ha ba etsa jwalo, ba ke ke ba etsa bofebe.—Bala Baheberu 13:4.
2. Bohlola ke eng?
Bibele e re ‘dihlola di ke ke tsa rua Mmuso wa Modimo.’ (1 Bakorinthe 6:9, 10) Bangodi ba Bibele ba neng ba ngola ka Segerike, ba sebedisitse lentswe por·neiʹa ha ba bua ka bohlola. Lentswe lena le akarelletsa (1) mefuta ya thobalanoa e etswang ke batho ba sa nyalanang, (2) thobalano e etswang ke batho ba bong bo tshwanang le (3) thobalano eo batho ba e etsang le diphoofolo. Ha re qoba ho etsa bohlola, re thabisa Jehova ebile re a itshireletsa.—1 Bathesalonika 4:3.
ITHUTE DINTLHA TSE DING
Ithute hore na o ka qoba bohlola jwang le hore na o tla fumana molemo ofe haeba o dula o itshwere hantle.
3. Balehela bohlola
Monna ya tshepahalang Josefa o ile a hana ho etsa thobalano le mosadi ya neng a batla ho robala le yena. Bala Genese 39:1-12 ebe le buisana ka dipotso tsena:
Keng e ileng ya thusa Josefa hore a hane ho etsa bohlola? (Sheba temana ya 9.)
Na o nahana hore Josefa o ile a etsa qeto e nepahetseng? Ke hobaneng ha o tjho jwalo?
Mehleng ee batjha ba ka etsisa Josefa jwang mme ba qoba ho etsa bohlola? Bapala VIDEO.
Jehova o batla hore kaofela ha rona re balehele bohlola. Bala 1 Bakorinthe 6:18 ebe le buisana ka dipotso tsena:
Ke maemo afe a ka etsang hore motho a qetelle a entse bohlola?
O ka balehela bohlola jwang?
4. O ka qoba ho etsa ntho e fosahetseng
Keng e ka etsang hore ho be thata ho qoba bohlola? Bapala VIDEO ebe le buisana ka potso e latelang.
Ha ntate ya hlahang videong ee a hlokomela hore menahano le diketso tsa hae di ka etsa hore qetellong a se ke a tshepahalla molekane wa hae, o ile a etsang?
Ka dinako tse ding, le ho Bakreste ba tshepahalang ho thata ho nahana dintho tse lokileng. Ke jwang o ka qobang ho dula o nahana ka dintho tse fosahetseng? Bala Bafilipi 4:8 ebe le buisana ka dipotso tsena:
Re lokela ho nahana ka dintho tse jwang?
Ho bala Bibele le ho phathahana ka mosebetsi wa Jehova ho ka re thusa jwang ho qoba teko ya ho etsa sebe?
5. Melao ya Jehova e re tswela molemo
Jehova o a tseba hore na ke eng e tla re tswela molemo. O a re bolella hore na re etseng e le hore re dule re itshwere hantle le hore na melemo ya ho etsa jwalo ke efe. Bala Liproverbia 7:7-27 kapa o bapale VIDEO ebe le buisana ka dipotso tse latelang.
Mohlankana eo o ile a ipeha tekong jwang? (Sheba Liproverbia 7:8, 9.)
Ho ya ka Liproverbia 7:23, 26 ho etsa bohlola ho ka ba le ditlamorao tse bohloko. Haeba re dula re itshwere hantle re tla qoba mathata afe?
Ho itshwara hantle ho ka re thusa jwang hore re thabele bophelo ka ho sa feleng?
Batho ba bang ba re seo Bibele e se buang ka batho ba bong bo tshwanang ba ratanang se bontsha ho hloka lerato. Empa Jehova ke Modimo ya lerato mme o batla hore batho ba thabele bophelo ka ho sa feleng. Ka hoo, e le hore re phele ka ho sa feleng, re lokela ho mamela melao ya hae. Bala 1 Bakorinthe 6:9-11 ebe le buisana ka potso ena:
Na Modimo o re ho ratana ha batho ba bong bo tshwanang ke yona feela ntho e fosahetseng?
Kaofela re lokela ho etsa diphetoho e le hore re thabise Modimo. Na ho na le molemo oo re tla o fumana ka ho etsa jwalo? Bala Pesaleme ya 19:8, 11 ebe le buisana ka dipotso tsena:
Na o nahana hore melao ya Jehova e a utlwahala? Ke hobaneng ha o tjho jwalo?
Jehova o thusitse batho ba bangata hore ba phele ka melao ya hae. Le wena a ka o thusa
BATHO BA BANG BA RE: “Ha ho phoso ho etsa thobalano le motho eo o sa nyalanang le yena hafeela le ratana.”
Wena o nahana jwang?
KAKARETSO
Thobalano ke mpho eo Jehova a e fileng monna le mosadi ba nyalaneng hore ba e thabele.
Re Ithutileng?
Bohlola bo akarelletsa ho etsang?
Ke eng e tla re thusa ho qoba ho etsa bohlola?
Re fumana melemo efe ha re mamela melao ya Jehova?
BATLA
Ithute hore na ke hobaneng ha Modimo a re monna le mosadi ba batlang ho dula mmoho ba nyalane ka molao.
“Bibele e Reng ka Batho ba Dulang ha Mmoho Pele ba Nyalana?” (Sehlooho se websaeteng)
Ithute hore na ke hobaneng ha Bibele e re ha re a lokela ho hloya batho ba bong bo tshwanang ba ratanang le hoja ketso eo ba e etsang e fosahetse.
“Na ke Phoso ha Batho ba Bong bo Tshwanang ba Ratana?” (Sehlooho se websaeteng)
Ithute ka moo melao ya Modimo e re sireletsang ka teng tabeng ya thobalano.
“Na ho Nyanyana Ditho Tsa Botona Kapa Tsa Botshehadi ke ho Etsa Thobalano?” (Sehlooho se websaeteng)
Sehloohong se reng “Ba ne ba Ntshwara ka Tlhompho,” hlokomela hore na ke eng e thusitseng ntate e mong ya neng a ratana le batho ba bong bo tshwanang le ba hae hore a fetole bophelo ba hae mme a thabise Modimo.
a Mefuta ena e akarelletsa thobalano e etswang ke batho ba sa nyalanang, ho nyanyana ditho tsa botona kapa tsa botshehadi, ho kenya setho sa botona ka morao le ho phollana ditho tsa botona kapa tsa botshehadi pakeng tsa batho ba sa nyalanang.
-
-
Bibele e Rutang ka Lenyalo le Bosoha?O ka Thaba ka ho sa Feleng!—Lenaneo la ho Ithuta Bibele
-
-
KGAOLO YA 42
Bibele e Rutang ka Lenyalo le Bosoha?
Ditsong tse ding batho ba dumela hore motho a ke ke a thaba haeba a sa nyala kapa a sa nyalwa. Le ha ho le jwalo, ha se batho bohle ba lenyalong ba thabileng hape ha se batho bohle ba masoha ba sa thabang. Bibele e re lenyalo le bosoha ke dimpho tse tswang ho Jehova.
1. Melemo ya ho ba lesoha ke efe?
Bibele e re: “Ya fanang ka bosoha ba hae lenyalong o etsa hantle, empa ya sa faneng ka bona lenyalong o tla etsa ha molemo haholo.” (Bala 1 Bakorinthe 7:32, 33, 38.) Ke ka ditsela dife motho ya seng lenyalong a etsang “ha molemo haholo”? Batho ba seng lenyalong ha ba na boikarabelo ba ho hlokomela balekane. Ka hoo, ba na le bolokolohi bo bongata. Ka mohlala, ba bang ba kgona ho sebeletsa Jehova haholwanyane ka hore ba ye dinaheng tse ding ho ya ruta batho Bibele. Ho feta moo, ba ka sebedisa nako ya bona e ngata ho matlafatsa setswalle sa bona le Jehova.
2. Ho na le melemo efe ha lenyalo le ngodisitswe ka molao?
Jwalo ka ha bosoha bo na le melemo ya bona, lenyalo le lona le na le melemo ya lona. Bibele e re “ba babedi ba molemo ho feta a le mong.” (Moeklesia 4:9) Taba ena ke nnete ho Bakreste ba sebedisang dikeletso tsa Bibele manyalong a bona. Batho ba nyalanang ka molao ba etsa tshepiso ya hore ba tla ratana, ba hlomphane ba be ba hlokomelane. Ha ba nyalane ka molao, ba ikutlwa ba sireletsehile ho feta batho ba dulang mmoho feela ba sa nyalana. Hape le bana ba ikutlwa ba sireletsehile haeba batswadi ba bona ba nyalane.
3. Jehova o nka lenyalo jwang?
Ha Jehova a nyadisa batho ba pele o ile a re: ‘Monna o tla siya ntatae le mmae a kgomarele mosadi wa hae.’ (Genese 2:24) Jehova o batla hore monna le mosadi ba ratane le hore ba dule ha mmoho hafeela ba ntse ba phela. O dumella hore ba ka hlalana feela ha e mong a entse bofebe. Boemong boo, Jehova o dumella molekane ya sa etsang bofebe hore a etse qeto ya hore na o tla hlala molekane wa hae kapa tjhe.a (Matheu 19:9) Jehova ha a dumelle hore Bakreste ba nyale sethepu.—1 Timothea 3:2.
ITHUTE DINTLHA TSE DING
Ithute hore na o ka etsang e le hore o thabe o be o thabise Jehova, ebang o lesoha kapa o lenyalong.
4. Sebedisa mpho ya bosoha hantle
Jesu o ne a nka bosoha e le mpho. (Matheu 19:11, 12) Bala Matheu 4:23 ebe le buisana ka potso ena:
Jesu o ile a sebedisa bosoha ba hae jwang e le hore a sebeletse Ntate wa hae le ho thusa batho ba bang?
Bakreste ba seng lenyalong ba ka sebedisa monyetla ona jwalo ka ha Jesu a entse. Bapala VIDEO ebe le buisana ka potso e latelang.
Bakreste ba masoha ba ka sebedisa nako ya bona jwang?
Na o ne o tseba?
Bibele ha e fane ka molao wa hore na batho ba lokela ho nyalana ha ba le dilemo di kae. Empa e kgothalletsa hore motho a eme ho fihlela a “fetile palesa ya botjha,” e leng nako eo maikutlo a ho etsa thobalano a leng matla hoo a ka sitisang motjha hore a etse qeto e nepahetseng.—1 Bakorinthe 7:36.
5. Kgetha molekane ka bohlale
Ho kgetha molekane ke e nngwe ya diqeto tsa bohlokwa tseo o ka di etsang. Bala Matheu 19:4-6, 9 ebe le buisana ka potso ena:
Ke hobaneng ha Mokreste a sa lokela ho potlakela ho kena lenyalong?
Bibele e ka o thusa hore o kgethe molekane ya nepahetseng. Ntho ya bohlokwa ke hore o batle molekane ya ratang Jehova.b Bala 1 Bakorinthe 7:39 le 2 Bakorinthe 6:14 ebe le buisana ka dipotso tsena:
Ke hobaneng ha re lokela ho nyalana feela le Bakrestemmoho le rona?
Haeba o nyalana le motho ya sa rateng Jehova, o nahana hore Jehova o tla ikutlwa jwang?
Haeba diphoofolo tse pedi tse sa tshwaneng di panwa ha mmoho, di tla lemala. Ka tsela e tshwanang, Mokreste ya nyalanang le motho eo e seng Paki ya Jehova o tla ba le mathata a mangata
6. Hlompha lenyalo jwalo ka Jehova
Baiseraele ba mehleng ya kgale ba ne ba hlala basadi ba bona ka mabaka a sa utlwahaleng. Bala Malakia 2:13, 14, 16 ebe le buisana ka potso ena:
Ke hobaneng ha Jehova a hloile ha batho ba hlalana ka mabaka a sa hlaheng ka Bibeleng?
Bofebe le tlhalo di utlwisa bana le molekane ya se nang molato bohloko
Bapala VIDEO ebe le buisana ka potso e latelang.
O ka etsang hore lenyalo la hao le atlehe haeba o nyalane le motho eo eseng Paki ya Jehova?
7. Phela ka melao ya Jehova ya lenyalo
Ho ka nna ha hlokahala hore motho a sebetse ka thata e le hore a phele ka melao ya Jehova ya lenyalo.c Jehova o hlohonolofatsa batho ba etsang jwalo. Bapala VIDEO.
Bala Baheberu 13:4 ebe le buisana ka dipotso tsena:
Na o nahana hore melao ya Jehova ya lenyalo e a utlwahala? Ke hobaneng ha o tjho jwalo?
Jehova o lebelletse hore Bakreste ba nyalane ka molao le ho hlalana ka molao jwalo ka ha dinaheng tse ngata mebuso e lebelletse hore batho ba etse jwalo. Bala Tite 3:1 ebe le buisana ka potso ena:
Haeba o lenyalong, na o kgodisehile hore lenyalo la hao le ngodisitswe ka molao?
MOTHO A KA NNA A RE: “Ke hobaneng ha re lokela ho nyalana? Bothata keng ha batho ba ratanang ba dula mmoho ba sa nyalana?”
O tla mo araba jwang?
KAKARETSO
Bosoha le lenyalo ke dimpho tse tswang ho Jehova. Batho ba ka thabela dimpho tsena le ho di kgotsofalla hafeela ba phela ka tsela eo Jehova a reng ba phele ka yona.
Re Ithutileng?
Motho a ka sebedisa bosoha ba hae ha molemo jwang?
Ke hobaneng ha Bibele e re re nyalane feela le Bakrestemmoho le rona?
Lebaka feela leo Bibele e reng motho a ka hlala ka lona ke lefe?
BATLA
Ho nyala “feela Moreneng” ho bolelang?
Shebella divideo tse pedi tse kgutshwanyane tse ka o thusang ho etsa qeto e nepahetseng pele o ratana kapa o kena lenyalong.
Ithute hore na ke hobaneng ha ntate e mong a re seo Jehova a mo fileng sona se molemo ho feta seo a se tetseng.
Ke dintho dife tseo motho a lokelang ho nahana ka tsona pele a etsa qeto ya ho hlala kapa ho arohana le molekane wa hae?
“Hlompha ‘Seo Modimo a se Kopantseng ha Mmoho’” (Tora ya ho Lebela, December 2018)
a Sheba Tlhaloso ya 4 e buang ka ho arohana boemong boo ho se nang molekane ya entseng bofebe.
b Ditsong tse ding batswadi ke bona ba kgethelang bana ba bona balekane. Boemong bo jwalo, batswadi ba ratang bana ba bona ba sheba hore na motho eo o rata Jehova hakae, e seng hore na o na le tjhelete e ngata hakae.
c Haeba o dula le motho eo o sa nyalanang le yena, ke wena ya tla etsa qeto ya hore na o a mo tlohela kapa o nyalana le yena.
-