Mmuso wa Modimo Keng?

 1. Ke thapelo efe e tsebahalang, eo re tlo bua ka yona?

BATHO ba bangata ba tseba thapelo e tummeng e bitswang Thapelo ya Morena kapa Ntata Rona ya Mahodimong. Jesu o ile a etsa thapelo ena e le mohlala ha a ne a ruta barutuwa ba hae ho rapela. Thapelo eo e bua kang, hona ke hobaneng ha e le ya bohlokwa ho rona kajeno?

 2. Ke dintho dife tse tharo tsa bohlokwa tseo Jesu a re rutileng hore re di rapelle?

² Jesu o ile a re: “Jwale, le rapele ka tsela ena: ‘Ntata rona ya mahodimong, lebitso la hao le ke le halaletswe. Mmuso wa hao o ke o tle. Thato ya hao e ke e etsahale lefatsheng, jwalo ka ha e etsahala lehodimong.’” (Bala Matheu 6:9-13.) Ke hobaneng ha Jesu a ile a re re rapelle dintho tsena tse tharo?—Sheba Ntlha ya 19 e hlahang qetellong ya buka.

 3. Re tlo ithutang mabapi le Mmuso wa Modimo?

³ Re se re ithutile hore lebitso la Modimo ke Jehova. Re ile ra boela ra ithuta hore na thato ya Modimo ke efe ka lefatshe. Empa Jesu o ne a bolelang ha a re: “Mmuso wa hao o ke o tle”? O ne a bua ka Mmuso wa Modimo. Kgaolong ena, re tla ithuta hore na Mmuso wa Modimo keng, hore o tla etsang ha o tla, le kamoo o tlang ho halaletsa lebitso la Modimo kateng.

 4. Mmuso wa Modimo keng, hona ke mang Morena wa Mmuso oo?

⁴ Jehova o ile a theha puso lehodimong mme a kgetha Jesu hore e be Morena wa yona. Bibele e bitsa puso eo Mmuso wa Modimo. Jesu ke “Morena wa ba busang e le marena le Kgosi ya ba busang e le dikgosi.” (1 Timothea 6:15) Jesu o matla ho feta marena le babusi bohle ba lefatshe, mme puso ya hae e phahametse tse ding tsohle.

 5. Mmuso wa Modimo o busa o le hokae, mme o tla busa eng?

⁵ Jesu o ile a kgutlela lehodimong ka mora matsatsi a 40 a tsositswe bafung. Jehova o ile a mo etsa Morena wa Mmuso wa Hae. (Liketso 2:33) Mmuso wa Modimo o tla busa lefatshe o le lehodimong. (Tšenolo 11:15) Ke ka hoo Bibele e reng Mmuso wa Modimo ke “wa lehodimo.”—2 Timothea 4:18.

6, 7. Keng se etsang hore Jesu a se tshwane le marena a mang?

⁶ Bibele e re Jesu ha a tshwane le marena a mang hobane yena ha ho mohla a tla shwa. (1 Timothea 6:16) Sena se a thabisa hobane dintho tsohle tse ntle tseo Jesu a tla re etsetsa tsona di tla ba teng ka ho sa feleng.

⁷ Boprofeta ba Bibele bo bontsha hore Jesu e tla ba Morena ya nang le kutlwelo bohloko le ya se nang kgethollo. Bibele e re ka Jesu: “Moya wa Jehova o tla dula hodima hae, moya wa bohlale le wa kutlwisiso, moya wa keletso le wa matla, moya wa tsebo le wa ho tshaba Jehova; mme o tla thabela ho tshaba Jehova. A ke ke a ahlola ka se bonahalang mahlong a hae, kapa a kgalemela feela ho ya ka ntho e utlwilweng ke ditsebe tsa hae. O tla ahlola ba tlaase [kapa mafutsana] ka ho loka.” (Esaia 11:2-4) Na o ka se thabele ho buswa ke morena ya jwalo?

 8. Re tseba jwang hore Jesu a ke ke a busa a le mong?

⁸ Modimo o kgethile batho ba itseng hore ba ilo busa le Jesu lehodimong. E mong wa batho bao, e leng moapostola Pauluse, o ile a re ho motswalle wa hae Timothea: “Haeba re tswela pele ho mamella, re tla boela re buse hammoho re le marena.” (2 Timothea 2:12) Ke batho ba bakae ba kgethilweng hore ba ilo busa le Jesu lehodimong?

 9. Ke batho ba bakae ba tla busa le Jesu lehodimong? Modimo o qadile neng ho ba kgetha?

⁹ Bibele e bua ka pono e ileng ya fuwa moapostola Johanne, eo ho yona a bonang Jesu e le Morena lehodimong, a na le batho ba 144 000 ba busang le yena. Ke bo mang batho bao ba 144 000? Johanne o re lebitso la Jesu le la Jehova, le ngotswe “diphatleng tsa bona.” Johanne o tswela pele ho re ka bona: “Ba ntse ba latela Konyana [e leng Jesu] ho sa tsotellehe hore na e ya hokae. Ba rekilwe hara moloko wa batho.” (Bala Tšenolo 14:1, 4.) Batho bana ba 144 000 ke Bakreste ba tshepahalang bao Modimo a ba kgethileng hore ba buse le Jesu “e le marena hodima lefatshe.” Ha ba shwa, ba tsosetswa lehodimong. (Tšenolo 5:10) Ho tloha mehleng ya baapostola, Jehova o nnile a kgetha Bakreste ba tla etsa palo eo ya 144 000.

10. Ke hobaneng ha ho buswa ke Jesu le ba 144 000 e le bopaki ba hore Jehova o a re rata?

¹⁰ Jehova o entse hore ho be le batho ba busang le Jesu hobane a re rata haholo. Jesu e tla ba mmusi ya lokileng hobane o a re utlwisisa. O a tseba hore ho jwang ho ba motho hobane o kile a phela lefatsheng. Bibele e re Jesu o tla “utlwela mefokolo ya rona bohloko” hobane o ile a lekwa “ka ditsela tsohle jwalo ka rona.” (Baheberu 4:15; 5:8) Batho ba 144 000 le bona ba kile ba phela lefatsheng. Ba a tseba hore ho jwang ho ba le mathata a kang ho kula. Ka hoo re ka kgodiseha hore Jesu le ba 144 000 ba tla busa le yena, ba tla utlwisisa mathata a rona le tsela eo re ikutlwang ka yona.

11. Na ha esale ho etsahala thato ya Modimo lehodimong?

¹¹ Jesu o ile a ruta balatedi ba hae ho rapella hore thato ya Modimo e etsahale lefatsheng jwalo ka ha e etsahala lehodimong. Empa ho na le nako eo ka yona thato ya Modimo e neng e sa etsahale lehodimong. Kgaolong ya 3, re ithutile hore Satane Diabolose o ile a fetohela Jehova. Jehova o ile a dumella Satane le mangeloi a mang a kgopo ho tswela pele ba phela lehodimong. Ka hoo, e ne e se mangeloi ohle a neng a etsa thato ya Modimo lehodimong ka nako eo. Kgaolong ya 10, re tla ithuta ho eketsehileng ka Satane le mangeloi ao a hae a kgopo.

12. Ke diketsahalo dife tse pedi tse hlaloswang ho Tšenolo 12:10?

¹² Bibele e re ha Jesu a qeta ho etswa Morena wa Mmuso wa Modimo, o ile a lwana le Satane. (Bala Tšenolo 12:7-10.) Temana ya 10 e bua ka diketsahalo tse pedi tsa bohlokwa. Ya pele, Mmuso wa Modimo o qala ho busa lehodimong o etelletswe pele ke Jesu Kreste. Ya bobedi, Satane o ntshwa lehodimong mme o dihelwa lefatsheng. Hamorao re tla tshohla bopaki ba hore diketsahalo tsena ka bobedi di se di etsahetse.a

13. Ho ile ha etsahalang lehodimong ha Satane a lelekwa?

¹³ Bibele e re mangeloi a tshepahalang a ile a thaba lehodimong ha Satane le mangeloi a hae ba lelekwa. Ho ile ha ba le lentswe le reng: “Thabang, lona mahodimo le lona ba dulang ho ona!” (Tšenolo 12:12) Hona jwale ho na le kgotso lehodimong hobane mangeloi ohle a setseng teng a etsa thato ya Modimo.

14. Ho etsahetseng lefatsheng ha Satane a dihelwa ho lona?

¹⁴ Lefatsheng teng ke dillo feela. Ho etsahala dintho tse bohloko hobane “Diabolose o theohetse” lefatsheng “a halefile haholo, a tseba hore o na le nako e kgutshwanyane.” (Tšenolo 12:12) E, Satane o tuka bohale. O lelekilwe lehodimong mme o a tseba hore haufinyane Modimo o tla mo fedisa. Ke ka lebaka leo a batlang ho siya a dubile mona lefatsheng, ka hore a bakele batho mathata le dintho tse utlwisang bohloko.

15. Thato ya Modimo ke efe ka lefatshe?

¹⁵ Le ha ho le jwalo, thato ya Modimo ka lefatshe ha e so fetohe. O sa ntse a batla hore lefatshe le tlale batho ba thabileng mme ba dule ho lona ka ho sa feleng. (Pesaleme ya 37:29) Mmuso wa Modimo o tla etsa dintho tsena. Empa o tla di etsa jwang?

16, 17. Lengolo la Daniele 2:44 le re rutang ka Mmuso wa Modimo?

¹⁶ Boprofeta bo ho Daniele 2:44 bo re: “Matsatsing a marena ao Modimo wa lehodimo o tla emisa mmuso o ke keng wa senngwa le ka mohla. Mmuso oo o ke ke wa fetisetswa ho batho le ha e le bafe ba bang. O tla silakanya o fedise mebuso ena kaofela, mme o tla ema ho isa dinakong tse sa lekanyetswang kapa ka ho sa feleng.” Ho na le dintlha tse tharo tseo re ithutang tsona ka Mmuso wa Modimo boprofeteng bona.

¹⁷ Ntlha ya pele, Mmuso wa Modimo o ne o tla qala ho busa “matsatsing a marena ao.” Sena se bolela hore Mmuso wa Modimo o ne o tla thehwa ho ntse ho na le mebuso e meng mona lefatsheng. Ntlha ya bobedi, Mmuso wa Modimo o tla ba teng ka ho sa feleng mme ha ho mmuso o mong o tla o nkela sebaka. Ntlha ya boraro, ho tla ba le ntwa pakeng tsa Mmuso wa Modimo le mebuso ya lefatshe. Mmuso wa Modimo o tla hlola mme o sale e le ona feela o busang lefatsheng. Qetellong batho ba tla ba le puso e molemo ka ho fetisisa.

18. Ntwa e tla ba pakeng tsa Mmuso wa Modimo le mebuso ya lefatshe e bitswang?

¹⁸ Ho tla etsahalang pele Mmuso wa Modimo o busa lefatshe lohle? Ho tla ba le ntwa e kgolo eo Bibele e e bitsang Armagedone. Pele ho ntwa eo, mangeloi a kgopo a Satane kapa bademona, a tla kgelosa “marena a lefatshe lohle leo ho ahilweng ho lona” mme a kenye marena ao moya wa hore a lwantshe Modimo. Ntweng eo ya Armagedone, Mmuso wa Modimo o tla fedisa mebuso yohle ya lefatshe.—Tšenolo 16:14, 16; sheba Ntlha ya 10 e hlahang qetellong ya buka.

19, 20. Ke hobaneng ha re hloka Mmuso wa Modimo?

¹⁹ Ke hobaneng ha re hloka Mmuso wa Modimo? Nahana bonyane ka mabaka ana a mararo. La pele, re baetsadibe, re a kula ebile re a shwa. Empa Bibele e re re tla phela ka ho sa feleng Mmusong wa Modimo. Ha e le hantle ho Johanne 3:16, Bibele e re: “Modimo o ratile lefatshe haholo hoo a ileng a fana ka Mora wa hae ya tswetsweng a nnotshi, e le hore e mong le e mong ya bontshang tumelo ho yena a se ke a timetswa empa a be le bophelo bo sa feleng.”

²⁰ Lebaka la bobedi leo ka lona re hlokang Mmuso wa Modimo, ke hobane re phela lefatsheng le tletseng batho ba kgopo. Batho ba bangata kajeno ba bua leshano ebile ba rata boitshwaro bo ditshila. Re ka se kgone ho ba thibela ho etsa dintho tsena empa Modimo yena o na le matla a ho etsa jwalo. Nakong ya Armagedone, Modimo o tla fedisa batho bohle ba kgopo, ba sa batleng ho tlohela mekgwa ya bona e mebe. (Bala Pesaleme ya 37:10.) Lebaka la boraro leo ka lona re hlokang Mmuso wa Modimo, ke hore mebuso ya batho e tletse bobodu, e sehloho, ebile ha ho mohla e tla kgotsofatsang ditlhoko tsa batho ka ho felletseng. Mebuso ena ha e kgothalletse batho hore ba mamele Modimo. Bibele e re ‘motho o busitse motho e mong e le hore a ka mo ntsha kotsi.’—Moeklesia 8:9.

21. Mmuso wa Modimo o tla etsang ho netefatsa hore thato ya Modimo e a etsahala lefatsheng?

²¹ Ka mora Armagedone, Mmuso wa Modimo o tla netefatsa hore thato ya Modimo e etsahala lefatsheng lohle. Ka mohlala, Modimo o tla fedisa Satane le bademona ba hae. (Tšenolo 20:1-3) Ka nako eo, ha ho sa tla ba le motho ya kulang mme batho ba ke ke ba hlola ba shwa. Ka lebaka la sehlabelo sa thekollo, batho bohle ba tshepahalang ba tla phela ka ho sa feleng lefatsheng. (Tšenolo 22:1-3) Mmuso wa Modimo o tla boela o halaletse lebitso la Modimo. Seo se bolelang? Se bolela hore ha Mmuso wa Modimo o se o busa lefatsheng, ho tla be ho setse batho ba hlomphang lebitso la Jehova feela.—Sheba Ntlha ya 20 e hlahang qetellong ya buka.

22. Re tseba jwang hore Jesu ha a ka a fuwa borena hanghang ha a qeta ho tsoha bafung?

²² Jesu o ile a re barutuwa ba hae ba rapele ba re: “Mmuso wa hao o ke o tle.” Ho hlakile hore Mmuso wa Modimo o ne o so ka o ba teng ha Jesu a bua mantswe ao, empa o ne o tla tla hamorao. Jehova o ne a tla theha mmuso pele, ebe o etsa Jesu Morena wa ona. Na Jesu e ile ya eba Morena hanghang feela ha a kgutlela lehodimong? Tjhe, hobane o ile a lokela ho leta. Nakwana ka mora hore Jesu a tsoswe, Petrose le Pauluse ba ile ba qotsa boprofeta bo ho Pesaleme ya 110:1 mme ba re bo phethahala ho Jesu. Boprofeteng boo, Jehova o re ho Jesu: “Dula ka letsohong la ka le letona, ho fihlela ke beha dira tsa hao jwalo ka setulwana sa maoto a hao.” (Liketso 2:32-35; Baheberu 10:12, 13) Ebe Jesu o ne tla ema nako e kae pele Jehova a mo etsa Morena?

23. (a) Jesu o qadile neng ho busa e le Morena wa Mmuso wa Modimo? (b) Re tlo ithutang kgaolong e latelang?

²³ Dilemo tse ngata pele ho selemo sa 1914, Bakreste ba mmalwa ba tshepahalang ba ne ba dumela hore selemo seo ke sa bohlokwa boprofeteng ba Bibele. Dintho tse ileng tsa etsahala lefatsheng ho tloha ka 1914 di bontsha hore ba ne ba nepile. Ke selemo seo Jesu a ileng a qala ho busa ka sona e le Morena wa Mmuso wa Modimo. (Pesaleme ya 110:2) Hang feela ha a fuwa borena, Jesu o ile a leleka Satane lehodimong mme a mo dihela lefatsheng. Hona jwale Satane o salletswe ke “nako e kgutshwanyane” feela. (Tšenolo 12:12) Bibele e bitsa nako ena ‘matsatsi a ho qetela.’ Kgaolong e latelang, re tla hlahloba bopaki bo bontshang hore kannete re phela “matsatsing a ho qetela.” Re tla boela re bone kamoo nako ya hore thato ya Modimo e etsahale lefatsheng e leng haufi kateng.—Sheba Ntlha ya 21 e hlahang qetellong ya buka.