Lipesaleme

79 Molimo, lichaba li kene lefeng la hao;+

Li silafalitse tempele ea hao e halalelang;+

Li entse Jerusalema qubu ea lithako.+

 2 Li file linonyana tsa maholimo litopo tsa bahlanka ba hao hore e be lijo,+

Li file libata tsa lefatše linama tsa ba tšepahalang ba hao.+

 3 Li tšolotse mali a bona joaloka metsi

Ho pota-pota Jerusalema ka hohle, ’me ha ho le ea mong ea ba patang.+

 4 Re fetohile nyeliso ho baahelani ba rōna,+

Litšeho le sesomo ho ba re potolohileng.+

 5 Jehova, u tla tuka ke bohale halelele hakae? Ka ho sa feleng?+

Cheseho ea hao e tla tuka feela joaloka mollo halelele hakae?+

 6 Tšollela khalefo ea hao holim’a lichaba tse sa kang tsa u tseba,+

Le holim’a mebuso e sa kang ea ipiletsa lebitsong la hao.+

 7 Etsoe li qetile Jakobo,+

Li entse hore sebaka sa hae sa bolulo e be lesupi.+

 8 U se ke ua hopola liphoso tsa baholo-holo khahlanong le rōna.+

Potlaka! Mehauhelo ea hao e ke e re khahlanyetse,+

Etsoe re futsanehile haholo.+

 9 Re thuse, Molimo oa poloko ea rōna,+

Ka lebaka la khanya ea lebitso la hao;+

U re lopolle ’me u koahele libe tsa rōna ka lebaka la lebitso la hao.+

10 Ke hobane’ng ha lichaba li lokela ho re: “Molimo oa bona o hokae?”+

Har’a lichaba ho ke ho tsejoe ka pel’a mahlo a rōna+

Ho pheteletsoa ha mali a tšolotsoeng a bahlanka ba hao.+

11 E se eka ho feheloa ha motšoaruoa ho ka kena ka pel’a hao.+

Ho ea ka boholo ba letsoho la hao u boloke ba behetsoeng lefu.+

12 U buseletse baahelani ba rōna ka makhetlo a supileng lifubeng tsa bona+

Nyeliso eo ba u nyelisitseng ka eona, Jehova.+

13 Ha e le rōna batho ba hao le mohlape oa lekhulo la hao,+

Re tla u leboha ho isa nakong e sa lekanyetsoang;

Re tla bolela thoriso ea hao ho tloha molokong o mong ho ea ho o mong.+