Jeremia
9 Hoja hlooho ea ka e ne e le seliba sa metsi
Ebe mahlo a ka ke mohloli oa meokho,+
Ke ne ke tla lla bosiu le motšehare,
Ke llele batho ba heso ba bolailoeng.
2 Hoja ke ne ke e-na le sebaka sa ho phomola lefeelleng,
Ke ne ke tla siea batho ba heso ’me ke tlohe ho bona.
Etsoe kaofela ha bona ke bafebi,+
Ke lequloana la balotsana.
3 Ba itokiselitse ho bua leshano joaloka seqha se kobehileng hore se betse tsenene.
Leshano le atile naheng ho e-na le botšepehi.+
Jehova o re: “Bokhopo ba bona bo ntse bo e-hloa mekoalaba
Ebile ha ba ’mamele.+
4 E mong le e mong a itebele ho moahisani oa hae.
Le se ke la tšepa esita le bana ba bo lona.
5 E mong le e mong o qhekella moahisani oa hae,
Ha ho ea buang ’nete.
Ba rutile maleme a bona ho bua leshano.+
Ba ipakela mokhathala ka ho etsa lintho tse fosahetseng.
6 U phela har’a batho ba leshano.
Ba bua leshano ’me ha ba batle ho ntseba,” ke Jehova ea chong.
7 Ka hona Jehova oa mabotho o re:
8 Maleme a bona ke tsenene e bolaeang, a bua leshano.
Ka molomo, motho o bua ka khotso le moahisani oa hae
Empa ka pelong o mo chehela leraba.”*
9 Jehova o re: “Na ha kea lokela ho ba bitsa hore ba tl’o ikarabella bakeng sa lintho tsee?
Na ha kea lokela ho iphetetsa ho sechaba se tjee?+
10 Ke tla lla ’me ke bokollele lithaba,
Ke bine koli-ea-malla* bakeng sa makhulo a naha
Kaha a chesitsoe e le hore ho se ke ha e-ba le motho ea fetang.
Batho ba ke ke ba utloa molumo oa liphoofolo tse ruiloeng.
Linonyana tsa maholimo le libata li balehile, li tsamaile.+
11 Ke tla etsa hore Jerusalema e be liqubu tsa majoe,+ selao sa liphokojoe,+
Ke etse hore metse ea Juda e be lithako, e hloke baahi.+
12 Ke mang ea bohlale hore a ka utloisisa hore na ke hobane’ng ha lintho tsee li etsahala?
Ke mang eo Jehova a mo boleletseng taba ee e le hore a ka e bolella batho ba bang?
Ke hobane’ng ha naha e timetse?
Ke hobane’ng ha e chesitsoe joaloka lefeella
Hoo ho seng motho ea fetang ho eona?”
13 Jehova a re: “Ke hobane ba furaletse molao* oa ka oo ke ba behetseng oona le hore ha baa ka ba o latela ’me ha baa ka ba mamela lentsoe la ka. 14 Ka manganga ba latetse lipelo tsa bona+ ’me ba latetse litšoantšo tsa Baale joalokaha bo-ntate ba bona ba ba rutile.+ 15 Kahoo, Jehova oa mabotho, Molimo oa Iseraele o re: ‘Ke jesa batho bana lengana ’me ke tla ba noesa metsi a chefo.+ 16 Ke tla ba hasanya har’a lichaba tseo bona le bo-ntate ba bona ba sa kang ba li tseba+ ’me ke tla ba nehella sabole ho fihlela ke ba timelitse.’+
17 Jehova oa mabotho o re:
‘Nahanisisang ka lintho tse etsahalang.
Bitsang basali ba binang koli-ea-malla,+
Le bitse le basali ba nang le tsebo
18 E le hore ba potlake ’me ba re llele
E le hore mahlo a rona a ka tsoa meokho
Le likeleli li keleketle marameng a rona.+
19 Etsoe ho utloahetse sello Sione:+
“Naha ea rona e sentsoe hakaakang!
Re tlotlolohile haholo
Hobane re tlositsoe naheng ea rona ’me ba lihile mahae a rona.”+
20 Lona basali, utloang lentsoe la Jehova.
E se eka litsebe tsa lona li ka mamela lentsoe la molomo oa hae.
Le rutane pina ena ea koli-ea-malla+
Le be le e rute barali ba lona
21 Etsoe lefu le kene ka lifensetere tsa rona.
Le kene litoreng tsa rona tse tiisitsoeng ka thata,
La lata bana literateng
Le bahlankana limmarakeng.’+
22 E-re: ‘Jehova o re:
“Litopo tsa batho li tla oa joaloka moiteli tšimong
Joaloka koro* e sa tsoa heloa ke mokotuli
Ho se ea e bokellang.”’”+
23 Jehova o re:
“Monna ea bohlale a se ke a ithorisa ka bohlale ba hae,+
Monna ea matla a se ke a ithorisa ka matla a hae
Le morui a se ke a ithorisa ka maruo a hae.+
A ithorise ka hore ke ’na Jehova ea nang le lerato,* toka le ea lokileng lefatšeng+
Hobane ke khahlisoa ke lintho tsena,”+ ke Jehova ea chong.
25 Jehova o boetse o re: “Matsatsi aa tla ao ka ’ona ke tla ahlola e mong le e mong ea bolotseng empa a sa bolla.+ 26 Ke tla ahlola Egepeta,+ Juda,+ Edomo,+ Baamone,+ Moabe+ le bohle ba lulang lefeelleng ba kutileng litelu tse ka holim’a mehlahare.*+ Etsoe lichaba tsohle ha lia bolla ’me bohle ba ntlo ea Iseraele ha baa hloeka* pelong.”+