Joshua
3 Joale Joshua a tsoha hoseng haholo ’me eena le Baiseraele* bohle ba tloha Shitime+ ’me ba tla Jordane. Ba ile ba qeta bosiu moo pele ba ka tšela.
2 Ka mor’a matsatsi a mararo, balaoli+ ba tsamaea har’a liahelo 3 ’me ba laela batho ba re: “Hang ha le bona areka ea selekane sa Jehova Molimo oa lona e jeroe ke baprista ba Balevi,+ le tlohe sebakeng sa lona ’me le e sale morao. 4 Empa le be hole le eona ka limithara tse ka bang 890.* Le se ke la e atamela e le hore le ka bona tsela eo le lokelang ho tsamaea ka eona hobane ha le e-s’o ka le tsamaea tseleng ena.”
5 Joshua a re ho sechaba: “Itlhoekiseng*+ hobane hosane Jehova o tla etsa lintho tse hlollang har’a lona.”+
6 Joshua a re ho baprista: “Nkang areka+ ea selekane ’me le etelle sechaba pele.” Kahoo, ba nka areka ea selekane ’me ba tsamaea ka pel’a sechaba.
7 Jehova a re ho Joshua: “Letsatsing lena ke tla etsa hore Baiseraele bohle ba u hlomphe+ e le hore ba ka tseba hore ke tla ba le uena+ feela joalokaha ke ile ka ba le Moshe.+ 8 U laele baprista ba jereng areka ea selekane u re: ‘Hang ha le kena ka metsing a Jordane le eme le sa sisinyehe ka har’a Jordane.’”+
9 Joshua a re ho Baiseraele: “Atamelang mona ’me le mamele mantsoe a Jehova Molimo oa lona.” 10 Joshua a re: “Le tla tseba ka sena hore Molimo ea phelang o har’a lona+ le hore ka sebele o tla leleka ka pel’a lona Bakanana, Bahethe, Baheve, Bapereze, Bagirgashe, Baamore le Bajebuse.+ 11 Areka ea selekane sa Morena oa lefatše lohle e le etelletse pele ho tšela Jordane. 12 Nkang banna ba 12 malokong a Iseraele. Le nke monna a le mong lelokong le leng le le leng+ 13 ’me hang ha maoto a baprista ba jereng Areka ea Jehova, Morena oa lefatše lohle a thetsa* metsi a Jordane, metsi a Jordane a phallang ho tsoa holimo nokeng a tla ema tsi! joaloka metsi a letamo.”*+
14 Kahoo, ha sechaba se tloha litenteng tsa sona pele se tšela Jordane, baprista ba jereng areka+ ea selekane ba etella sechaba pele. 15 Hang ha baprista ba jereng Areka ba fihla Jordane ’me ba kenya maoto a bona ka metsing (Jordane e tlala ho feta tekano+ matsatsing ’ohle a kotulo), 16 metsi a phallang ho tloha holimo a ema tsi! hole koana Adama e leng motse o haufi le Zarthane. A ile a phahama, a ba joaloka letamo,* ha ka nako eo metsi a theohelang Leoatleng la Araba e leng Leoatle la Letsoai* a ntse a fela. Noka ea khaotsa ho phalla eaba sechaba se tšela se shebane le Jeriko. 17 Ha baprista ba jereng areka ea selekane sa Jehova ba ntse ba eme ba sa sisinyehe mobung o ommeng+ bohareng ba Jordane, Baiseraele bohle ba feta mobung o ommeng+ ho fihlela sechaba kaofela se qetile ho tšela Jordane.