Jeremia

44 Molimo a bua le Jeremia hore a re ho Bajuda bohle ba neng ba lula naheng ea Egepeta,+ Migdole,+ Takpanese,+ Nofe*+ le Pathrose:+ 2 “Jehova oa mabotho, Molimo oa Iseraele o re: ‘Le bone tlokotsi eo ke e tliselitseng Jerusalema+ le metse eohle ea Juda ’me kajeno ke lithako tse se nang baahi.+ 3 Ke ka lebaka la bobe boo le bo entseng ka morero oa ho ntšiteloa ka ho etsa mahlabelo+ le ho sebeletsa melimo e meng eo lona kapa baholo-holo ba lona le sa kang la e tseba.+ 4 Ka ’na ka romela bahlanka bohle ba ka bao e leng baprofeta ho lona, ka ba romela ka makhetlo-khetlo* ke re: “Ke kopa le se ke la etsa ntho ena e nyonyehang eo ke e hloileng.”+ 5 Empa ha lea ka la mamela kapa la sekeha tsebe hore le tlohele bobe ba lona ka ho se etsetse melimo e meng mahlabelo.+ 6 Kahoo, bohale ba ka bo ile ba tukela metse ea Juda le Jerusalema ’me metse eo ea senyeha, ea lula e se na baahi ho fihlela letsatsing lena.’+

7 Joale Jehova Molimo oa mabotho, Molimo oa Iseraele o re: ‘Ke hobane’ng ha le ipakela tlokotsi e kholo, tlokotsi ea hore monna e mong le e mong le mosali, ngoana le lesea, ba bolaoe Juda ’me ho se be le ea salang? 8 Ke hobane’ng ha le ntšiteloa ka mesebetsi ea lona ka ho etsetsa melimo e meng mahlabelo naheng ea Egepeta moo le ileng ho ea lula teng? Le tla shoa, le rohakoe le be le nyefoloe har’a lichaba tsohle tsa lefatše.+ 9 Na le se le lebetse liketso tsa lona tse mpe, tsa basali ba lona,+ tsa baholo-holo ba lona, tsa marena a Juda+ hammoho le tsa basali ba ’ona,+ tse entsoeng naheng ea Juda le literateng tsa Jerusalema? 10 Ho fihlela letsatsing lena ha le ikokobetse,* ha le ntlhomphe+ kapa hona ho mamela melao ea ka le litaelo tseo ke li fileng lona le baholo-holo ba lona.’+

11 Kahoo, Jehova oa mabotho, Molimo oa Iseraele o re: ‘Ke ikemiselitse ho le tlisetsa tlokotsi, ho felisa Juda eohle. 12 Ke tla nka Bajuda ba setseng ba pheheletseng ho ea lula Egepeta ’me kaofela ba tla shoella naheng ea Egepeta.+ Ba tla bolaoa ke sabole le tlala, ho tloha ho mofutsana ho ea ho morui. Ba tla felisoa ke sabole le tlala. Batho ba tla tšoha ha ba ba bona, ba tla rohakoa, ba songoe ba be ba nyefoloe.+ 13 Ke tla otla ba lulang naheng ea Egepeta joalokaha ke otlile Jerusalema ka sabole, tlala le lefu la seoa.+ 14 Batho ba setseng ba Juda ba ileng Egepeta ho ea lula teng ba ke ke ba phela kapa ba phonyoha hore ba khutlele naheng ea Juda. Ba tla labalabela ho khutlela teng empa ba ke ke ba khutla. Ho tla khutla ba seng bakae feela ba phonyohileng.’”

15 Banna bohle ba neng ba tseba hore basali ba bona ba etsetsa melimo e meng mahlabelo le basali bohle ba neng ba eme moo ba entse letšoelehali le batho bohle ba neng ba phela Pathrose+ naheng ea Egepeta,+ ba araba Jeremia ba re: 16 “Re ke ke ra mamela litaba tseo u re boleletseng tsona ka lebitso la Jehova. 17 Empa re tla hle re phethe mantsoe ’ohle ao re a buileng ka hore re etsetse Mofumahali oa Leholimo* mahlabelo le linyehelo tsa lino+ feela joalokaha rona, baholo-holo ba rona, marena a rona le liofisiri tsa rona re ile ra etsa metseng ea Juda le literateng tsa Jerusalema, ha re ne re khora ’me re atlehile, re sa hlaheloe ke tlokotsi ho hang. 18 Hang hoba re khaotse ho etsetsa Mofumahali oa Leholimo* mahlabelo le linyehelo tsa lino, re ile ra haelloa ke ntho e ’ngoe le e ’ngoe, joale re felile ke sabole le tlala.”

19 Basali le bona ba re: “Banna ba rona ba ile ba re lumella ho etsetsa Mofumahali oa Leholimo* mahlabelo, linyehelo tsa lino le mahobe a sehlabelo a bopehileng joaloka eena.”

20 Eaba Jeremia o re ho batho bohle, e leng banna le basali ba bona le bohle ba neng ba bua le eena: 21 “Mahlabelo a entsoeng ke lona, baholo-holo ba lona, marena a lona, liofisiri tsa lona le batho ba naha metseng ea Juda le literateng tsa Jerusalema,+ Jehova o a hopotse ’me ha aa ka a a lebala.* 22 Qetellong Jehova o ne a se a sa khone ho mamella liketso tsa lona tse mpe le lintho tse litšila tseo le li entseng. Kahoo, naha ea lona ea senyeha, ea e-ba ntho e tšosang le e rohakiloeng, e se nang moahi joalokaha ho le joalo le letsatsing lena.+ 23 Ke hobane le entse mahlabelo ana le hobane le sitetsoe Jehova ’me ha lea mamela Jehova. Ha lea ka la mamela molao oa hae le litaelo tsa hae le likhopotso tsa hae. Ke ka lebaka leo le hlahetsoeng ke tlokotsi ena joalokaha le bona.”+

24 Jeremia a boela a re ho sechaba sohle ho akarelletsa le basali bohle: “Utloang lentsoe la Jehova, lona Bajuda bohle ba naheng ea Egepeta. 25 Jehova oa mabotho, Molimo oa Iseraele o re: ‘Lintho tseo lona le basali ba lona le li buileng ka melomo ea lona, le li phethahalitse ka matsoho a lona hobane le itse: “Re tla hle re phethe boitlamo ba rona ba ho etsetsa Mofumahali oa Leholimo* mahlabelo le linyehelo tsa lino.”+ Lona basali le tla fela le phethe boitlamo ba lona ’me le bo tšepahalle.’

26 Joale utloang lentsoe la Jehova, lona Bajuda bohle ba lulang naheng ea Egepeta: ‘Jehova o re: “Ke hlapanya ka lebitso la ka le leholo hore ha ho na Mojuda+ leha e le ofe naheng eohle ea Egepeta ea tla hlola a ikana ka lebitso la ka a re: ‘Ka ’Musi oa Lintho Tsohle Jehova ea phelang!’+ 27 Ke ba behile leihlo e le hore ke ba tlisetse tlokotsi eseng ntho e molemo.+ Bajuda bohle ba naheng ea Egepeta ba tla bolaoa ke sabole le tlala ho fihlela ba fela.+ 28 Ke ba seng bakae feela ba tla phonyoha sabole ’me ba khutlele naheng ea Juda+ ba tsoa Egepeta. Bohle ba setseng ba Juda ba tlileng naheng ea Egepeta ho tla lula teng ba tla tseba hore na ha e le ’na e le bona, ea neng a bua ’nete ke mang.”’

29 Jehova o re: ‘Ke tla etsa pontšo ena bakeng sa lona e le hore le bone hore ke tla le otlela naheng ena, le tle le tsebe hore ke tla le tlisetsa tlokotsi joalokaha ke boletse. 30 Jehova o re: “Ke tla nehelana ka Faro Hofra, morena oa Egepeta matsohong a lira tsa hae le a batho ba batlang ho mo bolaea feela joalokaha ke nehelane ka Morena Tsedekia oa Juda matsohong a Morena Nebukadnezare* oa Babilona, eo e neng e le sera sa hae a bile a batla ho mo bolaea.”’”+