Jeremia
20 Moprista Pashkure mora oa Imere eo hape e neng e le molaoli ea etellang pele ka tlung ea Jehova, o ne a mametse ha Jeremia a ntse a profeta lintho tsena. 2 Joale Pashkure a otla moprofeta Jeremia ’me a mo kenya litlamong+ tse neng li le Keiting e ka Holimo ea Benjamine, e neng e le pel’a ntlo ea Jehova. 3 Empa ka letsatsi la bobeli ha Pashkure a ntša Jeremia litlamong, Jeremia a re ho eena:
“Jehova ha aa u reha Pashkure empa o u rehile Tšabo ka Hohle.+ 4 Etsoe Jehova o re: ‘Ke tla etsa hore uena le metsoalle eohle ea hao le tšohe ka lebaka la ntho e tla u etsahalla ’me metsoalle ea hao e tla bolaoa ka sabole ke lira tsa eona u ntse u shebile.+ Ke tla fa morena oa Babilona taolo holim’a Juda eohle ’me o tla hapa ba bang ba Bajuda a ba ise Babilona ebe ba bang o ba bolaea ka sabole.+ 5 Ke tla nehelana ka maruo a motse ona, lihlahisoa tsohle tsa oona, lintho tsohle tsa oona tsa bohlokoa le matlotlo ’ohle a marena a Juda matsohong a lira tsa bona.+ Ba tla li nka ka mahahapa ’me ba li ise Babilona.+ 6 Ha e le uena Pashkure le bohle ba lulang ka tlung ea hao, le tla haptjoa. U tla ea Babilona u shoelle teng ’me u tla pateloa teng le metsoalle eohle ea hao hobane u ba profetetse leshano.’”+
7 U ’makalitse, Jehova ’me ke ile ka makala.
U bontšitse hore u matla ho mpheta ’me u hlotse.+
Ke fetohile ntho e tšehisang letsatsi lohle,
E mong le e mong oa ntšoma.+
8 Etsoe neng kapa neng ha ke bua, ke lokela ho hoeletsa ke re:
“Ntoa le timetso!”
Ke rohakiloe le ho songoa letsatsi lohle ka lebaka la lentsoe la Jehova.+
9 Kahoo ka re: “Nke ke ka bua ka eena.
Ha ke sa tla hlola ke bua ka lebitso la hae.”+
Empa ka pelong ea ka lentsoe la Molimo la e-ba joaloka mollo o tukang o koaletsoeng masapong a ka.
Ke ne ke khathetse ke ho le tiisetsa.
Ke ne ke sa khone ho thola.+
Ba re: “Mo qoseng, a re mo qoseng.”
Batho bohle ba ntakaletsang khotso ba ne ba shebile hore ke oe.+
Ba re: “Mohlomong o tla etsa phoso e se nang kelello
Ebe rea hlola ’me re iphetetsa ho eena.”
11 Empa Jehova o ne a e-na le ’na joaloka mohlabani ea tšosang.+
Ke ka lebaka leo ba ntlhorisang ba tla khoptjoa ’me ba se ke ba hlola.+
Ba tla hlajoa ke lihlong haholo hobane ba ke ke ba atleha.
Ba tla soaba ho ea ho ile ’me tšoabo ea bona e ke ke ea lebaloa.+
12 Empa uena, Jehova oa mabotho, u hlahloba ea lokileng.
U bona menahano e tebileng* le pelo.+
13 Binelang Jehova! Rorisang Jehova!
O pholositse mofutsana matsohong a ba khopo.
14 Ho rohakoe letsatsi leo ke tsoetsoeng ka lona.
E se eka letsatsi leo ’Mè a ntsoetseng ka lona le ke ke la hlohonolofatsoa.+
15 Ho rohakoe motho ea tliselitseng Ntate litaba tse monate a re:
“U tsoaletsoe mora, ngoan’a moshanyana!”
Eaba o mo thabisa haholo.
16 E se eka motho eo a ka ba joaloka metse eo Jehova a e timelitseng a sa ikoahlaee.
E se eka a ka utloa mohoo hoseng le mokhosi motšehare.