Na Letsatsi le Letsatsi Ua Botsa, “Jehova o Hokae?”

1, 2. (a) Boemo ba moea ba Bajuda ba mehleng ea Jeremia e ne e le bofe? (b) Bajuda ba ne ba lokela hore ebe ba ile ba etsa joang ka boemo ba bona?

JEREMIA o ne a lla. O ne a anngoe ke boemo boo batho ba habo ba neng ba le ho bona le seo Molimo a neng a batla hore a se profete ka bokamoso ba bona. O ne a lakatsa eka hlooho ea hae e ka be e le mohloli oa metsi ’me mahlo a hae e le seliba e le hore o ne a ka lla a sa khaotse. Jeremia o ne a e-na le lebaka la hore a sareloe ka lebaka la boemo ba sechaba sa habo. (Jer. 9:1-3; bala Jeremia 8:20, 21.) Bajuda ba ne ba tsoela pele ba hana molao oa Molimo ’me ba ne ba sa mamele lentsoe la Jehova, kahoo, ba ne ba tla oeloa ke tlokotsi.—Jer. 6:19; 9:13.

² Leha ho le joalo, batho ba Juda ba neng ba rata ho utloa ha baeta-pele ba bona ba bolumeli ba ntse ba re, ‘lintho li tsamaea hantle,’ ba ne ba hlile ba se na taba le hore na Jehova o nka boitšoaro ba bona joang. (Jer. 5:31; 6:14) Ba ne ba tšoana le bakuli ba batlang ngaka e tla ba bolella mantsoe a khothatsang empa e iphapanyetsa matšoao a bontšang hore e hlile baa kula. Haeba u ne u kula haholo, na u ne u ke ke ua batla hore ngaka e nepe hore na u tšoeroe ke lefu lefe e le hore u tsebe ho fumana pheko kapele? Ka tsela ea moea, Bajuda ba mehleng ea Jeremia ba ne ba lokela hore ebe ba ile ba batla hore boemo ba bona ba moea bo sekasekoe ka botšepehi. Ba ne ba lokela hore ebe ba ile ba botsa ba re: “Jehova o hokae?”—Jer. 2:6, 8.

 3. (a) Ke tsela efe eo ka eona Bajuda ba ka beng ba ile ba araba potso e reng, “Jehova o hokae?” (b) Tsela e ’ngoe eo Bajuda ba neng ba ka batla Jehova ka eona ke efe?

³ Haeba Bajuda ba ne ba ka botsa ba re, “Jehova o hokae?” seo se ne se tla be se bolela hore ba ne ba batla hore Molimo a ba tataise ha ba lokela ho etsa liqeto, ebang ke tse khōlō kapa tse nyenyane. Ka nako eo, Bajuda ba ne ba sa etse joalo. Empa ka mor’a hore Jerusalema e timetsoe le ka mor’a hore ba khutle Babylona, ba ne ba lokela ho ‘batla Jehova.’ Ha ba etsa joalo, ba ne ba tla mo fumana ’me ba tsebe litsela tsa hae. (Bala Jeremia 29:13, 14.) Seo ba ne ba ka se etsa joang? Tsela e ’ngoe e ne e le ka hore ba buisane le Molimo ka thapelo e tsoang botebong ba pelo, ba kōpe hore a ba tataise. Morena Davida o ne a e-na le maikutlo a joalo. O ile a kōpa Molimo a re: “Ntsebise litsela tsa hao, Jehova; nthute litsela tsa hao.” (Pes. 25:4) Hlokomela hore na Ea Utloang thapelo o ile a fana ka memo efe ka Jeremia selemong sa leshome sa puso ea Morena Tsedekia. “Hoeletsang ho ’na, ke tla le araba ’me ke le bolelle hang-hang lintho tse khōlō le tse ke keng tsa utloisisoa tseo le sa kang la li tseba.” (Jer. 33:3) Haeba morena le sechaba seo sa bakoenehi ba ne ba ka kōpa thuso ho Molimo, o ne a ka ba bolella lintho “tse ke keng tsa utloisisoa,” e leng ho timetsoa ha Jerusalema le ho tsosolosoa ha eona ka mor’a lilemo tse 70.

4, 5. Batho ba Molimo ba ka be ba ile ba batla Jehova ka litsela life tse ling?

⁴ Tsela e ’ngoe eo Bajuda ba ka beng ba batlile Jehova ka eona ke ka ho ithuta histori le ho fumana hore na o ile a sebelisana le batho ba hae joang. Ka tsela eo, ba ka be ba ile ba hopola hore na ke lintho life tseo Molimo a neng a ile a li amohela le hore na ke life tse neng li ile tsa mo halefisa. Ba ne ba e-na le libuka tse ngotsoeng ke Moshe le litlaleho tse ’maloa tsa histori tse bululetsoeng hammoho le litlaleho tsa histori ea marena a Iseraele le a Juda. Hoja ba ne ba ile ba thuisa ka lintho tseo ba ba ba mamela baprofeta ba ’nete ba Molimo, Bajuda ba mehleng ea Jeremia ba ka be ba ile ba utloisisa karabo ea potso e reng, “Jehova o hokae?”

⁵ Tsela ea boraro eo Bajuda bao ba ka beng ba ile ba batla Jehova ka eona, e ka be e bile ka ho ithuta ka lintho tse neng li ba hlahetse le tse neng li hlahetse batho ba bang. Hase hore ba ne ba lokela ho ithuta ntho e ’ngoe le e ’ngoe ka ho etsa liphoso pele, empa ba ka be ba ile ba rua molemo ka hore ba nahane ka seo bona ka bobona ba neng ba se entse nakong e fetileng le hore na Jehova o ne a talima seo ba se entseng joang. Hoja ba ne ba ile ba e-ba hlokolosi, ba ka be ba ile ba utloisisa hore na Molimo o ne a talima boitšoaro ba bona joang.—Liprov. 17:10.

 6. Mohlala oa Jobo o ka u khothatsa joang?

⁶ Empa a re ke re boneng hore na taba ena e sebetsa joang mehleng ea rōna. Ha u etsa liqeto le ha u khetha hore na u tla phela joang, na kamehla u ’nile ua botsa hore na “Jehova o hokae?” Ba bang ba ka ’na ba nahana hore ha baa ba hlokolosi joalokaha ba ne ba lokela. Haeba ka tsela e itseng sena se etsahetse ho uena, u se ke ua nyahama. Le mopatriareka Jobo ea tšepahalang o ile a ba le bothata tabeng ena. Ha a ne a hateletsoe, o ile a inahana boeena feela. Elihu o ile a tlameha ho mo hopotsa hore na tloaelo ea batho ke efe, a re: “Ha ho ea itseng, ‘Molimo Moetsi oa ka e Moholo o hokae?’” (Jobo 35:10) Elihu o ile a khothatsa Jobo a re: “Iponahatse u ela hloko mesebetsi e hlollang ea Molimo.” (Jobo 37:14) Ho ne ho hlokahala hore Jobo a hlokomele mesebetsi ea Jehova e meholo e neng e mo potolohile le tsela eo Molimo a neng a sebelisana le batho ka eona. Lintho tse ileng tsa hlahela Jobo li ile tsa etsa hore a utloisise litsela tsa Jehova. Ka mor’a hore a mamelle tsietsi ea hae le hore a bone hore na Jehova o ile a sebetsa taba eo joang, Jobo o ile a re: “Ke buile, empa ke ne ke sa utloisise lintho tse hlollang haholo bakeng sa ka, tseo ke sa li tsebeng. Ke utloile ka uena ka monyenyetsi, empa joale leihlo la ka lea u bona.”—Jobo 42:3, 5.

 7. Joalokaha setšoantšo se leqepheng la 116 se bontša, re tlil’o tšohla’ng?

⁷ Ha e le Jeremia eena, o ile a tsoela pele a batla Jehova ’me o ile a mo fumana. Ho fapana le batho ba habo, ka lilemo tse mashome tseo Jeremia a neng a sebeletsa Molimo ka botšepehi ka tsona, o ile a tsoela pele a botsa a re: “Jehova o hokae?” Khaolong ena, re tla bona hore na ho ea ka mohlala oa Jeremia, re ka batla Jehova joang ra ba ra mo fumana ka thapelo, ka ho ithuta le ka lintho tseo re thulanang le tsona bophelong.—1 Likron. 28:9.

 8. Jeremia o ile a rapela Molimo maemong afe?

⁸ Lilemong tseo Jeremia a sebelelitseng ka tsona e le ’muelli oa Molimo sechabeng sa Juda, o ile a batla Jehova ka ho etsa lithapelo tse tsoang botebong ba pelo. O ile a kōpa Molimo hore a mo tšehetse ha a ne a lokela ho bolela molaetsa oo batho ba neng ba sa o batle, ha a ne a ikutloa eka a ke ke a khona ho tsoela pele ka mosebetsi le ha a ne a ipotsa hore na ke hobane’ng ha lintho tse ling li ne li etsahala. Molimo o ile a mo araba ’me a mo bontša hore na o ne a lokela ho tsoela pele joang. Nahana ka mehlala e seng mekae.

 9. (a) Jeremia o ile a hlalosa maikutlo a hae joang ho Jeremia 15:15, 16, hona Jehova o ile a mo araba joang? (b) U nahana hore ke hobane’ng ha e le habohlokoa hore u tšolle maikutlo a hao ha u rapela?

⁹ Ka lekhetlo le leng ha Jeremia a ne a fuoa molaetsa oa kahlolo hore a o phatlalatse, o ne a ikutloa eka motho e mong le e mong o ne a mo rohaka. Kahoo, o ile a kōpa Molimo hore a mo hopole. Nahana ka thapelo ea hae e tlalehiloeng ho Jeremia 15:15, 16, moo a bolelang hore na o ile a ikutloa joang ka karabo ea Molimo. (E bale.) Thapelong eo, Jeremia o ile a ntša bohloko ba hae. Leha ho le joalo, ha a fumana mantsoe a Molimo ’me a a ja ka tsela ea tšoantšetso, o ile a thaba! Jehova o ile a mo thusa hore a ananele tlotla ea ho bitsoa ka lebitso la Molimo le ea ho phatlalatsa molaetsa oa Molimo. Jeremia o ile a bona ka ho hlaka hore na Jehova o ne a ameha joang tabeng ena. Re ithuta’ng tabeng eo?

10. Molimo o ile a etsa joang ha Jeremia a ne a re o ne a ke ke a hlola a bua ka lebitso la Jehova?

¹⁰ Ka lekhetlo le leng, ka mor’a hore moprista Pashkure mor’a Imere a mo otle, Jeremia o ile a re o ne a ke ke a hlola a bua ka lebitso la Jehova. Molimo o ile a araba Jeremia joang ha a ne a tšollela maikutlo a hae ho eena ka thapelo? (Bala Jeremia 20:8, 9.) Bibele ha e re bolelle hore Molimo o ile a araba Jeremia ka hore a bue le eena a le leholimong. Empa lentsoe la Molimo le ile la tšoana le mollo o tukang o koaletsoeng masapong a Jeremia, ’me ho ne ho se letho leo a neng a ka le etsa haese hore a le phatlalatse. Ka sebele, kaha Jeremia o ile a bolella Molimo maikutlo a hae ka botšepehi a ba a lumela hore a susumetsoe ke seo a neng a tseba hore ke thato ea Molimo, seo se ile sa mo susumetsa hore a tsoele pele ho etsa thato ea Molimo.

11, 12. Jeremia o ile a fumana karabo joang potsong ea hae ea hore na ke hobane’ng ha ho ne ho bonahala eka ba khopo ba ne ba atleha?

¹¹ Ha Jeremia a bona hore batho ba khopo ba ne ba atleha, o ile a tšoenyeha. (Bala Jeremia 12:1, 3.) Le hoja e se hore o ne a belaella ho loka ha Jehova, moprofeta Jeremia o ne a batla hore ‘pelaelo’ ea hae e arabeloe. Taba ea hore ebe o ile a bua ka bolokolohi e bontša ka ho hlaka hore o ne a e-na le kamano e matla le Molimo, e batlang e tšoana le eo ngoana a bang le eona le ntate oa hae eo a mo ratang. Jeremia o ne a mpa a sa utloisise hore na ke hobane’ng ha Bajuda ba bangata ba ne ba atleha le hoja ba ne ba le khopo. Na Jeremia o ile a fumana karabo e khotsofatsang? Jehova o ile a mo tiisetsa hore O ne a tla fothola batho ba khopo. (Jer. 12:14) Ha Jeremia a bona hore na litaba tseo a neng a li rapeletse ho Molimo li ne li tsamaea joang, e tlameha ebe tšepo ea hae ea hore Molimo o na le toka e ile ea tiea. Ka lebaka leo, e tlameha ebe Jeremia o ile a lula a rapela Molimo le ho feta, a tšollela pelo ea hae ho Ntate oa hae.

¹² Ho ella qetellong ea puso ea Tsedekia, nakong eo Bababylona ba neng ba thibeletse Jerusalema, Jeremia o ile a re Jehova ke motho “eo mahlo a hae a talimileng litsela tsohle tsa bara ba batho, e le hore [a] fe e mong le e mong ho ea ka litsela tsa hae le ho ea ka litholoana tsa mesebetsi ea hae.” (Jer. 32:19) Jeremia o ne a bona hore na maikutlo a Jehova ke afe ka toka, a bona hore ka sebele Molimo o talimile seo motho e mong le e mong a se etsang ’me o mamela lithapelo tse tiileng tsa bahlanka ba hae. Le bona ba ne ba tla tsoela pele ba bona hore O fa “e mong le e mong ho ea ka litsela tsa hae le ho ea ka litholoana tsa mesebetsi ea hae.”

13. Ke hobane’ng ha u kholisehile hore thato ea Molimo e tla phethahala?

¹³ Re ka ’na ra nahana hore ha re na pelaelo mabapi le toka ea Molimo le bohlale boo a finyellang thato ea hae ka bona le boo a sa ntseng a tla e finyella ka bona. Leha ho le joalo, re ka rua molemo ka hore re nahane ka se ileng sa hlahela Jeremia le ka hore lithapelong tsa rōna re hlalose hore na re ikutloa joang pelong. Ha re itlhalosa ka tsela eo, seo se ka tiisa tšepo eo re nang le eona ho Jehova, ea hore joang kapa joang thato ea hae e tla phethahala. Le haeba hona joale re sa utloisise ka botlalo hore na ke hobane’ng ha lintho li etsahala ka tsela eo li etsahalang ka eona, kapa hore na ke hobane’ng ha thato ea Molimo e nka nako eo e e nkang ho phethahala, re ka mo bolella thapelong hore re kholisehile hore ke eena ea laolang lintho ka botlalo. Thato ea hae e tla phethahala ka tsela eo a tsebang hore ke eona e molemo ka ho fetisisa ebile e tla nka nako eo a tsebang hore e molemo ka ho fetisisa. Sena ke ’nete; ha re na lebaka la ho ba le lipelaelo. Re tla tsoela pele re botsa re re, “Jehova o hokae?” ka tsela ea hore ka thapelo re batle ho utloisisa thato ea hae le hore re bone bopaki ba hore na e phethahala joang.—Jobo 36:5-7, 26.

14. Re tseba joang hore Jeremia o ile a batlisisa histori ea batho ba Molimo?

¹⁴ Jeremia o ne a hlokomela hore ha motho a ne a botsa potso e reng, “Jehova o hokae?” o ne a tla be a bontša hore ho hlokahala hore a ‘tsebe Jehova.’ (Jer. 9:24) E tlameha ebe o ne a ithutile histori ea batho ba Molimo nakong eo a neng a ntse a ngola libuka tseo hona joale li tsejoang e le buka ea 1 Marena le 2 Marena. Ka ho khetheha o ile a bua ka ‘buka ea litaba tsa Solomone,’ ‘buka ea litaba tsa matsatsi a marena a Iseraele,’ le ‘buka ea litaba tsa matsatsi a marena a Juda.’ (1 Mar. 11:41; 14:19; 15:7) Kamoo ho bonahalang kateng, o ile a utloisisa hore na Jehova o ne a ile a sebetsana le maemo a fapa-fapaneng joang. Jeremia o ile a bona hore na Jehova o ne a thabisoa ke eng le hore na O ne a nka liqeto tseo batho ba li etsang joang. Hape, o ne a ka bala mangolo a bululetsoeng a neng a le teng ka nako eo, a kang a neng a ngotsoe ke Moshe, Joshua, Samuele, Davida le Solomone. Ha ho pelaelo hore o ne a tseba ka baprofeta ba pele ho eena esita le ka ba mehleng ea hae. Thuto ea botho e ile ea tsoela Jeremia molemo joang?

15. E ka ’na eaba patlisiso eo Jeremia a ileng a e etsa boprofeteng ba Elia e ile ea mo thusa joang?

¹⁵ Jeremia o ile a ngola tlaleho e buang ka Jezebele, mosali ea khopo oa Morena Akabe oa Samaria. Tlaleho ea hae e ne e akarelletsa le phatlalatso e ileng ea etsoa ke Elia ea hore Jezebele o ne a tla jeoa ke lintja tšimong ea Jezriele. (1 Mar. 21:23) Ua tseba hore tumellanong le tlaleho eo ea Jeremia, lilemo tse 14 hamorao, Jezebele o ile a lahleloa ka ntle ka fensetere, pere ea Jehu ea mo hatakela a ba a jeoa ke lintja. (2 Mar. 9:31-37) E tlameha ebe patlisiso eo Jeremia a ileng a e etsa ka boprofeta ba Elia le phethahatso ea bona esita le lintlha tsa bona tse qaqileng, li ile tsa matlafatsa tumelo ea hae lentsoeng la Molimo. Ka sebele, tumelo ea hae e neng e matlafalitsoe ke ho ithuta lintho tseo Jehova a neng a li entse nakong e fetileng, ke eona e ileng ea etsa hore a mamelle mosebetsing oa hae oa boprofeta.

16, 17. U nahana hore ke hobane’ng ha Jeremia a ile a mamella ho lemosa marena a khopo a mehleng ea hae?

¹⁶ A re ke re hlahlobeng mohlala o mong hape. U nahana hore ke eng e ileng ea thusa Jeremia hore le hoja a ne a hlorisoa, a tsoele pele ho fana ka temoso ho marena a khopo a kang Jojakime le Tsedekia? Lebaka le ka sehloohong ke hore Jehova o ile a etsa hore Jeremia e be “motse o etselitsoeng qhobosheane le tšiea ea tšepe le marako a koporo” ho marena a Juda. (Jer. 1:18, 19) Empa ha rea lokela ho lebala hore Jeremia o ne a entse lipatlisiso tse batsi ka puso ea marena a fetileng a Juda le a Iseraele. O ne a tlalehile hore Manase o ne a hahetse “makhotla ’ohle a maholimo lialetare mabaleng a mabeli a ntlo ea Jehova,” a entse mora oa hae sehlabelo mollong ’me a tšolotse mali a mangata a batho ba se nang molato. (2 Mar. 21:1-7, 16; bala Jeremia 15:4.) Leha ho le joalo, e tlameha ebe Jeremia o ne a tseba hore e ile eare ha Manase a ikokobetsa ’me a tsoela pele ho rapela Jehova, Jehova o ile “a itumella hore a kōptjoe ka tieo,” ’me O ile a khutlisetsa morena setulong sa hae.—Bala 2 Likronike 33:12, 13.

¹⁷ Libukeng tseo Jeremia a li ngotseng, ha aa ka a bua ka mohau oo Jehova a ileng a o bontša Manase. Empa Manase o ile a shoa lilemo tse ka bang 15 feela pele Jeremia a qala mosebetsi oa hae oa boprofeta. Kahoo, e tlameha ebe Jeremia o ne a ile a utloa hore na ho ile ha etsahala’ng ha morena a ne a bakela bokhopo ba hae ba nako e fetileng. E tlameha ebe ho etsa lipatlisiso ka boitšoaro ba Manase bo tšabehang hammoho le liphello tsa bona, ho ile ha thusa Jeremia ho bona bohlokoa ba ho khothalletsa marena a kang Tsedekia hore a batle mohau oa Jehova le mosa oa hae o lerato. Esita le morena ea neng a tumme hampe ka lebaka la borapeli ba hae ba litšoantšo le tšollo ea mali o ne a ka baka ’me a tšoareloa. Haeba u ne u le boemong boo Jeremia a neng a le ho bona, na liketsahalo tse neng li ama Manase li ka be li ile tsa u khothatsa, tsa u fa mabaka a hore u mamelle nakong ea puso ea marena a mang a mabe?

18. Jeremia o ne a ka ithuta’ng mohlaleng oa Uria, hona ke hobane’ng ha u araba joalo?

¹⁸ Nakong eo Jeremia a neng a sebetsa joaloka moprofeta, e tlameha ebe ho na le seo a ileng a ithuta sona ha a bona hore na baprofeta ba mehleng ea hae ba ne ba etsa lintho joang maemong a itseng. E mong oa bona ke moprofeta Uria, ea ileng a profeta khahlanong le Jerusalema le Juda nakong ea puso ea Jojakime. Leha ho le joalo, ka lebaka la ho tšaba Morena Jojakime, Uria o ile a balehela Egepeta. Ka mor’a moo, morena o ile a romela banna hore ba e’o mo lata Egepeta, eaba oa mo bolaea. (Jer. 26:20-23) Na u nahana hore ho na le seo Jeremia a ileng a ithuta sona ho see se ileng sa hlahela Uria? Taba ea hore ebe Jeremia o ile a tsoela pele a lemosa Bajuda ka timetso e neng e ba tlela—a bile a ba lemosa le ka tempeleng—e bontša hore e tlameha ebe ho na le seo a neng a ithutile sona. Jeremia o ile a lula a le sebete, ’me Jehova ha aa ka a mo lahla. E tlameha ebe Molimo o ile a susumetsa Akikame, e leng mora oa Shafane, hore a sireletse Jeremia ea sebete.—Jer. 26:24.

19. Jeremia o ile a bona eng ha Jehova a ne a phehella ho romela batho ba Hae baprofeta?

¹⁹ Ho na le seo Jeremia a ileng a boela a ithuta sona ha Jehova a ne a mo sebelisa ho lemosa batho ba Hae. Selemong sa bone sa puso ea Morena Jojakime, Jehova o ile a bolella Jeremia hore a ngole mantsoe ’ohle ao A neng a a buile ho tloha mehleng ea Josiase ho fihlela nakong eo. Ke hobane’ng ha Molimo a ile a mo fa taelo ee? E ne e le ho khothalletsa batho hore ba tlohele ho etsa bobe e le hore ba tšoareloe. (Bala Jeremia 36:1-3.) Jeremia, ea neng a tsoha esale hoseng ho fana ka melaetsa ea temoso e tsoang ho Molimo, o ile a ba a kōpa sechaba ka tieo hore se tlohele mekhoa ea sona e nyonyehang. (Jer. 44:4) Na ha hoa hlaka hore e tlameha ebe Jeremia o ile a bona ka se etsahetseng ho eena hore Molimo o ne a rometse baprofeta hobane a ne a qenehela batho ba Hae? Hona na seo se ne se ke ke sa etsa hore Jeremia le eena a be le qenehelo? (2 Likron. 36:15) Kahoo, u ka utloisisa hore ha Jeremia a ne a pholoha timetso ea Jerusalema, o ne a ka re: “Ke liketso tsa mosa o lerato oa Jehova hore ebe ha rea fela, hobane ka sebele mehauhelo ea hae e ke ke ea fela. E mecha hoseng ho hong le ho hong.”—Lillo 3:22, 23.

20. U ka etsisa Jeremia joang ha u batla Jehova?

²⁰ Na liqetong tseo u li etsang letsatsi le letsatsi u etsa bonnete ba ho batla hore na thato ea Molimo ke efe ka ho botsa hore, “Jehova o hokae?” (Jer. 2:6-8) Ho fapana le Bajuda ba mehleng ea hae, kamehla Jeremia o ne a e-ea ho Ea Matla ’Ohle hore a mo thuse ho bona hore na a latele tsela efe. Ha ho pelaelo hore ke bohlale hore e mong le e mong oa rōna a etsise Jeremia ka hore letsatsi le letsatsi ha a etsa liqeto, a batle hore na maikutlo a Jehova ke afe.

21. Ke thapelo ea mofuta ofe e ka ’nang ea u thusa ha u le tšebeletsong, mohlomong ha motho e mong a u halefela?

²¹ Hase hore qeto e lokela ho ba e mabapi le ntho e khōlō kapa phetoho e khōlō bophelong. Ka mohlala, na u lokela ho batla Jehova mabapi le ho ea tšebeletsong ea tšimo letsatsing leo u neng u rerile ho ea ka lona? Mohlomong ha u tsoha u fumana hore maru a thibile, e leng boemo bo sa thabiseng. Mohlomong tšimo eo ho lokelang ho etsoa mosebetsi oa ntlo le ntlo ho eona letsatsing leo e sebelitsoe hangata. U ka ’na ua hopola hore batho ba bang ba ’nile ba u leleka ka bohlale kapa ka ntšoe li sa fohloa. Hoseng hoo, na ka thapelo u ka botsa, “Jehova o hokae?” Haeba u etsa joalo, seo se ka ’na sa u thusa hore u nahane hore na molaetsa oo u tla o bolela o molemo hakae le ho hlokomela haholoanyane hore thato ea Molimo ke hore u o bolele. Joale u ka ’na ua utloa ha lentsoe la Jehova e e-ba mohloli oa nyakallo le thabo e khaphatsehang ho uena, joalokaha le ile la e-ba joalo ho Jeremia. (Jer. 15:16, 20) Haeba hamorao ha u le tšimong u kopana le motho ea bohale kapa ea bileng a leng mabifi, u ka bolella Molimo maikutlo a hao ka thapelo. Na u tla etsa joalo? U se ke ua lebala hore a ka u fa moea oa hae o halalelang e le hore u ka etsa lintho ka tsela e loketseng, ’me takatso ea hao ea ho bolela molaetsa oa Molimo e tla etsa hore u hlōle ho nyahama.—Luka 12:11, 12.

22. Ke hobane’ng ha lithapelo tse ling li ka ’na tsa thibeloa?

²² Ke hantle ho hlokomela hore lithapelo tse ling li ka sitisoa kapa tsa thibeloa. (Bala Lillo Tsa Jeremia 3:44.) Jehova ha aa ka a mamela lithapelo tsa Bajuda ba marabele kaha ba ne ba ‘faposa tsebe ea bona ho eena’ ’me ba tsoela pele ho etsa lintho tse khahlanong le molao. (Liprov. 28:9) E tlameha ebe seo Jeremia a neng a lokela ho ithuta sona se ile sa hlaka, ’me se lokela ho hlaka le ho rōna: Haeba motho a sa etse lintho tumellanong le lithapelo tsa hae, seo se tla soabisa Molimo ’me se ka etsa hore A se ke a hlola a mamela lithapelo tsa motho ea joalo. Ka sebele re lokela ho qoba seo ka litsela tsohle.

23, 24. (a) Ke sefe se hlokahalang e le hore re fumane hore na thato ea Jehova ke efe? (b) U ka etsa hore thuto ea botho e u tsoele molemo haholo joang?

²³ Ho phaella tabeng ea ho rapela Jehova ka tieo hore a re tataise, re lokela ho tsoela pele re etsa thuto ea botho, e leng tsela e ka sehloohong ea ho fumana hore na thato ea Jehova ke efe. Tabeng ena, re na le monyetla o fetang oa Jeremia. Rōna re na le Bibele e feletseng. Joaloka Jeremia ea ileng a etsa lipatlisiso tse matla e le hore a ngole tlaleho ea hae ea histori e bululetsoeng, u ka etsa lipatlisiso Lentsoeng la Molimo ua ba ua batla tataiso ea Molimo ka hore u botse, “Jehova o hokae?” Ha u batla ho tseba thato ea hae, u bontša hore ua mo tšepa ’me “ka sebele [u] tla ba joaloka sefate se lenngoeng haufi le metsi, seo metso ea sona e namelang molatsoaneng.”—Bala Jeremia 17:5-8.

²⁴ Ha u ntse u bala ebile u thuisa ka Mangolo a Halalelang, leka ho hlokomela hore na Jehova o batla hore u etse’ng maemong a fapa-fapaneng. U ka sheba melao-motheo eo u batlang ho e hopola le ho e sebelisa bophelong ba hao. Ha u bala litlaleho tsa histori, melao ea Molimo, melao-motheo ea hae le mantsoe a bohlale a fumanoang Lentsoeng la Molimo, nahana hore na litemana tseo li lokela ho ama liqeto tseo u li etsang letsatsi le letsatsi joang. Ha u botsa hore na “Jehova o hokae?” a ka sebelisa Lentsoe la hae le ngotsoeng ho u bontša hore na u sebetsane joang le maemo ao u thulanang le ’ona esita le a mabe ka ho fetisisa. Ka Bibeleng u ka ’na ua fumana ‘lintho tse ke keng tsa utloisisoa tseo u neng u sa ka ua li tseba’ kapa ua li utloisisa.—Jer. 33:3.

25, 26. Ke hobane’ng ha lintho tse re etsahallang li ka re tsoela molemo?

²⁵ Ho phaella moo, u ka ’na ua nahana ka lintho tse ileng tsa u etsahalla kapa tse etsahaletseng batho ba bang. Ka mohlala, u ka ’na ua bona hore ba seng bakae ba khaotsa ho tšepa Jehova joalokaha ho ile ha etsahala ka Uria. (2 Tim. 4:10) U ka ithuta ho seo ba se entseng ’me ua qoba ho hlaheloa ke mathata a tšoanang. Kamehla hopola mosa o lerato oa Jehova ha a sebetsana le uena, u hopole hore Jeremia le eena o ile a ananela mehauhelo ea Molimo le qenehelo ea hae. Ho sa tsotellehe hore na boemo ba hao bo boima hakae, u se ke ua nahana hore Ea Phahameng ka ho Fetisisa ha a u tsotelle. Ua u tsotella feela joalokaha a ne a tsotella Jeremia.

²⁶ Ha u ntse u nahana ka tsela eo Jehova a sebelisanang le batho ka eona kajeno, u tla hlokomela hore letsatsi le letsatsi o tataisa batho ka litsela tse fapa-fapaneng. Morali e mong oabo rōna e mocha oa Japane ea bitsoang Aki, o ne a ikutloa eka ha a tšoanelehe ho ba Mokreste. Ka letsatsi le leng ha a ne a le tšebeletsong ea tšimo le mosali oa mopotolohi, Aki o ile a re: “Ke utloa eka Jehova o haufi le ho ntšoela molomong oa hae, empa ke itšoareletse molomong oa hae, ke mo kōpa hore a mpe a mphe monyetlanyana o mong hape.” Mosali oa mopotolohi o ile a mo sheba ka mahlong eaba o re: “Ha ke e-s’o bone eka u Mokreste ea foofo!” Hamorao, Aki o ile a nahanisisa ka mantsoe ao a khothatsang. Ha e le hantle, ho ne ho se ntho e bontšang hore Jehova o kile a mo nka e le motho ea foofo. Ka mor’a moo, Aki o ile a rapela Jehova a re: “Ke kōpa u nthomele hohle moo u batlang. Ke tla etsa sohle seo u batlang hore ke se etse.” Hoo e ka bang hona nakong eo, o ile a chakela naheng e ’ngoe moo ho neng ho e-na le sehlopha se senyenyane sa batho ba buang Sejapane, se neng se hloka motho ea buang puo eo ea neng a ka lula moo eaba o sebetsa le sona. Ho ile ha fumaneha hore Aki o ne a hlahetse naheng eo, e leng se ileng sa etsa hore ho be bonolo hore a fallele moo e le hore a e’o thusa. Empa o ne a tla lula hokae? Morali e mong oabo rōna eo morali oa hae a neng a sa tsoa tloha lapeng o ile a mo fa kamore. Aki o ile a re: “Lintho li ile tsa re khaqa! joalokaha eka likotoana tsa papali ea morabaraba li kena hantle moo li tšoanetseng; Jehova o ne a mpulela tsela.”

27. Ke hobane’ng ha potso e reng, “Jehova o hokae?” e lokela ho u susumetsa?

²⁷ Bara le barali babo rōna ba bangata ba ka pheta liketsahalo tseo ho tsona bona ka bobona ba ileng ba bona hore Molimo oa ba tataisa, mohlomong ha ba ne ba bala Bibele kapa ba etsa thuto ea botho. E ka ’na eaba le uena u ’nile ua etsahalloa ke ntho e tšoanang. Liketsahalo tse joalo li lokela ho matlafatsa kamano ea hao le Jehova ’me li u susumetse hore u mo rapele hangata le ka matla le ho feta. Kholiseha hore ha letsatsi le letsatsi re ntse re botsa re re, “Jehova o hokae?” o tla re bontša tsela ea hae.—Esa. 30:21.