Jeremia
11 Ana ke mantsoe ao Jehova a ileng a a bolella Jeremia: 2 “Batho bohle ba ke ba utloe mantsoe a selekane sena.
U* a bolelle batho ba Juda le baahi ba Jerusalema. 3 U re ho bona: ‘Jehova Molimo oa Iseraele o re: “Ho rohakoe motho ea sa mameleng mantsoe a selekane sena,+ 4 ao ke a laetseng baholo-holo ba lona mohla ke ba ntšang Egepeta,+ seboping sa mollo o qhibilihisang tšepe.+ Ke ile ka re: ‘Mamelang lentsoe la ka, le etse lintho tsohle tseo ke le laelang tsona. Le tla ba sechaba sa ka ’me ke tla ba Molimo oa lona+ 5 e le hore nka phetha kano eo ke e hlapanyelitseng baholo-holo ba lona, ea ho ba fa naha e phallang lebese le mahe a linotši.+ Kano eo e ntse e sebetsa le letsatsing lena.’”’”
Eaba ke re: “Amen,* Jehova.”
6 Eaba Jehova o re ho ’na: “Phatlalatsa mantsoe ana ’ohle metseng ea Juda le literateng tsa Jerusalema u re: ‘Utloang mantsoe a selekane sena ’me le a phethe. 7 Etsoe ke buile le baholo-holo ba lona ka thata mohla ke neng ke ba ntša Egepeta ka re: “Mamelang lentsoe la ka.” Ke fane ka keletso ena ka makhetlo* ho fihlela letsatsing lena.+ 8 Empa ha baa ka ba mamela kapa ba sekeha tsebe. Ho e-na le hoo, kaofela ha bona ba ne ba le manganga ’me ba ’na ba latela lipelo tsa bona tse khopo.+ Kahoo, ka ba fa kotlo ho ea ka mantsoe ’ohle a selekane sena ao ke ba laetseng hore ba a phethe eaba ba hana ho a phetha.’”
9 Eaba Jehova o re ho ’na: “Ho na le ’mommori har’a batho ba Juda le baahi ba Jerusalema. 10 Ba khutletse liphosong tsa khale tsa baholo-holo ba bona ba hanneng ho mamela mantsoe a ka.+ Le bona ba latetse melimo e meng ’me ba e sebeletsa.+ Ba ntlo ea Iseraele le ba ntlo ea Juda ha baa tšepahalla selekane sa ka seo ke se entseng le baholo-holo ba bona.+ 11 Ka hona, Jehova o re: ‘Ke ba tlisetsa tlokotsi+ eo ba ke keng ba khona ho e baleha. Ha ba nkhoeletsa ho kopa thuso, nke ke ka ba mamela.+ 12 Batho ba metse ea Juda le baahi ba Jerusalema ba tla ea ho melimo eo ba e etsetsang mahlabelo* ho e kopa thuso+ empa e ke ke ea ba pholosa ho hang nakong eo ba oeloang ke tlokotsi. 13 Etsoe melimo ea hao e mengata joaloka metse ea hao, uena Juda. U entse lialetare ’me holim’a tsona u etsa mahlabelo bakeng sa Baale, molimo ea hlabisang lihlong. Lialetare tseo li ngata joaloka literata tsa Jerusalema.’+
14 Ha e le uena,* u se ke oa rapella sechaba sena. U se ke oa hoeletsa ho se kopela thuso kapa oa se rapella+ hobane ke tla be ke sa mamela ha se nkhoeletsa nakong eo se leng tlokotsing.
15 Batho ba ka bao ke ba ratang ba na le tokelo efe ea ho ba ka tlung ea ka,
Ha bongata ba bona bo phethile merero e khopo?
Na ba tla sebelisa nama e halalelang* ho etsa hore tlokotsi e suthele hole nakong eo e u* tlelang?
Na u tla thaba ka nako eo?
16 Jehova o kile a u bitsa sefate sa mohloaare se atlehileng haholo,
Se setle se bileng se nang le litholoana tse ntle.
Empa ha e-ba le lerata le leholo ’me a u chesa ka mollo.
Ba robile makala a hao.
17 Jehova oa mabotho ea u lemmeng,+ o phatlalalitse hore tlokotsi e tla u tlela ka lebaka la bokhopo bo entsoeng ke ba ntlo ea Iseraele le ba ntlo ea Juda, ba ntšitetsoeng ka ho etsetsa Baale mahlabelo.”+
18 Jehova, u mpoleletse e le hore ke tsebe.
Ka nako eo, u entse hore ke bone hore na ba ntse ba etsa’ng.
19 Ke ne ke le joaloka konyana e bonolo e tl’o hlajoa.
Ke ne ke sa tsebe hore ba ntherile ba ntse ba re:+
“A re senyeng sefate le litholoana tsa sona,
Re mo bolaee
E le hore lebitso la hae le se ke la hlola le hopoloa.”
20 Empa Jehova oa mabotho o ahlola ka toka.
O hlahloba menahano e tebileng* le pelo.+
E-re ke bone ha u iphetetsa ho bona
Etsoe ke siile nyeoe ea ka matsohong a hao.
21 Ka hona, Jehova o re ka batho ba Anathothe+ ba batlang ho u bolaea le ba reng: “U se ke oa profeta ka lebitso la Jehova,+ ho seng joalo re tla u bolaea ka matsoho a rona,” 22 Jehova oa mabotho o re: “Ke tl’o ba ahlola. Bara le barali ba bona ba tla bolaoa ke tlala.+ Bahlankana ba tla bolaoa ka sabole.+ 23 Ho ke ke ha e-ba le ba setseng har’a bona hobane ke tla tlisetsa batho ba Anathothe+ tlokotsi ka selemo sa ho ahloloa ha bona.”