Jeremia

26 Ha Jojakime+ mora oa Josiase, morena oa Juda a qala ho busa, Jehova o ile a re ho Jeremia: 2 “ ’Na Jehova ke re: ‘Ema lebaleng la ntlo ea Jehova ’me u bue le* batho bohle ba metse ea Juda ba tlang ka tlung ea Jehova ho tla rapela.* U ba bolelle ntho e ’ngoe le e ’ngoe eo ke u laelang hore u ba bolelle eona. U se ke oa siea letho. 3 Mohlomong ba tla mamela ebe e mong le e mong o tlohela mekhoa ea hae e mebe ’me ke tla fetola maikutlo a ka* ka tlokotsi eo ke rerileng ho ba tlisetsa eona ka lebaka la mesebetsi ea bona e mebe.+ 4 U re ho bona: “Jehova o re: ‘Haeba le sa ’mamele ka hore le latele molao* oa ka oo ke le fileng oona 5 le bile le sa mamele mantsoe a bahlanka ba ka e leng baprofeta bao ke ba rometseng ho lona ka makhetlo-khetlo,*+ 6 ke tla etsa hore ntlo ena e be joaloka Shilo,+ ke felise motse ona ’me lichaba tsohle tsa lefatše li tla etsa mohlala ka oona ha li bua ka metse e rohakiloeng.’”’”+

7 Eaba baprista, baprofeta le batho bohle ba utloa Jeremia a ntse a bua mantsoe ana ka tlung ea Jehova.+ 8 Ha Jeremia a qetile ho bua lintho tsohle tseo Jehova a neng a mo laetse hore a li bolelle batho, joale baprista, baprofeta le batho bohle ba mo tšoara eaba ba re: “U tl’o shoa. 9 Ke hobane’ng ha u profetile ka lebitso la Jehova, oa re ntlo ee e tla ba joaloka Shilo ’me motse oo o tla ripitloa o sale o se na baahi?” Batho bohle ba bokanela Jeremia ka tlung ea Jehova.

10 Ha likhosana tsa Juda li utloa mantsoe ana, tsa tloha ka tlung ea morena* tsa ea ka tlung ea Jehova eaba li lula keiting e ncha ea ntlo ea Jehova.+ 11 Baprista le baprofeta ba re ho likhosana le ho batho kaofela: “Monna enoa o lokela ho ahloleloa lefu+ hobane o profetile hampe ka motse ona feela joalokaha le ikutloetse ka litsebe tsa lona.”+

12 Eaba Jeremia o re ho likhosana le ho batho bohle: “Ke Jehova ea nthometseng hore ke bolele molaetsa oa kahlolo oo le o utloileng mabapi le ntlo ena le motse ona.+ 13 Lokisang litsela tsa lona le mesebetsi ea lona, le mamele lentsoe la Jehova Molimo oa lona ’me Jehova o tla fetola maikutlo* ka tlokotsi eo a itseng o tla le tlisetsa eona.+ 14 Empa ha e le ’na, ke matsohong a lona. Le nketse eng kapa eng eo le bonang e nepahetse ho ea ka lona. 15 Feela le tsebe hore haeba le mpolaea, lona, motse ona hammoho le baahi ba oona, le tla ba molato hobane le bolaile motho ea se nang molato. Etsoe kannete Jehova o nthometse ho lona hore ke bue mantsoe ana ’ohle moo le ntseng le utloa.”

16 Likhosana le batho bohle ba re ho baprista le baprofeta: “Monna enoa ha a lokela ho ahloleloa lefu hobane o buile le rona lebitsong la* Jehova Molimo oa rona.”

17 Ho feta moo, ba bang ba banna ba baholo ba naha eo ba ema eaba ba re ho sechaba sohle se phuthehileng moo: 18 “Mehleng ea Ezekiase+ morena oa Juda, Mikea+ oa Moreshethe o ne a profeta ’me a re ho batho bohle ba Juda: ‘Jehova oa mabotho o re:

19 Na Morena Ezekiase oa Juda le Bajuda kaofela ba ile ba mo bolaea? Na morena ha aa ka a tšaba Jehova ’me a kopa mohau ho Jehova eaba Jehova o fetola maikutlo* ka tlokotsi eo a neng a itse o tla ba tlisetsa eona?+ Le rona re mothating oa ho ipakela tlokotsi e kholo.

20 Hape ho ne ho e-na le monna e mong e leng Uria mora oa Shemaia oa Kiriathe-jearime,+ ea neng a profeta ka lebitso la Jehova. O ile a profeta ka motse ona le naha ena ka mantsoe a tšoanang le a Jeremia. 21 Morena Jojakime,+ banna bohle ba hae ba matla le likhosana tsohle tsa utloa mantsoe a hae eaba morena o batla ho mo bolaea.+ Ha Uria a utloela ka taba ena, hang-hang a tšoha eaba o balehela Egepeta. 22 Morena Jojakime o ile a roma Elnathane+ mora oa Akbore le banna ba bang Egepeta. 23 Ba lata Uria Egepeta, ba mo tlisa ho Morena Jojakime ea ileng a mo bolaea ka sabole+ ’me a lahlela setopo sa hae mabitleng a bafutsana.”

24 Akikame+ mora oa Shafane+ o ile a sireletsa Jeremia, ke kahoo Jeremia a sa kang a nehelloa sechaba hore se mo bolaee.+