Jobo
1 Ho ne ho e-na le monna ea bitsoang Jobo*+ ea lulang naheng ea Utse. E ne e le monna ea lokileng le ea tšepahalang.+ O ne a tšaba Molimo a bile a hloile lintho tse mpe.+ 2 O ne a e-na le bara ba supileng le barali ba bararo, 3 a e-na le linku tse 7 000, likamele tse 3 000, likhomo tse 1 000* le litonki* tse 500. Hape o ne a e-na le basebeletsi ba bangata. E ne e le monna ea ruileng, ea hlomphehang ka ho fetisisa ho baahi bohle ba Bochabela.
4 Bara ba hae ba ne ba tloaetse ho etsa mokete, e mong le e mong ha hae ka letsatsi leo a ikhethetseng lona. Ba ne ba mema likhaitseli tsa bona tse tharo hore li tl’o ja le ho noa le bona. 5 Ha matsatsi a mokete a fela, Jobo o ne a bitsa bana ba hae e le hore a tl’o ba hloekisa. O ne a tsoha esale hoseng ’me a etsetsa e mong le e mong sehlabelo sa secheso+ hobane o ne a re: “Mohlomong bana ba ka ba entse sebe ’me ba rohakile Molimo ka lipelong tsa bona.” Jobo o ne a etsa joalo kamehla.+
6 E ne e le letsatsi la hore bara ba Molimo oa ’nete*+ ba tle ka pel’a Jehova+ eaba Satane+ o kena le bona.+
7 Jehova a re ho Satane: “U tsoa hokae?” Satane a araba Jehova a re: “Ke tsoa solla lefatšeng le ho tsamaea ho lona.”+ 8 Jehova a boela a re ho Satane: “Na u hlokometse* hore ha ho motho ea tšoanang le mohlanka oa ka Jobo? Ke monna ea lokileng le ea tšepahalang,+ o tšaba Molimo ebile o hloile lintho tse mpe.” 9 Satane a re ho Jehova: “Ha ho ne ho se na letho leo u le fang Jobo, na o ne a tla ’ne a u tšabe?+ 10 Na ha se ’nete hore u sirelelitse lelapa la hae+ le lintho tsohle tseo a nang le tsona? U atlehisitse mosebetsi oohle oa hae+ le liphoofolo tsa hae li tletse hohle lefatšeng. 11 Empa hanngoe feela, ak’u nke ntho e ’ngoe le e ’ngoe eo a nang le eona ’me u bone hore na a ke ke a u rohaka sefahla-mahlo.” 12 Jehova a re ho Satane: “Etsa seo u se batlang ka lintho tseo a nang le tsona. Empa eena u se ke oa mo etsa letho.” Ka mor’a moo, Satane a tloha ka pel’a* Jehova.+
13 Letsatsing leo ka lona bara ba Jobo le barali ba hae ba neng ba ja le ho noa veine ka tlung ea abuti oa bona e moholo,+ 14 moromuoa a fihla a re ho Jobo: “Ha likhomo tsa hao li ntse li lema le litonki li fula pel’a tsona, 15 Basabea ba ile ba re hlasela ’me ba li nka eaba ba bolaea bahlanka ka sabole. Ke ’na feela ea phonyohileng ’me ke tlile ho tla u joetsa.”
16 Ha moromuoa oa pele a ntse a bua, oa bobeli a fihla a re: “Mollo oa Molimo* o tsoang maholimong o chesitse linku le bahlanka ba hao. Ke ’na feela ea phonyohileng ’me ke tlile ho tla u joetsa.”
17 Ha moromuoa oa bobeli a ntse a bua, oa boraro a fihla ’me a re ho Jobo: “Lihlopha tse tharo tsa Bakalde+ li ile tsa fihla tsa nka likamele tsa ba tsa bolaea bahlanka ba hao ka sabole. Ke ’na feela ea phonyohileng ’me ke tlile ho tla u joetsa.”
18 Ha moromuoa oa boraro a ntse a bua, oa bone a fihla ’me a re ho Jobo: “Ha bara le barali ba hao ba ntse ba ja ’me ba noa ha abuti oa bona e moholo, 19 ho ile ha fihla moea o matla o hlahang lefeelleng re sa lebella. O ile oa sisinya lik’hona tse ’nè tsa ntlo hoo e ileng ea oela bana ba hao holimo eaba baa shoa. Ke ’na feela ea phonyohileng ’me ke tlile ho tla u joetsa.”
20 Hang-hang Jobo a ema ’me a tabola seaparo sa hae, a kuta moriri eaba oa khumama 21 o re:
Jehova o fane+ ’me Jehova o nkile.
Lebitso la Jehova le ke le tsoele pele ho rorisoa.”
22 Ho sa tsotellehe lintho tsena tse mo etsahaletseng, Jobo ha aa ka a etsa sebe kapa a beha Molimo molato.*