Jeremia
35 Jehova a bua le ’na Jeremia mehleng ea Jojakime+ mora oa Josiase, morena oa Juda a re: 2 “E-ea lapeng la Barekabe,+ u bue le bona ’me u ba tlise ka tlung ea Jehova, ho e ’ngoe ea likamore tsa ho jela ebe u ba fa veine hore ba noe.”
3 Kahoo, ka tlisa mora oa Jeremia e leng Jazania setloholo sa Habazinia, bana babo, bara bohle ba hae le lelapa lohle la Barekabe 4 ka tlung ea Jehova. Eaba ke ba bitsetsa ka kamoreng ea ho jela ea bara ba Hanane mora oa Igdalia, mohlanka oa Molimo oa ’nete. Kamore eo e ne e le pel’a kamore ea ho jela ea likhosana e ka holim’a kamore ea ho jela ea Maseia mora oa Shalume molebeli oa monyako. 5 Ka beha mabekere le lijana* tse tletseng veine ka pel’a bara ba Barekabe eaba ke re ho bona: “Noang veine ke ena.”
6 Empa ba re: “Re ke ke ra noa veine hobane Jehonadabe*+ mora oa Rekabe, moholo-holo oa rona, o laetse hore rona kapa bara ba rona, re se ke ra noa veine ho hang. 7 O itse re se ke ra haha matlo, ra jala peo, ra lema lirapa tsa morara kapa hona ho ba le tsona empa re ’ne re lule litenteng e le hore re phele nako e telele naheng eo re lulang ho eona re le balichaba. 8 Kahoo, ha re noe veine ho hang, rona, basali ba rona, bara le barali ba rona hobane re mamela Jehonadabe mora oa moholo-holo oa rona Rekabe nthong e ’ngoe le e ’ngoe eo a re laetseng eona. 9 Hape ha re hahe matlo ao re ka lulang ho ’ona, ha re jale peo, ha re be le lirapa tsa morara kapa masimo. 10 Re ntse re lula litenteng ’me re mamela lintho tsohle tseo moholo-holo oa rona Jehonadabe* a re laetseng tsona. 11 Empa ha Morena Nebukadnezare* oa Babilona a futuhela naha ena,+ ra re: ‘Tloong, re eeng Jerusalema re balehe lebotho la sesole la Bakalde le la Basiria.’ Joale re se re lula Jerusalema.”
12 Jehova a re ho Jeremia: 13 “ ’Na Jehova oa mabotho, Molimo oa Iseraele, ke re: ‘E-ea ’me u re ho batho ba Juda le ho baahi ba Jerusalema: “Na ha kea le kopa ka makhetlo hore le ’mamele?”+ ke Jehova ea chong. 14 “Jehonadabe mora oa Rekabe o laetse bana ba hae hore ba se ke ba noa veine ’me ba phethile mantsoe a hae ka hore ba se ke ba noa ho fihlela letsatsing lena. Kahoo, ba mametse taelo ea moholo-holo oa bona.+ Leha ho le joalo, ’na ke buile le lona ka makhetlo* empa ha lea ka la ’mamela.+ 15 Ka le romela bahlanka bohle ba ka ba baprofeta, ke ba romela ka makhetlo-khetlo*+ ke re: ‘Ke kopa e mong le e mong oa lona a furalle litsela tsa hae tse mpe+ ’me a etse lintho tse nepahetseng. Le se ke la latela melimo e meng kapa la e sebeletsa. Ha le ka ’mamela le tla ’ne le lule naheng eo ke e fileng lona le baholo-holo ba lona.’+ Empa ha lea ka la ’mamela kapa la ntšekehela tsebe. 16 Bana ba Jehonadabe mora oa Rekabe ba phethile taelo eo moholo-holo oa bona+ a ba fileng eona empa sechaba sena sona ha sea ’mamela.”’
17 Jehova, Molimo oa mabotho, Molimo oa Iseraele o re: ‘Kahoo, ke tlisetsa Juda le baahi bohle ba Jerusalema tlokotsi eohle eo ke ba lemositseng ka eona+ hobane ke buile le bona empa ha baa ka ba ’mamela, ka ’na ka ba bitsa empa ha baa ka ba nkaraba.’”+
18 Eaba Jeremia o re ho lelapa la Barekabe: “Jehova oa mabotho, Molimo oa Iseraele o re: ‘Kaha le mametse taelo ea Jehonadabe moholo-holo oa lona ’me le ntse le boloka litaelo tsohle tsa hae le ho phetha hantle lintho tseo a le laetseng tsona, 19 Jehova oa mabotho, Molimo oa Iseraele, o re: “Ho tla lula ho e-na le ngoana oa Jehonadabe* mora oa Rekabe ea ntšebeletsang.”’”