Ezekiele

43 O ile a nkisa keiting e shebileng ka bochabela.+ 2 Ha ke le moo, ka bona khanya ea Molimo oa Iseraele e hlaha ka bochabela,+ molumo oa lentsoe la hae o ne o le joaloka molumo oa metsi a mangata+ ’me lefatše le ile la tlala khanya ea hae.+ 3 Pono ena e ne e tšoana le pono eo ke ileng ka e bona ha ke ne ke* tl’o felisa motse, e ne e tšoana le ntho eo ke ileng ka e bona nokeng ea Kebare.+ Ke ile ka khumama fatše ke inamisitse hlooho.

4 Khanya ea Jehova e ile ea kena ka tempeleng* ka keiti e shebileng ka bochabela.+ 5 Moea* o ile oa nkuka oa nkisa lebaleng le ka hare, ka bona tempele e tletse khanya ea Jehova.+ 6 Ka utloa motho a bua le ’na a le ka tempeleng eaba motho eo oa tla ’me o ema pel’a ka.+ 7 O ile a re ho ’na:

“Mor’a motho, sena ke sebaka sa terone ea ka+ le seo ke behang maoto a ka ho sona,+ ke moo ke tla lula teng har’a sechaba sa Iseraele ka ho sa feleng.+ Baiseraele le marena a bona ha ba sa tla hlola ba silafatsa lebitso la ka le halalelang+ ka ho se ntšepahalle* le ka litopo tsa marena a bona. 8 Ba ile ba beha monyako oa bona pel’a monyako oa ka le kosene ea monyako oa bona pel’a kosene ea monyako oa ka e le hore ho be le lebota feela lipakeng tsa ka le bona.+ Ba ile ba silafatsa lebitso la ka le halalelang ka lintho tse nyonyehang tseo ba neng ba li etsa. Kahoo, ke ile ka ba felisa ke halefile.+ 9 Ba ke ba khaotse ho se ntšepahalle ba be ba tlose litopo tsa marena a bona ba li ise hole le ’na ’me ke tla lula har’a bona ka ho sa feleng.+

10 Mor’a motho, hlalosetsa Baiseraele hore na tempele e entsoe joang+ e le hore ba tle ba soabele liphoso tsa bona.+ Ba lokela ho ithuta hore na e entsoe joang.* 11 Haeba ba soabela lintho tsohle tseo ba li entseng, u lokela ho ba bontša polane ea motheo oa tempele, tsela eo e entsoeng ka eona le menyako ea eona e tsoang le e kenang.+ U ba bontše melao le litaelo tsa polane eohle ea motheo, u li ngole fatše ba ntse ba u bona e le hore ba ka li mamela le ho li latela.+ 12 Ona ke molao oa tempele. Sebaka sohle se potolohileng karolo e ka holimo ea thaba ke sona se halalelang ka ho fetisisa.+ Ona ke molao oa tempele.

13 Tsena ke litekanyo tsa aletare ka limithara*+ (halofong e ’ngoe le e ’ngoe ea mithara* ho ile ha eketsoa tekanyo ea bophara ba seatla).* Karolo e ka tlase ea eona e ne e ka ba halofo ea mithara le bophara ba eona e ka ba halofo ea mithara. E ne e e-na le moeli ho potoloha karolo e ka thoko ’me o ne o ka etsa bophara ba lisenthimithara tse ka bang 22.* Ena ke karolo e ka tlase ea aletare. 14 Ho tloha karolong e ka tlase ho ea sethaleng sa pele se potolohileng, e ne e ka ba ka holimonyana ho mithara* ’me bophara ba eona e ka ba halofo ea mithara.* Ho tloha sethaleng se senyenyane se e potolohileng ho ea sethaleng se seholo se e potolohileng, e ne e ka ba limithara tse ka holimonyana ho tse peli* ’me bophara ba eona e ka ba halofo ea mithara.* 15 Leifo la aletare le ne le le bophahamo ba limithara tse ka holimonyana ho tse peli* ebile le e-na le manaka a mane a shebileng holimo.+ 16 Leifo la aletare le ne le e-na le mahlakore a mane a lekanang, bolelele ba lona e le limithara tse ka holimonyana ho tse tšeletseng* le bophara ba lona e le limithara tse ka holimonyana ho tse tšeletseng.*+ 17 Mahlakore a mane a potolohileng sethala a ne a le bolelele ba limithara tse ka holimonyana ho tse supileng* le bophara ba limithara tse ka holimonyana ho tse supileng,* moeli o se potolohileng e ne e ka ba lisenthimithara tse 26* le mahlakore ’ohle a karolo ea sona e ka tlase e ka ba halofo ea mithara.*

“Litepisi tsa sona li ne li shebile ka bochabela.”

18 A re ho ’na: “Mor’a motho, Jehova ’Musi oa Lintho Tsohle o re: ‘Tsena ke litaelo tse lokelang ho lateloa ha ho etsoa aletare e le hore ho etsetsoe linyehelo tsa secheso ho eona ho be ho fafatsoe mali ho eona.’+

19 ‘U fane ka pohoana e tsoang mohlapeng e le nyehelo ea sebe+ ho baprista ba Balevi bao e leng litloholo tsa Tsadoke+ ba tlang ka pel’a ka ho tla ntšebeletsa,’ ke Jehova ’Musi oa Lintho Tsohle ea chong. 20 U nke a mang a mali a eona u a tlotse manakeng a mane a aletare, lik’honeng tse ’nè tse potolohileng sethala le ho potoloha moeli e le ho hloekisa aletare sebeng le ho e etsetsa sehlabelo sa ho tšoareloa libe.+ 21 Ka mor’a moo, u nke pohoana ea nyehelo ea sebe e le hore e chesetsoe sebakeng se khethiloeng sa tempele, ka ntle ho sehalalelo.+ 22 Ka letsatsi la bobeli, u fane ka phooko* e phetseng hantle e le nyehelo ea sebe. Baprista ba tla hloekisa aletare sebeng joalokaha ba ile ba e hloekisa sebeng ka pohoana.’

23 Ha u qeta ho e hloekisa sebeng, u nyehele pohoana e phetseng hantle le ramo e phetseng hantle ho tsoa mohlapeng. 24 U li hlahise ka pel’a Jehova ’me baprista ba li tšele ka letsoai+ ebe ba li nyehela e le nyehelo ea secheso e feletseng ho Jehova. 25 Letsatsi le leng le le leng ka matsatsi a supileng, u fane ka phooko e le nyehelo ea sebe+ hammoho le pohoana le ramo e tsoang mohlapeng, e be tse phetseng hantle.* 26 Baprista ba tla etsetsa aletare sehlabelo sa tšoarelo ea libe ka matsatsi a supileng, ba tla e hloekisa ba be ba e lokisetse ho sebelisoa. 27 Ha matsatsi ao a fetile, ka letsatsi la borobeli,+ baprista ba tla etsa linyehelo aletareng ka linyehelo tsa lona tsa secheso tse feletseng le mahlabelo a kopanetsoeng ’me le tla nthabisa,+ ke Jehova ’Musi oa Lintho Tsohle ea chong.”